10
Jesús ndac̈ho de ixin xí que dac̈hjendehe c̈hihi
(Mt. 19.1‑12; Lc. 16.18)
1 Jesús vac̈hjexin de ngain rajna Capernaum, co sacjoi para ngain regioen Judea co ngain región que jí toenxin río Jordán. Nttiha cjan ẍatte chojni ngain Jesús iná, co jehe joinchecoenhe chojni nttiha inchin jehe vanchehe ngain cain lugar.
2 Cottimeja conchienhe canxion xifariseo ngain Jesús para rrojinchenichja xa Jesús ná cosa nchaoha para que nchao rrocjanguihi xa. Co joanchianguihi xa Jesús ixin anchao ná xí sac̈hjendehe xa c̈hihi xa.
3 Cottimeja Jesús ndac̈ho ngain xa:
―¿Quehe coetonha ley que vayé Moisés?
4 Cottimeja jehe xa ndac̈ho xa:
―Ley ndac̈ho ixin nchao para ná xí sinchechjian xa ná ẍón dinhi acta para sac̈hjendexin xa c̈hihi xa, co ndatsinttohe xa nc̈ha.
5 Cottimeja ndac̈ho Jesús ngain xa:
―Ley que vayé Moisés coetonha jañá ixin jaha ra atto cha ansean ra.
6 Pero are saho Dios joinchechjian cainxin cosa; co ndac̈ho ngain Palabré Dios janhi: “Dios joinchechjian chojni xí co nc̈hí.”
7 “Mexinxin xí dac̈hjendehe xa ndodé xa co janné xa para decao xa jeho c̈hihi xa.
8 Co cayoixin chojni mé dintte na inchin nacoaxinxon chojni.” Jañá ijeha yó chojni, jeho nacoa chojni.
9 Mexinxin chojni c̈hoha santsjendehe cosa que Dios joinchechjian inchin nacoa.
10 Cottimeja are sacjan na ngain nchia, chojni que vacao Jesús joanchiangui na ngain jehe ixin cosa yá.
11 Co Jesús ndac̈ho ngain na:
―Si ná xí sac̈hjendehe xa c̈hihi xa co secao xa iná nc̈hí, anto jianha sinchehe xí mé ngain c̈hihi xa nc̈hisaho. Ixin rroc̈ho que xí mé jicao xa yó nc̈hí.
12 Co si ná nc̈hí sac̈hjendehe nc̈ha xixihi nc̈ha co secao nc̈ha iná xí, cai nc̈hí mé jianha sinchehe nc̈ha ngain xixihi nc̈ha xisaho. Ixin rroc̈ho que nc̈hí mé jicao nc̈ha yó xí.
Jesús joinchenchaon xannchinnchinchjan
(Mt. 19.13‑15; Lc. 18.15‑17)
13 Cottimeja joiaho na xannchinnchinchjenhe na ngain Jesús para catte xan conixin rá. Pero chojni que vacao Jesús joinchesattehe na cain chojni que joicao cain chjan mé.
14 Co are Jesús vicon yá, goñao co ndac̈ho:
―Tanc̈hjanda ra xannchinnchinchjan tsí xan nganji; cayacoenha ra xan. Ixin tti ttetonha Dios, nttiha para cain chojni inchin jehe xan.
15 Janha seguro rrondattjo ra que tti chojni que sitticaonha tti ttetonha Dios inchin ná xannchinchjan ditticaon xan tti ttetonhe xan nindoha xan, chojni mé ẍonhi tiempo rrochonda parte ngain tti ttetonha Dios.
16 Cottimeja Jesús cjóa xannchinnchinchjan mé, co vaquehe rá ngataha xan co joinchetsenhe ñao Dios ixin sinchenchaon xan.
Ná xanxí rico cjoao xan Jesús
(Mt. 19.16‑30; Lc. 18.18‑30)
17 Ná nchanho are Jesús sajittji ngatja nttiha, ná xanxí coinga xan joí xan vettoxin nttajochjihi xan ngain Jesús co ndac̈ho xan:
―Maestro, soixin que anto jian, ¿quehe chonda que sinttaha janha para nchao rrochonda iná vida naroaxin que ẍonhi tiempo tsjexin?
