23
تِرٍ شَ حَشَنكَتّ
حَشَنكَتّ نَ تِرٍكَيٍ بّ.
«تَرَ سِسِ كُنكُي كَنيِيٍ، وٌ شَ وٌ وَ شُي عِتٍ،
بَرِ مَ تِرٍ بْشِ شُن بَرَ رَكَنَ.
بَنشِ مُ لُمَ نَا سْنْن،
وَقُ بِرِن بَرَ كَنَ.»
سِثِرِكَ ندٍيٍ شَ مَسٍنيِ نَن نَ كِ.
 
وٌ وٌ سَبَرِ، وٌ تَن نَشٍيٍ سَبَتِشِ بَا دّ رَ،
وٌ تَن نَشٍيٍ قِندِشِ يُلّيٍ رَ سِدْن تَا كُي،
وٌ تَن نَشٍيٍ بَرَ نَاقُلِ سْتْ يُلّيَ رَ وَقُ دّ سَابُي رَ.
بَا بَرَ عَ نِيَ وٌ شَ سَنسِ شْرِ سْتْ كٍلِقٍ سِشٌرِ.
دَشَمُي نَشَن مِنِ نِلِ شُرٍ دّ رَ، نَ نَن قِندِشِ بَننَيَ رَ وٌ بّ.
حَمَنّيٍ شَ مَكِتِ شُنفبٍ رَبَ نّ وٌ شْنيِ.
 
سِدْنكَيٍ، وٌ يَافِ، وٌ تَن نَشٍيٍ شَ نْي نُ نَ بَا شُن مَ.
شُي ندٍ مِنِمَ كٍلِقٍ بَا مَ، عَ نَشّ،
«ﭑ لُشِ نّ عَلْ دِ بَرِتَرٍ،
نَشَن مُ دِ بَرِ شْنّ كٌلٌن،
نَشَن مُ دِ يٌ بَرِ مَ،
نَشَن مُ دِ يٌ رَ مْمَ، شّمّ شَ نَ مُ عَ رَ فِنّ.»
مِسِرَكَيٍ نَ نَ شِبَارُ مّ تِرٍ شَ قٍ رَ،
عٍ قَمَ نّ فَاشُدٍ.
 
وٌ شَ سِفَ تَرَ سِسِ.
وٌ تَن نَشٍيٍ نَ بَا دّ رَ، وٌ شَ وٌ وَ شُي عِتٍ.
سِنفٍ وٌ شَ تَا نُ نَ حّلّشِنيِ نَن كُي،
كْنْ يَكْسِ ندٍ وٌ شَ مِشِيٍ شَنِنشِ يِرٍ مَكُيٍ؟
ندٍ يِ نَتّ تٌنفٌشِ تِرٍ شِلِ مَ،
عَ تَن نَشَن نُ مَنفّ تِمَ،
عَ تَن نَشَن شَ يُلّيٍ نُ قِندِشِ كُنتِفِيٍ رَ،
عَ تَن نَشَن شَ يُلّيٍ نُ بِنيَشِ دُنِحَ بِرِن مَ؟
عَلَتَلَ سّنبّمَ نَن يِ نَتّ تٌنفٌشِ،
عَلَكٌ يّتّ عِفبٌيَ شَ كَنَ،
شِلِ شُنفبٍ كَنيِيٍ شَ مَفٌرٌ.
 
10 تَرَ سِسِكَيٍ، وٌ شَ بْشِ رَوَلِ عَلْ عَ رَبَمَ نِلِ شُرٍ دّ رَ كِ نَشّ،
بَرِ مَ سِدْن نُن تِرٍ شَ وَقُيٍ مُ نَ سْنْن.
11 عَلَتَلَ بَرَ عَ بّلّشّ عِتَلَ بَا شُن مَ،
عَ بَرَ مَنفّيَيٍ رَ سّرّن.
عَ بَرَ يَامَرِ قِ قٍنِسِيَ شَ يِرٍ مَكَنتَشِيٍ شَ كَنَ.
12 عَ نَشّ، «عِ تَن سِدْن تَا تٌقَنيِ،
عِ مُ لُمَ بٍرٍ رَ سْنْن،
عٍ قَمَ نّ عِ شُن نَكَنَدٍ قٍوٌ.
هَلِ وٌ وٌ فِ سِثِرِ سُرِ مَ،
وٌ مُ بْحّسَ سْتْمَ.
13 كَلِدٍ بْشِ مَتٌ بَ. عٍ شُن بَرَ رَكَنَ.
عَسِرِيَكَيٍ بَرَ سَ وُلَءِ سُبٍيٍ سَفٌي.
عٍ بَرَ عٍ شَ يِرٍ مَكَنتَشِيٍ رَبِلِن،
عٍ قَ عٍ فٍرٍ هَن سٍسٍ مُ لُشِ سْنْن.»
 
14 «تَرَ سِسِ كُنكُي كَنيِيٍ، وٌ شَ وٌ وَ شُي عِتٍ،
بَرِ مَ وٌ شَ وَقُ مَكَنتَشِ شُن بَرَ رَكَنَ.»
15 تِرٍ لُمَ نّيمُي نَن كُي هَن حّ تٌنفٌ سٌلٌقٍرٍ، مَنفّ كٍرٍن شَ بُي شَسَبِ. حّ تٌنفٌ سٌلٌقٍرٍ رَحْنيِ، قٍ قَمَ رَبَدٍ تِرٍ بّ عَلْ عَ قَلَشِ سِفِ كُي لَنفٌي فِنّ شَ قٍ رَ كِ نَشّ،
16 «عِ تَن لَنفٌي فِنّ، بِرِن نّيمُشِ نَشَن مَ،
عِ شَ كْرَ بْنبْ عَ قَنيِ رَ تَا كُي،
عِ شَ سِفِ سَ عَلَكٌ مِشِيٍ شَ رَتُ عِ شَ قٍ مَ.»
17 حّ تٌنفٌ سٌلٌقٍرٍ رَحْنيِ، مَرِفِ عَ يَ رَقِندِ مَ نّ تِرٍ مَ. عَ فبِلٍنمَ نّ عَ شَ لَنفٌيحَ قٌرِ مَ، عَ عَ يّتّ سَ دُنِحَ مَنفّيَيٍ بِرِن سَفٌي كْبِرِ شَ قٍ رَ. 18 كْنْ عَ شَ فٍينِ قَمَ رَوَلِدٍ عَلَتَلَ شَ قٍ نَن كُي. عَ مُ نْمَ نَ رَفَتَدٍ عَ يّتّ بّ، عَ لُمَ مِشِيٍ نَن بّ نَشٍيٍ بِرَ مَ عَلَتَلَ قْشْ رَ، عَلَكٌ عٍ شَ دٌنمَ قَنيِيٍ نُن بَلٌي فبٍفبٍ سْتْ.