2
परमप्रभु आ सोक्तीम प्रिंचा पुंइसीशो
1 मिनु पेन्तीकोस नाक्त थमा सुइक्ब आन ग्रुम्तीकेमी देल्मा बाक्त। लेवी २३:१५-२१
2 मिनु सरीङ रे हुरुर पा फश खोदेंशो फो ग्रूशा, आन बाक्तीक प्रिंशा थुरशा रेयके पवा बाक्त।
3 मिनु ब्रशो मी खोदेंशो तांइसीशो परमप्रभु यावे आ सोक्त का का पा आन तारी जुक्ता बाक्त। मत्ती ३:११
4 मिनु परमप्रभु यावे आ सोक्तीमी सोइश्शो आन कली प्रिंशा, मेको आन कली आन मतुइश्शो लोव़ पपाइक्मी बाक्त। प्रेरित ४:३१; प्रेरित १०:४४-४६
5 यरूसलेममी परमप्रभु यावे कली मान पा हिंब, रागी नेल्ल रे जाक्शो यहूदी बाक्मा बाक्त। प्रेरित १३:२६
6 मिनु मेकोपुकीमी मेको रेयके नेंशा, खुम्सीमा बाक्त। मिनु मेकेर आन लोव़ कका ब्वाक्शो नेंशा छक लाक्मा बाक्त।
7 मिनु छक लाक्शा “मेकोपुकी गालील ङा मुर मनमी ङा? तन्न इं लोव़ कका ब्वाक्तेक्म।
8 गालील ङा मुरपुकीमी दोपा इं लोव़ नेल्ल ब्वाक्स जोक्ग्मे माइ?” देंमुमा बाक्त।
9 मो दुम्शो ताइबपुकी ते ते ङा बाक्मा बाक्त देंशा हना, पारथेस, मेदी, एलाम, मेसोपोटामीया, यहूदीया, कापाडोसीया, पोन्टस, एसीया,
10 फ्रिगीया, पाम्फीलीया, इजीप्त, लिबीया नु साइरेनी एर ओंथ, रोम, क्रेट नु अरब रागी रे जाक्शो यहूदी नु यहूदी दुम्शोपुकी बाक्मा बाक्त।
11 मेकोपुकीमी “गो नेल्लेमी परमप्रभु यावे आ पशो छक लाक्चा ङा गेय आ पर्बम आंइ लोव़ पशो नेंतय।
12 मोपा मेको नेंबपुकीमी ‘मार बाक्म माइ, मार दुम्बा’ देंमुमा बाक्त।
13 का निक्शीमी चहिं ‘शांबु दुक्शो बाक्तेक्म’ ” दे शुक्शी पामे बाक्त।
साइ ङा लोव़ थमा दुम्शो
14 मिनु पत्रुसमी सोइश्शोपुकी नु राप्शा, मुर आन कली “इं यहूदी नु यरूसलेममी बाक्बपुकी, आं लोव़ रुप्चा कली नोफा दाइश्शा नेनीने।
15 इन मिम्शो खोदेंब पा एकोपुकी दुक्शो मनमी। मुल सुनी ङा ९ बजेशो बाक्ब, दे तुइक्तीने। भजन संग्रह १६:८-११
16 मार रुपीन देंशा हना, साइ परमप्रभु यावे आ लोव़ पाइब योएलमी ब्रेक्शो लोव़ मुल थमा दुम्त, दे रुपीने। साइ ङा लोव़म मार ब्रेक्शो बाक्त, देंशा हना योएल ३:१-५
17 ‘परमप्रभु यावेमी रागी नुप्ची नाक्त मुर नेल्ल आन कली आं सोक्तीम प्रिंनुङमी। मिनु इन तमी तौपुकीमी आं लोव़ पाइनीम। ठिटापुकीमी आं कोंइशो ताइनीमी, खाल्पापुकीमी ङोमु ताइनीम।
18 आं वाइलीम वाइल आन कली यो आं सोक्तीम प्रिंनुङमी। मिनु मेकोपुकीमी यो आं लोव़ पाइनीम।
19 मेको ठेयब नाक्त जाक्चा क्येङा ङोंइती गो सरीङ नु रागीमी चिन्ड नु छक लाक्चा ङा गेय कोंइनुङ। हुश यिपाइक्नुङ, मी ब्रपाइक्नुङ नु ठेयब कुन ग्रूशो तपाइक्नुङ।