18 Jesús ndac̈ho:
―¿Quedonda ncheguinhi na janha jian? ẍonhi iná tti icha jian, jeho nacoaxinxon, co mé jehe Dios.
19 Jaha ochonxin tti coetonha Dios inchin: “Ncheyeha c̈hihi iná tattíta, dantsjeha vidé iná chojni, tteha cosé iná chojni, nichjaha cosa que ndoaha de iná chojni, ncheyeha icha chojni, co ttjiho respeto ngain ndodá co ngain janná.”
20 Cottimeja xanxí mé ndac̈ho xan:
―Maestro, cain yá ojointtaha de ẍa nchín na.
21 Are Jesús tsjehe, jehe joinao xanxí mé co ndac̈ho ngain xan:
―Jeho nacoa cosa ditján sinchehe. Ttji co nchecji cainxin tti chonda co nchettonhe chojni noa tomi. Cottimeja nttiha ngajni jaha rrochonda cosa icha rentte. Cottimeja sihi co sacjin na tti janha sacji masqui anto tangui tsonha hasta ndasenhe.
22 Pero are coinhi xan cain yá, anto vechín xan sacjoi xan ixin jehe xan anto rico vehe xan.
23 Cottimeja Jesús tsjehe ngayé chojni que vacao co ndac̈ho ngain na:
―Atto tangui para ná chojni que chonda anto tsje cosa rrochonda parte ngain tti ttetonha Dios.
24 Co chojni que vacao Jesús goan na admirado de ixin tti nichja Jesús. Pero Jesús cjan ndac̈ho ngain na iná:
―Chojni que chonda confianza que ixin tomi tsjenguijna na, ¡anto tangui para jehe na rrochonda na parte ngain tti ttetonha Dios!
25 Icha tanguiha sattoxinhi ná cocamello ná ttoechjenhe nttachiehe manta que para ná chojni rico rrochonda parte ngain tti ttetonha Dios.
26 Co are coinhi na yá, icha goan na admirado co joanchianguihi chó jeho na co ndac̈ho na:
―¿Mexinxin quensen nchao rrochonda iná vida naroaxin remé?
27 Jesús tsjehe ngain na co ndac̈ho:
―Chojni c̈hoha sinchehe jamé, pero Dios nchao sinchehe yá, ixin para Dios ẍonhi cosa tangui.
28 Cottimeja Pedro ndac̈ho ngain Jesús:
―Janha na cointtoa na cainxin tti vechonda na para c̈hji na nganji soixin.
29 Jesús ndac̈ho:
―Janha seguro rrondattjo ra ixin quexeho chojni que ttinttohe nchiandoha, o xanchó, o ndodé, o janné, o c̈hihi, o xenhe, o nonttehe de ixin causananxin janha co de ixin causexin joajna que danjo vida naroaxin,
30 chojni mé sayé cien nttiha icha tsje ngain tiempo jihi inchin nchiandoha, co xanchó, co ndodé, co janné, co xenhe, co nonttehe, masqui tsje chojni rroningaconhe. Co ngain nchanho que tsí sayé vida naroaxin que ẍonhi tiempo tsjexin.
31 Pero tsje chojni que jai ẍaxaon na ixin anto importante na, are mé, ẍonhi tsorentte na. Co tsje chojni que jai ẍaxaon na ixin jehe na jeha importante na, pero are mé jehe na nisintte icha importante.
Jesús cjan ndac̈ho iná ixin jehe ndasenhe
(Mt. 20.17‑19; Lc. 18.31‑34)
32 Jesús conixin tsje chojni que vacao tettji na ngatja nttiha para Jerusalén; Jesús jitaon nttiha, co chojni que vacao Jesús terroé na. Co jehe na anto tedoan na admirado, co terroé na pero conixin joaẍaon. Co Jesús ngaria co vac̈hjendacaho tti tteyó chojni que vacao de ngayé icha chojni para ndache na quehe tsonhe jehe.
33 Co ndac̈ho Jesús ngain na:
―Inchin jaha ra tedicon ra, jaxon satettjin na para Jerusalén. Nttiha janha, tti Xí que joixin de ngajni, sinchechienhe na na ngain xidána que ttetonha ngain icha xidána co ngain ximaestroe ley Israel, co nimé ni rrondac̈ho que ixin janha nasenxon na. Co sanjo na na janha ngain xí de ojé nontte,
34 co jehe xa tsjanoa na xa janha, co rroẍanguihna na cuarta de roa, co tsjatjo na xa nttatté xa co nasoenxon na xa. Pero ngain nchanho ninxin janha rroxechon na.
