Pauro Korĩtio ezektsa bo ziwatahakazo
Wastuhu Korĩtio ezektsa Pauro ziwatahaka naha humo batu siakparawy. Iwatahi ziwatahakazo tahyrikosokdawy soho humo nisispirikpoko. Deus Pauro tuk ziknapykyrykta hi iwatsahi katsa kino niwatihi Deus soho humo tanymyryky.
1
Uta Pauro, Sesus Kiristu ykzohota iwa hi Deus nizihikik. Ikiahatsa Korĩtio ezektsa bo piwataha. Asaktsa Deus tyryktsa, Akaija ezektsa bo niwatihi piwataha. Asahi Sesus harere bo hyỹ nikaranaha. Timoteo humo katsa mymypokzitsirẽtsa mytsy wata atahi katuk ahabo piwatahaka.
Deus myzo Sesus Kiristu mypehakatsa iwaze sibo mopamykysokoze utakta:
— O myzo Korĩtio ezektsa tysipokzitsihikikta! Sibo tysisapywyky iwaze batu paikpa mytsaty mykaranaha sakurẽtsa mykaranaha — my. Iwa Deus bo ahatsyhyryze mopamykysoko.
Pauro Deus humo tsakurẽta nikara.
Katsaktsa Deus bo tihiktsa:
— O Deus myzo ikia zuba tsamysapyrẽta ikia hi mypehakatsa Sesus Kiristuzo. Ikia zuba myhumo tsamypokzitsiukrẽta, iwatahi myzo babata — tsimaha. Atahi sinini tsimykaranahaze mymytsumuẽhĩ. Paikpa mytsaty tsimykaranahaze mymykuwyky. Deus hi:
— Pahatsumuẽhĩ ikiahatsa niwatihi ustsa kytsa sinini mykaranahaze tysitsumuẽhĩnaha iwahi natatsihikik — iwa myhyrinymyrẽtsa Deus hi nimyhyrinymyryky. Kiristu mytsyhyryze sinini nikara. Katsa kino niwatihi Sesus Kiristu humo tsikspirikpokonahaze ihumo sinini tsimykaranaha. Iwatsa tu sinini tsimykaranaha zeka atahi mymykuwyky. Iwatsahi ihumo mypunihikrẽtsa tsimoziknaha.
Tapara ahabo iktsasoko Deus nimytsumuẽhĩkĩ nawa Deus mymytsapuhyripyrywyky Kiristu mysapyzeky nihyrikosokda iwatsahi sinini ykarawy bo batu zikaha. Kytsa asaktsa Deus batu siakparawy mymysukyrykynaha. Mymysukyryikiknahaze Deus mymytsumuẽhĩ atahi mymykuwyky ana humo kino ahahyrinymyrẽtsa. Iwaze uta ahasoho humo kaspihikrẽta. Ikiahatsa hi:
— Hawa Deus kytsa mysitsumuẽhĩkĩkze iktsa tsimaha, iwatsahi asaktsa Deus batu siakparawy mymysukyrykynahaze Deus mymytsumuẽhĩ, ihumo mypunihikrẽtsa tsimoziknaha iwahi ustsa kytsa mysitsumuẽhĩkĩ niwatihi — tsimaha.
Katsaktsa Asia eze tuze hawa tsihokdaharẽna imysapybara ty mybo nikara. Anahi ahabo motsasoko iwaze tsinymyrykynaha. Kytsa nimyitsapyriwykynaha. Sinini tsikykaranaha. Iwaze mypetu tsikykaranaha:
— O abahi katsa tsimyokbanahatsa watsa. Ustsa kytsa mymybanaha bo — mytsaty tsikykaranaha. Iwa mytsaty ahabyitsa tu tsikaha. Batu mypunihik. Iwaze myspihikbyitsa tu tsimykaranaha. Iwaze Deus zuba mymytsumuẽhĩ ana humo hi myhyrinymyrẽtsa. Ata zuba siakbatsa mynasihyrizikpowy. Iwaze sinini tsimykaranahaze batu mytsaty tsimykaranaha — O katsa mypunihikrẽtsa tsimaha — iwa batu mypetu mysopyk. Ihumo zuba mypunihikrẽtsa iwa Deus nimyhyrinymyryky. 10 Ata pokzi hi kytsa nimybakyzykynahaze nimytsumuẽhĩkĩ iwatsahi tsikwaknaha. Iwaze katsaktsa:
— O atahi mymytsumuẽhĩekik iwaze ihumo myspirikporẽtsa — tsimykaranaha. 11 Ikiahatsa niwatihi Deus bo mytsyhyryze tsimypamykysonahaktsa! Mytsyhyryze Deus bo tsimypamykysonahaze Deus mymytsumuẽhĩkĩ. Isapyrẽnikia ty mybo nyny my. Myhumo tsimypokzitsiukrẽta iwaze kytsa ipe:
— O myzo Pauro tuktsa humo niwatihi sihumo tysipokzitsiki, ikia zuba tsamysapyrẽta — maha. Iwa kytsa sizubarẽtsa Deus humo sakurẽtsa maha.