20 नां छिङछिङ दुम्ब। तास्ला हुश खोदेंशो लल दुम्शो तांइसीब। मेको प्रभु आ ठेयब नाक्त आ क्येङा ङोंइती मोदेंशो दुम्ब।
21 मिनु सु सुमी प्रभु आ नें थिशा प्रोंइयीकी, दे ब्रेम्मा, मेकोपुकी पाप रे प्रोंइचा पुंइसीनीम’ दे परमप्रभु यावेम देंशो बाक्ब। योएल २:२७-३२
22 मोपतीके इस्राएल ङा लोक्बपुकी, आं लोव़ नेनीने। परमप्रभुमी नासरथ ङा येसु कली योव़शा, सक्ति पाइश्शो गेय, चिन्ड नु छक लाक्चा ङा गेय इन दातेमी कोंइपाइक्तु। मेको गे यो तशो तुइश्शो बाक्नीनी।
23 गेपुकीमी येसु कली अरेशो मटीब आन गुइम गेशा, शीम केप्शा कांटी थोक्शा क्याइश्शा साइक्पाइक्तीनी। ङोंइती रे परमप्रभु यावेमी मोदेंशो दुम्चा माल्ब, दे मिम्शा, इन कली मो पचा गेशो बाक्माक्त, दे रुपीन। प्रेरित ४:२८
24 गेपुकीमी साइक्पाइक्तीनी हना यो, परमप्रभुमी येसु कली बेक्शो रे सेंताक्व। मारदे हना आ गेना हना यो ब्रोंइशा बाक्ब परमप्रभु बाक्ब।
25 मिनु पिप दाऊदमी येसु आ पर्बम ‘प्रभु गेना हना यो आं ग्युरा गे बाक्ब, दे तुइश्शा महिंनुङ। भजन संग्रह १६:८-११
26 गो ग्येरसीशा प्रभु कली ठेयब सेल्शा कुम्सो पाइनुङ। मारदे हना प्रभु नु काथा बाक्शा, गेना हना यो ब्रोंइचा ताइनुङ।
27 बेक्शा आं रां राक्शा लचा मगेब, दे तुइक्नुङ।
28 परमप्रभुमी ब्रोंइतीक लां कोंइताक्यी। मिनु गेना हना यो प्रभु नु ग्येरसीशा बाक्नुङ’ दे येसु आ पर्बम ब्रेक्शो बाक्त। भजन संग्रह १६:८-१०
29 आं लोक्बपुकी, इं किकी पिपी दाऊद आ पर्बम का का पा देंने चाप्नुङ। दाऊद बेक्माक्त। मिनु लाइश्शा थिम्ने थुम्मे बाक्त। तेकेर थिम्मे गोपुकीमी मुल यो तुइक्नय। १राजा २:१०
30 परमप्रभु यावेमी आ लोव़ पाइब दाऊद कली ‘इ चच युइ रे पिप का सेल्नुङ’ दे लोव़ गेशो तुइश्शो बाक्त।
31 मिनु दाऊदमी परमप्रभु यावे आ लोव़ पाइब दुम्तीके, मेको येसु, मस्सीह आ पर्बम लोव़ पाप्तु, दे तुइश्शो बाक्माक्त। मिनु मेकोमी ‘मेको बेक्शो मुर आन बाक्तीकेम मलीब। आ रां मराक्बा’ देंशो बाक्माक्त। २सामुएल ७:१२-१३; भजन संग्रह ८९:४-५
32 परमप्रभु यावेमी येसु कली बेक्शो रे सेंताक्व। मेको गो आंइ मिक्चीमी ताइतक।
33 मिनु येसु परमप्रभु यावे आ ग्युरा गे बाक्शा, आ आफ रे परमप्रभु यावे आ सोक्त ताक्शा, आंइ तारी मोइक्तु। मिनु मार मार नेंनी, मार मार तनी, मेको नेल्ल परमप्रभु यावे आ सोक्तीम पपाइश्शो बाक्माक्त, दे तुइक्तीने। यूहन्ना १५:२६
34 पिप दाऊद सरीङ ग्येत्थ क्युक्चा मतवा। तन्न दाऊदमी ‘प्रभुमी आं प्रभु कली, आं ग्युरा गे बाक्को। भजन संग्रह ११०:१
35 इ जोरी सत्रु आन कली इ खोइल आगाम मवोदुमी सम्म आं ग्युरा गे बाक्को’ दे ब्रेक्शो बाक्त। मेको लोव़ दाऊद आ पर्बम ममाइ। येसु आ पर्बम ब्रेक्शो बाक्ब, दे रुपीन।
