19
Lahenda Farisi ra saka enoꞌ fo rahihiiꞌ Ramatua Yesus laꞌe-neuꞌ namaetuꞌ
(Markus 10:1-12)
1 Yesus nanori-nafada basa sira, boe ma Ana laꞌo ela Galilea de leo propensi Yudea neu nai lee Yarden a seriꞌ.
2 Lahenda dodouꞌ tuka Ni, ma Ana puli na lahenda kamahedis ara rai naa.
3 Lahenda Farisi hida mai fo nau rahihiiꞌ Yesus boe. Ara ratane rae, “Papa! Tuka ami atoran agama ma, maneniko touꞌ a sao, sona ana bole namaetuꞌ no sao na neniꞌ sudi eno ubeaꞌ a, do leo beaꞌ?”
4 Tehuu Ana nataa nae, “Emi nana, lahenda fo malelaꞌ agama. Tehuu ubeaꞌ taon, de emi ta bubuluꞌ Manetualain Susura Makamoi Na isi-liin? Nai tutui masososaꞌ a, manaduiꞌ nae, ‘Manetualain adu na lahenda a, touꞌ ma inaꞌ.’
5 Ma nanaduiꞌ bali nae,
‘Huu ria na, touꞌ a muste foa ela ina-aman,
fo neu nasoda daleꞌ esa no sao na,
nana huu sira dua dadi esaꞌ so.’
6 Huu ria na, de maneniko Manetualain riꞌ tao naa sira dadi esaꞌ, sona lahenda bosoꞌ fee si ramaetuꞌ bali!”
7 Lahenda Farisi sira ramanene Yesus dedea nae leoꞌ na, boe ma ratane bali rae, “Kalu leoꞌ na, sona ubeaꞌ taon de baꞌi Musa nae, lahenda bole ramaetuꞌ, sadi ana fee susura namaetuꞌ neuꞌ sao ina na dei?”
8 Boe ma Yesus nataa bali nae, “Baꞌi Musa nataaꞌ emi bei-baꞌim ramaetuꞌ ro sao ina nara, huu fo sira laka batuꞌ leoꞌ emi! Tehuu tepoꞌ fo Manetualain adu dae-bafoꞌ ia, Ria hihii-nanaun ta leo naꞌ fa.
9 Huu ria na de Au afada! Maneniko sao inaꞌ a hohoke nauluꞌ, sona touꞌ a bole namaetuꞌ. Tehuu maneniko sao inaꞌ a ta hohoke fa, te touꞌ a riꞌ namaetuꞌ noon, boe ma sao seluꞌ ina fekeꞌ, sona ana hohoke ria!”
10 Ana mana tuka dea nara ramanene Ni dedea nae leoꞌ na, boe ma ara dedea rae, “Kalu leoꞌ na, sona malole lenaꞌ bosoꞌ sao.”
11 Yesus nataa si nae, “Ta basa lahenda ra bisa sipoꞌ Au dedea Ka. Noi lahenda fo riꞌ Manetualain teka-here si a.
12 Hapu lahenda manasao taaꞌ, nana huu neme boki ni a leo naꞌ. Hapu lahenda manasao taaꞌ, nana huu lahenda tao ni leoꞌ na. Ma lahenda ta nahiiꞌ sao fa, nana huu ria nau nalalaꞌo noi Manetualain nonoi-tataon. Lahenda bea bisa bubulu-nalelaꞌ nanori-nafadaꞌ ia, sona ela ana sipoꞌ.”
Ramatua Yesus nafada fee ana aanaꞌ ara ua-naleꞌ
(Markus 10:13-16; Lukas 18:15-17)
13 Faiꞌ ria, lahenda ra oꞌo roo ana nara leo Yesus reu, fo ela Ana fua lima Na neuꞌ asa ma nafada fee si ua-naleꞌ. Tehuu ana mana tuka dea nara rasaꞌai lahenda sira.
14 Boe ma Ana namanasa no ana mana tuka dea nara nae, “Nemeꞌ na ela anaꞌ sira leo Au mai! Bosoꞌ ena-matabaa si! Huu fo lahenda leo iaꞌ ara, nana Manetualain lahendan.”
15 Boe ma Ana fua lima Na neuꞌ ana aanaꞌ sira, ma hule fo Manetualain fee si ua-naleꞌ. Basa boe ma Ana laꞌo ela mamanaꞌ ria.
