प्रेरित
ब्रेक्ब मुर: एको किताब लूकाम ब्रेक्शो बाक्ब। लूका यहूदी मबाक्थु यो, पावल नु गेय पवा बाक्त। प्रेरित १६:१०-१७; प्रेरित २०:५-१५; प्रेरित २१:१-१८ नु प्रेरित २७:१-२८:१६ एको किताबमी शुश खेयप “गोपुकी” ब्रेक्शो बाक्ब। मोपतीके लूका पावल नु काथा बाक्शो तुंइसीब। लूका डक्टर बाक्त। कलस्सी ४:१४
गेना ब्रेक्शो: एको किताब गेना ब्रेक्शो बाक्मे, मेको रिम्शो पा मतुंइसीब। तन्न पावल रोम सहरम चोक्चा पुंइसीशो बर्स निक्शी दुम्शो नोले ६३-६४ ए. डी. एको किताब ब्रेक्शो बाक्चा माल्ब। एको किताब मथुम्शो किताब का बाक्त। मारदे हना लूका ते लमे, सुइमी मतुइक्नीम। ६४ ए. डी.मी रोम सहरम ठेयब मी सुइक्तीके नु थमा सुइक्ब आन कली खेदा पतीके लूका बेक्म कों, प्रोक्म कों मारेइ मतुंइसीब।
मार ब्रेक्शो: लूका, यहूदी मुर मबाक्ब। आ ब्रेक्शो “लूका ग्येरपाइक्तीक” लोव़मी अर्को रागी ङा मुर येसु ख्रीस्त आ पतीकेमी पाप रे ब्रोंइचा ताइनीम, दे शुश ब्रेक्शो बाक्ब। येसु ख्रीस्त आ सोइश्शो आन पशो गेय नु परमप्रभु यावे आ सोक्त आ गेय आ पर्बम शुश ब्रेक्शो बाक्ब।
1
येसु स्वर्ग लाइक्चा पुंइसीशो
1 आं दाक्शो थियोफीलस, गो ङोंइती ङा किताबमी परमप्रभु यावे आ बाक्तीक लाइक्चा मपुंइसे सम्म येसुमी मार पवा, मार शेंदा, मेको नेल्ल ब्रेक्शा, तुइक्पाइक्ने थुम्तन्नी। लूका १:३
2 येसुमी शेंसीब आन कली योव़शा, मेको योव़शो आन कली सोइश्शोपुकी नें वोइश्शो बाक्माक्त। मेको सोइश्शो आन कली परमप्रभु यावे आ सोक्त रे पा मार शेंचा, मार पचा, नेल्ल शेंना शेंन वोइक्मी बाक्त। मत्ती २८:१-२०
3 मेको आन कली शेंशो मार बाक्माक्त देंशा हना, येसु श्येत जशा साइक्चा पुंइसीशा, बेक्शा, बेक्शो रे सेंपाइक्चा पुंइसीशा, ४० नाक्त सम्म आ सोइश्शो आन कली तपांइसीन सीन परमप्रभु यावे आ राज्य ङा लोव़ शेंना शेंन बाक्माक्त।
4 मोदेंशो पा काथा बाक्शा, मेको आन कली “परमप्रभु यावेमी आ देंशो लोव़ मखबा सम्म यरूसलेम सहरमीन बाक्कीन। लूका २४:४९; यूहन्ना १५:२६
5 इन कली ङोंइती मार मार देंङा, मेको लेंशा देंनुङ यूहन्नामी मुर आन कली ब्वाक्कुम खुम्शा ग्रुंइताक्व। इन कली चहिं परमप्रभु यावेमी आ सोक्तीम ख्रुम्ब। मेको दुम्चा कली शुश नाक्त मलीशो बाक्ब” दे शेंदीमी बाक्त। मत्ती ३:११
6 मिनु येसु नु आ सोइश्शोपुकी बुक्शा बाक्मानु, मेकोपुकीमी येसु कली “प्रभु, गे इस्राएल कली मुल लेंशा आंम राज्य सेल्नीनी?” दे हिल्लो पामे बाक्त। लूका १९:११; लूका २४:२१
7 मिनु येसुमी “राज्य सेल्चा आं आफ आ गुइमी बाक्ब। मिनु गेना सेल्चा दाक्बा, मेना सेल्ब। मेको तुइक्चा यो ममाल्नीनी। मत्ती २४:३६
8 मार चहिं तुइक्चा माल्नीनी देंशा हना, परमप्रभु यावे आ सोक्त आ सक्ति ताइनीनी। सक्ति तशा यरूसलेम, यहूदीया, सामरीया नु रागी नेल्लेमी हिरशा, आं लोव़ शेंशा, आं सांकछी दुम्नीनी” दे माइक्मी बाक्त। लूका २४:४८; प्रेरित ८:१
9 मिनु मोदेंशो लोव़ पा, मेको आन तना तन ग्येत्थ ग्युक्शा, गोस्सुमी गिल्सीशा सरीङ ग्येत्थ लमाक्त। मिनु नोले मेकोपुकीमी मतामे बाक्त। मर्कूस १६:१९; लूका २४:५१
10 मोपा यो सरीङ गे कोव़ना कोव़न बाक्मानु, बुश वा फेक्शो मुर निक्शी फो फु ग्रूशा, आन ङोंइती राप्शो तामे बाक्त। लूका २४:४
