3
खोइली मदुक्ब कली सापाइश्शो
1 मिनु काबु पत्रुस नु यूहन्ना ३ बजे ङा प्रार्थना पची ना परमप्रभु यावे आ खिंमी जाक्सा बाक्त।
2 मेकेर जरमेसे रेन खोइल मदुक्ब मुर का बाक्माक्त। मेको कली नाक्त किंत किंत कुरशा चाक्शा, खिं ओव़ब आन कली पुंइदीमील, दे “रिम्शो लाप्चो” नें पाइश्शो लाप्चो आ ङोंइती वोइक्बाक्मा बाक्त।
3 मिनु मेको पुंइब मुरुमी पत्रुस नु यूहन्ना आस कली ओव़चशो तशा, मारेइ गेनीसी कों, दे पुना बाक्त।
4 मिनु पत्रुस नु यूहन्नामी पुंइब कली कोव़शा, पत्रुसमी “ओंथ कोव़स्की” देंमाक्त।
5 मिनु पुंइबमी मार गेयीसी, दे आस पा कोव़सी बाक्त।
6 मिनु पत्रुसमी “गो नु सुन चांदी मबा। मार बाक्मे, मेकोन गेनन। तन्न आं के मार मेकोन गेनन। नासरथ ङा येसु ख्रीस्त आ नेंमी बोक्शा एर ओंथ हिरसो” देंशा,
7 पुंइब आ ग्युरा गुइ ग्याइश्शा कीशा छुल पोक्शा राप्पदा बाक्त। राप्पदानु, आ खोइल ङा बोंइसे नेल्ल दुक्ब दुम्शा,
8 दिव दाव प्रेक्शा, एर ओंथ गाक्ब दुम्माक्त। गाक्ब दुम्शा परमप्रभु यावे कली ठेयब सेल्शा, कुम्सो पना पन, प्रेक्ना प्रेक्न पत्रुस नु यूहन्ना नु काथा गाक्शा, परमप्रभु यावे आ खिं ओव़माक्त।
9 मिनु मेकेर बाक्बपुकीमी मेको पुंइब कली साशा, परमप्रभु यावे कली ठेयब सेल्शा गाक्शो तशा,
10 “रिम्शो लाप्चो आ ङोंइती बाक्ब खोइल मदुक्ब दोपा साशा ओं पा गाक्मे” दे छक लाक्मा बाक्त।
11 पुंइबमी पत्रुस नु यूहन्ना कली काइ मप्रोंइथु काथा गाक्शा, पिप सोलोमन नें वोइश्शो थाम पाइश्शो बाक्तीके जाक्दीम्मा बाक्त। मिनु एर ओंथ ङा मुर दोरशा जाक्शा पुम्दमे बाक्त। प्रेरित ५:१२; यूहन्ना १०:२३
12 मिनु मोपा पुम्शो तशा, पत्रुसमी “इं इस्राएलीपुकी, एको मुर साशो तशा छक लाक्तीनी। मिनु गो आंस सक्तिम सापाइश्शो बाक्माक्त, फेस्तस दे मिम्तीनी? आंस सक्तिम सापाइश्शो ममाइ।
13 इ किकी पिपी अब्राहाम, इसहाक नु याकूब आन परमप्रभु यावेमी आ गेय पाइब येसु कली ठेयब सेल्तु। गेपुकी चहिं मेको कली ग्याइक्पाइक्तीनी। पिलातसमी मेको कली प्रोंइचा थुं पवानु यो, गे मबिस्सीनी।
14 तन्न गेपुकीमी परमप्रभु यावे आ योव़शो नु ठीक पाइब कली तिल्तीनी। मुर साइक्ब कली प्रोंइशा सोइक्चा कली पुंइतीनी। मत्ती २७:२०-२१
15 मिनु गे ब्रोंइचा गेब कली साइक्तीनी। परमप्रभु यावेमी चहिं बेक्शो रे सेंताक्व। गो मेको तशा, सांकछी दुम्ताक्क।
16 परमप्रभु आ सक्ति येसु नु बाक्ब। मिनु येसु आ नें थिशा थमा सुइश्शा, सक्ति पाइश्शो गेय पचा तांइसीब, दे थमा सुइक्नीकी। मिनु आंइ कली थमा सुइश्शो तशा, परमप्रभुमी एको मुर कली सापाइश्शा कोंइताक्व। मिनु साशा सेस दुम्शो ताइतीनी।
17 आं लोक्बपुकी, इन ठेयब मुरपुकी नु गे नेल्लेमी येसु कली मतुइक्थु, साइक्पाइक्तीनी, दे तुइक्नुङ। लूका २३:३४
18 साइ ङोंइती रे परमप्रभुमी यावे आ लोव़ पाइबपुकी रे ‘ख्रीस्त श्येत जशा साइक्चा पुंइसीब’ दे लोव़ पाइक्बाक्माक्त। परमप्रभु यावेमी मेको लोव़ खाप्शो बाक्त। लूका २४:४४
19 मुल चहिं इन थुं परमप्रभु यावे गे लेश्शा, ख्रीस्त कली थमा सुतीन। मिनु मेकोमी इन पाप क्याम्ब। प्रेरित २:३८
20 मिनु मेकोमी इन कली रिम्शो बाक्चा गेब। मिनु परमप्रभु यावेमी पाप रे प्रोंइब, येसु ख्रीस्त इन बाक्तीक सोइक्ब। मिनु इन थुं नाइक्पाइक्ब।
21 तन्न परमप्रभु यावे आ लोव़ पाइबपुकीमी साइ रे मार मार देंमा, मेको लोव़ थमा मदुम सम्म येसु ख्रीस्त परमप्रभु यावे नु स्वर्गम बाक्ब।
22 साइ नेसी परमप्रभु यावे आ लोव़ पाइब मोसामी ‘परमप्रभु, इन परमप्रभु यावेमी आं कली योव़शो खोदेंशो पा आ लोव़ पाइब इन मुर आन दाते रे योव़शा, इन कली वारच पाइब नु लां कोंइब सेल्ब। मोपा योव़शोमी इन कली मार मार शेंबा, मेको आ लोव़ नेंशा टिने। ब्यवस्था १८:१५,१९
23 सु सुमी आ लोव़ मटीमे, मेकोपुकी जाम्शा लाइनीम’ दे देंशो बाक्त।
24 मोसामी देंशो लोव़ ला ममाइ। परमप्रभु यावे आ लोव़ पाइब सामुएल नु अरु शुशेमी मोसामी देंशो खोदेंशो लोव़ पामे बाक्त।
25 इन किकी पिपी अब्राहाम आ खिं ङा मुर नमी। परमप्रभु यावेमी अब्राहाम कली ‘गे इ खिं ङा मुर रे पा रागी ङा मुर नेल्लेमी आसीक राइनीम’ दे कबल पशो बाक्माक्त। उत्पत्ती २२:१८
26 मोपतीके परमप्रभु यावेमी आ गेय पाइब येसु कली ङोंइती इन बाक्तीकेम सोइक्ताक्व। मारदे हना इन कली आसीक गेशा, इन मरिम्शो गेय रे लेत्चा, दे मोदेंशो पाप्तु, दे रुपीने” दे शेंदीमी बाक्त। प्रेरित १३:४६