8
+ Uthughun khavɨn Sol ivhɨre ikha bighan khavɨn ganigha kamaghɨusue, a indera.
Sol Kraisɨn phorus tharsi phuvɨra mera afharavasi
Kha uthughun mee Stivenɨm mbɨsuesima ana aremi. Ana aremisima mee Jerusalemɨni iti Kraisɨn phorus tharsi phuvɨra mee mbɨsogha, othevir maghatɨsir meŋga amui. Kamagha amuisima, Kraisɨn phorus tharsi bar ara Judian distrigh ko Samarian distrighɨn gue. Uthughun khavɨn Iesusɨm mbɨsevisi gumasi Jerusalemɨni iti. Mauthughura gumasi Gotɨn apheeŋn iti tharsi, mee Stivenɨn khum nigha umoghɨ athɨgha phuvɨra aŋmɨusuava azii. + Kha uthughun Sol Kraisɨn phorus tharsi mee ikava, mee rafharavaghavhɨrei rɨpheni uvhuaghuvhuagha andar gua gumasi rako amisi ivhɨra mee nigha mee akuvagha rɨvɨnan khɨrthɨgha arɨsi.
Iesusɨm mbɨsevisi gumasir akamana aghuuŋ Judian distrigh ko Samarian distrighɨn ana ukurava arui
(Sapta 8.4--12.25)
Filip Samarian distrighɨn akamana aghuuŋ ukuri
+ Aresir gumasi rako amisi mee ma itirɨ uŋuimbar akaman aghuuŋ ana ukuri. Uthughun khavɨn Filip Samarian distrighɨn avhen itirɨ uŋuun mavɨn gua, Got nom ee niamɨusua mbɨsevisi gumaghan akamɨ ukuri. A gamgaaŋ iti bisigha amuima, nori akuvasi gumasi rako amisi nori aŋm mbɨzeva orasima, a rɨŋgavan maghatɨgha amuir othevigha amuima anda othuivima, mee andar garava ukuari ariigha bar inderaghavɨra aŋm mbarasi. + Mee Filivɨn garima a unduur maghatɨsir gumasi rako amisigha aphasasi tharsi vatosima, mee fhigha dɨɨva arava mee thamɨraghava akɨran zui. Gumasira avhɨrara usue rako afhari amɨrasi tharsi rako usue maghatɨsi tharsi ivhɨra nomthegha indera. Kamagha amuisima, uŋuun khavɨn amisi rako gumasi bari aŋgi iphui.
Saimon atomtorir gumaghan niaghagh
Gumaghan mavɨn izɨɨ Saimon, a fhomɨra Samarianɨ uŋuun ikha atomtorir maghatɨsigha amuima, Samarian gumasi rako amisi aŋn ganigha rɨŋgavan maghatɨgha amui. Ana mɨghasɨgha kamaghɨm mbɨŋgeeghi, “Khɨɨ gumaghan ikhɨv.” 10 Gumasir ikii koma gumasi rako amisir kɨni, mee Saimonɨn akamamba oraghaousua vhusvhusi. Mee kamaghɨm mbɨŋgeeghi, “Kha asaaŋn gamgaaŋ, aŋni izɨɨ Gamgaaŋn Bar Ikɨv, Saimon a ma gamgaaŋ.” 11 A uthusira avhɨrara atomtorir maghatɨsigha amuima mee andar garava, rɨŋgavan maghatɨgha amui. Bighan khavɨusua, mee aŋna akamamba oraghaousua vhusvhusigha aŋn gɨa arui. 12 Thighira Filip, a Got kha bisigha ativamirɨ uthughun akamana aghuuŋ ko Krais Iesusɨn izɨɨn akamɨ ukuri. Kamagha amuisima, gumasi rako amisi nɨghɨnɨghana aghavaghar Filivɨn akaman ikava, mee urue. 13 Mauthughura Saimon ivhɨra nɨghɨnɨghana aghavaghar ikava a ivhɨrou urue. Uthughun khavɨn Saimon Filivɨn gɨa arua garima, Filip rɨŋgavan maghatɨgha amuir othevi rako gamgaaŋn bisir ikiigha amuima anda othuivima, a rɨŋgavan maghatɨgha amui.
