2
دَوُدَ شَ حُنفُي نُن عَ لَاشِرَ تّمُي
دَوُدَ تٌ عَ كٌلٌن عَ نُ قَ نَ سَيَ كِرَ نَن شْن، عَ نَشَ يِ مَسٍنيِ تِ عَ شَ دِ سُلٍمَنِ بّ، عَ نَشّ، «ﭑ نَ سَيَ كِرَ نَن شْن مَ يِ كِ عَلْ عِبُنَدَ مَ بِرِن. عِ شَ عِ سّنبّ سٌ، عِ شَ تِ فبٍن. عِ شَ عِ حْشْ سَ عِ مَرِفِ عَلَتَلَ شَ يَامَرِيٍ شْن مَ، عِ شَ بِرَ عَ شَ كِرَ قْشْ رَ. عِ شَ عَ شَ سّرِيّ رَبَتُ، عِ شَ عَ شَ يَامَرِيٍ رَتِنمّ. عِ شَ بِرَ عَ شَ لْننِ قْشْ رَ، عِ شَ عَ شُي سُشُ عَلْ عَ سّبّشِ كِ نَشّ تَوُرٍتَ مُنسَ كُي، عَلَكٌ قٍ بِرِن شَ سْونّيَ عِ بّ عِ سِفَ دّدّ. نَ نَن عَ تٌمَ، عَلَتَلَ عَ شَ مَسٍنيِ رَكَمَلِمَ، عَ نَشَن مَسٍن ﭑ بّ عَ تٌ عَ قَلَ، ‹شَ عِ شَ دِيٍ قٍ بِرِن نَبَمَ عَلَكٌ عٍ شَ عٍ حّرّ ﭑ مَ كِرَ شْن عٍ بْحّ بِرِن نَ، عٍ نِي بِرِن نَ، عِسِرَيِلَ مَنفّيَ لُمَ عٍ يِ رَ عَبَدَن.›»
«عِ عَ كٌلٌن سٍرُيَ شَ دِ يٌوَبَ نَشَن نَبَ ﭑ نَ، عِ عَ كٌلٌن عَ نَشَن نَبَ عِسِرَيِلَ سْورِيٍ شَ مَنفّيٍ، عَبٍنٍرِ، نُن عَمَسَ رَ. عَ نَشَ عٍ قَشَ بْحّسَ وَشَتِ، عَ عٍ وُلِ مَسٌ عَ شَ بّلّتِ نُن عَ شَ سَنكِرِيٍ مَ. نَ كُي عِ شَ قّيرّ قٍن عَلَكٌ عَ نَشَ سِفَ عَلِفِيَمَ بْحّسَ كُي. عِ شَ عِ حْشْ سَ بَرَ سِلَيِ فَلَدِكَ شَ دِيٍ شْن مَ، عَلَكٌ عٍ شَ عٍ دّفٍ عِ شَ تٍيبِلِ رَ، بَرِ مَ عٍ نَ مْولِ نَن نَبَ ﭑ بّ ﭑ نُ نَ ﭑ فِقٍ عِ تَارَ عَبِسَلٌمِ مَ تّمُي نَشّ. قٌ عِ شَ فٍرَ شَ دِ سِمٍيِ بَشُرِ مِ شَ قٍ قَن مَتٌ، نَشَن قَتَنشِ بُنيَمِن بْنسْي رَ. عَ ﭑ دَنكَ نّ عَ حَاشِ رَ، ﭑ نُ سِفَقٍ مَشَنَيِمِ لْشْي نَشّ. ﭑ تٌ فبِلٍن، عَ نَشَ ﭑ نَلَن يُرُدّن شُرٍ بِرِ. مّننِ ﭑ نَشَ ﭑ كَلِ عَلَتَلَ رَ عَ ﭑ مُ عَ قَشَمَ سَنتِدّفّمَ رَ. يَكْسِ عِ نَشَ دِحّ عَ مَ دٍ. شَشِلِمَ نَن عِ رَ، عِ عَ كٌلٌن عَ لَنمَ عِ شَ عَ رَ سِفَ عَلِفِيَمَ كِ نَشّ.»
10 نَ تّمُي دَوُدَ نَشَ لَاشِرَ، عَ نَشَ بّلّ عَ بٍنبَيٍ قّ مَ عَ شَ تَا كُي. 11 عَ حّ تٌنفٌ نَانِ مَنفّيَ نَن نَبَ عِسِرَيِلَ شُن مَ. عَ نَشَ حّ سٌلٌقٍرٍ رَبَ شٍبِرٌن، عَ حّ تٌنفٌ سَشَن نُن سَشَن نَبَ دَرِ سَلَمُ. 12 عَ شَ دِ سُلٍمَنِ نَشَ مَفٌرٌ عَ شَ كِبَنيِ كُي، عَ شَ مَنفّيَ نَشَ مَبَنبَن.
