11
Jesús joigaha ciudad de Jerusalén
(Mt. 21.1‑11; Lc. 19.28‑40; Jn. 12.12‑19)
Después joiji na ngandehe rajna Betfagé co rajna Betania que te chian Jerusalén co nttiha tavintte na rotté jnanchjan dinhi Nttaolivo. Nttiha Jesús coetonhe yó chojni que vacao jehe co ndac̈ho ngain na:
―Ttji ra ngain rajnanchjan taha. Yá sinchí ra ná colocho jic̈hoa co ẍa ẍonhi chojni diguetaha va. Tonxindanguehe ra va co sicó ra va. Co si c̈honja chojni sanchianguiha ra ixin quedonda jañá tenchehe ra, ndache ra na ixin ximaestroa ra rrogondehe xa va; cottimeja sicán ra va.
Cottimeja sacjoi cayoi chojni mé co vittja na colocho tajic̈hoa va ngain ná puerté nchia ngaxin nttiha, co conxindanguehe na va.
Co icanxin chojni que te nttiha ndac̈ho na:
―¿Quehe tenchehe ra yá? ¿Quedonda tonxindanguehe ra colocho yá?
Co cayoi na ndac̈ho na inchin ondac̈ho Jesús ngain na. Co chojni que te nttiha coanc̈hjanda na na sacjoi na conixin colocho. Cottimeja joicao na colocho mé ngain Jesús co cjoanjihi na va tti tetsá na co Jesús vetaha va. Co anto tsje chojni coingo na ngá nttiha tti tetsá na co icanxin na coingo na ramanchjenhe nttá para conchjian chaho tti coingachje colochohe Jesús.
Co chojni que vitaonhe Jesús nttiha co chojni que rroé Jesús, cainxin na ndac̈ho na sén:
―¡Gloria ngain Dios! Co anto jian tti joí conixin nombré Dios. 10 ¡Co anto jian tti siquetonha inchin coetonha David ndogoelitoa na ẍanc̈hjen! ¡Gloria ngain Dios!
11 Jañá joigaha Jesús ngain ciudad de Jerusalén co joixinhi nihngo icha importante nttiha. Co are joexin tsjehe Jesús cainxin cosa nttiha, sacjan Jesús para ngain rajna dinhi Betania conixin tti tteyó chojni que vacao, ixin ondacotsocjin.
Jesús nichja ngain nttahigo que ẍonhi ttochjoin jiyá
(Mt. 21.18‑19)
12 Nchanho yoxin are vac̈hjexin na de Betania, Jesús venhe jintta. 13 Co de cjin viconxin Jesús ná nttahigo que jiyá ntta ca co Jesús joitsjehe ntta ixin ayá ntta ttohigo. Pero vittjaha Jesús ni ná tto ixin ẍa jeha tiempoe tto. 14 Cottimeja Jesús ndac̈ho ngain nttahigo mé:
―Ẍonhi chojni rrocjan sine ttochjoian iná.
Co coinhi cain chojni que vacao Jesús.
Jesús joincheroa nihngo icha importante
(Mt. 21.12‑17; Lc. 19.45‑48; Jn. 2.13‑22)
15 Cottimeja joí na Jerusalén iná. Co are Jesús joixinhi patioe nihngo icha importante, coexinhi joantsjexin de nttiha cain chojni que tenchecji co tettehna cosa nttiha. Jesús concjamangui mesé cain tti tedasinguixinhi icha chojni tomi para rrochondaxin na suelto, co concjamangui nttaxitaoen cain tti tenchecji conttoanajni. 16 Co iẍonhi chojni coanc̈hjanda Jesús para coattoa na patioe nihngo mé conixin cosé na. 17 Co Jesús joinchecoenhe na co ndac̈ho ngain cain na:
―Jitaxin ngain Palabré Dios: “Nchiania sehe nchia para sinchecoanxinna na janha chojni de ngoixin mundo.” Pero jaha ra ndadinchechjian ra nchia ná lugar tti ẍatte tti chehe.
18 Co cain xidána que ttetonha ngain icha xidána co cain ximaestroe ley coinhi xa quehe ndac̈ho Jesús, co joincheẍoxinha xa. Mexinxin coexinhi xa cjoé xa queẍén sinchehe xa para nasoenxon xa Jesús. Pero vaẍaon xa ixin cainxin chojni tiempo mé joincheẍoxinhi na cainxin tti cjoago Jesús. 19 Co are ondaconaxin xehe, Jesús sacjoixin de ngain ciudad mé.
Nttahigo que ndadixema
(Mt. 21.20‑22)
20 Co ndoexin dacao vatto na tti jí nttahigo que Jesús nichjé. Co vicon na ondadixema ngoixin ntta. 21 Cottimeja Pedro ẍaxaon quehe ndac̈ho Jesús co ndache Jesús:
―Maestro, tsjexin, nttahigo que nichjehe, ondadixema ntta.
22 Co Jesús ndac̈ho:
―Ditticaon ra seguro ngain Dios. 23 Co seguro rrondattjo ra ixin quexeho chojni que rrondache jna jimé: “Sattjixin de yá, co digaritsiahngui ndachaon”, co si chojni mé seguro ditticaon que Dios sinchehe jamé, seguro que jamé tsonhe. 24 Mexinxin ndattjo ra que are sanchia ra ná cosa ngain Dios, ditticaon ra seguro que ovayehe ra co seguro jamé tsonhe. 25 Co are tenchecoanxinhi ra Dios, si c̈honja chojni toñaohe ra, nchetjañehe ra. Jamé cai Ndodá ra que jí ngajni sinttatjañaha ra Ndo cain cosa jianha que nchehe ra. 26 Pero si jaha ra sinchetjañeha ra chojni mé, cai Ndodá ra que jí ngajni c̈hoha sinttatjañaha ra Ndo cain cosa jianha que nchehe ra.
Tti joachaxin que chonda Jesús
(Mt. 21.23‑27; Lc. 20.1‑8)
27 Cottimeja joiji na Jerusalén. Co cjoi na ngain nihngo icha importante. Co are Jesús tarridehe nttiha ngain nihngo, conchienhe ngain Jesús canxion xidána que vaquetonha ngain icha xidána co canxion ximaestroe ley co icanxin xí que ttetonha ngain nihngo. 28 Co ndac̈ho xa ngain Jesús:
―¿Quehe joachaxin chonda jaha para nchehe cain cosa jihi? ¿Quensen chjá joachaxin jihi?
29 Co Jesús ndac̈ho:
―Cai janha sanchianguiha ra ná cosa, co si rrondachjenji ni ra tti janha sanchianguiha ra, cai janha rrondattjo ra quehe joachaxin nttaxin janha cain cosa jihi. 30 Ndachjenji ni ra: ¿Quensen rroanha Juan para joincheguitte chojni? ¿A Dios o ani chojni?
31 Cottimeja coexinhi xa joanchianguihi chó jeho xa co ndache chó xa:
―¿Quehe rrondac̈ho na? Si rrondac̈ho na ixin Dios rroanha, jehe rrondattjo na: “¿Quedonda vitticaonha ra tti ndac̈ho Juan remé?” 32 ¿O apoco rrondac̈ho na ixin chojni rroanha?
Ixin vaẍagoen na chojni ixin cainxin chojni vitticaon ixin Juan vanichja joajna que vagayé de ngain Dios. 33 Mexinxin ndac̈ho na ngain Jesús:
―Nonaha na.
Cottimeja ndac̈ho Jesús ngain na:
―Mexinxin janha cai rrondattjoha ra quexehe joachaxin nttaxin cain cosa jihi.