14 Uthughun khavɨn Iesusɨ mbɨsevisi gumasi Jerusalemɨni iti tharsi orasima, Samarian gumasi rako amisi Gotɨna akam nigha gɨvasima, kamagha amuisima mee Pita ri Jon amandasima aniiŋ memɨusua gu. 15-16  + Samarian gumasi rako amisi, mee Ikhɨv Iesusɨni izɨɨn uruegha, mee Gotɨnɨ Utum nisi phatɨ. Kamagha amuisima Pita ri Jon gua otogha mee Gotɨnɨ Utum niamɨusua, aniiŋ memɨusua Gotɨn phorugham mbɨŋgeeghi. 17  + Mauthughura aniiŋ Gotɨn phorugham mbɨkemigha, nona aghari ufhueghava men iphɨna athɨsima mee Gotɨnɨ Utum nii.
18 Mauthughura Saimon garima, Iesusɨm mbɨsevisi gumasi non aghari ufhueghava men iphɨna athɨsima mee Gotɨnɨ Utum nii. Mauthughura ana aŋgɨro ovɨsi nigha aniiŋga anɨŋga, kamaghɨm mbɨŋgeeghi, 19 “Aŋgo gamgaaŋn khav ivhɨra na raniiŋtima, khɨɨ nona afharimuu ufhegh thavɨn iphɨra thɨghtima, a Gotɨnɨ Utum niaŋga.”
20  + Pita kamagh aŋm mbeŋgeeghi, “Nɨɨna aŋgɨr ovɨsi nɨɨn phorughɨvɨra maghatiighemi. Got a bighan aghuuŋn mɨn anɨɨndir bigha thav aŋgɨr ovɨsir uvhuesi a? Bar phatɨ! Bighan khavɨusua nɨɨ nona aŋgɨro ovɨsi phorughɨvɨra mbuŋŋue phatɨsir arivan maŋŋaŋga. 21  + Nɨɨn navana avhee Gotɨna arɨmasi rɨfhaaŋn inderasi phatɨ. Kamagha amuisima, nɨɨ Gotɨn iŋaaran avhen ikaami thughatɨs phatɨ. 22-23  + Khɨɨ nɨɨn garima, nɨɨn nav maghatɨghi, kamagha amuigha othevir maghatɨsi ivhɨra nɨɨ, ike. Kamagha amuisima nɨɨ nɨghɨnɨsigh ɨraghiva othevir maghatɨsi anda thaegh, Ikhɨvan phorughum mbɨkɨm. A ti nɨɨn navana avhen iti nɨghɨnɨsir maghatɨsi tharsi gɨna amaaŋga.” 24  + An aŋm mbɨŋgeema, Saimon aŋna akam ikara, “Aŋgo namɨusua Ikhɨvan phorughum mbɨkɨmtima, aŋgo mbɨkemisi bisi tharsi namba othuivam thughathɨgham phatɨghami.”
25 Pita ri Jon Ikhɨv aniiŋn akuruvasi bisir gunɨm mbɨŋgɨva, aŋna akamɨ ukuri. Gumughun aniiŋ nomthegha Jerusalemɨn gua, akamana aghuuŋ Samarian distrighɨnɨ uŋuimbar avhɨrara ana ukura zui.
Filip Itiopianɨ unuaghɨnan gumagh akaman aghuuŋn aŋm mbɨŋgeeghi
26 Ikhɨvan ensel Filivɨm mbɨŋgeeghi, “Nɨɨ sautɨn utuavɨn maaŋɨ, a Jerusalema thaegha gueghira Gasanɨ uŋuun oto. Utuavɨn khav gumasi iti phatɨsira aŋanan iti.” 27-28  + Kamaghɨn amuisima, a maghɨra zui. A utuavɨna arɨghan Itiopianɨ unuaghɨnan gumaghan mavɨa oto. A gumaghan aphan, a Itiopianɨ unuaghɨnan ativasira amighan aŋgɨr ovɨsir garir gumagh. Amighan izɨɨ Kandasi. Gumaghan khav Jerusalemɨn gugha Gotɨni izɨɨ ufhuegha nomthegha zii. A karisɨa apheragha, Gotɨna ambuuŋn gumagh Aisaian mbɨgharan gari. 29 Mauthughura Gotɨnɨ Utum Filivɨm mbɨŋgeeghi, “Nɨɨ maŋɨva karisɨn munavɨn aghan ikhɨɨ.” 30 Mauthughura Filip akhɨghavtɨgha gua karisɨn aghan gugha Itiopianɨ unuaghɨnan gumagha orasima, a Aisaia, Gotɨna ambuuŋn gumagham mbɨgharan gari. Kamagha amuisima Filip aŋna azaaghi, “Nɨɨ gari bighan khav nɨɨ ana ikeeŋsi o phatɨ?” 31  + Itiopianɨ unuaghɨnan gumagh ana ikara, “Khɨɨ manmaghɨra ikaaŋ ti? Thav nan niaghɨtima, khɨɨ ikeeŋgemi. Nɨɨ zɨvanaŋ nan phorugh raphera.”
