44
Telena Zihova mo sa Tamasa
1 Ba kamahire si mu avoso mae, Zekopi, Qua nabulu,
agoi Izireli, sapu vizata igo Arau.
2 Hiera gua si zama nia Arau e Zihova, pu tavete igo si agoi, pu va podakigo pa tiana sa tinamu,
meke Arau kote toka nigo si agoi:
Mu lopu matagutu, Zekopi, Qua nabulu,
agoi Izireli sapu vizata igo Arau.
3 Ura kote zoropo nia kolo Rau sa pepeso memehana,
meke sari tototolo si kote ene pa pepeso popana;
kote zoropo vura nia Rau sa Maqomaqoqu koari na mua koburu,
meke sa Qua minana si kote koari na tutimu.
4 Kote toa va leana si arini guana duduli pa pepeso masuruna,
guana huda pa taqele leana.
5 Keke tie si kote zama, ‘Arau si te Zihova’;
keke pule si na tutina e Zekopi si asa kote guni pule nia;
meke keke pule si kote kuberia pa limana, ‘Te Zihova’,
meke vagia sa pozana e Izireli.
6 Hiera gua si zama nia Arau Zihova,
sa Baṉara pa Izireli meke sa Tie Vata Rupaha Tie, se Zihova Tadi na Qeto Minate:
Arau sa kekenu meke sa mumudi;
loketoṉa pule Tamasa si koa ba Arau mo.
7 Ke esei pule si gugua Arau? Mani tozi vura nia.
Mani zama vura nia meke va dogoro nia pa Kenuqu
sa si ta evaṉa seunae gua vizati Rau sari na Qua tie pa pukerane la,
meke na sa si kote mae pule,
uve, mani tozi vura nia sa si kote ta evaṉa vugo repere.
8 Mi lopu neneqara; mi lopu matagutu.
Vea lopu Arau tu na tozi vura nia si hie meke zama va kenue nia pukerane sia?
Gamu sari Qua tie va sosode. Vea, koa nana pule keke Tamasa gugua Arau?
Lokari, loketoṉa pule si keke Patu Hihiu; lopu gilania pule Arau si keke.”
Tava Sisire sa Vinahesi Beku
9 Doduru pu tavete beku si loke laedi beto,
meke sari tiṉitoṉa va arilaena i rini si loke laedi.
Arini pu hoke zama poni si behu;
loketoṉa gilania si arini, na variva kurekuredi.
10 Esei ponia kineha sa tamasa huporona meke tavetia sa beku,
sapu loketoṉa vagi nia sa?
11 Asa meke sari tie gugua asa si kote tava kurekure;
saripu peqopeqo si loketoṉa ba na tie mo.
Vekoi madi mae varigara beto madi tozia sa dia vina hinokara;
na kote kamo matagutu meke kurekure mo.
12 Sa tie tavetavete pa aeana si vagia sa si keke kukuru aeana
meke vala nia sa koari na patu leradi;
meke podalae sekea sa meke va vura nia kineha sa,
lilohia sa lamae pa doduru nana ṉiniraṉira.
Sa tinavete si kamo nia ovia tu sa meke malohoro;
lopu napo kolo si asa meke podalae mabo.
13 Sa kamada si pada ia sa sa huda.
Kuberia sa koasa huda sa kineha;
beto si peqo ia sa meke rausu ia
meke va vura ia sa sa kineha tie.
Va tolavaena ia sa sa kineha tie
pude mani ta veko pa nana hope.
14 Maho gore nia sa sa huda sida,
babe vizata vagia sa huda saeparasi na oaku.
Va toa ia sa koari na huda pa hiqohiqo,
babe letea sa sa huda paeni meke sa ruku va toqolia.
15 Na huda si sutuṉu nia nika na tie:
kukuruna si pude maliha nana,
meke pude kina nana bereti tugo.
Ba kukuruna si peqo nia tamasa tu sa, meke vahesi ia;
tavetia sa si keke beku meke kokotuṉu la tu koa sa.
