7
Lahenda a atoran na boso kati heni Manetualain pareta na
(Mateos 15:1-9)
1 Lahenda Farisi bubuaꞌ esa, ma mese agama hida reme Yerusalem mai fo raneta ro Yesus.
2-5 Lahenda Farisi ra hopu rahere sira hada Yahudi nara. Nasasamaꞌ leoꞌ maneniko lahenda sakaꞌ raa-rinu, sona ara muste safe lima nara tuka sira hada na hihii-nanaun. Leoꞌ na boe, kalu fali remeꞌ pasar a mai, ara muste radiu oe dei. Losaꞌ sira rou-raaꞌ manai dapu a, leo-leoꞌ ureꞌ, bikaꞌ, galaas, cerek, muste safe katemaꞌ asa tuka hadas a hihii-nanaun, besaꞌ ko bole raa-rinu reniꞌ.
Maneniko hapu lahenda Yahudi fekeꞌ fo ta tuka hadas ria, sona lahenda Farisi ra ramanasa.
Huu ria na de, faiꞌ fo rita Yesus ana mana tuka dea nara raa-rinu, ta safe lima nara tuka hadas a hihii-nanaun. Boe ma, ara mai de sale Yesus rae, “Ubeaꞌ taon de o ana mana tuka dea mara raa-rinu, tehuu ta safe raꞌuluꞌ lima nara fa? Ria nana ara ralena laka ita hada na neme bei-baꞌi a mai so!”
6-7 Tehuu Yesus nataa nae, “Emi ia nana tebe lahenda fo dedea fekeꞌ, tao fekeꞌ! Neme uluꞌ mai, baꞌi Yesaya duiꞌ na Manetualain dedea na so nae,
‘Lahenda ia ra io-oa neuꞌ Au,
adaꞌ noi bafadoo peda nara, tehuu ta no dale nara fa.
Ara tao leoꞌ na boe oo, sosoa-raraaꞌ taꞌa.
Ara ta tao daleꞌ neuꞌ Au hihii-nanau Ka,
tehuu ara tuka adaꞌ noi lahenda dae-bafoꞌ a hihii-nanaun.’
Emi sama leoꞌ ria boe.
8-9 Emi foa ela Manetualain pareta na, fo nau tuka lahenda dae-bafoꞌ a hada na. Emi memaꞌ tao leo naꞌ sona malela mara seli!
10 Fai ulu na baꞌi Musa nafada Manetualain pareta Na so nae, ‘Fee hadaꞌ neuꞌ ina-ama mara.’ Ma nafada seluꞌ bali nae, ‘Kalu lahenda esa doꞌi ina-ama nara, sona muste huku mateꞌ ana.’
11-12 Manetualain nanori nae leoꞌ na, tehuu emi manori fekeꞌ. Emi mae, ‘Kalu lahenda helu nau fee hata esa neuꞌ Manetualain, sona leo mae ina-ama mara doidoso mamateꞌ boe, tehuu ta bole pake hata sira fo tulu-fali si, huu fo emi helu basa nau fee Manetualain.’
13 Huu ria na bisi naaꞌ a Au afada, emi tuꞌu heni Manetualain hihii-nanaun so, fo katin neniꞌ atoran bebeuꞌ. Hapu atoran dodouꞌ emi kati si leo naꞌ so.”
Dedea tadaluꞌ fo kalua nemeꞌ lahenda dale na mai
(Mateos 15:10-20)
14 Basa boe ma, Yesus naloo na lahenda fekeꞌ manai naa ra de nae, “Pasaꞌ ridooꞌ mara dei, ela emi bubuluꞌ.
15 Hata fo masoꞌ leo teiꞌ a dale neu, ria ta tao nakekeo-nakakanu lahenda fa. Tehuu hata fo kalua deaꞌ mai, ria riꞌ tao makekeo-makakanuꞌ.
16 [Naa bea manuu ridooꞌ, sona namanene natalolole!]”
17 Basa boe ma, Yesus no ana mana tuka dea nara laꞌo ela lahenda sira, de kodi leo uma esa daleꞌ reu. Boe ma ana manatukadea nara ratane dedea nasasamaꞌ ria sosoa na.
18-19 Yesus nataa nae, “Emi ta bubuluꞌ fa, do? Ria sosoa na leo iaꞌ: hata fo lahenda raa-rinun, nana malole a. Tehuu hata fo kalua mai, sona ta malole a fa. Hata fo ita taa-tinun, masoꞌ leo ita tei na daleꞌ neu, tehuu basa nate kalua mai bali. (Ramatua Yesus dale na nae, lahenda bole naa-ninu sudi laꞌe ubeaꞌ a, ta horo fa.)
20 Tehuu hata fo kalua neme lahenda dale na mai, ria tao makekeo-makakanuꞌ losaꞌ Manetualain nahiaꞌ ana, ma ta nau nabua noo ni fa.
