30
شٍسٍكِيَ سَيَمَلٍكّ دَنفِ سَلِ رَبَقٍ
1 شٍسٍكِيَ نَشَ شّيرَيٍ شّي عِسِرَيِلَ نُن يُدَيَ بِرِن كُي. عَ مَن نَشَ بَتَاشّيٍ سّبّ عٍقِرَ مِكَيٍ نُن مَنَسِكَيٍ مَ، عَلَكٌ عٍ شَ قَ عَلَتَلَ شَ بَنشِ دَرِ سَلَمُ سَيَمَلٍكّ دَنفِ سَلِ رَبَدٍ عِسِرَيِلَ مَرِفِ عَلَتَلَ شَ بِنيّ بُن مَ.
2 مَنفّ، كُنتِفِيٍ، نُن حَمَ بِرِن نُ بَرَ نَتّ تٌنفٌ دَرِ سَلَمُ عٍ شَ سَيَمَلٍكّ دَنفِ سَلِ رَبَ كِكٍ قِرِن ندٍ.
3 عٍ مُ نْ نَ رَبَدٍ عَ وَشَتِ، بَرِ مَ سّرّشّدُبّ بِرِن مُ نُ فّشِ عٍ يّتّ رَ سّنِيّندٍ. حَمَ قَن مُ نُ مَلَنشِ دَرِ سَلَمُ.
4 مَنفّ نُن حَمَ نَشَ تِن نَ نَتّ رَ.
5 عٍ نَشَ عِسِرَيِلَ بِرِن مَشِلِ، كٍلِقٍ بٍرٍ سٍبَ مَ، سَ دْشْ دَنَ نَ، عَلَكٌ عٍ شَ قَ سَيَمَلٍكّ دَنفِ سَلِ رَبَ دَرِ سَلَمُ عِسِرَيِلَ مَرِفِ عَلَتَلَ شَ بِنيّ بُن مَ. عَ نُ بَرَ بُ حَمَ مُ نَ سَلِ رَبَ عَلْ عَ سّبّشِ كِ نَشّ.
6 شّيرَيٍ نَشَ مَنفّ نُن كُنتِفِيٍ شَ بَتَاشّ شَنِن عِسِرَيِلَ نُن يُدَيَ بِرِن. عٍ نَشَ مَنفّ شَ يَامَرِ مَسٍن، «عِسِرَيِلَكَيٍ، وٌ فبِلٍن عَلَتَلَ مَ، عِبُرَهِمَ، عِسِيَفَ، نُن عِسِرَيِلَ مَرِفِ عَلَ، عَلَكٌ عَ قَن شَ فبِلٍن وٌ مَ، عَ وٌ تَن نَشٍيٍ رَتَنفَشِ عَسِرِيَ مَنفّيٍ بّلّشّ عِ.
7 وٌ نَشَ لُ عَلْ وٌ بَبَيٍ نُن وٌ نفَشَكٍرٍنيِيٍ، نَشٍيٍ نُ بَرَ عٍ بَبَيٍ مَرِفِ عَلَتَلَ رَبّحِن. عَلَ بَرَ فبَلٌي رَفِرِ عٍ مَ، عَلْ وٌ عَ تٌشِ كِ نَشّ.
8 يَكْسِ، وٌ نَشَ وٌ كٌبٍ تِ عَلَ رَ عَلْ وٌ بَبَيٍ عَ رَبَشِ كِ نَشّ. وٌ وٌ بّلّشّ سٌ عَلَتَلَ يِ رَ، وٌ شَ قَ عَ شَ هْرْ مْبَنشِ، عَ نَشَن نَسّنِيّن وَشَتِ بِرِن بُن مَ. وٌ شَ وٌ مَرِفِ عَلَتَلَ رَبَتُ، عَلَكٌ عَ شَ شْنّ شَ فبِلٍن وٌن قْشْ رَ.
9 شَ وٌ فبِلٍن عَلَتَلَ مَ، وٌ نفَشَكٍرٍنيِيٍ نُن وٌ شَ دِيٍ هِننّ سْتْمَ نّ مِشِيٍ رَ، نَشٍيٍ عٍ شَنِن كٌنيِيَ كُي. شَ وٌ فبِلٍن وٌ مَرِفِ عَلَتَلَ مَ، عَ قَمَ نّ هِننّدٍ وٌ رَ، عَ مُ نّيمُمَ وٌ مَ.»
10 شّيرَيٍ نَشَ سِفَ تَايٍ بِرِن عٍقِرَ مِ نُن مَنَسِ بْشِ مَ، هَن سَبُلٌن. كْنْ نَ مِشِيٍ مُ تِن عٍ شَ مَسٍنيِ رَ، عٍ مَن قَ يٌ شّيرَيٍ مَ.
11 عَسٍرِكَيٍ، مَنَسِكَيٍ، نُن سَبُلٌنكَيٍ ندٍيٍ نَشَ عٍ يّتّ مَفٌرٌ، عٍ سِفَ دَرِ سَلَمُ.
12 عَلَ نَشَ عَ نِيَ يُدَيَكَيٍ بِرِن شَ كَقُ عٍ بٌورٍ مَ مَنفّ نُن كُنتِفِيٍ شَ يَامَرِ رَبَقٍ رَ عَلْ عَلَتَلَ عَ قَلَ كِ نَشّ.
13 حَمَ فبٍفبٍ نَشَ عٍ مَلَن دَرِ سَلَمُ، عَلَكٌ عٍ شَ تَامِ لّبِنِتَرٍ سَلِ رَبَ كِكٍ قِرِن ندٍ.
