21
Ngajní natjúá ko nunte natjúá
1 *Tjumeꞌe bikon naa ngajní ko naa nunte natjúá ixi ngajní ko nunte saꞌó bakeꞌe ó tsikitjáña ko ndachaon íkoꞌa kaxon.
2 *Janꞌan Juan bikon naa tjajna ijié ko tjúá, meꞌe tjajna Jerusalén natjúá, xingajinxin ngajní kui̱xi̱n ti jii ndo Dio, ko kain sen tjajna meꞌe tsikonchjian sen xranchi naa nchrichajan tsuteꞌe, tsango chaxro tsikitsojin nchrichan ixi tsi̱i̱ ndo tsuteꞌe nchrichan.
3 Tjumeꞌe kui̱nꞌa̱n séen nichja naa tée sen kui̱xi̱n ngajní ko ndachro:
―Ndo Dio jii ndo ti ste chujnie ndo, ko jeꞌe ndo tsekao ndo sen ko jeꞌe sen xrokjan sen tjajnée ndo ko jeꞌe ndo ndo Dio tikinixinꞌen sen.
4 Jeꞌe ndo tsoni ndo ndakon sen ko nchakon meꞌe xruanꞌan ngisen tsenꞌen, ko xruanꞌan ngisen xrotsjanga, ko tsoníeꞌa sen ko xruanꞌan juachjaon xrochónda sen ixi kain ngeꞌe konꞌen saꞌó ó juexin kuatsinga.
5 Ko ndo jitaꞌa trono ndachro ndo:
―Janꞌan ntakonchjian kain ngeꞌe natjúá.
Ko kaxon ndachro ndo:
―Ikjian jiꞌi ixi jiꞌi chijni nduaxin, chijni chao tsitikaon chujni.
6 Tjumeꞌe ndachro ndo:
―Kain ngeꞌe ó juexin konꞌen. Janꞌan ndo xrangíxixión kain ngeꞌe ko janꞌan ndo tsjexixin kain ngeꞌe, xranchi letra xrangíxixín letra Á ko letra tjexixín letra Zeta. Ngisen kuenꞌen inda, janꞌan xrotjáꞌa sen inda tsiꞌi sen, ko inda tajon janꞌan meꞌe tsechónxin sen ko xroꞌan ngeꞌe tsjenga sen ꞌna̱.
7 Ngisen tsjacha tsindueꞌa xrochuntiana, janꞌan xrotjáꞌa sen kain ti jian, ko janꞌan xrokjanna ndo Dio tikinixinꞌen sen, ko jeꞌe sen xrokjan sen chjanꞌna.
8 Ko ni xronka, ni titikaonꞌa, ni ndakoꞌa ncheꞌe, ni naatóñaxón chujni, ni chónda inaa nchri o̱ inaa xi, jeꞌa janchriꞌe o̱ ndoxiꞌe, ni tajon juasaya ngajin ídolo, ni tuso ko ni ruéꞌe chin tuso, ni ncheya, kain ni meꞌe tikinixinꞌen na̱ itsji na̱ ti jii xroꞌi jichexin ixi azufre ko naiꞌa tsjexin. Jiꞌi xrondachro ti yuxin tsenꞌen chujni.
Jerusalén natjúá
9 Tjumeꞌe kui̱i̱ ndo ángel ya̱tu̱xi̱n chónda copa ya̱tu̱xi̱n jikaon ixi ichin tsjexixin tsikaon chujni ko jaꞌin ndachro ndo:
―Xrokuia tsjakoꞌa sen tsuteꞌe Xjantuchjon.
10 Tjumeꞌe bikon ixi Espíritue ndo Dio bikiꞌan naa ntajie ijié ko juakoꞌna ndo tjajna ijié, tjajna Jerusalén tjúá xingajinxin ngajní jiti̱ꞌxi̱n ti jii ndo Dio.
11 Ko tóngíxin tjajna xranchi chjiixro nchengasáña ndo Dio, tsango tóngíxin xranchi naa ixro tsango chaxro, xro jaspe chaxro tikonni xranchi xroxrao.
