42
A kum tatein Iosep
diat waan urong Aaigipto
1 Baa Iaakob i nunurai naa a wit kurong Aaigipto, i piri karom a kum natnatuna naa, “I lawaai maa muaat ki biaa ku?
2 Iaau aa walangoro taai naa a wit kurong Aaigipto. Muaat a waan ma muaat a kul paa andaat ta wit, kupi daat a lalaaun mai ma koku daat maat.”
3 Ma noina tatein Iosep diat waan urong Aaigipto kupi diat a kul paa ta wit.
4 Iaku Iaakob pa i tula Beniaamin, ia baa raa naandiaar ma Iosep, kupi in waan ungaai ma diat, maa i nuki naa kaduk ia bulung in wirua ku.
5 Io, a kum natnatun Iaakob, baa raa iaana kaai Israael, diat weur ungaai ma raa taara kaai baa diat waan na kul wit, maa a minolo ia waan paat kaai irong Kaanaan.
6 Iosep ma maa a mukmuga ko ra pia Aaigipto raap, ia baa i laana wiura wit karom a taara raap. Io, baa a kum tatena liklik diat waan paat, diat ki but keke karomi ma ra mataandiat unapia.
7 Baa Iosep i babo paa a kum tatena liklik, i babo lele wa diat maut, iaku i papaam karom diat lenbaa pa i nunura diat, ma i pirpir ma ra dekdek karom diat. I tiri diat naa, “Muaat taangawaai?” Diat baalui naa, “Miaat waan taangirong Kaanaan kupi miaat a kul paa ta utnaa na winangaan.”
8 Iosep ia babo lele wa a kum tatena liklik, iaku diat ut pa diat babo lele paai.
9 Namur i nuk paa anuna kum beberon un diat, ma i piri taan diat naa, “Muaat a kum tena babo ino! Muaat waan urin kupi muaat a babo ino anumiaat taamaan kup ta wanua baa muaat a ruk iaai!”
10 Diat baalui, “Pate, tadaaru! Miaat waan urin kupi miaat a kul ta utnaa na winangaan.
11 Miaat raap a kum natnatun raa muaana ku. Ma miaat a kum dowot na muaana, wakir a kum tena babo ino.”
12 Iosep i piri taan diat, “Muaat warwaruga! Muaat waan kupi muaat a babo ino anumiaat taamaan.”
13 Iaku diat baalui naa, “Raa noina ma rudi miaat, a kum natnatun raa muaana ot ku, baa i lalaaun u ra pia Kaanaan. A murmur lik maku kurong diaar ma ra tamaamiaat, ma raa kon miaat i maat.”
14 Iosep i piri taan diat, “Mi ut ia iaau piri taamuaat, naa muaat a kum tena babo ino.
15 Iaku din walaar muaat lenbi: U ra iaan Paraao iaau piri taamuaat, pain muaat a waan ko ra taamaan mi, tuk muaat a ben a murmur na teimuaat urin.
16 Muaat a tula wa te kon muaat, kupi in ben paa a teimuaat, ma muaat raap mi muaat a ki u ra karabus, kupi din walaar muaat baa anumuaat pirpir i lingtatuna, baa pate. Baa pate, io u ra iaan Paraao, iaau nunurai naa muaat a kum tena babo ino.”
17 Io, i waruk ta diat u ra ruma na karabus welaar ma tula bung.
18 U ra wetula bung, Iosep i piri taan diat, “Muaat a murmur anung pirpir, kupi muaat a lalaaun, kabina maa iaau burut karom God.
19 Baa muaat a kum dowot na muaana, muaat a maadek wa te kon muaat in ki na karabus, ma muaat raap muaat a waan ma muaat a lo paa ta wit kup anumuaat taara baa kuraa diat molo u ra numuaat taamaan.
20 Iaku muaat a ben taa a murmur na teimuaat karom iaau, kupi din nunurai naa anumuaat kum pirpir i dowot, ma kupi koku di aak doko muaat.” Ma diat mulaaot kupi diat a paami lenmaa.
21 Diat pirpir wetwetalaai karom diat naa, “Maia, di wakarabus daat kabina u ra kum pinapaam daat paami u ra teindaat Iosep. Daat babo ut anuna tapunuk baa i luan na maarmaari naandaat, iaku pa daat walangoroi. Lenkaai mi daat bulung daat a kariaana a dekdek.”
