12
Manetualain Dula-dale Na fee ita kuasa fo tao nonoi laka rupaꞌ ara
1 Toranoo susue kara! Au nau emi bubuluꞌ laꞌeneuꞌ kuasa ria, ma babati-papalaꞌ fo Manetualain Dula-dale Na fee ita ela pake.
2 Emi bubuluꞌ mae, tepoꞌ fo bei ta dadi meuꞌ Manetualain lahenda nara, emi soko-taku hata haraꞌ taaꞌ. Emi moi tuka-tukaꞌ sira.
3 Huu ria na, au nau emi bubuluꞌ mae, tantu lahenda fo nabua-naesa noo Manetualain Dula-dale Malalao-malalafu Na, ta bisa nae, “Kutuk neuꞌ Yesus!” Ma, tantu lahenda fo ta nabua-naesa noo Manetualain Dula-dale Malalao-malalafu Na, ta bisa nae, “Yesus nana, au Ramatua ka!”
4 Manetualain Dula-dale Na fee lahenda ra esaꞌ ko nooꞌ ria babati-papalan, ela ralalaꞌo sira nonoi laka feke nara. Tehuu basa babati-papalaꞌ sira reme Dula-daleꞌ esa mai.
5 Lahenda hapu babati-papalaꞌ rupaꞌ ara fo ralalau lahenda, tehuu sira basa ramanene neme noi Ramatuaꞌ esaꞌ a mai.
6 Lahenda hapu nonoi laka rupaꞌ ara fo ralalaꞌo Manetualain nonoi-tataon, tehuu noi Manetualain riꞌ tulu-fali si ela ralalaꞌo basa nonoi lakaꞌ ara.
7 Manetualain natudu Ria Dula-dale Na nai lahenda ra soda na neniꞌ esaꞌ ko enon, tehuu Ana nau basa si onto belaꞌ.
8 Ana fee Dula-dale Na kuasa na nai Ria lahenda nara. Ruma sipo kuasa de bisa ranuu duduꞌa-aafi tandeꞌ, ela fee lelea-nonoreꞌ noo matetuꞌ. Ma ruma sipo kuasa ela rafada ledo-ledo, hata fo ara bubuluꞌ ana.
9 Ruma bali, sipo kuasa ela ramahere tebe-tebe Manetualain, nana huu sira rabua-raesa ratalolole roo Ria Dula-dale Na. Ruma bali, sipo kuasa ela puli lahenda kamahedis.
10 Ruma bali, sipo kuasa ela tao tanda heran rupaꞌ fo natudu Manetualain marela-masaꞌa Na. Ruma bali, sipo kuasa ela tui-beka Manetualain hehelu-baratan neuꞌ Ria lahenda nara. Ruma bali, sipo kuasa ela bubuluꞌ rae dula-daleꞌ ria neme Manetualain mai do, taꞌa. Ruma bali, sipo kuasa ela bisa dedea pake dedea rupaꞌ ara. Ruma bali, sipo kuasa ela rafada fee dedeaꞌ sira sosoa-raraan ubeaꞌ.
11 Tehuu noi Dula-daleꞌ esa riꞌ tataon, de sira basa bisa roi-tao nonoi lakaꞌ sira. Ana fee babati-papalaꞌ neuꞌ lahenda ra esa-esa tuka Ria hihii-nanaun.
Ao-inaꞌ esa, nanuu babatiꞌ rupaꞌ ara
12 Au nau araraaꞌ babati-papalaꞌ sira roo lahenda ao-ina na. Ao-inaꞌ esa nanuu babatiꞌ rupaꞌ ara. Tehuu babatiꞌ sira nanahekeꞌ dadi reuꞌ ao-inaꞌ esa.
Ria sama leoꞌ Kristus lahenda nara.
13 Ita basa tabua-taesa nai Dula-daleꞌ esa daleꞌ. Huu ria na, de tepoꞌ fo ita sarani, ita dadi sama leoꞌ lahenda nusaꞌ esa. Leo mae ita lahenda Yahudi do, lahenda fo ta Yahudi fa do, ata do, ta ata fa, Manetualain fee ita basa Dula-daleꞌ noi esaꞌ a. Ria sama leoꞌ ita basa tinu oe fo neni sodaꞌ neme oe dodoluꞌ esa mai.
14 Tebe, ao-inaꞌ a, ta nanuu noi babatiꞌ esaꞌ a. Huu fo ria dadi neme babatiꞌ dodouꞌ mai.
15 Uniꞌ ko leo ei ma nae, “Limaꞌ ta au fa. De, au ta dadi uuꞌ babatiꞌ neme ao-ina ma mai.” Leo mae dedea nae leoꞌ na, tehuu ria bei babatiꞌ neme ao-ina ma mai. Tebe, hete?
