17
Sa Sinea meke Vina Kilasa te Ziuda
1 Zama se Zihova, “Na sesala aeana kubere ni rini sari sinea te Ziuda,
sa livona sa sesala si koa ia daemani,
ta kubere si arini pa ola bulodia ri na tie
meke pa kikihodi ri na dia hope.
2 Ari dia koburu ba tumae ni
sari dia hope meke sari beku huda kinehana sa barikaleqe se Asera
pa kaurudi rina huda aqoro meke koa ri na batu toqere.
3 Sa Qua toqere koasa popoa meke sari mia likakalae na tinagotago
meke sari na vasina vahesi beku koa rina toqere
si kote vala ni Rau koari na kana, pude na dia vinagi pa vinaripera,
koa gua koari mia sinea pa doduruna sa popoa.
4 Koari mia sinea telemia si kote ta vagi palae
sa mia tinago sapu ele ponini gamu Rau.
Kote va pinausu gamu Rau si gamu koari mia kana
pa popoa sapu lopu tumae nia gamu,
sina ele va huruṉu ia gamu sa Qua tinaṉaziri,
sapu kote sulu eko ninae rane.”
Kaiqa Votivotiki Zinamazama
5 Hiera gua si zama nia e Zihova:
“Mani ta levei si asa pu raṉe la pa tie,
asa pu kalavarae pa masa pude ṉiṉira,
meke sa bulona si taliri va seu koe Zihova.
6 Kote guana keke huda hitekena si asa pa qega
sapu loke lineana dogoria.
Kote koa si asa koari na patupatu pa qega,
pa vasina siṉia soloti meke loke tie si koa ia.
7 Tamanae sa tie pu raṉea se Zihova
pu kalavarae pa doduru bulona koa Sa.
8 Kote guana huda si asa sapu ta lete kapa pa kolo
sapu va karoso tata pa tototolo.
Lopu kote matagutu si asa pana kamo sa maṉini;
kote buma eko lamo sari elona.
Pa totoso dada si lopu kote balabala mamata si asa
meke kote lopu makudo vua si asa.
9 Sa bulo si sekesekei hola ni doduru pule
meke tasuna salaṉana.
Esei boka tumae nia sia?
10 Arau, Zihova, si hata la pa korapana sa bulo
meke viliti sari binalabala,
pude pia ia sa tie koari nana hahanana,
luli gua pa nana tinavete.”
11 Guana kokorako sapu opo va puzaka vovoto sapu lopu asa hira ni,
si sa tie sapu tagotago pa poata hinikodi.
Pana lopu ele komiha sari vuahenina si kote murimuri palae sari poata,
meke pa vinabetona si kote na tie pekipekina mo si asa.
Tepa Tinokae se Zeremaea Koe Zihova
12 Zama se Zeremaea, “Na habohabotuana baṉara tolavaena, vasina tavahesi si Goi pa pinodalaena,
si sa vasina hopena pa nada Zelepade.
13 Zihova koa Agoi mo si raṉe atu Izireli,
ba doduru pu kilu Igo si kote tava kurekure.
Arini pu taliri va seu koa Goi si kote guana kinubekubere sapu ta kubere pa kavuru meke murimuri palae,
sina ele kilu Igo rini si Agoi Zihova,
sa bukahana sa kolo tinoa.
14 Zihova, Mu salaṉau pude maqu ta salaṉa qua;
Mu harupau pude maqu ta harupu qua,
ura Agoi mo sapu vahesi Igo arau.
15 Na zama au rina tie si rau,
‘Avei sa zinama te Zihova?
Mani tava gorevura kamahire!’ gua.
16 Zihova, arau si na Mua sepati koari na tinoni meke lopu hiva beto nia rau sa tinavete asa;
gilania Mua sapu lopu okoro nia rau pude va kamo ni tinasuna sari tie hire.
Doduru pu zama ni sa beruqu si tumae beto ni Goi.
17 Lopu kote mae va holoqoru au Agoi;
na Agoi sa qua tometomeana pa rane tinasuna.
18 Mu vekoi sarini pu hiva va mate au pude madi kurekure,
ba kopu nau pude lopu kurekure;
Mu vekoi si arini pude madi matagutu,
ba kopu nau pude lopu holoqoru.
Va kamo ni koa rini sa rane tinasuna;
va tomo rua ni tinahuara.”
Sa Kinopuna sa Sabati
19 Hiera gua si zama nia e Zihova koa rau: “La mamu turu pa sasada tadi na tinoni, vasina nuquru vura sari baṉara pa Ziuda; la turu tugo koari doduru sasadana sa popoa Zerusalema.
20 Zama guahe koarini, ‘Avosia sa zinama te Zihova, gamu na baṉara pa Ziuda meke gamu doduru tiena sa popoa Ziuda meke doduru pu koa pa Zerusalema pu nuquru gua koari sasada hire.
21 Hiera gua si zama nia e Zihova: Mi balau pude lopu palepaleke mamata pa rane Sabati, babe palepaleke nuquru gua koari sasadana sa popoa Zerusalema.
22 Lopu va vura pinaleke koari mia vetu babe tavetavete pa rane Sabati, kopu nia sa rane Sabati pude na rane madina si asa, gua sapu garunu ni Arau koari tiatamamia.
23 Gua ba lopu hite va avoso si arini babe va taliṉa mae meke korodia va avoso babe va tabei sari Qua tinarae.
24 Ba Arau Zihova si zama vura, mi kopu valeana si gamu meke va tabe Au, mi lopu palepaleke nuquru gua koari sasadana sa vasileana nomana pa rane Sabati, ba kopu nia gamu sa rane Sabati pude madina si asa meke lopu tavetavete koasa rane asa.
25 Be gua asa, si sari na baṉara pu habotu koasa habohabotuana baṉara te Devita si kote nuquru gua koari na sasadana sa vasileana lavata turaṉae koari na dia koimata. Arini meke sari dia koimata si kote koi pa dia totopili varipera meke pa hose, turaṉae sari na tie pa Ziuda meke arini pu koa pa Zerusalema, meke sa vasileana lavata hie si kote koa ia tie ninae rane.
26 Sari tinoni si kote mae gua koa rina vasileana pa Ziuda meke koari na vasileana hitekedi pa vari likohaena Zerusalema, pa pinaqaha popoa te Benisimane meke sari hubidi ri na toqere pa kali lodu rimata, koasa popoa toqetoqere pa Ziuda meke pa popoa Neqevi, meke kote paleke vinukivukihi va uququ, vinariponi huiti, na oto huda humaṉa lea, meke va vukivukihi zama leana la koasa Zelepade te Zihova.
27 Ba be lopu va tabe Au gamu pude va madia sa rane Sabati, meke palepaleke totoso nuquru gua koari na sasadana sa popoa Zerusalema pa rane Sabati, si kote katua Rau sa nika sapu tasuna vina matena koari na sasada pa Zerusalema meke kote kamo la koari na vasidi ta gobadi na ṉiṉiradi tanisa.’ ”