12
Israel apanawa warere Reobeam onawa enei
Warere Reobeam bola debama Sikem bedewe alen Israel apanawa uduudu sape onioniantoia me wisepio itupuo warereu segalepi. Nebat otopa Ieroboam warere Solomon sawalene alene Isibtiwa wandia gagalo ema etene leulene wisen. Israel apanawa uaula me gagalowa wanaaubeiena wisepi, ita Ieroboam Israelwa uduudu do warere Reobeam mampe antone diane waienase, “E mamaa Solomon no nola saiwaia nenedie tane e dieeitana nola saiwa tekateka nenawo e atoawontato onianea.”
Tane Reobeam sipoamone wanase, “E ene aitane walama natadea diantopuo leutane mainawo wilena ita gagalola sipoa dialepa.” Mo epe etane ita ene antoiena.
Mo antoieno aupo Reobeam apana eiau mida warere Solomon inawaa wandio sausaia apanawa do gagalonton. Me mo waitaramone wanase, “Apana ema wimopuo ambi wape diamopa?”
Tane mo waienase, “Naita e apana saumoa meneempa mo dima waia asiasi dewasaa ita mo e atoawontopuo oniakasamoa.”
Ita Reobeam mo gagalou etene mai ruaulepona, me ene alene apana sanaau do gagalonton. Mo ipa me mu sosowa me sausaia apanawa. Me mo waitaramone wanase, “Ne ambi dewanteapa, apana waia ne nola tekateka wanamopa mai nola saiwaia ne mamana walamawe wanamodia rua wanamopa. Ne ambi wape diamopa?”
10 Ita apana sanaa me diane waienase, “Mo e dieiena, ‘Nola saiwa tekateka nenaa’ ita e mo diamoa,
‘Ne apana badowaia wainedina mai mamana rua. 11 Ne mamana sai debama enaleno awanelana tane ne sai osowesape enalepa. Me tai mampe epalen, tane ne tai gedaragedaraua mampe epalepa.’ ”
12 Walama natadea diantono Ieroboam ita apana uduudu me diamona rua leuntone wimoiena Reobeam gagalowa etapua baiwa. 13 Warere Reobeam apana eiau wasaubu gagalowa mai etapona, sa baiwa me badowa apana mampo gagalolen. 14 Ita me apana sanaa wasaubu gagalowa asiasi apana diamone wanase, “Ne apana badowaia, mai mamana rua! Ne mamana sai debama enalen tane ne e sai debamawaida enalepa! Me tai mampe epaledie tane ne tai gedaragedaraua mampe epalepa!”
15 Iawe God epe menasana rua segalen, sa baiwa warere apana aiau mai etaeta menasapona. Iawe God bola debama Silo perowetawa Aisa bedeweinta Nebat otopa Ieroboam mampe gagalolen. Me wana, Solomon otopa mampe apana oniamodia mukawa wadepiaubepi. Ita Iawe God peroweta Aisa bedewee wana rua segalen.
16 Israelwa uduudu warere mo gagalou etaeta dabualeno ewane me diane waienase,
“No ipa mai Iese otopa Dawid bedewea!
No mai me damba wainipona!
Israelwa, eno nuba bolambobolambo ana,
Dawid bedewea Reobeam meba apanawa oniamopi!”
Ita mo epe wane ene antoiena. 17 Ita warere Reobeam Israelwa Iuda bolawa debama bedewe waimoia me atowentono oniamodie.
18 Tane apana ebowa Adoniram Israelwa nola baiwa auweia me diamodie oniamodio nolantoi, mo warere Reobeam nolawa dewalala. Sa baiwa Reobeam me wanaubeno Israel apanawa mampo alen otamopie wimpuo me atowentopuo oniamopi. Tane mo seu mampe me bosaiena. Ita warere Reobeam tauwadea turaka pue mampe teiteinalala osowe odene waine Ierusalemwa alen. 19 Walama sawo ita odene tauma Israel apanawa einapue Ieroboam atowentone bola Iuda bedewe wanwanla Dawid bedewea do emalawoantoie waimoie.
