13
Huba Mokoikoi Yane
(Mat. 24:1-2; Luk. 21:5-6)
1 Allahre ei mom-mom imae na kaban sele kiyaera Yesus naei maibaleke ewate mo, na moisa orowate ro mbai yae weunge, “Guru, nda imae obe hebele ereibo! Na ruka foi sele ahunewate, yalaeinyeboke hele!”
2 Yesus yae weunge, “Ndi imae obe kaban-kaban mokainyehake hebate ereyae? Nanemene kerenaisonde ruka hi ran hi ranne ahungkoi hononate.”
3 Zaitun elune ikate. Yesus nuweuboke na ijoko nebei Allahre ei mom-mom imae na kaban sele kiyaere erewole mo, Petrus, Yakobus, Yohanes, Andreas, nenaei mo Yesusre hinainye,
4 “Maere yakaimebona are eleukoke nanemene makei hee yae enaibende? Nebei naeise rahe iwau ma rilende?”
5 Yesus yae weumi, “Kayaa hebembe, ro miyae hiwa ame-ame yae wabenayengkombe bele.
6 Ro miyae helen menate ame-ame yae elenate, ‘Reyae Wali Ondofolo, Allah yae ukeufe mekale.’ Nebei yo ro miyae nekai sele ame-ame yae wabenaimile.
7 Buloo fela kulun relennele nane merau a yo-yo buloo fela kaenainyebonde naei emborombe yane buhae ohokoijae. Nda wanen nemene inyaibonde hele. Nebeibe nebei huba mokoikoi ya ban.
8 Nda kani kelana yo yan hi bele yo yan hi bele fela relenainyele. Onyeu, moni mai makeinye-makeinye benate, nebeibe huba mokoikoi ya namman, miyae hiyaunge fare honondere kole wanen ma bekore hubanainyele naei hengkelenbe raungehike.
9 “Nebei hee kayaa bele yae hebembe, rabuhine ban Rare ehakoyei yo yae mare ikilenayengkombe, yo riyare kinyenayembombe, mai wali ijoko erenayengkombere. Ei mom-mom imaene erahuae yae bonayembe. Rangkele mbainye nekandene yaungayembombe gubernur yoni-yoni bene ondofolo yoni-yoni bene embe. Nebei hee yae mon rowembe Raei a foi faeu foi wemmile.
10 Nane merau huba mokoikoi ya emei yae Raei a foi fae foi nda kani kelana nanemene hungaimile hele.
11 Mai wali ijokore erenayengkombere ikilenayembene, emelengkombe are buhae ohokoijae. Nebei hee Allahle Roh yae u bene yakanembe hului a yae elengkombe. Nebei a elele waei a ban, Allahle Roh waei euwa walora elele.
12-13 Rare hakonsebombe aerene ro miyae helen mare ikele konayembe. Ro mbai na aka baekere enaisombonde naeise kelai nenende, nane hului mbai naeko yae na kelure. Kelu omi hiwa naeko nenakere angkaei oboroiboi konate, ro miyae hiware ungaimile honate. Nebeibe kena yae heraungayende Raei elele are hila rabo halenayende ro miyaere hole eremolombonde.
14 “Nebei ya mende heene ‘ro nansau fele kiyae’ heere naisake anuwaunge mensebenunde. Nda ro Allahle bene na beko hele nane merau Allahre ei mom-mom imae na kaban sele kiyaene u mekai u nene ma mokonnebonde. Nebei hee Yudea kanina ro miyae elure mo habelemembe hele. (Mayae nda homofae kombe yo isaeyembombe!)
15 Nebei ro nansau beko helen mokombondene, imae kelaeunge nekaube yo mai rambun roweise imaere eijae.
16 Hekene mokonate yo na malo roweise imaere ebukeisi eijae.
17 Nebei hee bendene, emale miyae bele wayeu miyae bele beko hele hubanainyele.
18 Manse hele yembonde bele naeise ebeli bombe,
19 rabuhine ban beko hele rambun benate. Nebei beko bako hubanainyehinde Allah nda kani kela mokoubokera meke nda hee nda waline eyeiboi mo, nane merau benen eyeiboi mo honenende.
20 Allah yae eleukoke holona holere molommibonde aerene bekore hubanainyehinde ya fofo mokonnebonde. Nebei mekai omokoiboi yae walire nekande yo hi yae ha yae wali orowei.
21 “Nebei hee yae hiwa yo yae elenate, ‘Ereibo, Wali Ondofolo ndina nare, ndana nare!’ Mare ungayembena, nebei are na hele yae eleijae.
22 Rabuhine ban, na hele ban wali ondofolo holona bele na hele ban yenjo kayaayo bele menaiyakambonde, rambun emere-emere mokonate, Allah yae eleukoke holonare ame yae wabenaimihinde balenatere, nebeibe na hului ban.
23 Namman eyeiboi yae, Reyae na bere holo yae nanemene isaeyaemale. Nebei mekai yae mauwa kayaare hebembe.
24 “Allahle homofaene ya beko huba mokonnekonde naeise nda a moloukoke,
‘Hu hehe wende ouben yembonde,
oko na hehe kebengkonde,
25 findelau yoni-yoni yakura balenate onate,
yakuna elae wake Allah yae kusemmikonde.’
26 Nebei hee yae ro miyae erenaisele Reyae, Allahle bokora mekale ro miyae uware yeubokale Kiyae, elae wake bele one hengko bele kitenaisebonde mangko eisa merele.
27 Nebeise malaikat ufemile enate Allah yae eleukoke wekeumi holona yore nda kani kelana makeinya-makeinya nemene arilenaimihinde.
28 “Ara none mo isaeyembe u bene yarombe. Yahudi kanine ara no na maensa-maensa ereiboyate rimi-rimi ibewate bele onsi efawewate belene mo, neyae isaeyeiboyate rolonsan wenjendere yabe nobeungekoke.
29 Nebei sului mbai nda a wamale wanen mae erembe benatena, mayae isaeyembombe Reyae benen merele ya nobeungekoke hele.
30 Na helebe mare wamale, nda hokolo namman ehereiboi mo nda a elale nemene menaibende.
31 Yaku bele nda kani kela bele enainundembonde, nebeibe Reyae wamale a na hibi mo hononayende.
32 “Na huba mokoikoi ya hului hu hului raungehikere surgana malaikat yoni-yoni bele, Reyae Allahle Kelu bele, nde nde nanemene isian mo, Allah nembai ken naeisaei.
33 Nebei yare mayae isianne kayaa-kayaa hebembe.
34 Kayaare hebate u mekai nda wanen mae a ahunemabon: Ro mbai kolore enderene, naei imae einye kaliare mokate yore naeise naeise waheumikoke. Romau kayaana kiyaere a elae bele rorounge foi yae hebende.
35-36 “Nebei mekai Reyae berehonde merelene ijongkune honombe yae hubaimakonde belene mayae kayaa hebembe. Rabuhine ban nebei imae rowa berehonde wanen Raei merele hee isian nekaube, huae yae, reniai yae, ojo konate hee yae, ya hembonde yae.
37 Nda a faeu mare wamale hului mbai ro miyae nemene ufemiyende, ‘Kayaa bele yae mo hebembe mai wali mokaungehake yae nekemembe!’ ”