Pauro ta soho humo meky watu nikara.
12 Iwaze mypetu mysopyk katsaktsa wasani tsimykaranaha, Deus humo wasani mysopyk. Ikiahatsa humo hi tsimypokzitsiukrẽtsa iwatsahi mykurẽtsa. Deus humo ahabo simypokzitsirẽtsa batu ahabo zuba tsikykaranaha. Deus mymytsumuẽhĩkĩ iwatsahi wasani tsimyzurukunaha ana humo hi mykurẽtsa.
13 Iwatsahi ahabo tsiwatahakanahaze ihokdahabara ty tsikykaranaha ipiktsĩhibara ty zuba tsikykara naha tsimyspirikponaha. Abaka iwa ape iky hỹ tozeka ja tsimyspirikpo 14 Ikiahatsa tsikaeni zuba mysoho humo tsinymyrynaha. Uta hi: — Aibani tsinymyrybabanahaze myhumo ahakurẽtsa — iwa mozihikik. Sesus Kiristu mypehakatsa myziksizoze myhumo ahakurẽtsa mywatsa ahahumo mykurẽtsa.
15-16 Niytahi utakta ahabo mytsaty ikykaraze iknakozore tsihikik Masedonia bo moparakze:
— O Masedonia bo moparakze Korĩtio ezektsa bo mynakozore. Myziksizoze niwatihi Korĩtio ezektsa bozo my. Nawa petok babaha sibo mynakozore iwatahi mysihyrinymyryze sakurẽtsa. Sudeja bo my zeka piktsumuẽhĩnaha — iwa mytsaty ikykara. 17 Anasoho ty ba ziky. Ana humo hi tsipiksapybyikinaha. Ahaokze ka — O Pauro hawa sa mykara batu ihyrinymyry. Batu ispirikpo batu imysapy — tsimaha. Iwa kasoho humo mytsaty tsimykaranaha. 18 Iwa batu ba my. Deus ba zikmyspihikbata, Deus ta wasape zuba mykara. Uta kino niwatihi batu mybarapetu kasopyk. Wasape mykara iwata wasani mykara. Deus ana humo hi tsihyrinymyrẽta. Ikiahatsa batu tyso:
— O Pauro hawa motsaso zeka wasani ja mykara — Iwa batu tyso. 19 Utakta Deus wasania ty Sesus Kiristu soho ahabo iktsasoko. Timoteo, Siras ahatsa katuk Sesus Kiristu Deus tse babata ziknatsasoikiknaha. Hawaha isoho ty tsiktsasonaha wasani ana harere humo hi wasape my. 20 Deus mype:
— Hawa tisapyrẽna my pahasapywyky — my. Sesus Kiristu humo hi imysapyrẽna ty mybo nyny my. Katsaktsa:
— Hawa haty Deus mybo nitsasoko atsatu wasani mykara. Iharere mybo tsizubarẽna. Kiristu humo zuba iharere bo yhỹ mynakara. Iharere baba zuba. Iwa kytsa sizubarẽtsa bo tsimytsasonaha. Iwatsahi kytsa hi: “O Deus tsamysapyrẽta” — mykaranaha. 21 Deus hi mymytsumuẽhĩekik. Katsaktsa ikiahatsa kino niwatihi Kiristu tyryktsa tsimoziknaha ana humo hi nimywatawy. 22 Mynaro mynamy humo tsipiwatahanaha iwatsahi kytsa mynamy humo sihyrinymyrẽtsa. Iwatahi Deus hyrikoso mytuk mynapykyryk Deus tihi: — Asaktsa kahyrytsa — mykara. Deus hyrikoso mytuk mynapykyryk zeka iwaze usa isapyrẽnikia ty mybo nyny my.
23 Deus okze ahabo motsasoko. Iokpyrykytatu batu. Ikiahatsa bo mynakozore zeka pahabetsakak. Pahabetsakak zeka ahasukatsihikrẽtsa tsimoziknaha. Iwatahi batu ahabo zuk. 24 Ikiahatsa botu Sesus harere bo hyỹ tsimykaranaha. Katsaktsa batu ahapehatsitsa, tsipahatsumuẽhĩ tsihikiknaha. Sesus harere bo hyỹ tsimykaranaha zeka ihumo ahaspirikporẽtsa ana humo hi tsipahatsumuẽhĩkĩnaha, iwatsahi ahakurẽtsa tsimoziknaha.