31
شٍسٍكِيَ عَلَ شَ سّرِيّ مَبَنبَنقٍ
عِسِرَيِلَ مَنفّيٍ عِِ ١٨؛٤
1 سَلِ تٌ حْن، عِسِرَيِلَكَيٍ نَشَ سِفَ يُدَيَ تَايٍ كُي، عٍ كُيٍ فّمّ مَسٌلِشِيٍ كَنَ، عٍ عَسٍرَ كُيٍ وُرِ دَاشِيٍ سّفّ، عٍ سّرّشّبَدٍ بِرِن كَنَ نَشٍيٍ نُ نَ فٍيَيٍ قَرِ يُدَيَ، بُنيَمِن، عٍقِرَ مِ، نُن مَنَسِ بْشِ مَ. نَ دَنفِ شَنبِ، عِسِرَيِلَكَيٍ نَشَ فبِلٍن عٍ شْنيِ.
2 شٍسٍكِيَ نَشَ سّرّشّدُبّيٍ نُن لٍوِكَيٍ تِ كَنكَن شَ وَلِ رَ؛ سّرّشّ فَن دَاشِيٍ بَقٍ، شَنُنتٍيَ سّرّشّيٍ بَقٍ، هْرْ مْبَنشِ وَلِ رَبَقٍ، مَتْشْي نُن تَنتُي بّيتِ بَقٍ عَلَتَلَ بّ، نُن عَلَتَلَ شَ هْرْ مْبَنشِ نَادّ مَكَنتَقٍ.
3 مَنفّ نَشَ ندٍ بَ عَ هَرِفٍ رَ عَ عَ قِ سّرّشّ فَن دَاشِيٍ رَ نَشٍيٍ بَمَ فّيسّفّ، نُنمَرٍ، مَلَبُي لْشْي، كِكٍ نّينّ، سَلِ شُنفبٍيٍ عَلْ عَ سّبّشِ عَلَتَلَ شَ سّرِيّ كُي كِ نَشّ.
4 شٍسٍكِيَ نَشَ عَ مَسٍن حَمَ نُن دَرِ سَلَمُكَيٍ بّ، عٍ شَ سّرّشّدُبّيٍ نُن لٍوِكَيٍ مَلِ عٍ شَ هَرِفٍ سْتْ، عَلَكٌ عٍ شَ سّنبّ سْتْ عَلَتَلَ شَ سّرِيّ كُي.
5 عٍ تٌ نَ مَسٍنيِ مّ، عِسِرَيِلَكَيٍ نَشَ قَرِلّ بَ عٍ شَ سَنسِيٍ بٌفِ سِنفٍيٍ رَ، مّنفِ، وّنِ نّينّ، تُرٍ، كُمِ، نُن دَشَمُي فبّتّيٍ. عٍ نَشَن قِشِ، نَ نُ فبٌ.
6 عِسِرَيِلَكَيٍ نُن يُدَيَكَيٍ، نَشٍيٍ نُ سَبَتِشِ يُدَيَ تَايٍ كُي نَشَ قَرِلّ بَ عٍ شَ شُرُ سٍ شُنفبٍيٍ نُن عٍ شَ شُرُ سٍ لَنمَيٍ رَ، عٍ مَن نَشَ قَرِلّ بَ سٍ سّنِيّنشِيٍ رَ عٍ نَشٍيٍ قِشِ عٍ مَرِفِ عَلَتَلَ مَ. نَ نَشَ قِندِ كٌتٍ فبٍفبٍ رَ.
7 عٍ نَشَ نَ كٌتٍ مَلَن قْلْ كِكٍ سَشَن ندٍ رَ، عٍ فّ كِكٍ سٌلٌقٍرٍ ندٍ رَ.
8 شٍسٍكِيَ نُن كُنتِفِيٍ تٌ نَ كٌتٍ تٌ، عٍ نَشَ عَلَتَلَ نُن عَ شَ حَمَ تَنتُ.
9 شٍسٍكِيَ نَشَ سّرّشّدُبّيٍ نُن لٍوِكَيٍ مَشْرِن نَ كٌتٍ شَ قٍ مَ.
10 نَ كُي، سّرّشّدُبّ كُنتِفِ عَسَرَيَ، نَشَن كٍلِشِ سَدْكِ شَبِلّ نَشَ عَ يَابِ، «كَبِ وٌن يِ هَدِيَ قٍ قْلْ عَلَتَلَ شَ بَنشِ كُي، بَلٌي بَرَ فبٌ مُشُ يِ رَ هَن مُشُ مُ نْمَ نَ بِرِن دٌندٍ. نَشَن لُشِ نَ نَن يَ. عَ فبٌ بَرِ مَ عَلَتَلَ بَرَ بَرَكّ سَ عَ شَ حَمَ مَ.»
11 شٍسٍكِيَ نَشَ يَامَرِ قِ عٍ شَ كٌنكٌي يَءِلَن عَلَتَلَ شَ بَنشِ كُي. عٍ نَشَ نَ رَبَ.
