16
Ta Hukata se Zeremaea pude Vari Haba
1 Meke kamo mae sa zinama te Zihova koa rau:
2 “Lopu kaqu varihaba si agoi meke vagi koburu koasa popoa hie.”
3 Ura hiera gua si zama nia e Zihova pa guguadi ri na koreo na vineki pu podo koasa popoa hie meke gua tugo sari na barikaleqe sapu tinadia rini meke sari palabatu sapu tamadia rini:
4 “Kote mate si arini pa minoho sapu kaleadi hola. Loke tie kote kaboi babe pomunu ni, ba kote guana remoremo si arini pa pepeso. Kote mate si arini pa vedara meke soṉe, meke sari tinidia si kote na ginani tadi na kurukuru pa galegalearane meke na kurukuru ṉame pa popoa pepeso,” gua.
5 Ura hiera gua si zama nia e Zihova: “Mu lopu nuquru pa vetu haqohaqoana; lopu la besu babe va sare, sina ele vagi pania Rau sa Qua minana, Qua tataru nabuna, meke Qua tataru variva taleosae koari tie hire.
6 Tie nomadi meke hitekedi si kote mate koasa popoa hie. Lopu kote ta pomunae babe ta kaboe, meke loke tie kote va bakora pule nia babe neri va golugolu pa tinalotaṉa.
7 Loke tie kote poni ginani pude va manoti sarini pu kaboi sari pu mate, be tamadia sia babe tinadia, meke loke tie kote poni napo pude tokani.
8 Mu lopu nuquria sa vetu vasina korapa inevaṉa si arini meke la habotu pude hena na napo.
9 Ura hiera gua si zama nia Arau Zihova Tadi na Qeto Minate, sa Tamasa pa Izireli: Pa mia totoso meke pa matamia si kote va noso ia Rau sa hegere na qetu meke sa mamalaiṉi tadirini pu varihaba koasa popoa hie.
10 Pana tozi ni goi koa rini sari doduru pu gua hire meke nanasa igo arini sapu, ‘Na vegua ke kaqu va raza ni gami tinasuna noma hola tu e Zihova si gami? Na sa si tavete va kaleania gami? Na sinea sa si tavete va sea ia gami koe Zihova mami Tamasa?’
11 si mamu tozi ni sapu zama vura guahe se Zihova, ‘Ura na kilu Au ri na tamamia, meke luli rini sari votiki tamasa meke vahesi rini. Kilu Au rini meke lopu kopu ni rini sari Qua tinarae.
12 Ba sari mia hahanana gamu si kaleadi hola ni sari tamamia. Doṉo la sapu ve tasuna gua sari bulomia sapu luli gamu, meke lopu va tabe Au si Arau.
13 Ke kote gona vurani gamu Rau koasa popoa hie meke la pa keke popoa sapu lopu gilania gamu babe sari tamamia, meke vasina kote nabulu ni gamu sari kaiqa votiki tamasa boṉi na rane, meke lopu kote tataru hokarani gamu Rau.’ ”
Sa Pinule pa Tinaraovo
14 Zama pule se Zihova, “Gua ba, sari rane si korapa mae, totoso sari tie si kote beto tokotokoro pa pozaqu Arau sa Tamasa toana, pu turaṉa vura ni pa Izipi sari tie Izireli.
15 Na kote tokotokoro si arini koa Rau sa Tamasa toana, sapu turaṉa pule ni sari na tie Izireli koa sa popoa pa kali gede meke koari doduru votiki popoa pule vasina pu hurakatae lani Rau si arini. Ura kote vagi puleni Rau meke veko pule lani koasa pepeso pu poni nia Arau koari na tiatamadia.”
16 Zama pule se Zihova, “Ba kamahire si kote tioko vagi tie habu si Arau, meke kote la habu vagi si arini. Beto asa si kote hata vagi tie hukue si Arau, meke kote la hukue vagi pa doduru toqere na toa meke koari na bae patu.
17 Na dogoro betoi Rau sari doduru dia hahanana; lopu tome si arini koa Rau, meke sari dia sinea si lopu paere pa Kenuqu Rau.
18 Kote va kilasi Rau karua totoso hola ni sari na kinaleana taveti rini meke sari dia sinea, sina ele va bonia rini sa Qua popoa koari na kineha variva malederedi sapu lopu siṉodi meke va siṉi nia beku kaleanadi rini sa Qua tinago.”
Na Vinaravara Rinaṉeraṉe te Zeremaea
19 Zihova, Agoi sa qua ṉiniraṉira meke qua vasina sapu ta gobana,
qua tometomeana pa totoso tinasuna,
sari butubutu si kote mae koa Goi koari vina betobeto popoa pepeso meke kote zama,
“Loketoṉa si tagoa ri tamamami ba kobi tamasa kokohadi mo,
beku loke laedi meke loke ginugua leadi si vagi rini koa arini.
20 Boka tavete dia tamasa teledia sari tie?
Uve, ba lopu na tamasa si arini!”
21 “Gua ke kote va tumatumae i Arau,
kamahire kote va tumatumae ni Arau sa Qua ṉiniraṉira meke binokaboka.
Meke tiqe kote tumae nia rini sapu sa Pozaqu Arau si e Zihova.”