21 Huu fo dedea tadaluꞌ dodouꞌ kalua neme lahenda dale na mai. Samaleoꞌ: duduꞌa-aꞌafi tadaluꞌ, hohoke, naꞌo, kanisaꞌ,
22 tendetuu, sosoa-piao, tadaluꞌ, mapuputaꞌ, tuka hihii-nanau aopaaꞌ, naꞌmutiꞌ, dedea natuda lahenda, koaoꞌ, manori taꞌ, laka batuꞌ.
23 Basa tadalu leo naꞌ a, kalua remeꞌ lahenda dale na mai. Ria riꞌ tao nalutu ni. Manetualain boe oo nahiaꞌ ana.”
Ramatua Yesus tulu-fali inaꞌ esa fo ta lahenda Yahudi fa
(Mateos 15:21-28)
24 Basa boe ma, Yesus foa ela mamanaꞌ ria, fo leo kota esa neu nade Tirus. Losa na boe ma, ara kodi leo uma esa daleꞌ reu, huu fo Yesus ta nau hapu lahenda bubuluꞌ Ana nai na. Tehuu ta nafuni nala ao Na fa.
25-26 Naina hapu inaꞌ esa, fo ta lahenda Yahudi fa. Boki ni nai nusa Fenesia, nai propinsi Siria. Tepoꞌ fo ana namanene Yesus mai, boe ma neu hule Yesus fo usi heni nitu nemeꞌ anafeto na mai.
27 Tehuu Yesus tuꞌu dedeaꞌ nae, “Ana ara muste raa raꞌuluꞌ dei, besaꞌ ko tuꞌu nanaa lenaꞌ sira fee busa a.” [Ma nai dale na nananafuniꞌ, Yesus muste tulu-fali naꞌuluꞌ Ria lahenda Yahudi nara dei, besaꞌ ko lahenda fekeꞌ a.]
28 Tehuu inaꞌ ria balas nae, “Tebe leoꞌ na, Papa! Tehuu busa fo nai mei a fiki dale na. Ria boe naa nemeꞌ nanaaꞌ fo tuda nemeꞌ anaꞌ a bika na mai.” [Sosoa na nae, faiꞌ fo ana ara raa a, nana busa ra hapu boe. Leo mae Yesus tulu-fali Ria lahenda nara, Ana muste tulu-fali lahenda fekeꞌ a boe.]
29 Yesus namanene leoꞌ na, boe ma nafada nae, “Awi! Mama Ka dedea laꞌe ria so! De mama ka fali leo, huu fo nitu ria kalua neme anafeto ma mai so.”
30 Boe ma inaꞌ ria fali neun. Losa uma te ana na suku namanee. Nitu ria memaꞌ kalua so.
Ramatua Yesus puli na lahenda pakeꞌ-pakanaaꞌ esa
31 Basa ria, boe ma Yesus asa foa ela kota Tirus, ara laꞌo tuka tasi a suu na raroo kota Sidon. Reme naaꞌ mai, ara laꞌo raroo losa dano Galilea. Basa boe ma ara leo nusaꞌ esa no kota sanahulu, fo riꞌ rae, ‘Dekapolis’.
32 Nai naa, hapu lahenda esa pakeꞌ ma pakanaa ni. Nonoo nara roon leo Yesus neu. Ara hule fo Yesus fua lima Na neuꞌ ria laka na, fo puli nan.
33 Boe ma Yesus foa ela lahenda kadodouinaꞌ sira, de neu noo noi lahenda ria. Yesus duku lima Na leo lahenda ria ridoon dua si daleꞌ neu. Basa de Ana tao ape neu lima uꞌu Na, boe ma nafaroe lahenda ria maa na.
34 Yesus nakanaro leo lalai neu, Ana hela hahae Na, boe ma pareta nae, “Efata!” (Sosoa na nae, “Matahuꞌa leo!”)
35 Yesus nae leoꞌ na, boe ma lahenda ria ridoo na namanene tutiꞌ a. Lahenda ria maa bara-aꞌain na bala-nau tutiꞌ a, losaꞌ ana mulai dedea maloleinaꞌ.
36 Basa boe ma, dua si fali leo lahenda kadodouinaꞌ sira reu. Yesus horo si nae, “Nenene, o! Emi bosoꞌ tui lahenda mae, Au puli a lahenda ia so.” Leo mae Yesus horo si boe oo, tehuu ara ratui aoꞌ nai basa mamanaꞌ ara.
37 Lahenda fo ramanene tutuiꞌ ria, ara heran mamateꞌ. Boe ma ara beidea rae, “Lahenda ia, kahereꞌ naan seli! Tao na basa hihii-nanauꞌ a dadi malole. Lahenda pakeꞌ ara ramanene. Ma lahenda pakanaaꞌ ara bisa dedea.”