5
Pablo kwian ta gbe kwian mo ta gbadale
chage ngerugu Cristo alin ole
Ngeru che ulita chegu tañachuge diali age Moisés chadalla alin gerule kare ene che tañachugu che Chubenu, che chegu age geru e gerule kare kwian lle boanga chege age mo mauña alin kare, che me ñadu joge siere ege. Che ene gire Cristo che jun siere age enege, sugedu chege Cristo alin giti che Chubenu. Nege ba ulita mo ta gbadale diali Cristo ole me mo ta blite chege age nge kare naskuni Moisés chadalla alin gerule kare. Cha Pablo cha gerule ba ulita ole, cha takalin ba tachke geru ai giti cha kle gerule ba ole, ba ulita bai kaire kle mo ta gbe age naskuni mo kwara tkangenga suia gai, e giti ba kle tañachuge ba no trate Chube gwa giti ba ulita Chubenu, ba ulita age ene naskuni, Cristo agedu ulita ba kle chuge ngwadi ngwale ulita, ngwale ama agedu ba ulita alin. Cha gerule ba ole kwaite, ba bai kaire mo kwara sidri tkangenga kwian israelita kle age kare, ba tañachuge e giti ba no trate Chube gwa giti, ba age ene gire ba chegedale age diali ulita Moisés chadalla gerule kare. Ba bai kaire kle mo ta gbe age ulita diali Moisés chadalla alin gerule kare, e alin giti ba kle tañachuge ba Chubenu ba chege no trate Chube gwa giti, ba mo ta gbe ene Moisés chadalla alin ole ba agali kle mo ta gbe joge siere Cristoge ba kle Cristo gai lle ngwale kare, e giti ba ta kle chege sugekare Chubege, me ñage suge bage Chube no ba ole Chube ta agekalin no ba alin. Agwa che ulita bai kaire Chubenu ulia che Cristo gau ulia mo tale, Chube Oña kle che ta gbe suge Cristo alin giti che chege no trate Chube gwa giti ene che me chege jiske Chube gwage che agedu me no giti. Che mo ta gbu Jesucristo gai ulia, che amanu, malen che me tañachugadale mo kwara sidri tkangenga o me mo kwara sidri tkangenga, e giti che me tañachugadale, e ngwale, e me che ta blite joge siere age me noge Chube gwage, agwa Jesucristo alin che ta blite age no Chube takalin kare, che mo ta gbadale ulia Jesucristo gai mo tale diali, ene Jesucristo giti che chege diali mo ta dbe no Chube ole kaire daba ulita ole. Ba ulita geru Jesucristo giti gau gwangea gire ba mo ta gbu chage no no geru e ulia ole, ¿nege boidu mine ba ulita ole? ¿Mineade ba ulita kle mo ta gbe joge siere geru uliage? Chube agali ba ta gbu geru ulia Jesucristo giti gai ulia, nege Chube me kle ba ta gbe joge siere geru e amañage, agwa ba kle geru gweale na nganake keruchuge, e giti ba kle mo ta gbe joge siere geru uliage. Geru ngwale gweale kle chage ba ulitaske salengwli levadura tugenga harinaske kare. Levadura harinaske harina gbe sie ulita, ene kaire ba geru ngwale gweale keruchuge ba mo ta gbe bedre bedre geru ege, gire bdagli ba geru ngwale ulita gai gire ba joge siere geru ulia ulitage. 10 Kle boi ene bedre bedre ba ulitaske geru ngwale giti, agwa chage uñale trate Cristo che Chugagwalla be ba ta gbe naskuni geru uliadi cha kle gerule kare ba ole, ene ba me tañachuge nganake geru ulia giti. Kwian bai kaire kle ba ta gbe geru na nganake me uliadi kwian ene alin Chube be ji gbe.
11 Cha daballa cha ibotea ulita Cristo giti, cha takalin suge bage cha giti, cha me kle chage gerule kwian Cristo gau ulia ole mo kwara sidri tkadalenga kaire kwian israelita ulita kle age kare ene ama Chubenu. Agwa cha me kle geru dbe ene kwiange. Cha chage gerule kwian Cristo gau ulia ole mo kwara sidri tkadalenga kaire, cha gerule ene kwian ole ene kwian israelita me age me no cha ole geru giti. Uñale bage cha me kle gerule ene, cha kle gerule daba ulita ole Cristo agedu kruge alin giti kwian ulita Cristo alin gai ulia ene ama Chubenu. Cha kle gerule ene giti kwian israelita kle ta dbe skochie chadi kle mo ta gbe chage age me no cha ole diali. 12 Kwian bai kle chage geru dbe baske mo kwara sidri tkangenga ene kwian chege Chubenu, ama alin geru mo kwara sidri tkangenga ma kweri geru na ulitage. ¿Mineade kwian ene agali me mo kwara tkenga ulita?
13 Ba ulita cha daballa cha ibotea Chubenu, Cristo giti Chube ba ulita gau mau alin, Cristo alin giti ba Chubenu, ba ene ba me mo ta gbadale age ulita Moisés chadalla gerule kare. E me gerule ba agedale me no ulita ba takalin kare, me ene, ba mo ta gbadale age trate ulita Chube takalin kare ta dbale no daba na Chubenu ulita ole ba mo ta gbale daba na chudaboi diali Chube takalin kare. 14 Chube gerua degaba unsuialin gerule:
“Ba mo ta dbadale no daba na ulita ole salengwli ba no mo ole naskuni kare.”