20 Tane Israel apanawa Ieroboam Isibtiwae leulene wisena umanawa etane mo apana uduudu diamoieno auweiena. Ita mo me dieieno wiseno ituieno Israelwa uwa daitada uduudu oniamon. Tane Iuda damba os Dawid bedewea atowentono oniamon.
Ieroboam Iawe God adiananasan
25 Eparaim nosinosiwa bolau bedewe Ieroboam bola debama Sikem gonaalene bodene bedewe wandie. Bola sawo wadi uara enei. Me sape wandie ene alene bola debama Penuel gonaalene boden.
26-27 Tane walama dea Ieroboam wandie ema epe insedie, “Israel apanawa uduudu Ierusalemwa Iawe God duwa bedewe pue pulontompe sumpa baiwa antoi. Apana ema antoia, Dawid damba bedewea atowentopue nuau leusapuo mo apanau bola Iuda warerewa Reobeam mampentopu. Ita mo ne boneapue me dewasapuo ne aupana wadepie warerelepi.”
28 Sa baiwa warere aten apanawa do gagalonton dima dewasapu, ita me gold mampe kau inainamba rua kokoitau nata dewamon. Tane apana diamone wanase, “E Ierusalem awa aitile pokaida eteilana, e Israel apanawa, godila ema ewanee mapo Isibt bedewe banlaleno nolelana.” 29 Ita me kokoitau sa dewamona otene dea bola debama Betel bedewe itun ita da bola debama Dan bedewe itun. 30 Me epe dewaleno apana kadi dewasaiena. Apana nowadawo Dan bedewe kokoitau wadaposiwa baiwa anton.
31 Ita do Ieroboam wadapos bolawa wadi uarau iwa oso dewamon ita pirisi dan daitada bedeuwo sonabamone teamon. Mo ipa mai Liwai damba bedewea, dia.
Walama sawo Ieroboam warerelen Israel bedewe. Ita Reobeam warerelene Iuda bolawa oniedie. Tane Ieroboam warerelene waina enawa 17 waden. Reobeam warerelene wandia walamawe Iuda apanawa god lagawaau wadaposimoie ita Isibt apanawa wimone Iuda apanawa onau eneiena ita Iawe God duwa bedewe ita do warere duwa bedewe puraiwa eubu uwataubuida otene antoiena. Reobeam ita Ieroboam walama uduudu onantoie.
Tane Reobeam boleno aupawe me otopa Abia warerelen ita me bola Iuda warerewalene waina enawa natadea waden. Me do Ieroboam onawa enedie. Reobeam boleno aupe me otopa Asa warerelene Iuda onien. Ita Asa warerelene waina enawa 41. Me warere euda Iawe God wadaposisadie ita Iuda apanawa godiu lagawaa wadaposimoia onawa enedie. Asa walama uduudu Israelwa warereu ebowa Baasa do onantoie. Ita Asa boleno me otopa Iosapat bola Iuda warerewalen.
Ita bola Israel bedewe Ieroboam otopa Nadab, me warere kadiwaida mo mida me wawe wimone warerentoiena mo do kadiuida. Nadab warerelene bola Israel oniena enawa nata dianton. Tane warere Baasa enene warere Nadab ita do apana isiwa Ieroboam duwa bedewe wanwanlala bomon. Baasa bola Israel warerewalene waina enawa 24 wadeno bolen. Ita ema aupe me otopa Ela warerelene ita Israel onieno enawa nata dianton. Tane me sorodiawa ona ualeidia apanawa ebowa Simri enene me bosane aupe meba warerelen. Ita ema aupe wiki dea dialeno Israel apanawa sorodiau ona ualeidia ebowa Omri warerelen. Tane Simri meba enelene bolen. Ita Omri warerelene waina enawa 12 diantono otopa Eiab warerelen. Ita Eiab warerelene waina enawa 22 dialen.
12:28 Ekisod 32.4