22 Ruben i baalu diat, “Iaau piri taamuaat naa koku muaat paam ta aakaina mangamangaan uni, iaku pa muaat walangoro iaau! Io, mi ma ia a binabaaluina di taari karom daat.”
23 Pa diat nunurai naa Iosep i walangoro lele ku aawa maa diat piri, kabina maa i pirpir karom diat ma ra pirpir Aaigipto, ma raa muaana ingen i puku a pirpir karom diat u ra pirpir Ebraaio.
24 Baa Iosep i walangoro taa anundiat kum pirpir, i tapuku paa kon diat ma i luan. Namur i tapuku balet karom diat ma i pirpir karom diat. I pilak paa Simion kon diat, ma di do koto taai namataan diat.
A kum tatein Iosep
diat waan talili urong Kaanaan
25 Iosep i wetulaa kupi din wateng taa anundiat kum bek ma ra wit, ma din ung talili taa anundiat kum kelom na maani u ra nundiat kum bek, ma din taar taa andiat kiniwa kup anundiat winawaan. Baa di aa paam raap taa a kum utnaa mi,
26 diat wakaa paa anundiat kum utnaa u ra kum dongki ma diat waan.
27 Baa diat ngo paa u ra wanua baa diat ngo aagil paa iaai u ra marum, raa kon diat i paapa anuna bek kupi in tabaara anuna dongki. I babo paa anuna kelom na maani kuraa ut naruma u ra nuna bek.
28 I piri karom a kum tatena liklik naa, “Aai, muaat baboi! Anung kelom na maani bari balet ma ia, u ra nung bek na wit.” A balaandiat i laklagon ma diat babo wetwetalaai diat ma diat dadader ma ra bunurut ma diat piri, “Aawa mi God i paami un daat?”
29 Baa diat waan paat karom a tamaandiat Iaakob irong Kaanaan, diat wapuai u ra kum utnaa raap baa i waan paat un diat. Diat piri naa,
30 “A muaana baa i naagagon raap u ra taamaan Aaigipto i pirpir dekdek aakit karom miaat, ma i takuna miaat naa miaat babo ino anundiat taamaan.
31 Iaku miaat piri karomi, ‘Miaat a kum dowot na muaana, wakir miaat a kum tena babo ino.
32 Raa noina ma rudi miaat, raa tamaamiaat ku, ma raa kon miaat i maat. A murmur taamiaat maku kurong diaar ma ra tamaamiaat irong Kaanaan.’
33 Ma a muaana baa i naagagon u ra taamaan Aaigipto i piri karom miaat, ‘Muaat a paami lenbi kupi ang nunurai naa muaat a kum dowot na muaana: Muaat a maadek taa ta teimuaat in ki min, ma muaat a lo paa ta utnaa na winangaan kup anumuaat taara baa diat molo u ra numuaat taamaan, ma muaat a waan.
34 Iaku muaat a ben taa a murmur na teimuaat urin karom iaau, kupi ang nunurai naa muaat a kum dowot na muaana, ma wakir a kum tena babo ino. Io, ang walaangalaanga wa balet a teimuaat karom muaat, ma muaat a laangalaanga kupi muaat a kul utnaa ko ra taamaan mi.’ ”
35 Namur baa diat labo anundiat kum bek na wit, diat labo aara paa balet anundiat kum kelom na maani. Baa diat ungaai ma ra tamaandiat, diat babo paa a kum kelom na maani maa, diat burut.
36 A tamaandiat Iaakob i piri taan diat naa, “Muaat ku muaat pet taa anung ru naat baa pa iaau babo diaar ma. Iosep mun ia panaai, Simion bulung panaai ma iaai, ma mi muaat nem na ben bulung Beniaamin. A kum utnaa raap mi i manong iaau.”
37 Ma Ruben i piri taan tamaana lenbi, “Un maadek taa Beniaamin u ra nung binaboura, ma iaau ang ben talili taai balet karom ui. Baa pang ben talili Beniaamin, un aak doko anung ru naat muaana.”
38 Iaku Iaakob i piri naa, “Natunglik pa in waan ungaai ma muaat. Raa tenalik mun ia maat, Beniaamin maku mi i lalaaun. Iaau aa takaana, ma baa ta utnaa in waan paat karomi u ra numuaat winawaan ma in wirua, io muaat ma maa a kabina un iaau baa ang maat ma ra tapunuk.”