22
Inda jitinga tajon juachaxin tsechónni
1 Tjumeꞌe ndo ángel juakoꞌna ndo naa inda jitinga, nda tjúá, ko nda meꞌe tajon juachaxin tsechón chujni. Ko tikonni nda xranchi naa xroxrao, ko kuachrjexin inda ti jii ntachaonꞌen ndo Dio ko Xjantuchjon.
2 Ko ngusine chaꞌo ijié chónda tjajna ngujngu lado ti jitinga nda tjúá jii nta̱a̱ tajon juachaxin tsechón chujni ko ngujngu nchanitjao tajon nta̱a̱ itu, ko chaan nta̱a̱ meꞌe xro̱a̱n tsoxruenxin chujni kain nación.
3 Ko ntiꞌa íxroꞌan ngeꞌe ti ningakonꞌen ndo Dio tsakeꞌe. Ko sen ncheꞌe xrée ndo Dio tsajon sen juasie sen ti jii ntachaonꞌen ndo Dio ko tronoe Xjantuchjon ti tjajna ntiꞌa.
4 Ko jeꞌe sen tsikon sen ikon ndo Dio ko tsenito ntatjen sen xranchi tinꞌin ndo.
5 Ko ntiꞌa tsakeꞌa tiie ko í xrokondaꞌi xruie naa foco ko xruie chjiixro tsingasáñaxin ixi Ncháina ndo Dio jeꞌe ndo tsingasáña ndo, ko jeꞌe sen tsetuanꞌan sen kain nchakon.
Ko ndachro ndo Jesucristo ixi tuinxin tsi̱i̱ ndo
6 Ko ndo ángel ndachijina ndo:
―Chijni jiꞌi, chijni nduaxin, chijni xrokonda tsitikaonnta. Ko jeꞌe Ncháina, ndo Dio, ndo nchexraxaon sen nichja chijnie ndo, xruanꞌan ndo ndo angéel ndo ixi tsjako ndo ngajin sen ncheꞌe xrée ndo Dio, ngeꞌe ó taka tsonꞌen.
7 ―¡Janꞌan tuinxin tsjiꞌi!
Juaxruxin tsakeꞌe sen titikaon chijnie ndo Dio, chijni jitaxin xroon jiꞌi ko chronga ngeꞌe xrokonda tuinxin tsonꞌen.
8 Janꞌan, Juan, kui̱nꞌa̱n ko bikon jiꞌi. Ko juexin kui̱nꞌa̱n ko bikon, tjumeꞌe bakeꞌexin ntatuchiꞌin tutée ndo ángel ixi xrokuajon juasaya ngajin ndo ixi jeꞌe ndo juakoꞌna ndo kain ngeꞌe bikon.
9 Tjumeꞌe jeꞌe ndo ndachro ndo:
―Ncheꞌa jaña, ixi janꞌan kaxon ntaꞌa xrée ndo Dio xranchi jaꞌa ko xranchi sen kichuua, sen nichja chijnie ndo, ko kain sen nduaxin titikaon ti jitaxin xroon jiꞌi. Jeꞌo ndo Dio tikinixinꞌen ndo tsayéꞌe ndo juasaya.
10 Kaxon ndachijina ndo:
―Temaꞌia kain ti bikuan ko kuinꞌen, ti jitaxin xroon jiꞌi, ixi chijni kuinꞌen tuinxin tsonꞌen kain jiꞌi.
11 Tintuꞌe ni ncheꞌe ti ñaꞌi, ndancheꞌe na̱ ti ñaꞌi ko ni ndakoꞌa ncheꞌe, ntancheꞌe na̱ ti ndakoꞌa, ko sen ncheꞌe ti jian, sincheꞌe sen ícha jian, ko sen titikaon xranchi tjaun ndo Dio, ícha tsitikaon sen.
12 ―Jian tinꞌennta, janꞌan tuinxin tsjiꞌi ko tsikian kain ti tikinixin tsayéꞌe ngujngu sen xranchi ixra̱ juincheꞌe sen.
13 *Janꞌan ngisen xrangíxixín kain ngeꞌe ko ngisen tsjexixin kain ngeꞌe, xranchi letra Á xrangíxixín ko xranchi letra Zeta xrangíxixín.
14 Juaxruxin tsintee sen tsijinemá manta jitsáa sen ixi jaña xrochónda sen juachaxin tsonchjiñeꞌe sen ngajin nta̱a̱ tajon juachaxin stechón chujni, ko kaxon chao tsixixin sen nta̱chjeꞌe tjajna tjúá.
15 Ko nduja tsituꞌe chujni ñaꞌi, ti ncheꞌe xranchi kunia, ko kain chujni ruéꞌe ichin tuso, ni chónda nchri o̱ xi jeꞌa janchriꞌe o̱ ndoxiꞌe, ni naatóñaxón chujni, ni tajon juasaya ngajin ídolo ko kain ni ncheya.
16 ―Janꞌan ndo Jesús xruanꞌan ndo ángel tikinixinna ixi xrochronga ndo ngajin kain sen niꞌngo kain jiꞌi. Janꞌan kuachrjenixin ndo rey David ko janꞌan meꞌe nchanotsé tingasáña ndúyo.
17 Espíritue ndo Dio ko sen titikaon Xjantuchjon ndachro sen:
―Xrokuiinta.
Ko sen tsinꞌen kaxon xrondachro sen:
―Xrokuiinta.
Ko ngisen kuenꞌen inda tsi̱i̱ sen ko tsiꞌi sen inda tajon juachaxin tsechónni kain nchakon, ko sen tsi̱i̱ xroꞌan ngeꞌe tsjenga sen ꞌna̱.
18 Kain sen tinꞌen chijnie ndo Dio, chijni jitaxin xroon jiꞌi ko chronga ngeꞌe tsonꞌen, sintanoꞌa sen: Siá xrojan ngisen tsasintaxin inaa ngeꞌe ti jitaxinꞌa xroon jiꞌi, ndo Dio sincheniꞌe ndo sen xranchi jitaxin xroon jiꞌi.
19 Ko siá xrojan ngisen tsantsjendeꞌe xrojan chijni jitaxin xroon jiꞌi, ndo Dio sincheméꞌe ndo xranchi tinꞌin sen jitaxin xroon chónda juachaxin tsechónni kain nchakon ko tsajonꞌa ndo juachaxin tixinꞌin sen tjajna natjúá xranchi jitaxin xroon jiꞌi.
20 Ko ndo chronga chijni jiꞌi ndachro ndo:
―Ó tuinxin tsjiꞌi janꞌan.
Jaán, jaña tsonꞌen. ¡Tuinxin xrokjuiꞌinta, Ncháina Jesús!
21 Ncháina Jesucristo sintanchaonnta ndo kainnta. Jaña tsonꞌen.