4
Janhi tocoanxin ngajni tti ttjen Dios
Después de cain jihi, janha tsjá iná co vicon ná puerta jiẍangué ngajni co tti tté Jesucristo que nichjahna icha saho que inchin tté ná trompeta are toyao, mé ndachjenji na janha:
―Tani nttihi co tsjagoha cain cosa que chonda que siconhe después de cain jihi.
Ngain rato mé joí Espíritu Santo nganji na janha conixin anto tsje joachaxin, co janha vicon ná nttaxintaon importante jí nttiha ngajni, co ngataha nttaxintaon mé tajitaha ẍá figuré ná tti xí. Co tti jitaha nttaxintaon mé ngá con jehe anto jitonguíxin inchin ná ẍo fino que dinhi jaspe o ẍo que dinhi cornalina. Co ngandanji nttaxintaon mé jí ná conchecha que jitonguíxin inchin tti ẍo que dinhi esmeralda. Co ngandanji nttaxintaon mé janha vicon iveinticuatro nttaxintaon, co nttiha tetaha veinticuatro nittetonha que tengá na lontto roa co techjinga na corona de oro. Co de ngain tti nttaxintaon saho que janha vicon, de nttiha tedac̈hjexin ẍoí rayo co icha ruido co jidatte. Co nttiha ngain nttaxintaon mé teche yáto candil de ẍohi, que mé tti yáto espiritue Dios. Co nttiha ngaca nttaxintaon mé jí ná cosa inchin ndachaon que nchao dicondoxin ni inchin ẍoẍao.
Co ngandanji nttaxintaon mé jí nó cosa que jichon. Co cosa mé ngoixin ngama chonda jmacon de ngajinxin co notonxin. Tti saho de tti canoi cosa jihi jí inchin ná coleón. Co tti yoxin jí inchin ná coxinttá. Co tti ninxin jichonda con inchin ngá con ná xí. Co tti nonxin jí inchin ná coaguila que jitjaganga. Canoi cosa que techon mé techonda incjaon nenechán cada. Co ngoixin ngama co ngaxinhi techonda jmacon; de ttie co de nchanho joxon tendac̈ho:
Santo, santo, santo,
Dios, soixin que chonda cainxin joachaxin,
soixin tti Dios que varihi desde are saho, co rrihi jai, co soixin tti sihi iná.
Co cada nttiha que jehe tti canoi cosa que techon nchesayehe co danjo gracias ngain jehe tti jitaha nttaxintaon icha importante, tti jichon para cainxin tiempo, 10 cada nttiha mé tti veinticuatro nittetonha dinttettoxin nttajochjihi na ngain jehe tti jichon para cainxin tiempo, co ttín na coroné na nttiha ngaca nttaxintaon mé, co ndac̈ho na:
11 Soixin tti Dios na na janha na, soixin tti jiquininxin
cainxin gloria, co jiquininxin tosayaha co cainxin joachaxin;
ixin soixin tti joinchechjian cainxin cosa,
co ixin soixin jamé joinao, mé texin co conchjianxin cainxin cosa.