2
Lakkal ga boro hallasi ifutu ra
1 Ay izʼaroo, nda nʼnʼay šenney dii,
nda nʼnʼay yaamarey dii,
2 nda nʼna haŋa kayandi lakkal šenney se,
nda nʼna ni binoo hangandi fahamay bande,
3 nda cimi, nda nʼna lakkal cee,
nda nʼna ni jindoo jer fahamay se,
4 nda nʼgʼa ceeci sanda nzorfu kaaray,
nda nʼgʼa ceeci sanda alman,
5 woo ra nʼga faham haya kaŋ ti Abadantaa hunburaa,
nʼga duu Irkoy bayraa.
6 Zama Abadantaa no ma lakkal noo,
nga miɲoo ra bayray nda fahamay ga hun.
7 A ga koyjineyan jisi boro šerrantey se,
koray no borey se kaŋ ga dira laadirtaray ra,
8 ka fondo hennawey hawgay,
ka nga ganakey lakkal.
9 Woo ra nʼga bay haya kaŋ ti šerretaray,
nda haya kaŋ ti cimi, nda haya kaŋ ti goy šerrante,
nda ka dira fondo kul ra kaŋ ga gomni noo.
10 Waati kaŋ lakkal huru ni binoo ra,
waati kaŋ bayray ga tee ni binoo ɲaaloo,
11 miileyan ga ni hawgay,
fahamay ga ni koroši
12 ka ni feeri ka ni kaa fondo laala ga,
ka ni kaa borey ra kaŋ ga šenni šiirandi,
13 nda borey kaŋ ga fondo šerrantey naŋ
ka hanga fondo kubayanteyaŋ,
14 nda borey ra kaŋ ga ɲaali nda ifutu teeyan,
kaŋ ga yafarhã nda dabari šiirante futay,
15 ngi kaŋ ngi fondawey ga šiiri,
ngi diradogey ga golbi-golbi
16 ka ni hallasi woy waani ra,
ka ni kaa woy kaŋ nʼsʼa bay ra, kaŋ ga šenni kaanay.
17 Woy no kaŋ ga nga soogataray cere kaanaa fur,
kaŋ ga dirɲa amaanaa kaŋ goo nga nda nga Koyoo game.
18 Nga hugoo si šiiri ka koy kala buuyan here,
nga fondawey si koy kala bukawey here.
19 Boro kul kaŋ koy a here si willi kate koyne,
affoo kul si duu hunayan fondaa.
20 Woo ra nʼga hanga boro henney fondaa bande,
nʼga boro šerrantey fondawey hawgay.
21 Zama boro šerrantey ga goro gandaa ra,
boro laadirantey ga cindi a ra,
22 amma boro laaley ga hun gandaa ra,
zanbantey ga dogandi ka hun a ra.