13 شَفِتِ شَ دِ عَدٌنِيَ نَشَ سِفَ سُلٍمَنِ نفَ بَتِسٍبَ يِرٍ. بَتِسٍبَ نَشَ عَ مَشْرِن، «عِ قَشِ بْحّسَ كُي؟» عَ نَشَ عَ يَابِ، «عِيٌ، ﭑ قَشِ بْحّسَ كُي.» 14 عَدٌنِيَ نَشَ عَ قَلَ عَ بّ، «ﭑ وَ مَ وْيّن كٍرٍن نَن قَلَقٍ عِ بّ.» بَتِسٍبَ نَشَ عَ يَابِ، «نَ قَلَ ﭑ بّ.» 15 عَدٌنِيَ نَشَ يِ مَسٍنيِ تِ عَ بّ، «عِ عَ كٌلٌن عَ نُ لَنمَ ﭑ تَن نَن شَ قِندِ مَنفّ رَ. عِسِرَيِلَ بِرِن يَ نُ رَقِندِشِ ﭑ تَن نَن مَ ﭑ شَ قِندِ مَنفّ رَ. كْنْ عَلَتَلَ نَشَ عَ نِيَ مَنفّيَ شَ سٌ ﭑ شُنيَ يِ رَ. 16 يَكْسِ، ﭑ وَ مَ قٍ كٍرٍن فبَنسَن نَن شْن مَ عِ يِ، عِ نَشَ تٌندِ ﭑ بّ.» بَتِسٍبَ نَشّ، «نَ قَلَ ﭑ بّ.» 17 عَدٌنِيَ نَشَ عَ قَلَ، «يَندِ، عِ شَ عَ قَلَ مَنفّ سُلٍمَنِ بّ عَ شَ عَبِسَفَ سُنَمِكَ قِ ﭑ مَ فِنّ رَ. عَ مُ تٌندِ مَ عِ بّ.» 18 بَتِسٍبَ نَشَ عَ يَابِ، «عَوَ، ﭑ وْيّنمَ مَنفّ بّ عِ شَ قٍ رَ.»
19 بَتِسٍبَ نَشَ سِفَ مَنفّ سُلٍمَنِ يِرٍ، عَ شَ سَ عَدٌنِيَ شَ قٍ قَلَ عَ بّ. مَنفّ تٌ عَ نفَ تٌ، عَ نَشَ كٍلِ عَ شَ كِبَنيِ، عَ سِفَ عَ رَلَندٍ. عَ نَشَ عَ عِفٌرٌ عَ نفَ بّ، عَ كِبَنيِ فبّتّ مَشِلِ. سُلٍمَنِ نفَ نَشَ عَ مَفٌرٌ عَ يِرٍقَنيِ مَ. 20 نَ تّمُي عَ نفَ نَشَ عَ قَلَ عَ بّ، «ﭑ وَ مَ قٍ ندٍ نَن شْن. عِ نَشَ تٌندِ ﭑ بّ.» مَنفّ نَشَ عَ يَابِ، «نفَ، عِ شَ نَ قَلَ ﭑ بّ، ﭑ مُ تٌندِ مَ عِ بّ.» 21 عَ نفَ نَشَ عَ قَلَ عَ بّ، «عِ شَ عَبِسَفَ سُنَمِكَ قِ فِنّ رَ عِ تَارَ عَدٌنِيَ مَ.» 22 مَنفّ سُلٍمَنِ نَشَ عَ نفَ يَابِ، «مُنقٍ رَ عِ عَبِسَفَ مَشْرِنمَ عَدٌنِيَ بّ؟ نَ لُشِ عَلْ عِ وَ مَ ﭑ مَ مَنفّيَ نَن سٌقٍ عَ يِ رَ، عَ تٌ قِندِشِ ﭑ تَارَ رَ. عِ شَ عَ سٌ عَبِيَتَرِ سّرّشّدُبّ نُن سٍرُيَ شَ دِ يٌوَبَ قَن يِ رَ.»
