3 Yohanis
1
Yohanis duiꞌ ria susura na
Gayus au toranoo susue-lalaiꞌ ka. Soda-moleꞌ neme au mai, Yohanis, mauli-malaka saraniꞌ.
Au hule Ramatuaꞌ a nanea-nasalaꞌe o, fo ela o hapu soda-moleꞌ ma mapii-baraaiꞌ. Toranooꞌ hida mai tui au rae, o tuka maroo Manetualain eno masoda roo-tetu Na. Au amanene leoꞌ na, boe ma au amahoꞌo-atadale. Au amahoꞌo an seli nana huu amanene rae, au ana kara leo-laꞌo tuka eno roo-tetuꞌ.
Yohanis io Gayus, nana huu ana nalalaꞌo nonoi-tataoꞌ noo malole
Toranoo susue-lalaiꞌ! O bei ta malelaꞌ toranooꞌ fo ralalaꞌo Kristus nonoi-tataon nai basa mamana ain, tehuu o sipoꞌ asa no malole. Tepoꞌ fo o sipoꞌ asa no malole, ria sama leoꞌ o malalaꞌo Manetualain nonoi-tataon. Lahenda fo fali mai si, tui fee saraniꞌ nai ia rae, o sipoꞌ no malole ma sue-lai si. Besaꞌ ia au hule fo o tulu-fali maroo si leoꞌ na, huu fo ria riꞌ tao na Manetualain dale Na namahoꞌo. Ara laꞌo rule-feo basa mamanaꞌ ain fo ranori-rafada lahenda laꞌeneuꞌ Yesus Kristus. Tehuu ara ta sipo tutulu-fafaliꞌ hata esa neme lahenda kamahere taaꞌ ara mai. De, memaꞌ naraa, ita riꞌ muste tulu-fali si. No ria na, ita to si sama-sama talalaꞌo Ramatuaꞌ a nonoi-tataon.
Diotrefes nana, mana tao tasibu
Maulu na, au haitua susuraꞌ fee saraniꞌ nai o mamana ma, tehuu Diotrefes tao aon sama leoꞌ malaka. Ma ana ta nau namanene au. 10 De, maneniko au leo naaꞌ uu, neuꞌ ko au tui neuꞌ matetu na laꞌeneuꞌ ria nonoi-tataon. Ana dedea napuputaꞌ, ela natuda ita. Lena-lenaꞌ bali, ana tipa Ramatuaꞌ a lahendan fo riꞌ mai rai naa. Ria boe horo toranooꞌ fo roi sipoꞌ, ela bosoꞌ sipoꞌ lahenda sira.
Demetrius nalalaꞌo Ramatuaꞌ a nonoi-tataon no malole
11 Toranoo susue-lalaiꞌ! O muste mete conto neme lahenda fo riꞌ nonoi-tatao malole. Bosoꞌ mete conto neme lahenda fo riꞌ nonoi-tatao tadaluꞌ. Huu fo lahenda bea nonoi-tatao malole, sona Manetualain lahendan ria. Tehuu lahenda bea nonoi-tatao tadaluꞌ, sona ta nalelaꞌ Manetualain.
12 Conto leo-leoꞌ Demetrius. Basa lahenda ra io ni, nana huu ana tuka Manetualain eno masoda roo-tetun. Au boe io ni, ma o bubuluꞌ au ta dedea fufudiꞌ fa.
Yohanis duiꞌ nateꞌe ria susura na
13 Bei hihii-nanauꞌ fekeꞌ dodouꞌ bali, fo au nau dedea oo o, tehuu au ta nau duiꞌ asa reuꞌ susuraꞌ. 14 Au amahehenaꞌ ta dooꞌ a soꞌ, te ita taneta ela ita dua bisa dedea tasasare mataꞌ.
15 Nemeꞌ naa leo. Toranooꞌ fo rai ia haitua haraoe soda-moleꞌ. Malosaꞌ au haraoe soda-mole ka fee toranooꞌ fo rai naa, esa-esaꞌ ko nooꞌ ria nade na.
Soda-moleꞌ,
Yohanis
1:1 Lahenda Nadedenuꞌ ara Tutuin 19:29; Roma 16:23; 1 Korintus 1:14