13
Susue-lalai matetuꞌ
1 Uniꞌ ko leo au bisa dedea pake basa dedea rupaꞌ ara, dedeaꞌ lahenda dae-bafoꞌ do, dedeaꞌ neme Manetualain eilaꞌo-limalopen rai nusatetu-ikutemaꞌ a do, tehuu au ta anuu susue-lalaiꞌ baiꞌ boeꞌ, ria onto ubeaꞌ? Au dedea ka rouꞌ, sama leoꞌ meꞌo a nalii, do darom fo lii na nadolo.
2 Uniꞌ ko leo au anuu babati-papalaꞌ fo tui-beka Manetualain hehelu-baratan neuꞌ Ria lahenda nara, ma au bubulu-alelaꞌ basa hata nino a, ma basa hihii-nanauꞌ fo lahenda malelaꞌ ara bubuluꞌ, ma kalu au amahere tebe-tebe neuꞌ Manetualain, losaꞌ au bisa lali heni leteꞌ ara, tehuu au ta anuu susue-lalaiꞌ baiꞌ boeꞌ, ria sosoa-raraan ubeaꞌ? Au nonoi-tatao ka, sosoa-raraaꞌ taꞌa.
3 Leo mae au seꞌo heni katemaꞌ hata-heto ki, boe ma babati doi nara ela ahao lahenda manatoꞌa-manataaꞌ ara, do fee heni au ao-ina ka dadi tutunu-hohotuꞌ, tehuu au ta anuu susue-lalaiꞌ baiꞌ boeꞌ, ria sosoa-raraan ubeaꞌ? Au ta anuu neteꞌ fo atutua-adedema ao ka. Huu fo ria mana dadi taaꞌ! Ta onto hata esa boeꞌ.
4 Susue-lalaiꞌ a, nana balaroe-balanauꞌ.
Susue-lalaiꞌ a, nana sabar.
Susue-lalaiꞌ a, nana ta namanasaꞌ.
Susue-lalaiꞌ a, nana ta natutua-nadedemaaoꞌ.
Susue-lalaiꞌ a, nana ta koaoꞌ.
5 Susue-lalaiꞌ a, nana ta baraꞌaai fa.
Susue-lalaiꞌ a, nana ta soa noi ao-ina heheliꞌ a.
Susue-lalaiꞌ a, nana ta mudaꞌ laesaꞌ namanasa.
Susue-lalaiꞌ a, nana ta napeda daleꞌ nalelaꞌ.
6 Susue-lalaiꞌ a, nana namahoꞌo neuꞌ hata roo-tetuꞌ,
ma ta nahiiꞌ hata ta roo-tetuꞌ fa.
7 Susue-lalaiꞌ a, nana ta nalale balas lahenda nonoi tadalun.
Susue-lalaiꞌ a, nana namahere naroo.
Susue-lalaiꞌ a, nana namahena-nabani.
Susue-lalaiꞌ a, nana nanenete naroo.
8 Susue-lalaiꞌ a ta namaetun.
Tehuu hata fo Manetualain mana nesimata nara rafada a, mateꞌe na te ta parluu soꞌ. Ma kalu lahenda dedea pake dedea rupaꞌ ara, mateꞌe na te ta parluu soꞌ. Ma hata fo lahenda malelaꞌ ara bubuluꞌ a, mateꞌe na te sosoa-raraaꞌ taꞌa soꞌ.
9 Besaꞌ ia, ita bubuluꞌ noi baianaꞌ. Maneniko ita dadi teuꞌ Manetualain mana nesimatan, ita dedea-nafadan bei ta namadai fa.
10 Tehuu losa ledo-fain nai nusatetu-ikutemaꞌ a, te neuꞌ ko basa-basan namadai so. Tepoꞌ ria te, hihii-nanauꞌ fo bei ta namadai fa, sosoa-raraaꞌ taꞌa.
11 Conto na leo iaꞌ: tepoꞌ fo au bei aanaꞌ, au dedea sama leoꞌ biasa ana aanaꞌ ara dedea a. Au boe duꞌa-afi sama leoꞌ biasa ana aanaꞌ a duaꞌ-afi. Tehuu besaꞌ ia au ambauinaꞌ so. Huu ria na, de au ta leo-laꞌo sama leoꞌ ana aanaꞌ soꞌ.
12 Conto fekeꞌ bali: besaꞌ ia, ita bisa tita-dae baiꞌ, tehuu bei sama leoꞌ tita salaoꞌ ara nai tiroao fakiꞌ. Tehuu neuꞌ ko ita tita noo matetuꞌ, sama leoꞌ nai ita mata-idun. Besaꞌ ia au bubuluꞌ noi baianaꞌ. Tehuu neuꞌ ko au bisa bubuluꞌ basa-basan, sama leoꞌ Manetualain bubuluꞌ basa-basan laꞌeneuꞌ au ao-ina ka.
13 De, ita muste tao hihii-nanauꞌ telu fo riꞌ rahere raroo, siꞌ:
ita muste tamahere taroo Ramatuaꞌ a;
ita muste tamahena-tabani taroo tae, neuꞌ ko Ana ator basa-basan dadi malole;
ma ita muste tasue-talaiao taroo.
Neme hihii-nanauꞌ ia ra telu mai, penting nan seli a, nana riꞌ, susue-lalaiꞌ. Huu fo susue-lalaiꞌ a riꞌ malole lena neme basa-basan mai.