12 مِشِيٍ نَشَ قَ هَدِيَيٍ، قَرِلّيٍ، نُن سٍ سّنِيّنشِيٍ رَ، عٍ عَ سَ نَ كٌنكٌي كُي. لٍوِكَ كٌنَنِيَهُ نُن عَ شُنيَ سِمٍيِ نَشَ مّينِ نَ بِرِن مَ.
13 مَنفّ شٍسٍكِيَ نُن عَلَ شَ بَنشِ يَرٍرَتِ عَسَرَيَ نَشَ مِشِيٍ سُفَندِ نَشٍيٍ لُمَ كٌنَنِيَهُ نُن عَ شُنيَ سِمٍيِ شَ يَامَرِ بُن مَ. نَ مِشِيٍ شِلِيٍ نَن يَ؛ يّشِيّلِ، عَسَرَيَ، نَشَتِ، عَسَهّلِ، يٍرِ مٌتِ، يٌسَبَدِ، عٍلِيٍلِ، يِسِمَكِيَ، مَشَتِ، نُن بّنَيَ.
14 يِمِنَ شَ دِ لٍوِكَ كٌرٍ، نَشَن نُ سٌفٍتٍدٍ نَادّ مَكَنتَمَ، عَ تَن نَن نُ عَ حّنفِ سَشِ سٍيٍ شْن مَ، مِشِيٍ نَشٍيٍ حَنِفٍشِ عَلَ بّ. عَ نُ نَ سٍ سّنِيّنشِيٍ عِتَشُنمَ.
15 عٍدٍن، مِنيَمِن، يٌسُوٍ، سٍمَيَ، عَمَرَيَ، نُن سّكَنَيَ نُ كٌرٍ مَلِمَ سٍيٍ عِتَشُندٍ عٍ نفَشَكٍرٍنيِيٍ مَ سّرّشّدُبّيٍ شَ تَايٍ كُي. مِشِ شُنفبٍيٍ نُن مِشِ لَنمَيٍ بَرَ عٍ فبٍ سْتْ عٍ شُندّ كِ مَ.
16 عٍ نَشَ سٍيٍ عِتَشُن شّمّ دِ مّدِ بِرِن مَ نَشٍيٍ نُ بَرَ فّ حّ سَشَن سْتْدٍ، نَشٍيٍ شِلِيٍ نُ سّبّشِ تَرُشُي كُي، نَشٍيٍ نُ لَنمَ عٍ شَ سّرّشّدُبّ وَلِ رَبَ عَلَتَلَ شَ هْرْ مْبَنشِ كُي عٍ شُندّ كِ مَ.
17 عٍ نَشَ سٍيٍ عِتَشُن سّرّشّدُبّيٍ مَ، نَشٍيٍ شِلِيٍ نُ سّبّشِ تَرُشُي كُي عٍ شَ دٍنبَيَ كِ مَ. عٍ نَشَ سٍيٍ عِتَشُن لٍوِكَيٍ مَ عٍ شَ وَلِ نُن عٍ شُندّ كِ مَ، نَشٍيٍ نُ بَرَ فّ حّ مْشْحّن سْتْدٍ.
18 عٍ مَن نَشَ سٍيٍ عِتَشُن عَلَ شَ هْرْ مْبَنشِ وَلِكّ بِرِن مَ، نَشٍيٍ شِلِيٍ نُ سّبّشِ تَرُشُي كُي، عٍ نَشَ عَ عِ تَشُن عٍ شَ مَمَدِيٍ، عٍ شَ فِنّيٍ، عٍ شَ دِ شّمّيٍ نُن عٍ شَ دِ فِنّيٍ مَ.
19 هَرُنَ شَ دِ سّرّشّدُبّيٍ، نَشٍيٍ نُ نَ دَاشَ، تَا قَرِ مَ، تَاكَ ندٍيٍ نُ بَرَ سُفَندِ نَشٍيٍ سٍيٍ عِتَشُنمَ يِ سّرّشّدُبّيٍ نُن يِ لٍوِكَيٍ مَ، نَشٍيٍ شِلِيٍ نُ سّبّشِ تَرُشُي كُي.
20 شٍسٍكِيَ نَ نَن نَبَ يُدَيَ بْشِ مَ. عَ وَلِ نّ هِننّ، تِنشِنيِ، نُن نْندِ كُي عَ مَرِفِ عَلَتَلَ بّ.
21 عَ شَ وَلِ بِرِن عَ نَشَن نَبَ عَلَ بَتُقٍ شَ قٍ رَ، عَ نُن عَلَ شَ سّرِيّ نُن يَامَرِ شَ قٍ رَ، نَ بِرِن سْونّيَشِ نّ عَ بّ. عَ نَ بِرِن نَبَ عَ بْحّ بِرِن نَن نَ عَلَكٌ عَ شَ عَ مَرِفِ عَلَتَلَ سَفٌي رَبَ.