32-33  + Itiopianɨ unuaghɨnan gumagh Gotɨm mbɨgharan itir akaar kharsir gari, “A sivsivɨn mɨn mee aŋm mbɨsoghousuava, ana nigha gu. Mee sivsiviirɨ uŋusira arɨsia rɨphɨrousuava amuima anda inɨmɨre iti. Kamaghɨra gumaghan khav, mee aŋm mbɨsoghousuava amuima, a phura inɨmɨre ikha bigha thavɨm mbɨŋge phatɨ. Mee bar aŋn amevagha, inderaghavɨra an osɨmndɨsiva oragha anda rɨkɨrisi phatɨ. Kamagha amuisima, a boorir phatɨ, manmagh aŋn niaghɨ ti? Mee an ikɨrana aghuuŋ gɨvasima, a nomthegha unuaghɨnan iti phatɨ.”
34 Mauthughura ɨnan gumagh Filivɨn azaaghi, “Nɨɨ na mbɨkɨm. Gotɨna ambuuŋn gumagh, a thɨɨŋn gunɨm mbɨŋgeeghi? A nombɨ mbɨŋgeeghi, o igharis tharsi vɨŋgeeghi?” 35  + Filivɨ ufhuaragha Gotɨm mbɨgharana avhen itir akaa kharsi vɨnɨŋgari vɨŋgɨ gua, Iesusɨn akaman aghuuŋn gun aŋm mbɨŋgeeghi. 36-37  + Mee utuavɨn gua, rɨmɨn mavɨ oto. Itopianɨ unuaghɨnan gumagh kamaghɨm mbɨŋgeeghi, “Nɨɨ gan, rɨmɨ khara. Khɨɨ thighira uruasa, bighan theghɨna thav nom nanɨ usuiraghti?” *
38 Mauthughura ɨnan gumagh karisɨnɨ usuisi gumagham mbɨŋgema, a karisɨ amuisima a utu. Mauthughura Filiv ri ɨnan gumagh rɨmɨna avhen gueghirɨsi, Filiv ana urue. 39  + Mee rɨmɨn ikeghava azenan zesima, Ikhɨvanɨ Utum uzuamɨra Filip nigha gu. Gumughun ɨnan gumagh nom Filivɨusua garava avheeŋi, a utuavɨn gua bari iphui. 40  + Mauthughura Gotɨnɨ Utum Filiv nigha gua ana athɨsima a gara nɨghɨnɨsi, “Khɨɨ thighira Asdotɨnɨ uŋuun oto.” A gua, uŋuimba bar andar akamana aghuuŋ ukura gua Sisarianɨ uŋuuno oto.
+ 8:1 Ap 7.58; 8.4; 11.19; 22.20 + 8:3 Ap 9.1; 9.13; 9.21; 22.4-5; 26.9-11; 1 Ko 15.9; 1 Ti 1.13 + 8:4 Mt 10.23; Ap 6.5; 11.19 + 8:7 Mt 10.1; Mk 16.17 + 8:15-16 Ap 2.38 Mt 28.19; Ap 10.48; 19.2 + 8:17 Ap 6.6; 19.6; Hi 6.2 + 8:20 Mt 10.8; Ap 2.38; 10.45 + 8:21 Sng 78.37 + 8:22-23 Dan 4.27; 2 Ti 2.25 Hi 12.15 + 8:24 Kis 8.8; Nam 21.7; 1 Kin 13.6; Je 5.16 + 8:27-28 Ais 56.3-7; Sef 3.10; Jo 12.20 + 8:31 Jo 16.13 + 8:32-33 Ais 53.7-8 + 8:35 Lu 24.27; Ap 18.28 + 8:36-37 Ap 10.47 * 8:36-37 Ikeeŋsi gumasir marsi kamagh nɨghɨnɨsi, akaman igharisi mav ivhɨra khagh iti. Filip kamaghɨm mbɨŋgeeghi, “Nɨɨ non navana avhen guisimbaaŋra nɨghɨnɨghana aghavaghar Iesusɨn ikhɨti, khɨɨ nɨɨ uruami.” Mauthughura ɨnan gumagh kamaghɨm mbɨŋgeeghi, “Khɨɨ nɨghɨnɨghana aghavaghar Krais Iesusɨn iti, a Gotɨn Otar.” + 8:39 1 Kin 18.12; 2 Kin 2.16; Ese 3.12-14 + 8:40 Ap 21.8