14 عٍ نَشَ كٍلِ، عٍ كُيٍ سّرّشّبَدٍ بِرِن كَنَ دَرِ سَلَمُ، عَ نُن سُرَيِ فَندٍيٍ، عٍ قَ نَ بِرِن وْلّ عِ سٍدِرٌن قٌلٍ كُي.
15 كِكٍ قِرِن ندٍ، شِ قُ نُن نَانِ ندٍ رَ، عٍ نَشَ سَيَمَلٍكّ دَنفِ سَلِ شَ سّرّشّ بَ. سّرّشّدُبّيٍ نُن لٍوِكَيٍ نُ بَرَ يَافِ عٍ شَ سّنِيّنتَرٍحَ شَ قٍ رَ، عٍ قَ عٍ يّتّ رَ سّنِيّن. عٍ نَشَ سّرّشّ فَن دَاشِيٍ بَ عَلَتَلَ شَ بَنشِ كُي.
16 سّرّشّدُبّيٍ نَشَ تِ عٍ يِرٍ عَلْ عَلَ شَ مِشِ مُنسَ عَ يَمَرِشِ كِ نَشّ تَوُرٍتَ مُنسَ كُي. لٍوِكَيٍ تٌ وُلِ سٌ عٍ يِ رَ، عٍ نَشَ عَ كَسَن سّرّشّبَدٍ مَ.
17 مِشِ سّنِيّنتَرٍيٍ تٌ نُ وُيَشِ حَمَ يَ مَ، لٍوِكَيٍ نَشَ سَيَمَلٍكّ دَنفِ سَلِ سّرّشّ بَ عٍ بّ، عَلَكٌ عٍ شَ عَ قِ عَلَتَلَ مَ.
18 مِشِ سّنِيّنتَرٍ وُيَشِيٍ نُ نَ حَمَ يَ مَ كٍلِقٍ عٍقِرَ مِ، مَنَسِ، نُن سَبُلٌن. عٍ بَرَ سَيَمَلٍكّ دَنفِ سَلِ سّرّشّ دٌن، كْنْ نَ مُ رَدَشَشِ عَلَ شَ مَسٍنيِ كُي. نَ نَن عَ تٌ، شٍسٍكِيَ نَشَ عَلَتَلَ مَشَندِ عٍ بّ، «عَلَتَلَ نَشَن قَن، دِحّ
19 سّنِيّنتَرٍيٍ بِرِن مَ نَشٍيٍ نَ عٍ بَبَيٍ مَرِفِ عَلَ قٍنقٍ عٍ بْحّ كُي.»
20 عَلَتَلَ نَشَ شٍسٍكِيَ شَ دُبّ سُشُ، عَ دِحّ حَمَ مَ.
21 عِسِرَيِلَكَيٍ نَشٍيٍ نُ مَلَنشِ دَرِ سَلَمُ نَشَ تَامِ لّبِنِتَرٍ سَلِ رَبَ شِ سٌلٌقٍرٍ بُن مَ حّلّشِنيِ كُي. لْشْي بِرِن مَ، لٍوِكَيٍ نُن سّرّشّدُبّيٍ نُ عَلَتَلَ مَتْشْمَ عٍ شَ بّيتِبَسٍيٍ رَ عَلَ شَ بِنيّ بُن مَ عٍ سّنبّ بِرِن نَ.
22 شٍسٍكِيَ نَشَ لٍوِكَيٍ رَلِمَنِيَ، بَرِ مَ عٍ نُ بَرَ عَلَتَلَ شَ وَلِ رَبَ عَ رَبَ كِ مَ. عٍ نَشَ سّرّشّيٍ دٌن شِ سٌلٌقٍرٍ بُن مَ. عٍ مَن نَشَ شَنُنتٍيَ سّرّشّيٍ بَ عٍ بَبَيٍ مَرِفِ عَلَتَلَ بّ.
23 حَمَ بِرِن نَشَ لَن عَ مَ، عٍ شَ شِ سٌلٌقٍرٍ فبّتّ سَ نَ سَلِ شُن مَ. عٍ نَشَ نَ رَبَ سّيوّ كُي.
24 يُدَيَ مَنفّ شٍسٍكِيَ نَشَ تُورَ وُلُ كٍرٍن نُن شُرُ سٍ لَنمَ وُلُ سٌلٌقٍرٍ بَ سّرّشّ رَ. كُنتِفِيٍ قَن نَشَ تُورَ وُلُ كٍرٍن نُن شُرُ سٍ لَنمَ وُلُ قُ بَ سّرّشّ رَ. سّرّشّدُبّ فبٍفبٍ نَشَ عٍ يّتّ رَ سّنِيّن.
25 يُدَيَ حَمَ، سّرّشّدُبّيٍ، لٍوِكَيٍ، عِسِرَيِلَكَيٍ، نُن شْحّيٍ كٍلِقٍ عِسِرَيِلَ بْشِ مَ، عٍ بِرِن نَشَ سّيوَ.
26 حّلّشِنيِ فبٍفبٍ نَشَ لُ دَرِ سَلَمُ. نَ قٍ مْولِ نُ بَرَ بَ تٌقٍ دَرِ سَلَمُ كَبِ عِسِرَيِلَ مَنفّ دَوُدَ شَ دِ سُلٍمَنِ شَ وَشَتِ.
27 سّرّشّدُبّيٍ نُن لٍوِكَيٍ نَشَ كٍلِ، عٍ دُبَ حَمَ بّ. عَلَتَلَ نَشَ نَ دُبّ سُشُ عَ شَ يِرٍ سّنِيّنشِ كُي كٌورٍ مَ.