3
مُنسَ شَ شّيرَيَ
مُنسَ بِتَنيِ يٍتِرٌ نَن نُ نَ مَدِيَن سّرّشّدُبّ رَ. مُنسَ نَشَ يٍتِرٌ شَ شُرُ سٍيٍ شَنِن وُلَ عِ يِرٍ مَكُيٍ، هَن عَ سَ عَلَ شَ فٍيَ شٌرٍبٍ لِ. مّننِ عَلَتَلَ شَ مَلٍكّ نَشَ مِنِ عَ مَ وُرِ بِلِ لَنمَدِ مَ، نَشَن رَدّشّشِ. مُنسَ نَشَ عَ مَتٌ، تّ نُ نَ نَ وُرِ بِلِ مَ، كْنْ وُرِ بِلِ مُ فَنشِ. مُنسَ نَشَ عَ قَلَ عَ يّتّ مَ، «ﭑ شَ ﭑ مَكْرّ يِ كَابَنَكٌ رَ، ﭑ شَ عَ كٌلٌن مُنقٍ رَ وُرِ بِلِ لَنمَ مُ فَنشِ.»
عَلَتَلَ تٌ مُنسَ تٌ عَ مَكْرْشِ وُرِ بِلِ رَ عَلَكٌ عَ شَ عَ عِفبّ، عَ نَشَ عَ شِلِ كٍلِقٍ نَ وُرِ بِلِ مَ، «مُنسَ، مُنسَ!» مُنسَ نَشَ عَ رَتِن، «ﭑ تَن نَن يَ.» عَلَ نَشَ عَ مَسٍن عَ بّ، «عِ نَشَ عِ مَكْرّ بٍ رَ. سَنكِرِيٍ بَ، بَرِ مَ عِ تِشِ يِرٍ سّنِيّنشِ نَن مَ.» عَ مَن نَشَ عَ مَسٍن، «عِ بَبَ مَرِفِ عَلَ نَ ﭑ تَن نَ، عِبُرَهِمَ، عِسِيَفَ، نُن يَشُبَ مَرِفِ عَلَ.» مُنسَ تٌ نَ مّ، عَ نَشَ عَ يَتَفِ مَكٌتٌ، بَرِ مَ عَ نُ فَاشُشِ عَلَ مَتٌقٍ رَ.
عَلَتَلَ مَن نَشَ يِ مَسٍنيِ تِ مُنسَ بّ، «ﭑ بَرَ ﭑ مَ حَمَ شَ تْورّ تٌ مِسِرَ بْشِ مَ. ﭑ بَرَ عٍ وَ شُي مّ عٍ شَ كٌنيِيَ كُي. ﭑ حّنفِ سَشِ عٍ شَ تْورّ شْن مَ. ﭑ فٌرٌشِ نَ نَن مَ، ﭑ شَ قَ عٍ بَدٍ مِسِرَكَيٍ يِ رَ، ﭑ شَ عٍ رَ سٌ بْشِ قَنيِ مَ، لُدٍ فبٍفبٍ نَ دّننَشّ. شِحّ نُن كُمِ فبٌ نَا، كَنَانكَيٍ، شِتِكَيٍ، عَمٌرِكَيٍ، ثٍرِ سِكَيٍ، هِوِكَيٍ نُن يٍبُسُكَيٍ شْنيِ. يَكْسِ عِسِرَيِلَكَيٍ وَ شُي بَرَ ﭑ لِ. ﭑ مَن بَرَ حَشَنكَتّ تٌ مِسِرَكَيٍ نَشَن دْشْقٍ عٍ مَ. 10 سِفَ، ﭑ بَرَ عِ شّي قِرَوُنَ شْن، عِ شَ ﭑ مَ حَمَ عِسِرَيِلَ رَ مِنِ مِسِرَ.»
11 مُنسَ نَشَ عَ قَلَ عَلَ بّ، «مِشِ مْولِ مُندُن نَ ﭑ تَن نَ، ﭑ شَ سِفَ قِرَوُنَ مَ عِسِرَيِلَكَيٍ رَ مِنِقٍ رَ مِسِرَ؟» 12 عَلَ نَشَ عَ يَابِ، «وٌن بِرِن نَ عَ رَ. عِ نَ فّ حَمَ رَ مِنِدٍ مِسِرَ بْشِ مَ، وٌ قَمَ ﭑ بَتُدٍ يِ فٍيَ نَن قَرِ. نَ قِندِ مَ تْنشُمَ رَ، قَ عَ قَلَ، ﭑ تَن يَتِ نَن عِ شّيشِ.»