12 Ngandajin tjajna tsikité naa tjatuꞌo, tsango noi ko chónda teyuu nta̱chja ko ngujngu nta̱chja jii naa ndo ángel ko ntiꞌa jitaxin xranchi tinꞌin ti teyuu sen tsikachrjenixin ndo Israel.
13 Níi nta̱chja jii ndatsjonxin chjuya ko níi nta̱chja jii ndatsjonxin kuꞌe, níi nta̱chja jii ndatsjonxin retuya ko íjngo níi nta̱chja jii ndatsjonxin níjin.
14 Ko ngandajin tjatuꞌo tsikité na̱ chónda teyuu ixro jichroaxin tjatuꞌo, ko ngataꞌa ixro meꞌe jitaxin xranchi tinꞌin ti teyuu sen kuajikao Xjantuchjon.
15 Ko ndo ángel jinichjana chónda ndo naa ntakuto chika oro, jitjatichuaꞌxin ndo tjajna, ko nta̱chjeꞌe tjajna ko tjatuée tjajna.
16 Tjajna meꞌe xrajeꞌo tonxin ko jine̱xin tjajna, ko ndo ángel juatichoꞌa ndo tjajna ixi ntakuto ko chónda yuu mil ko yuu ciento kilómetro.
17 Ko juatichoꞌa ndo tjatuꞌo níi kán ko naꞌó metro noixin, xranchi tjatichuꞌa ni nunte xasintajni, jaña juatichoꞌa ndo ángel.
18 Ko ixro tsikóñaxin tjatuꞌo meꞌe ixro jaspe ko tjajna tsikóñaxin jeoxón chika oro jian, xroxrao tóngíxin oro meꞌe.
19 Ko ixro tsikiꞌtexin tjatuée tjajna meꞌe tsikitsojin ixi ixro tsango chaxro: ixro jaspe, ixro yuxin zafiro, ixro nínxin ágata ko ixro noóxin esmeralda,
20 ixro naꞌóxin ixro mármol, ixro kjaunxi̱n ixro cornalina, ko ixro ya̱tu̱xi̱n crisólito, ixro jníxin ixro berilo, ixro na̱xi̱n topacio, ko ixro texin crisopraso, ko ixro tenaá jacinto, ko ixro teyuu amatista.
21 Ko ti teyuu nta̱chja meꞌe teyuu perla kaxon, ko ngujngu nta̱chja tsikóñaxin naakua perla. Ko chaꞌo ijié chónda tjajna tsikóñaxin jeoxón chika oro, xranchi xroxrao tikontuꞌuni.
22 Ngaxinꞌin tjajna meꞌe bikonꞌa ninaa niꞌngo, ixi Ncháina ndo Dio, ndo chónda kain juachaxin, jeꞌe ndo ko Xjantuchjon jeꞌe sen meꞌe niꞌngo.
23 Ko tjajna xrokondeꞌa tjajna chjiixro ko nchanitjao tsingasáñaxin. Ixi ntiꞌa tingasáña ndo Dio ko Xjantuchjon ixi jeꞌe sen xroꞌi tingasáñaxin tjajna.
24 Ko chujnie kain nación, chujni kuayéꞌe juachaxin tsechón kain nchakon, tsaji sen ti tingasáña tjajna meꞌe, ko sen rey nunte xasintajni tsajon sen ti tjintee chónda sen.
25 Ko nta̱chjeꞌe tjajna naiꞌa tsijeꞌe̱ nta̱chja taa nchakon, ixi ntiꞌa naiꞌa tsontie.
26 Ko kain sen kain nación ntiꞌa tsikaan sen ngeꞌe chaxro kuachónda sen nunte xasintajni.
27 Ko ntiꞌa juaꞌi tixinꞌin ngeꞌe tjúáꞌi ko ti ncheya. Jeꞌo chao tixinꞌin sen jitaxin xranchi tinꞌin ngaya xroon jitaxin kain sen chónda juachaxin tsechón kain nchakon, meꞌe xroon chónda Xjantuchjon.