23 نَ كُي مَنفّ سُلٍمَنِ نَشَ عَ كَلِ عَلَتَلَ رَ، عَ نَشّ، «عَلَ شَ ﭑ شُن نَكَنَ شَ عَدٌنِيَ مُ قَشَمَ عَ شَ وْيّنيِ شَ قٍ رَ! 24 يَكْسِ، ﭑ بَرَ ﭑ كَلِ عَلَتَلَ شِلِ رَ، نَشَن ﭑ دْشْشِ ﭑ بَبَ دَوُدَ شَ مَنفّ كِبَنيِ كُي، تٌ يَتِ عَدٌنِيَ قَشَمَ نّ. ﭑ بَرَ ﭑ كَلِ عَلَتَلَ رَ نَشَن ﭑ مَ قٍ بِرِن سْونّيَمَ، نَشَن بْنسْي قِمَ ﭑ مَ.» 25 مَنفّ سُلٍمَنِ نَشَ يٍهٌيَدَ شَ دِ بّنَيَ يَمَرِ، عَ شَ سَ عَدٌنِيَ قَشَ. عَ رَبَ نَ كِ نّ.
26 نَ دَنفِ شَنبِ، مَنفّ نَشَ عَ قَلَ عَبِيَتَرِ سّرّشّدُبّ بّ، «سِفَ عِ شْنيِ عَنَتْتِ بْشِ مَ. عَ لَن عِ شَ قَشَ، كْنْ ﭑ بَرَ دِحّ بَرِ مَ عِ عَلَ شَ سَاتّ كَنكِرَ شَنِن نّ ﭑ بَبَ دَوُدَ يَ عِ، عِ مَن تْورْ نّ ﭑ بَبَ شَ تْورّ.» 27 سُلٍمَنِ عَبِيَتَرِ كٍرِ نَ كِ نّ. نَ كُي عَلَتَلَ شَ مَسٍنيِ نَشَ كَمَلِ، عَلَ نَشَن مَسٍن عٍلِ بْنسْي شَ قٍ رَ سِلٌ.
28 يٌوَبَ نُ بَرَ عَدٌنِيَ مَلِ مَنفّ مَتَندِدٍ، كْنْ عَ مُ نُ نَ عَبِسَلٌمِ تَن شَ مَنفّ مَتَندِقٍ كُي. نَ كُي، عَ تٌ قٍ مّ سُلٍمَنِ نَشَن نَبَ، عَ نَشَ عَ فِ، عَ سِفَ هْرْ مْلِنفِرَ كُي، عَ سَ سّرّشّبَدٍ قٍرِيٍ سُشُ. 29 مِشِيٍ تٌ عَ قَلَ مَنفّ سُلٍمَنِ بّ، عَ يٌوَبَ بَرَ عَ فِ عَ سِفَ هْرْ مْلِنفِرَ كُي سّرّشّبَدٍ يِرٍ، مَنفّ سُلٍمَنِ نَشَ يٍهٌيَدَ شَ دِ بّنَيَ يَمَرِ، «سَ عَ قَشَ!» 30 بّنَيَ نَشَ سِفَ عَلَتَلَ شَ هْرْ مْلِنفِرَ، عَ عَ قَلَ عَ بّ، «مَنفّ نَشّ عِ شَ مِنِ.» عَ نَشَ عَ يَابِ، «ﭑ تٌندِ! ﭑ شَ قَشَ بٍ!» بّنَيَ نَشَ سَ يٌوَبَ شَ وْيّنيِ دّنتّفّ مَنفّ بّ. 31 مَنفّ نَشَ عَ قَلَ بّنَيَ بّ، «عِ شَ عَ رَبَ عَلْ عَ عَ قَلَشِ كِ نَشّ. عِ نَ عَ قَشَ، عَ رَفَتَ. نَ كُي عِ قَمَ ﭑ تَن نُن ﭑ مَ دٍنبَيَ رَتَنفَدٍ يٌوَبَ شَ وُلِ رَ مِنِشِ قُقَقُي مَ. 32 عَلَتَلَ قَمَ نَ يُنُبِ سَرٍ رَفبِلٍندٍ عَ تَن نَن مَ، بَرِ مَ عَ مِشِ قِرِن قَشَ نّ نَشٍيٍ نُ تِنشِن عَ تَن بّ، نَشٍيٍ شَ قٍ بِنيّ نُ دَنفِ عَ تَن فبٍ رَ. ﭑ بَبَ دَوُدَ مُ نُ عَ كٌلٌن عَ نٍرِ شَ دِ عَبٍنٍرِ نُن يٍتٍرِ شَ دِ عَمَسَ، عِسِرَيِلَ سْورِيٍ شَ مَنفّيٍ قَشَ يٌوَبَ شَ سَنتِدّفّمَ نَن سَابُي رَ. 33 عٍ وُلِ سَرٍ دْشْمَ يٌوَبَ نُن عَ بْنسْي نَن شُن مَ عَبَدَن، كْنْ عَلَتَلَ شَ هِننّ نَن لُمَ دَوُدَ، عَ بْنسْييٍ، عَ شَ دٍنبَيَ نُن عَ شَ مَنفّيَ مَ.» 34 يٍهٌيَدَ شَ بّنَيَ نَشَ سِفَ، عَ سَ يٌوَبَ قَشَ، عَ عَ رَفَتَ عَ شْنيِ فبٍنفبٍرٍنيِ مَ.