Lahenda kamasuꞌi a saka enoꞌ fo nasoda naroo noo Manetualain
(Markus 10:17-31; Lukas 18:18-30)
16 Laiꞌ esa de, lahenda mai natane Yesus nae, “Papa Mesen! Au muste tao hihii-nanauꞌ malole leo beaꞌ, fo ela au bubuluꞌ matetuꞌ ae, au bisa masoꞌ nusatetu-ikutemaꞌ a. Huu fo au nau asoda aroo sama-sama oo Manetualain.”
17 Yesus nataa nae, “Ubeaꞌ taon, de o matane Au laꞌe-neuꞌ ubeaꞌ riꞌ malole? Noi Manetualain riꞌ malole. Maneniko o nau masoda mo Ni, sona tuka pareta Na.”
18 Lahenda ria natane seluꞌ nae, “Pareta a riꞌ ubeaꞌ?”
Yesus nataa nae,
“Bosoꞌ maisa lahenda;
bosoꞌ hohoke;
bosoꞌ mamanaꞌo;
bosoꞌ sakasii pepekoꞌ;
19 fee hada-horomata neuꞌ o ina-amam;
ma sue-lai toranoo ma sama leoꞌ o sue-lai ao-ina heheli ma.”
20 Lahenda ria nataa Ni nae, “Basa pareta sira au tao si so. Bei kura ubeaꞌ bali?”
21 Yesus namanene leoꞌ na, boe ma nae, “Maneniko o nau tuka Manetualain hihii-nanaun katemaꞌ, sona fali fo seꞌo heni katemaꞌ hata-hetom. Basa sona muu babati doiꞌ sira fee lahenda hata taaꞌ ara, besaꞌ ko mai fo tuka Au. Huu fo neuꞌ ko Manetualain balas fee o hata-heto dodouꞌ nai nusatetu-ikutemaꞌ a.”
22 Lahenda ria namanene leoꞌ na, boe ma ana fali neun no dale susa, huu fo namasuꞌi naan seli.
23 Boe ma Yesus dedea no ana mana tuka dea nara nae, “Mamahere Au, huu fo lahenda kamasuꞌi a susa laesaꞌ masoꞌ nusatetu-ikutemaꞌ.
24 Ria susa na, sama leoꞌ banda onta bau-inaꞌ a, masoꞌ leo oka na neu, nesiꞌ rarauꞌ a bolo na.”
25 Ana mana tuka dea nara ramanene leoꞌ na, boe ma ara heran. Ara rataa rae, “Kalu leoꞌ na, sona bea riꞌ bisa masoꞌ nusatetu-ikutemaꞌ a?”
26 Ana mete natalolole si, boe ma dedea nae, “Maneniko lahenda dae-bafoꞌ a riꞌ noi-tao, sona memaꞌ ta bisa fa. Tehuu kalu Manetualain riꞌ noi-tao, sona basa-basan bisa dadi!”
27 Boe ma Petrus fee nafarereneꞌ nae, “Papa! Ami foa ela hata-hetom katemaꞌ so, fo tuka Papa. Tehuu ami hapu ubeaꞌ?”
28 Yesus nataa nae, “Mamahere Au! Maneniko Manetualain tao na basa-basan dadi bebeu, neuꞌ ko Au Ana Lahenda ia, atuuꞌ nai kadera mana pareta bau-inaꞌ. Tepoꞌ ria, emi fo riꞌ tuka Au a, matuuꞌ nai kadera mana pareta kasanahulu duaꞌ sira boe, fo dadi mana ee dedeaꞌ soa-neuꞌ leo Israel kasanahulu duaꞌ ara.
29 Lahenda fo foa ela ria uma-loon, aꞌa-fadin, ina-aman, ana nara, ma oka-tinen fo tuka Au, neuꞌ ko ana sipo faliꞌ losa lena heni laiꞌ natun. Boe ma maneniko dae-bafoꞌ ia noe, ana nasoda naroo noo Manetualain.
30 Mafarereneꞌ! Tuka Manetualain duduꞌa-aafin, lahenda dodouꞌ matutua-madedema aoꞌ ara, nana siꞌ lahenda fo aanaꞌ raan seli. Tehuu lahenda maloe-madae aoꞌ ara, nana siꞌ lahenda bau-inaꞌ.”