4
Buuyan baa hunayan
1 Ay yee ka laasaabu ka dii tooɲerey kul kaŋ ga tee waynaa cire.
Borey kaŋ biney ga hẽe mundawey ga doo,
bineyaynandikaw sii no i se.
Gaabi sii kala ngi tooɲekey se,
bineyaynandikaw sii i se.
2 Woo se ay ga nee kaŋ borey kaŋ buu ka bisa duu gomni ka bisa baahunantey kaŋ ga bara.
3 Amma boro kaŋ mana hayandi jina duu gomni ka bisa ihinkaa kul, zama a mana dii goy futaa kaŋ ga teendi waynaa cire.
Hunanzamyan baa taabiyan
4 Ay dii mo kaŋ boro ga nga boŋ farandi ka goy, ka goy ka boori, ka gar nga cinaa ga a ga canse. Woo mo sii nda addalil sanda hew gaarandiyan.
5 Lakkal jaŋante mma nga kabey koli nga gandoo ra,
a ga nga boŋ hasara.
6 Boro ma duu kabe mee foo hunanzamay
bisa boro ma duu kabe mee hinka taabiyan ka hew gaarandi.
Boro hinka baa boro foo
7 Ay yee koyne ka dii haya yaada waynaa cire
8 kaŋ ti boro kaŋ nga foo no, a sii nda boro,
a sii nda arma wala izʼaru, amma woo kul, a si fay nda ka goy.
A si wasa alman ra, ba nda a ga nga boŋ hãa ka nee:
«May sabbu se ay ga goy kʼay boŋ farandi takaa woo?»
Woo mo sii nda addalil, goy yaamu no.
9 Boro hinka baa boro folloku, zama ngi fara bagaa ga boobo.
10 Zama nda affoo kaŋ, affaa gʼa tunandi,
de boro kaŋ nga foo no, nga bonaa ti, boro tana sii no kaŋ gʼa tunandi.
11 Takaa din da, nda boro hinka ga kani cere bande,
i ga hargu kaa cere ra,
boro kaŋ nga hinne no, taka foo nda a ga hargu kaa nga ga?
12 Boro ga hin ka kaŋ boro folloku ga, nda boro hinka no, i ga kay a se.
Karfu hinza kaŋ didijandi cere ra, ngi dunbuyanoo ga šendi.
Zanka lakkalkoyni baa aru žeena lakkal jaŋante
13 Zanka kaŋ ga talka, amma a goo nda lakkal
baa kokoy aru žeena lakkal jaŋante kaŋ si maa hoyray koyne.
14 Zama a ga hin ka hun kasaa ra ka laama,
ba nda a hayandi talka aru žeenaa laamaa ra.
15 Ay dii baahunantey kul kaŋ ga dira waynaa cire
ga hanga zankaa kaŋ ga kaa ka huru affaa dogoo ra.
16 Jamaa woo kaŋ jine a goo hinnaa si bayrandi,
woo kul wey kaŋ ga kaa dumaa ga si duu a ra ɲaali.
Zama woo kul sii nda addalil sanda hew gaarandiyan.
Lakkal daŋ ni dira takaa se Irkoy jine
17 Lakkal daŋ ni dira takaa se nda nʼga koy Irkoy hugoo ra,
man ka haŋajer baa ma lakkal jaŋante sargari kaa.
Zama i si bay kaŋ ifutu no ngi goo mʼa tee.