Yaasawey citaaboo
Citaaboo fahamandiroo
Yaasawey citaaboo manʼti kala yaasay dumi-dumiyaŋ, iboobaa kokoyoo Sulaymaana kʼi tee. Lakkalkoyni fooyaŋ mo hantumey goo a ra sanda Agur, nda Lemuyel. Lakkal šenniyaŋ bara Yaasawey citaaboo ra. A ga boro hoyray, a ga boro kaa fondo laala ga, a ga boro daŋ fondo henna ra. Hayey kaŋ ga a ga šelaŋ ti: takaa kaŋ nda goy henna ga teendi, nda fuyyantetaray, nda adamizetaray, nda ceretaray, nda ize aladabuyan, nda suuri, nda talkataray, nda hiijay, nda alman, nda hinnari, nda borohennataray. Amma i kul ibeeroo manʼti kala Irkoy hunburaa: «Abadantaa hunburaa ti bayray šintinoo.» (zamnaa 1.7).
Citaaboo zamna kokorantaa kaŋ ti 31 si šelaŋ kala woy alkadarante ga.
Yaasawey citaaboo woo ga hoyrayyaŋ noo kaŋ boro kul kaŋ gʼi gana, boraa ga tee boro kaŋ dira takaa ga boori, a ga tee boro kaŋ ga kan Irkoy se.
Yaasawey citaaboo ga hin ka zamnandi kanje taaci:
1. Lakkalkoynitaray nafaa ga beeri (1—9)
2. Kokoyoo Sulaymaana yaasawey (10—29)
3. Agur lakkal šenney (30)
4. Lemuyel ɲaa hoyrawey (31)
1
Citaaboo addaliloo
1 Dawda izʼaroo Sulaymaana kaŋ ti Izirayel kokoyoo yaasawey ti wey.
2 Hantumoo addaliloo manʼti kala ka borey noo lakkal nda hoyray,
hala boro ma faham lakkal šenni se,
3 ka duu hoyray kaŋ ga bayray noo,
nda šerretaray, nda cimi, nda goy šerrante,
4 ka boŋbiyey carmandi,
ka aru sooga noo bayray nda miileyan.
5 Lakkalkoynoo ma haŋajer, a ga tonton nga bayraa ga,
boro kaŋ ga faham ga duu hoyray.
6 Woo ra a ga wan yaasawey nda šenney feeriyanoo,
ka wan lakkalkoyney šenney nda ngi albatawey.
7 Ka hunbur Abadantaa ti bayray šintinoo,
saama mma lakkal nda hoyray tee yaada.
8 Ay izʼaroo, haŋajer ni baabaa hoyraa se,
masi wanji ni ɲaa cawandoo,
9 zama i ga fatala alhormante ka ni boŋoo taalam,
i ga tee hiiri ni jindoo ra.
10 Ay izʼaroo, nda zunubanteyaŋ ga baa ngi ma ni fafagay,
masi yadda!
11 Nda i nee: «Kaa ir bande,
ir ma lanba borey se ka wiiya,
ir ma kumsay hirri borey se bila addalil kaŋ mana taali kul tee,
12 kʼi dii i ga huna sanda alaahara takaa,
ngi kunturey kul ga zunbu a ra sanda boroyaŋ
kaŋ ga zunbu saaraa guusoo ra.
13 Ir ga duu haya hay šenda dumi kul,
ir gʼir hugey too nda alganiima.
14 Huru ir ra,
woo ra ir kul ga sawa nooroo ra.»
15 Ay izʼaroo, masi hanga ey,
ni cewey dii ngi fondaa ga,
16 zama cewey si zuru kala ka koy goy laala tee,
i ga cahã kuri munyan ra.
17 Zama yaada ti ka kumsay hirri
haya kul kaŋ goo nda fata moɲey cire.
18 Borey wey, ngi boŋ hunday se i ga kumsay daŋ,
i mma gum ka ngi hunaroo halaci.
19 Woo ti haya kaŋ ga tee boro ga kaŋ ga baa zanba alman,
zanba alman ga nga koyoo hundoo kaa.
Lakkal ga ciya borey se
20 Lakkal ga wurru lolawey ra,
a ga nga jindoo jer farrey ra.
21 A ga kaati lolawey cere kubaydogey ra,
koyraa miɲey jere, a ga šenniyaŋ har ka nee:
22 «Boŋbiyey, hala waati foo no war ga fay nda ka baa war boŋbiitaraa?
Hala waati foo no ɲooɲokey ga fay nda ka ɲooɲoyan boonay?
Hala waati foo no lakkal jaŋantey ga fay nda ka konna bayray?
23 Wa willi kate ka maa ay tejeyaney.
Ay gʼay hundoo zumandi war ga,
ay ga war bayrandi ay šenney.
24 Zama ay ciya, amma war wanji,
ay nʼay kaboo šerre, boro kul manʼa daŋ assal,
25 war nʼay hoyrawey kul fur,
war mana kula ay tejeyaney ra,
26 agay da, ay ga haaru waati kaŋ bonaa zunbu war ga,
ay ga war ɲooɲo waati kaŋ hunburay kaa war ga,
27 waati kaŋ hunburay kaa war ga sanda hewkur,
waati kaŋ bonaa kaa war ga sanda hew beeri,
waati kaŋ binemaray nda lakkaltunay kaa war ga.
28 Waatoo din i ga ciya ya ne, amma ay si tuuru,
i gʼay ceeci, amma i si duu agay.
29 Zama i konna bayray,
de mo i mana Abadantaa hunburaa zaa.
30 I mana baa ay hoyraa,
i nʼay tejeyaney yebebe,
31 woo se, i ga duu ngi dira takaa alhakoo,
ngi boŋ hoyrawey gʼi kungu.
32 Zama boŋbii, nga tureyanoo no mʼa wii,
lakkal jaŋante alhuzun jaŋaa no mʼa halaci.
33 Amma boro kaŋ ga haŋajer ya ne ga goro alaafiya ra,
a ga goro lakkalkanay ra, a si hunbur bone.»