36 मोपतीके इस्राएली नेल्लेमी मार तुइक्चा माल्नीनी देंशा हना, गेपुकीमी शीम केप्शा कांटी थोक्शा साइक्पाइश्शो येसु कली परमप्रभु यावेमी प्रभु नु ख्रीस्त सेल्तु” दे माइक्मी बाक्त। ख्रीस्त आ देंशो मस्सीह् बाक्ब।प्रेरित ५:३१
37 मिनु आ लोव़ नेंब आन थुं खाइक्माक्त। मिनु पत्रुस नु सोइश्शो आन कली “गो मार पक मिनु?” दे हिल्लो पामेनु, प्रेरित १६:३०; लूका ३:१०
38 पत्रुसमी “इन थुं परमप्रभु यावे गे लेश्शा, येसु कली थमा सुइश्शा, आ नेंमी ब्वाक्कुम ख्रुम्शा ग्रुंइपांइसीने। मिनु इन पाप क्याम्चा पुंइसीनीनी। परमप्रभु यावे आ सोक्तीम प्रिंचा यो पुंइसीनीनी। प्रेरित ३:१७-१९; लूका २४:४७
39 मारदे हना परमप्रभु यावे आ गेशो लोव़ इन कली, इन तमी तौ चच युइ आन कली नु ङोन रागीम बाक्ब आन कली गेशो बाक्त। मिनु परमप्रभु आंइ परमप्रभु यावेमी सु सु कली ब्रेश्शो बाक्मे, मेको आन कली गेशो बाक्त” दे शेंदीमी बाक्त। योएल ३:५
40 मिनु पत्रुसमी शुश शेंशा “थमा मसुइक्ब मदुमीने। मरिम्शो पाइब रे ङोन बाक्कीने” दे शुश अर्ती गेशा माइक्मी बाक्त। मत्ती १७:१७; फिलिप्पी २:१५
41 मिनु शुश मुरुमी पत्रुस आ देंशो बिश्शा, ख्रीस्त कली थमा सुइश्शा, ब्वाक्कुम ख्रुम्शा ग्रुंइचा पुंइसमा बाक्त। मोपा ब्वाक्कुम ख्रुम्शा ग्रुंइचा पुंइसीबपुकी हजार सां खोइ दुम्मा बाक्त। मोपा थमा सुइक्ब नु तेम्समा बाक्त।
42 मिनु नेल्ल काथा बाक्शा, सोइश्शोपुकीमी शेंशो लोव़ शेंसीशा, प्रभु भोज जशा, प्रार्थना पना पन बाक्बाक्मा बाक्त। प्रेरित २०:७
थुं का ङा दुम्शा बाक्शो
43 मिनु सोइश्शोपुकीमी परमप्रभु यावे आ सोक्त रे पा शुश चिन्ड नु छक लाक्चा ङा गेय कोंइना कोंइन बाक्बाक्मा बाक्त। मुरपुकीमी मेको आन कली मोदेंशो पशो तशा छक लाक्शा हिंबाक्मा बाक्त।
44 थमा सुइक्ब नेल्ल थुं का दुम्शा, आन के बाक्शो मारेइ मारेइ नेल्ल इं के बाक्ब, दे मिम्बाक्मा बाक्त। प्रेरित ४:३२-३५
45 रू, मारेइ लेयङमेनु, सु सु आन कली माल्मा, मेको आन कली योक्शा क्येट गेशा वारच पाइबाक्मा बाक्त।
46 मिनु नाक्त किंत किंत परमप्रभु यावे आ खिंमी ग्रुम्शा शेंसीबाक्मा बाक्त। खिं खिं हिरशा, प्रभु भोज जाइबाक्मा बाक्त। हाइश्शो थुं ङा दुम्शा, जचा तूचा योक्शा, ग्येरसीशो दुम्शा,
47 परमप्रभु यावे कली ठेयब सेल्ना सेल्न बाक्बाक्मा बाक्त। मुरपुकीमी मेको आन कली मोदेंशो पशो तशा, रिम्शो मिम्बाक्मा बाक्त। प्रभुमी नाक्त किंत किंत येसु कली थमा सुइक्ब तेम्ना तेम्न बारपाइक्मी बाक्त। प्रेरित ४:४; प्रेरित ५:१४; प्रेरित ६:७; प्रेरित ११:२१; प्रेरित १४:१