3
Sã Jesús quiato rerecua siqui turã
1 Acheẽ ñooño eã ño se re. Jesús quiato reaquiatu sacuã ño taɨco se, ɨ mose emo, eturãte ũquɨ̃.
2 Sã Jesús quiato rerecua riqui siqui turã mbeɨ. Mbia ñee eã sacuã ee. Sã ngũinisi mɨɨ ño nderequia. Sã eriqui ndua turã turã mbeɨ. Sã earacua tuchɨ riqui. Sã eriqui mbia isi turã turã mbia mo oso mose echuchúaa. Sã eriqui mbia mbaaquiatu quiatu aracua.
3 Sã eriqui quiacuayã. Sã eɨcuã ɨcuã eã mbeɨ riqui emo je. Sã eriqui oo tuchɨã mbae isiquia rese. Sã eriqui ɨco mingue.
4 Sã eriqui mbia uchuchua jenda rerequia turã. Sã eriqui nguiirĩ mbaaquiatu quiatu turã. Aba cheẽ mumbayã sacuã. Ɨ̃ nda eriirĩ eɨ̃ ñooño eã mbia je.
5 Nguiirĩ ndea chooño mose, Dios quiato reaquiatu turã aroneate.
6 Ae Jesús ɨcua ramote nae, Jesús quiato rerecua aroneate ũquɨ̃. Ũquɨ̃ mose ucuasu raã naa arõte. Eɨcuã arõte cote. Sã Satanás abe ucuasu raã naa ñɨmbɨɨcuã nonde no.
7 Sã Jesús quiato rerecua riqui siqui turã mbeɨ Jesús quiatoã abe je. Ɨ̃ nda diablo embɨɨrɨ̃ ɨrɨ̃ eã embɨɨcuã. Ɨ̃ nda Jesús quiatoã ñee turã mbeɨ erɨɨ̃.
Sã diáconos siqui turã
8 Diáconos je abe tacheẽ. Sã diáconos abe siqui turã. Sã eriqui ucheẽ mbuchebiã mbae raã nonde. Sã eriqui quiacuayã. Sã eriqui oo tuchɨã mbae isiquia rese.
9 Sã diáconos siqui eã tuchɨ mbae ɨcuã mo ndese. Sã Dios mɨɨ ndese quiatu eriqui beɨ. Sã Dios ɨcua tuchɨ.
10 Ae ra diácono nae, sã mbia mae na nguiatu erese nyii. Eturã mose mbia je, sã diácono ae cote.
11 Sã diácono ninisi abe riqui siqui turã mbia je. Sã mbia mbucheẽ ñee eã emo nɨɨ. Sã eriqui quiacuayã. Sã eriqui ucheẽ mbuchebiã mbae raã nonde.
12 Sã diácono ngũinisi mɨɨ ño nderequia. Sã eriqui nguiirĩ nderequia turã. Uchuchua jenda ja abe no.
13 Diáconos mbae raã turã turã mbeɨ mose, mbia ra eɨcua tuchɨ cote. Dios abe ra embuquirãcuã tuchɨ Jesucristo renei nenei sacuã mbia je.
Ae Dios saã nande je, ũquɨ̃ aba ɨcua ja aroneate raque
14 Seso jeɨse rete raque nderea. Seso eã moi ño aɨco nguiã co mbesa ndeje a.
15 Nde Jesús quiato rerecuarã irabo aquiatu sacuã ño aɨco nguiã ã mbesa ndeje a. Iglesia jenda rerecua irabo sacuã. Dios reco mbae rei iglesia. Iglesia quia rei Dios cheẽ nderequia tuchɨ mbia ja je.
16 Ae Dios saã nguia nande je nae, ũquɨ̃ aba ɨcua ja aroneate raque:
Dios que tu mbiarã íbii ra. Jesús, ɨ equia ee.
“Eturã tuchɨ” ɨ que Espíritu Turã erɨɨ̃ nda.
Angeles abe que mae erese ra.
Ae Jesús quiato nae, ũquɨ̃ ngue esenei senei mbia ataque je ra.
Mbia mangue chooñoa jenda ja que eɨcua ra.
Aquere que Dios equeraobe ibate cote ra.