16 Ma kalu ridoo ma nae, “Mataꞌ ta au fa. De, au ta dadi uuꞌ babatiꞌ neme ao-ina ma mai.” Leo mae dedea nae leoꞌ na, tehuu ria bei babatiꞌ neme ao-ina ma mai.
17 Dodoo masudin! Maneniko ao-ina ma dadi noi mataꞌ, sona bisa mamanene tao leoꞌ bea? Ma kalu ao-ina ma dadi noi ridooꞌ, sona bisa hae tao booꞌ a leo beaꞌ?
18 Tehuu emi bubuluꞌ, Manetualain tao na ita dadi sama leoꞌ ao-inaꞌ esa, ma Ana ator babatiꞌ rupa nara tuka Ria hihii-nanaun.
19 Maneniko ita ao-ina na dadi noi babatiꞌ esa, sona ria ta nade ‘ao-inaꞌ’ soꞌ, hete?
20 Tehuu matetu na riꞌ, ita ao-paa na nanuu babatiꞌ rupaꞌ. Ria riꞌ dadi neuꞌ ao-ina katemaꞌ esa.
21 Lahenda mata na ta bisa nae ta hika-hadaꞌ lima na nae, “Au ta parluu o fa!” Ma lahenda laka na ta bisa nafada ei na nae, “Au ta parluu o fa!”
22 Matetu na riꞌ, ao-inaꞌ a babatin fo ita tae ta baraaiꞌ, ma ta penting, tehuu ita parluu si.
23 Babatiꞌ fo ita tae sira sosoa-raraan noi baianaꞌ, tehuu ita taboi tatalolole si. Ma babatiꞌ fo ita maeꞌ asa, ita tapoti tatalolole si.
24 Tehuu babatiꞌ fo ita ta maeꞌ asa, ita ta tao si leoꞌ bea boeꞌ.
Tehuu Manetualain nabubua na basa babatiꞌ ara fo dadi reuꞌ ao-inaꞌ esa. Ana ator de babatiꞌ fo ita tae ta penting fa boe, ita taboi tatalolole si,
25 huu fo Ana ta nahiiꞌ ita ao-ina na fifika-fafae. Ana nau basa babatiꞌ ara, esa mete-relu esa.
26 Maneniko babatiꞌ esa hapu susa, sona basa babatiꞌ ara rameda belaꞌ a. Ma kalu esa sipo hada-horomata, sona basa si ramahoꞌo.
27 Leoꞌ na boe neuꞌ emi. Emi sama leoꞌ Kristus ao-ina katema-tua Na. Lahenda kamahereꞌ ara esa ko noꞌ babatin neme Kristus ao-ina Na mai.
28 Huu fo nai lahenda kamahereꞌ ara talada, Manetualain fee kuasa, ela tao nonoi laka rupaꞌ ara.
Masososan, Ana nadenu lahenda ruma reu ralalaꞌo Ria hehelu-baratan.
Kaduan, Ana pake lahenda ruma dadi reuꞌ Ria mana nesimatan.
Katelun, Ana tao na lahenda ruma ranori ralelaꞌ laꞌeneuꞌ Ana.
Ana fee kuasa neuꞌ lahenda ruma fo bisa tao tanda heran rupaꞌ ara, ela ratudu Ria marela-masaꞌan.
Ruma bali hapu kuasa ela puli lahenda kamahedis.
Ruma bali hapu babati-papalaꞌ ela tulu-fali lahenda.
Ruma bali hapu babati-papalaꞌ ela bisa urus lehenda ra fo roi-tao sama-sama noo malole.
Ma Ana fee kuasa neuꞌ lahenda ruma bali, ela ara bisa dedea pake dedea rupaꞌ ara.
29 Emi duduꞌa-aafim leo beaꞌ? Manetualain nadenu basa lahenda ra, fo reu tui-beka Ria hehelu Na do? Taꞌa. Ana tao na basa lahenda ra dadi reuꞌ Ria mana nesimatan do? Taꞌa. Ana tao na basa lahenda ra, ranori-rafada ralelaꞌ do? Taꞌa. Ana fee kuasa neuꞌ basa lahenda ra fo bisa tao tanda heran do? Taꞌa.
30 Ana fee kuasa neuꞌ basa lahenda ra fo puli lahenda kamahedis do? Taꞌa. Ana tao na basa lahenda ra bisa dedea pake dedea rupaꞌ ara do? Taꞌa. Ana tao na basa lahenda bisa rafada dedeaꞌ sira sosoa-raraan do? Taꞌa.
31 Emi muste mahehere ao mara fo sipoꞌ, ma pake babati-papalaꞌ, manuu sosoa-raraaꞌ bauinaꞌ soaneuꞌ lahenda dodouꞌ.
Leo mae leoꞌ na, tehuu au nau atudu emi eno-dala malole inaꞌ a.