Geru e ma kweri che alin Chube gerua degaba na ulitage. Ba age no ene daba na ole ba mo ta gbe age mo ole kare, gire ba kle age ulita Chube gerua ulita kle gerule kare. 15 Ba me mo ta gbe no daba ole Chube gerua degaba unsuialin gerule kare, ba ulita mo ta gbe daba gutenga ongoru ongoru geru giti, gire bdagli ba ulita be chege sugekare daba nage ba mi ñage chege ule diali gerudi.
Kwian talla gballa ulita tañachuge me no,
Chube Oña kwian ta gbe tañachuge no
16 Cha gerule ba ulita ole, Chube Oña kle ba tale, ba chagedale diali Chube Oña ba ta gbe kare, ba ulita chagedale ama takalin kare diali, ba me mo chugadale ngwadi age me no ba takalin kare. 17 Ba age me no ba takalin kare, ene ba me kle age no Chube Oña takalin kare. Ba age no Chube Oña takalin kare, ene ba me kle age me no ba takalin kare. Ba ulita ta e kare boke molen, ta e boke kle kira bate ba tale, gdaite kle kira bate gdaite ole diali. Uñale ba ulitage Chube Oña ta ba ta gbakalin age no, ba ta agekalin no ama takalin kare, agwa kaire ba ta agekalin me no ba takalin kare. Ba ulita ta boke ene molen, malen ba agali gballa me ñage mo ta gbe age no, Chube Oña alin giti ba ñage age no. 18 Ba ulita Chube Oña chuge ngwadi ba ta gbe age no ama takalin kare, ene ba me tañachugadale age Moisés chadalla gerule kare. 19 Kwian ulita bai mo ta gbe age me no diali kle mo ta gbe age ai kare:
Muinga onbre mo chuge ke giti.
Kwian tañachuge geru sugaska giti, age tañachuge kare.
Kwian onbre me ngwedi muinga na na ole, muinga me ngwedi onbre na na ole, kwian ene me ibule mo giti.
20 Kwian lle dodaba kodi gai mo chubeale.
Kwian ta gdaboke me no molen age me no diali daba na ole che dolla Satanás kirallaske.
Kwian ta chege jainchke diali daba nadi.
Kwian ta dbe kira bate diali daba na ole.
Kwian semale daba ole lle ulita giti.
Geru mebitabi kwian chege ta skochie tanre.
Kwian geru jinade daba na dollale daba ole ene daba ta blite, ene ama takalin daba ulita gerule no ama giti alin.
Mneite mo gbe sugekare daba na ulitage tañachuge ama alin allabi no, bedre bedre geru me ulia giti ama daba na gai chege ama ole.
21 Kwian ta dbe tañachuge me no dabadi lle dabanu giti, ama takalin lle dabanuge mau alin.
Kwian mo ta dbe lle gage jai diali.
Kwian chui ollade me no, kwian age ulita me no ama takalin kare.
Kaire kwian lle na tanre me no dodade.
Cha gerudu ngeru kare ba ole nege cha gerule kwaite ba ulita ole, bai kaire chage diali age ulita ai kare lle ai cha chada degangu giti kare, kwian ene me kle Chube gai mo Chugagwallale, ama mi toi Chube ole diali.
22 Kwian mo chuge ngwadi age kwian takalin kare, kwian ene be age me no diali, agwa kwian Chube Oña chuge ngwadi age ama tale, Chube Oña kwian ene ta gbe ai kare:
Chube Oña kwian ta gbe mo ta dbe no daba na ulita ole.
Chube Oña kwian ta gbe nga suga no ole.
Chube Oña kwian ta gbe suga no me tañachuge boi daga ngwale giti.
Chube Oña kwian ta gbe jage ulita boi daga ngwalege me skochie me skwatige.
Chube Oña kwian ta gbe gerule ta no ole daba na ole.
Chube Oña kwian ta gbe age no daba na alin daba na chudaboi.
Kwian gerule be age gweale daba na alin, Chube Oña kwian ene ta gbe age ulia kwian gerudu kare.
23 Chube Oña kwian ta gbe me mo gbe ma kweri daba nage.
Chube Oña kwian ta gbe me mo chuge ngwadi age me no kwian takalin kare.
Chube Oña kwian ta gbe age no ulita ai kare. Geru kwian nu gbaba kwian ulita alin nga dba ai giti kwian ulita chagedale geru kle gbaba gerule kare, geru e ni gdaite ñage gerule age ulita no ai kare dollale. 24 Kwian bai kaire Jesucristo gau ulia, kwian ene Jesucristonu, kwian ene mo talla ulita ngeru me no mliunga, ama me mo chuge ngwadi age me no dare ulita ama takalin kare ama agedu ngeru kare. 25-26 Nege Chube Oña kle toi che tale, ama alin ñage che ta gbe chage no, che Chube Oña chugadale ngwadi che ta gbe age ama takalin kare. Che Chube Oña chuge ngwadi che ta gbe age ama takalin kare ama che ulita ta gbe toi no ule modi, ene che me toi sugaska modi. Che me tañachugadale mo tale: “Cha ma no daba na ulitage.” Che me mo ta gbadale geru jinade dabage daba gbagda skochie. Che me ta dbadale tañachuge me no dabadi lle dabanu giti, che me ta dbale che takalin lle dabanuge mau alin, che mo ta dbale tañachuge no daba ulita alin.