11 मिनु मेको निक्शीमी “ए गालील ङा मुर, मार सरीङ गे कोव़ना कोव़न बाक्नी? येसु इन बाक्तीके रे परमप्रभु यावे आ बाक्तीके लाइक्चा पुंइसाक्व। दोपा लशो तनी, मोपा काबु लेश्शा यीब, दे तुइक्तीने” देंसा बाक्त। लूका २१:२७
12 मिनु मेकोपुकी जैतून डांडा रे यरूसलेम लेम्मा बाक्त। मेको लां चहिं नाइक्तीक नाक्त गाक्चा दुम्तीक लां बाक्माक्त।
13 मिनु यरूसलेम सहरम जाक्शा ङा मीन, खिं का ङा तला तारी ओव़शा बाक्मा बाक्त। मोपा बाक्बपुकी सु सु बाक्मा बाक्त देंशा हना, पत्रुस, यूहन्ना, याकूब, अन्द्रीयास, फिलीप, थोमास, बारथोलोमाइ, मत्ती, अल्फयस आ तौ याकूब, सिमोन, मेको कली कनानी यो देंसीब नु याकूब आ तौ यहूदा बाक्मा बाक्त। लूका ६:१३-१६
14 मेकोपुकी नु मीश मुरपुकी, येसु आ ममा मरीयम नु येसु आ लोक्बपुकी यो बाक्मा बाक्त। मेको नेल्ल थुं का ङा दुम्शा, नाक्त किंत किंत परमप्रभु यावे कली ठेयब सेल्ना सेल्न, पुंइना पुंइन बाक्बाक्मा बाक्त। यूहन्ना ७:३
सोइश्शो का तेम्शो
15 मिनु काबु नाक्त पत्रुस थमा सुइक्ब सहे का २० जना मुर आन दातेमी बाक्मा बाक्त। यूहन्ना २१:१५-१९
16 मिनु पत्रुस मेको आन दातेमी राप्शा, मेको आन कली “आं लोक्बपुकी, नेनीने, येसु कली ग्याइक्ब आन कली लां कोंइब यहूदा आ पर्बम लोव़ का निक्शी पाइनुङ। साइ परमप्रभु यावे आ सोक्तीमी पिप दाऊद कली मार ब्रेक्पाइश्शो बाक्मे, मेको नेल्ल थमा दुम्चा माल्ब। मिनु मुल थमा दुम्त। भजन संग्रह ४१:१०
17 यहूदा १२ जना शेंसीब आंइ दाते ङा वारच का बाक्त। मेको कली यो प्रभुमी गेय का पपाइक्चा कली योव़शो बाक्त।
18 मेकोमी येसु कली ग्याइक्ब आन कली लां कोंइशा, वारच पा क्येट ताक्गा बाक्त। मिनु मेको क्येटमी रू ग्यबा बाक्त। मोपा मरिम्शो गेय पतीके क्यूली पा दोक्शा, आ कोव़ज ब्रोल्शा आ क्यी ग्रूशा बेक्माक्त। मत्ती २७:३-१०
19 मेको आ मरिम्शो पशो यरूसलेम सहरमी बाक्ब नेल्लेमी तुइक्ताक्म। मिनु मेको रू कली आन लोव़ रे पा आखेल्दामा, दे नें वोइक्तेक्म। आखेल्दामा देंशो “हुश आ रू” रुम्सीब।
20 साइ पिप दाऊदमी ब्रेक्शो लोव़मी मार ब्रेक्शो बाक्ब देंशा हना ‘मेको आ खिं ब्रेश्शा बाक्ल, मेकेर सुइ बाक्चा मतामेक्ल, आ पशो गेय अर्को मुरुमी पवल’ दे ब्रेक्शो बाक्ब। भजन संग्रह ६९:२५-२६; भजन संग्रह १०९:८
21 मुल यहूदा आ पा ङा मुर का योव़चा माल्ब। दोदेंशो मुर माल्ब देंशा हना, यूहन्नामी मुर आन कली ब्वाक्कुमी ख्रुम्शा ग्रुंइशो नाक्त रे येसु परमप्रभु यावे आ बाक्तीक लाइक्चा मपुंइसे सम्म, प्रभु येसु नु काथा बाक्ब, काथा गाक्ब, काथा जाइब मुर का माल्ब। यूहन्ना १५:२७
22 मेको मुरुम ‘येसु बेक्शा, सेंसीशो ताता’ देंने चाप्चा माल्ब” दे माइक्मी बाक्त।
23 मिनु आ लोव़ नेंशा बिश्शा, आन दाते रे योव़शा, मुर निक्शी आस कली नेल्ल आन ङोंइती राप्पदमे बाक्त। मेको आस नें का के योसेफ बारसाबास, आ याइनी नें चहिं युस्तस बाक्माक्त। का के चहिं मत्तीयस बाक्माक्त।
24 मिनु मेकोपुकीमी “परमप्रभु, गे मुर नेल्ल आन थुं तुइक्नीनी। मोपतीके एको निक्शीमी तेको कली योव़नीनी, आंइ कली तुइक्पतीने। प्रेरित ६:६
25 मिनु मेको यहूदा आ पा ङा सोइश्शो का दुम्ल” दे प्रार्थना पामे बाक्त।
26 मिनु भोट तोक्गमे बाक्त। भोट तोक्गमेनु, मत्तीयस ग्रामाक्त। मोपा मत्तीयस यो सोइश्शो का दुम्शा तेम्सीशा, १२ जना सोइश्शो दुम्मा बाक्त। हितोपदेस १६:३३; निसाफ पाइब २१:१७