43
Va Tatara nia Tamasa pude Harupu Puleni sari Nana Tie
1 Agoi Zekopi, e Zihova pu tavete igo si agoi si zama vura,
agoi Izireli, Asa pu va podaka igo si agoi si kamahire zama vura guahe:
“Mi lopu matagutu, ura Arau harupu vagi pule nigo si agoi;
Arau na tioko vagi igo pa pozamu, na Taqarau si agoi.
2 Pana ene nuquru gua si goi koari na kolo lamana,
si kote koa turaṉa igo Arau;
meke pana ene nuquru gua si goi koari na ovuku,
si lopu kaqu lodu si agoi.
Pana ene nuquru gua si goi pa nika,
si lopu kote kina si agoi;
sa halalana si lopu kote huruṉu koa goi.
3 Ura Arau se Zihova, sa mua Tamasa,
Arau si Asa sapu Hopena pa Izireli, sa mua Hinarupu;
variponi nia Rau si pa Izipi pude holu vagi pule nigo,
gua tugo sari Kusi meke Siba pude vagi pule nigo.
4 Sina arilaemu si goi koa Rau,
meke sina tataru nigo meke va lavatigo Rau,
ke kote variponi ni Arau sari pude harupia sa mua tinoa.
5 Ke mi lopu matagutu, ura Arau korapa koa turaṉigo;
kote turaṉa maeni Rau sari mua koburu pa kali gasa rimata
meke varigara pule ni pa kali lodu rimata.
6 Kote zama si Rau koari pa kali gede, ‘Va vura mae i!’
meke koari pa kali matao, ‘Lopu tuqe puleni,’ gua.
Turaṉa mae ni sari tuqu koreo pa seu,
meke sari tuqu vineki pa vina betona sa popoa pepeso,
7 doduru pu ta pozae na tie te Zihova si arini,
arini pu taveti Arau pude na vinahesiqu,
arini pu va podaki Arau meke va evaṉi.”
8 Turaṉa vurani sarini pu koa matadia ba behu,
pu koa taliṉadia ba nuli.
9 Varigara mae ni sari doduru butubutu,
meke madi koa pa keke vasina sari tie.
Esei koari dia beku na korotae ni si hire
meke tozi va kenue nia gua sapu kote ta evaṉa vugo?
Va mae i sari dia tie va sosode pude tozia sapu toṉoto dia, sapu gua,
pude boka avosia ri kaiqa meke zama, “Uve, hinokara dia.”
10 Zama vura se Zihova, “Gamu sari Qua tie va sosode,
Gua na qua nabulu si gamu sapu vizatia Rau,
pude mi gilana Au meke va hinokara Au,
pude mi gilania sapu Arau mo telequ sa Tamasa.
Pa kenuqu si loke Tamasa si koa,
meke lopu kote koa tugo si keke pa mudiqu.
11 Arau, uve Arau, mo se Zihova,
meke loketoṉa pule sa Hinarupu ba Arau mo.
12 Arau korotae nia sapu kote ta evaṉa, meke atu harupu igo meke helahelae vura nia,
Arau, meke lopu kaiqa tamasa karovodi pule pa vari korapa mia.”
Zama vura guahe se Zihova, “Gamu sari Qua tie va sosode, sapu Arau eke mo sa Tamasa.
13 Uve, podalae koari na totoso pukerane si Arau mo sa Tamasa.
Loke tie si kote boka harupu pania si keke tie pa limaqu.
Sapu tavetia Rau, si loke tie kaqu boka hobe ia,” gua.
Ta Rupaha pa Babiloni sari Tie Izireli
14 Hiera si zama nia e Zihova,
sa mia Hinarupu, Asa mo sapu Hopena pa Izireli:
“Pa laemia gamu, si kote na qeto minate si garunu la nia Rau pa Babiloni,
meke turaṉa goreni sari doduru tie pa Babiloni guana tie govetedi,
koari na vaka sapu va titie hola ni rini.
15 Arau se Zihova, sa mia Tamasa Hopena,
sapu va podakana sa Izireli, Arau sa mia Baṉara.”
16 Hiera gua si zama nia e Zihova,
Asa pu tavetena sa siraṉa sapu karovo, ene lulia gamu gua pa kolo lamana,
sapu ene gua pa korapadi rina kolo nomadi,
17 pu turaṉa vurani sari na totopili varipera tadi pa Izipi,
sa qeto minate meke sari doduru nana tie varipera,
meke la eko dia vasina, lopu pude tekulu pule hokara,
ta ivu va mate guana zuke vaka.
18 “Ba mi muliṉini sari vivinei koadi;
mamu lopu vivinei lamo ni sari ginugua ele holadi.
19 Doṉo la, na tiṉitoṉa vaqurana si tavetia Rau kamahire!
Isa, ele podalae sia; vea, lopu dogoria gamu?
Na siraṉa si tavetia Rau pa qega
meke na tototolo koari na pepeso kaleanadi.
20 Ari na kurukuru pinomo pa soloso va lavata Au,
sari siki pinomo meke na duduru si kote va lavata Au,
sina va vura poni kolo Rau pa qega
meke na tototolo koasa pepeso kaleanana,
pude poni napo sari Qua tinoni ta vizatadi,
21 saripu taveti Rau pude Qua telequ
pude arini kote zama vura nia sa vinahesiqu.
Sa Tinavete Sea Tadi na Tie Izireli
22 Agoi Zekopi, ba lopu hite tioko hata tinokae si agoi koa Rau,
agoi Izireli, lopu hite mabo hokara si gamu pa laequ Rau.
23 Lopu paleke mae ni gamu sari na mia vinukivukihi uququ sipi
babe va lavata Au gamu koa ri kaiqa vinukivukihi pule.
Lopu va mamata ni gamu vinariponi huiti Rau
babe va mabo gamu koari na tinepa oto huda humahumaṉa lea Rau.
24 Lopu hite holu poni Nau oela humaṉa lea gamu si Arau
babe va qetu Au koa ri na vina uququ deanadi rina mia kurukuru sapu ta vukivukihi.
Ba va mamata Au gamu koari na mia sinea;
meke va malohoro Au koari na mia tinavete kaleadi.
25 Arau, uve Arau eke si Asa pu vulasa pani
sari mia sinea, koasa laequ mo Telequ,
meke lopu balabala pule hokari Arau sari mia sinea.
26 Aria mada viliti varigara nia sa ginugua hie,
mada varipitu nia;
ego va sosodea sapu toṉoto mia si gamu.
27 Sa tamamia kenuna tavetena sa sinea;
sari na mia tie tuturaṉa si hoqa pa sinea tugo.
28 Ke kote va kurekure i Rau sari mia hiama koasa Zelepade,
meke kote vala nia Rau se Zekopi pa tinahuara
meke se Izireli si kote tava sisirei.