5
1 Masi cahã ka šelaŋ,
ni binoo masi cahã ka haya har Irkoy jine,
zama Irkoy goo beenaa ra, ni woo goo laboo ga.
Woo maaganda se ni šenney masi boobo.
2 Almuraadu boobo ga kate boro ma handiri,
takaa din da lakkal jaŋante, nga šenni boobey no mʼa cebe.
3 Nda nʼna meefur zaa Irkoy se, masi gay manʼa kaa,
zama lakkal jaŋantey si kan a se,
meefuroo kaa kaŋ nʼnʼa zaa.
4 Masi meefur zaa baa ma ne
mʼa zaa ma goro manʼa kaa.
5 Masi naŋ ni miɲoo ma ni kul tee zunubante,
masi nee Irkoy dontokaa se kaŋ ni nka dere ka meefur zaa.
Macin se ni šenney ga Irkoy futandi
ka ni kabe teegoyey hasara.
6 Zama nda handiri boobo kokoroo ti yaada,
takaa din da no nda šenney boobo.
Adiši hunbur Irkoy.
Hini futawey
7 Nda ni dii ganda kaŋ ra i ga talka šiita, i si yadda cimi nda šerretaray ga, hayaa masi ni boŋoo haw,
zama jineboro foo kul, jineboro foo goo a boŋ,
amma boro goo no kaŋ goo i kul boŋ.
8 Nafaw no ganda se a ma duu kokoy
kaŋ ga faari goy daŋ jine.
Alman manʼti kala haya kaŋ ga bisa
9 Boro kaŋ ga baa nooru si kungu a ra,
boro kaŋ ga baa alman, woo kaŋ a ga duu a si wasa a se.
Woo mo sii nda addalil.
10 Nda alman boobo, nga ŋaakey ga boobo,
macin ti albahaa kaŋ koyoo ga duu a a ra
nda manʼti ka dii a nda nga moɲey?
11 Goykaw jirboo ga kom,
a ma ŋaa kayna wala iboobo.
Almankoyni alman boobaa gʼa ganji a ma jirbi.
12 Ay dii haya futu beeri foo waynaa cire
kaŋ ti boro ga alman marga kaŋ ga kate ni ga bone.
13 Goy yaamu no kaŋ ga almanoo din derandi.
Haya kul si cindi izʼaroo kaŋ a nʼa daŋ aduɲɲa ra kaboo ra.
14 Takaa kaŋ nda a fatta ɲaŋoo gundoo ra gaa koonu,
takaa din da nga nda a ga hun aduɲɲa ra.
Nafaa kaŋ a duu a nga goyoo ra,
kaboo si koy nda a ra haya kul nga bande.
15 Woo mo manʼti kala haya futu beeri.
A ga koy nda takaa kaŋ nda a kaa,
adiši man nafaa kaŋ se boro ga taabi hew se?
16 A ga nga zaarey kul wii kubawey ra,
ka torro, nda binehẽenay, nda dukuri marga.
17 Hayaa kaŋ ay dii a kaŋ ga boori, a ga hennay adamize se manʼti kala a ma ŋaa, a ma haŋ ka dii gomni nga taabiyanoo kul ra kaŋ a gʼa tee waynaa cire, aloomuroo ra kaŋ Irkoy nʼa noo a se, zama woo ti nga bagaa.
18 Boro kul kaŋ Irkoy nʼa noo alman nda arzaka, kʼa noo a ma huna i ra, ka nga bagaa zaa, ka ɲaali nda nga goyoo, woo manʼti kala Irkoy nooyan.
19 Kullihinne Irkoy ga adamize binoo too nda ɲaali, a si hongu boobo kaŋ nga aloomuroo si kuu.