Tti joanchia Jacobo co Juan
(Mt. 20.20‑28)
35 Cottimeja Jacobo co Juan, cayoi xenhe Zebedeo, conchienhe na ngain Jesús co ndac̈ho na:
―Maestro, ná joatotsenhe ñaho na sanchia na nganji.
36 Cottimeja Jesús ndac̈ho:
―¿Quehe rinao ra?
37 Co jehe na ndac̈ho na:
―Nttatsanha ra ñao are soixin sayé joachaxin de tsetonha cainxin cosa, que janha na sintte na nganji, ná na lado jian, co ná na lado cjon.
38 Cottimeja Jesús ndac̈ho ngain na:
―Jaha ra noaha ra tti danchia ra. ¿Anchao tsonha ra tti anto tangui que janha tsonna, co anchao ndasenhe ra inchin janha ndasenhe na?
39 Co jehe na ndac̈ho na:
―Ján, nchao.
Co Jesús ndac̈ho ngain na:
―Ján, ndoa, anto tangui tsonha ra, co senhe ra inchin janha senhe na.
40 Pero jeha janha tti danjo joachaxin ixin quensen sehe lado jian na co quensen sehe lado cjon na. Jeho Ndodana tti danjo joachaxin mé ngain quexeho chojni que jehe ochonxin.
41 Are coinhi tti itte chojni que vacao Jesús ixin quehe joanchia Jacobo co Juan, anto goñao na nganji cayoi.
42 Pero Jesús nichjé na co ndac̈ho ngain na:
―Jaha ra noha ra que cain xí que ttetonha ngain nación, ttetonha xa inchin rinao xa, co cain icha xí que chonda joachaxin nttiha anto ttetonha xa ngain chojni.
43 Pero jeha jamé tsonhe ngayaha ra, sino que tti rinao icha tsetonha ngayaha ra, pero mé chonda que icha tsjenguijna icha chojni.
44 Co quexeho de jaha ra ẍo rinao ra sintte ra icha importante, pero jehe mé cai chonda que sehe inchin esclavo para ngain icha chojni.
45 Ixin janha, tti Xí que joixin de ngajni, joiha para que chojni sinchehe ẍana, sino que janha joihi para joicjenguijna chojni co para sanjo vidana para tsjenga hna tti teca tsje chojni.
Jesús joinchexingamehe Bartimeo, tti vaguiconha
(Mt. 20.29‑34; Lc. 18.35‑43)
46 Cottimeja Jesús conixin chojni que vacao joiji na ngain ciudad de Jericó. Co are Jesús conixin chojni que vacao co anto tsje icha chojni vac̈hjegaxin na de ciudad mé, vicon na ngandehe nttiha tají ná xí vaganchiagaha ixin vaguiconha. Co tattíta mé vinhi Bartimeo, xenhe ná tti vinhi Timeo.
47 Co are conohe que ochian jidiji Jesús que joixin Nazaret, jehe tti vaguiconha mé coexinhi ndac̈ho sén:
―¡Jesús, tti razé David, ttiaconoana na janha!
48 Anto tsje chojni joinchesattehe na ixin rrotencoa, pero jehe ndac̈ho icha sén:
―¡Soixin, razé David, ttiaconoana na janha!
49 Cottimeja Jesús tavengattjen co ndac̈ho:
―Dayehe ra xí yá.
Cottimeja jehe na vayé na xa co ndac̈ho na:
―Taha joachjaon co dingattjen ixin Jesús jidayaha jaha.
50 Cottimeja jehe tti vaguiconha mé nttihao vanca tti jitsá co vingattjen daca co conchienhe ngain Jesús.
51 Cottimeja ndac̈ho Jesús ngain:
―¿Quehe rinao sinttaha nganji?
Jehe tti vaguiconha ndac̈ho:
―Maestro, janha rinaho sicon.
52 Co Jesús ndac̈ho:
―Oxingamehe con ixin vitticaon nganji janha. Co onchao sattji nchiandoi.
Co rato mé jehe tti vaguiconha mé onchao vicon co rroé Jesús tti sacjoi Jesús.