13 مُنسَ نَشَ عَ قَلَ عَلَ بّ، «ﭑ نَ سَ عَ قَلَ عِسِرَيِلَكَيٍ بّ، ‹وٌ بٍنبَيٍ مَرِفِ عَلَ نَن ﭑ شّيشِ وٌ مَ،› عٍ قَ سَ ﭑ مَشْرِن عِ شِلِ مَ، ﭑ يَابِ مُندُن قِمَ عٍ مَ؟» 14 عَلَ نَشَ عَ مَسٍن مُنسَ بّ، «ﭑ نَ ‹نَشَن نَ› نَ. عِ شَ عِسِرَيِلَكَيٍ يَابِ، ‹عَلَ نَشَن نَ، عَ بَرَ ﭑ شّي وٌ مَ.›» 15 عَلَ مَن نَشَ عَ مَسٍن مُنسَ بّ، «عِ قَمَ وْيّندٍ يِ كِ نّ عِسِرَيِلَكَيٍ بّ، ‹وٌ بٍنبَ عِبُرَهِمَ، عِسِيَفَ، نُن يَشُبَ مَرِفِ عَلَتَلَ، عَلَ نَشَن نَ، نَ نَن ﭑ شّيشِ وٌ مَ.› ﭑ شِلِ نَن نَ كِ عَبَدَن، ﭑ وَ مَ مِشِ بِرِن شَ ﭑ شِلِ نَ كِ نّ تّمُي بِرِن. 16 سَ عِسِرَيِلَ كُنتِفِيٍ مَلَن، عِ عَ قَلَ عٍ بّ، ‹وٌ بٍنبَ عِبُرَهِمَ، عِسِيَفَ، نُن يَشُبَ مَرِفِ عَلَتَلَ بَرَ مِنِ ﭑ مَ. عَ بَرَ عَ مَسٍن ﭑ بّ، «ﭑ بَرَ قٍ تٌ عٍ نَشَن دْشْقٍ وٌ مَ مِسِرَ. 17 ﭑ بَرَ نَتّ تٌنفٌ وٌ رَ مِنِقٍ رَ مِسِرَ وٌ شَ تْورّ كُي. ﭑ شَ وٌ شَنِن كَنَانكَيٍ، شِتِكَيٍ، عَمٌرِكَيٍ، ثٍرِ سِكَيٍ، هِوِكَيٍ، نُن يٍبُسُكَيٍ شْنيِ، شِحّ نُن كُمِ شّلّمَ دّننَشّ.»›»
18 «عِسِرَيِلَ كُنتِفِيٍ نَ فّ عِ شُي رَ مّدٍ، وٌ سِفَمَ نّ مِسِرَ مَنفّ يِرٍ عَ قَلَقٍ رَ، ‹عِسِرَيِلَكَيٍ مَرِفِ عَلَتَلَ بَرَ قَ مُشُ قْشْ رَ. عِ شَ مُشُ سَفٌ سَ مُشُ شَ قّيحّن سَشَن حّرّ رَبَ فبٍنفبٍرٍنيِ مَ، عَلَكٌ مُشُ شَ سّرّشّيٍ بَ مُشُ مَرِفِ عَلَتَلَ بّ.› 19 ﭑ عَ كٌلٌن مِسِرَ مَنفّ مُ تِنمَ وٌ لُدٍ وٌ شَ سِفَ، شَ ﭑ مُ ﭑ سّنبّ مَسٍن عَ بّ. 20 نَ كُي ﭑ قٍ مَفَاشُشِيٍ رَبَمَ نّ مِسِرَكَيٍ رَ، ﭑ عٍ تْورْ كَابَنَكٌي رَ. نَ دَنفِ شَنبِ، عٍ شَ مَنفّ تِنمَ نّ وٌ شَ سِفَ. 21 ﭑ مَن عَ رَفِرِ مَ نّ مِسِرَكَيٍ شَ وٌ كِ، عَلَكٌ وٌ نَشَ سِفَ وٌ بّلّشّ عِفٍلِ رَ. 22 عِسِرَيِلَ فِنّ بِرِن شَ عٍ دْشْبٌورٍ مِسِرَكَيٍ مَكُلَ يِرَبَسٍ فبٍتِ نُن شّيمَ دَاشِيٍ رَ، عَ نُن سٌسٍيٍ، وٌ نَشٍيٍ سٌمَ وٌ شَ دِيٍ مَ. نَ كُي وٌ هَرِفٍ بَمَ نّ مِسِرَكَيٍ يِ رَ.»