16 Kukuruna sa huda si halala pa korapa nika;
vasina si tavete gana ginani si asa,
kina ia sa sa gana masa kurukuru meke hena va deṉa.
Meke maliha nana tugo si asa meke zama,
“Kei, maṉini va leana; toa va leana hola sa nika.”
17 Koasa huda koa holana si peqoa sa sa tamasa, sa nana beku;
kokotuṉu gore si asa koa sa meke vahesi ia.
Varavara la si asa koasa meke zama,
“Harupu au, agoi sa qua tamasa.”
18 Loketoṉa si tumae nia rini, loketoṉa si gilania rini;
sari mata dia si tuku, ke lopu boka dodogorae,
sari monana dia si tuku ke lopu boka gilagilana.
19 Loke tie si noso paki meke balabala,
loke tie si tumatumae meke gilagilana pude zama,
“Kukuruna si suṉa nia nika rau;
sapu tavete nia bereti arau,
meke kina nia masa kurukuru sapu hena ia rau.
Vea, kaqu tavete nia keke tiṉitoṉa kaleana hola tu arau koasa kukuru huda sapu koa holana?
Kaqu kokotuṉu gore la ia tu rau si keke kukuru huda?”
20 Deṉa pa ginani sapu ta kina pa eba sa tie, na bulo kokohana si turaṉa va sea ia;
lopu boka harupu pule nia, babe zama,
“Vea, lopu na koha mo sa beku pa limaqu hie?”
Zihova, sa Tie Kurikuri, meke sa Hinarupu
21 “Mu balabala i si hire, agoi Zekopi,
ura, agoi Izireli sa Qua nabulu.
Arau tavete igo, meke agoi sa Qua nabulu;
agoi Izireli, si lopu kaqu muliṉi nigo Rau.
22 Ele givusu pani Rau sari mia sinea guana lei,
sari mia sinea sapu murimuri guana kovele pana munumunu.
Mi kekere pule mae koa Rau,
ura Arau harupu vagi gamu.”
23 Agoi na maṉauru, mu kera qetuqetu,
mi kukili vala beto gamu na pepeso, sina rupahi e Zihova sari pa Izireli.
Mi poraka vura mae pa kinera, gamu na toqere,
gamu na hiqohiqo meke doduru mia hudahuda,
ura e Zihova ele harupia se Zekopi,
meke ṉedala vura mae si Asa pa Izireli.
24 Hiera gua si zama nia e Zihova,
sa mua hinarupu, pu va podaka igo koasa tiana sa tinamu:
“Arau se Zihova,
Arau tavetedi sari doduru tiṉitoṉa,
Arau nadoro vura nia sa maṉauru,
Arau repaha vura eke nia sa popoa pepeso.
25 Arau va kokoha i sari na vina gilagila tadi na poropita kokohadi, pude lopu gorevura vugo na repere,
meke va doṉo guni ni na tie pekipekidi sari tie matemateana.
Arau huari sari na vina nonoga tadi na tie gilagilana,
meke iliri lani pa dinuviduvili.
26 Arau tavete vura ni sari zinama tadi na Qua nabulu,
meke va gorevura i sari na kinorokorotae tadi na Qua tie paleke inavoso,
pu zama nia sa popoa Zerusalema, ‘Kote koa pule ia tie,’
koari na vasileana pa Ziuda si, ‘Kote ta kuri pule,’
meke sari na vasina ta huaradi si, ‘Arau kote tavete pulei,’
27 pu zama koari na kolo lamana, ‘Mi popa,
meke kote va popa i Arau sari mia tototolo.’
28 Arau zama nia se Saerasi, ‘Asa sa Qua sepati,
asa kote va gorevura i sari doduru pu hiva ni Arau,
kote zama guni nia sa sa vasileana pa Zerusalema, “Mani ta kuri pule si asa,” kote gua,
meke koasa Zelepade, “Mani ta kuri pule sa Zelepade,” ’ ” gua se Zihova.