35 مَنفّ نَشَ يٍهٌيَدَ شَ دِ بّنَيَ قِندِ سْورِيٍ شَ مَنفّ رَ. عَ نَشَ سَدْكِ سّرّشّدُبّ تِ عَبِيَتَرِ حْشْي رَ.
36 مَنفّ نَشَ شّيرَ تِ سِمٍيِ مَ، عَ عَ قَلَ عَ بّ، «بَنشِ ندٍ تِ دَرِ سَلَمُ، عِ لُمَ دّننَشّ. عِ نَشَ مِنِ تَا كُي دٍ. 37 عِ نَ سٍدِرٌن شُرٍ عِفِرِ لْشْي نَشّ مِنِقٍ رَ تَا كُي، عِ قَشَمَ نَ لْشْي يَتِ نّ.» 38 سِمٍيِ نَشَ مَنفّ يَابِ، عَ نَشّ، «عَوَ يِرٍ، عِ تَن ﭑ مَرِفِ نَشَن قَلَشِ، ﭑ نَ نَن نَبَمَ.» سِمٍيِ نَشَ بُ دَرِ سَلَمُ كِ قَنيِ، 39 كْنْ حّ سَشَن تٌ دَنفِ، عَ شَ كٌنيِ قِرِن نَشَ عٍ فِ عٍ سِفَ مَاكَ شَ دِ عَكِسِ شْنيِ، فَتِ مَنفّ. مِشِ ندٍيٍ تٌ عَ قَلَ عَ بّ، «عِ شَ كٌنيِ قِرِن نَ فَتِ،» 40 عَ نَشَ تٍ عَ شَ سٌقَلٍ قَرِ، عَ سِفَ عَ شَ كٌنيِيٍ قْشْ رَ فَتِ، عَكِسِ شْنيِ. عَ تٌ عٍ مَسْتْ، عَ نَشَ عٍ رَفبِلٍن.
41 مِشِ ندٍ نَشَ سَ نَ قَلَ مَنفّ بّ، عَ سِمٍيِ مِنِ نّ دَرِ سَلَمُ، عَ سِفَ فَتِ، عَ مَن فبِلٍن. 42 مَنفّ نَشَ سِمٍيِ شِلِ، عَ عَ قَلَ عَ بّ، «ﭑ مُ ﭑ كَلِ عَلَتَلَ رَ شّ عِ يَ شْرِ، قَ عَ قَلَ، ‹شَ عِ مِنِ دَرِ سَلَمُ تَا كُي، ﭑ عِ قَشَمَ نّ نَ لْشْي يَتِ؟› عِ مُ عَ قَلَ شّ ﭑ بّ عَ عِ ﭑ شُي سُشُمَ نّ عَ قَنيِ رَ؟ 43 مُنقٍ رَ عِ مُ تِن نَ لَايِدِ رَكَمَلِدٍ عِ نَشَن تٌنفٌ عَلَتَلَ بّ؟ مُنقٍ رَ عِ مُ ﭑ مَ يَامَرِ سُشُ؟» 44 مَنفّ نَشَ عَ قَلَ سِمٍيِ بّ، «عِ عَ كٌلٌن عِ قٍ حَاشِ نَشَن بِرِن نَبَ ﭑ بَبَ رَ، مَنفّ دَوُدَ، عَلَتَلَ قَمَ نَ سَرٍ رَفبِلٍندٍ عِ مَ، 45 كْنْ عَ بَرَ بَرَكّ سَ مَنفّ سُلٍمَنِ مَ. دَوُدَ شَ مَنفّيَ مَبَنبَنشِ عَ قَنيِ رَ عَلَتَلَ يَ عِ.» 46 نَ تّمُي مَنفّ نَشَ يٍهٌيَدَ شَ دِ بّنَيَ يَمَرِ عَ شَ سِمٍيِ قَشَ. عَ نَشَ نَ رَبَ. سُلٍمَنِ شَ مَنفّيَ مَبَنبَن نَ كِ نّ.