4
कछडीम राप्पाइक्चा पुंइसीशो
1 मिनु पत्रुस नु यूहन्नामी मोदेंशो शेंना शेंन बाक्सानु, चढ़ेबपुकी, परमप्रभु यावे आ खिं ङा ठेयब मुर नु सदुकीपुकी जाक्मा बाक्त। लूका २७:४:५२
2 मिनु “येसु बेक्शो रे सेंसाक्व। मिनु मुर नेल्ले यो बेक्शो रे सेंसीनीम” दे शेंशो नेंशा, थुं मनुमा बाक्त। प्रेरित २३:८
3 मिनु पत्रुस नु यूहन्ना आस कली ग्याइक्पाइश्शा “मुल नां रिक्त। मोपतीके कछडीम दीसा बाक्चा” दे मेको नाक्दो जेल्खानमी चोक्पदमे बाक्त।
4 पत्रुस नु यूहन्ना आस शेंशो लोव़ नेंशा, थमा सुइक्ब ५ हजार जना जाक्दीश्शो बाक्मा बाक्त। प्रेरित २:४७
5 मिनु आ दीसा कछडीम बाक्चा कली यरूसलेम ङा हुकुम पाइब, जोक्ब तुइक्ब खाल्पापुकी नु सास्त्री नेल्ल बुक्मा बाक्त।
6 मेना ठेयब चढ़ेब हन्नास बाक्माक्त। ङोंइती ङा ठेयब चढ़ेब काइयाफास, यूहन्ना नु अलेकजन्डर बाक्मा बाक्त। ठेयब चढ़ेब आन खिं ङा मुर यो शुश जाक्शो बाक्मा बाक्त। लूका ३:१-२
7 मेको नेल्ल खुम्सीशा बाक्मानु, पत्रुस नु यूहन्ना आस कली जेल्खान रे ग्रुंइपाइश्शा, आन बाक्तीके चाक्पाइश्शा आन ङोंइती राप्पदमे बाक्त। मिनु “मेको खोइल मदुक्ब मुर कली सु आ सक्तिमी, सु आ नें ब्रशा सापांइसी, लो देनीस” दे हिल्लो पामे बाक्त। मत्ती २१:२३
8 मिनु पत्रुस परमप्रभु यावे आ सोक्तीमी ब्रीशा, मेको आन कली “इं इस्राएल ङा हुकुम पाइब नु खाल्पापुकी, आं लोव़ नेनीने। मत्ती १०:१९-२०
9 मेको खोइल मदुक्ब कली खोइल सापाइश्शा, रिम्शो गेय पाइतस्कु। दोपा सापांइस्कु, दे तुइक्चा दाक्नीनी हना, शेंनन्नी।
10 गे ला ममाइ, तन्न इं इस्राएल ङा मुर नेल्लेमी रुप्चा माल्नीम। मेको खोइल मदुक्ब मुर नासरथ ङा येसु ख्रीस्त आ नें ब्रशा साशा गाक्ने चाप्ब दुम्माक्त, दे रुपीने। मेको नासरथ ङा येसु ख्रीस्त कली गेपुकीमी शीमी केप्शा कांटी थोक्शा क्याइक्पाइश्शा साइक्पाइक्तीनी। तन्न परमप्रभु यावेमी मेको कली बेक्शो रे सेंताक्व। प्रेरित ३:६,१३-१६
11 खिं सेल्बपुकीमी गारो प्रोव़ङमेनु, एको फुल्लु मगार, दे ताइक्तमे बाक्त। मेको मगारथु, ताइश्शो फुल्लु चहिं सुर ङा जग फुल्लु दुम्माक्त, दे ब्रेक्शो लोव़, मेको येसु आ पर्बम ब्रेक्शो बाक्ब, दे रुपीन। मत्ती २१:४२; भजन संग्रह ११८:२२
12 मुर आन कली श्येत नु पाप रे प्रोंइब येसु ख्रीस्त का ला बाक्ब। परमप्रभुमी येसु ख्रीस्त कली अधिकार गेशा, मुर नेल्ल आन क्येङा ठेयब सेल्तु। मिनु आ नेंमी ला ब्रोंइचा तांइसीब, दे तुइक्तीने” दे माइक्मी बाक्त। प्रेरित १०:४३; मत्ती १:२१
13 पत्रुस नु यूहन्ना शुश मशेंसीशो बाक्ताक्स हना यो, जोक्ब तुइक्ब खोदेंशो पा महिंथु, ठेयब थुं पा लोव़ पाम्से बाक्त। मेको लोव़ नेंशा, कछडी पाइबपुकी छक लाक्मा बाक्त। मिनु मेको निक्शी थमा पा येसु नु काथा गाक्ब काथा बाक्ब बाक्सा बाक्त, दे तुइक्तमे बाक्त।
14 सापाइक्चा पुंइसीशो मुर पत्रुस नु यूहन्ना नु काथा राप्शा बाक्शो तशा, जोल पाम्से बाक्त देंशा, आस लोव़ जोल सेल्ने मचाप्थु, मारेइ देंने मचाप्मे बाक्त। प्रेरित ३:८-९
15 मिनु पत्रुस, यूहन्ना नु साशो मुर सांफा आन कली ग्रुंइशा वोइश्शा “मुल मार पया” दे लोव़सी पचा गोव़मे बाक्त।
16 मिनु लोव़सी पा “खोइल मदुक्ब कली सापाइश्शा मेको निक्शीमी ठेयब छक लाक्चा ङा गेय कोंइताक्स। इं यरूसलेममी बाक्बपुकीमी थमा लोव़ बाक्माक्त, दे नेल्लेमी तुइक्नीमी। मिनु गोपुकीमी थमा ममाइ देंने मचाप्नय। यूहन्ना ११:४७
17 तन्न मोदेंशो लेंशा मदुम्ल, दे मेको आस कली मार पचा देंशा हना, मुल ङा मेरे येसु आ नें सुइ कली मतुइक्पाइक्चा नमी, आ नें ब्रशा सुइ कली मसापाइक्चा नम, दे माइक्चा नसी” दे सल्ला पामे बाक्त।
18 मिनु पत्रुस नु यूहन्ना आस कली खिंम ओंइशा “हेरकादे, मुल ङा मेरे येसु आ नें मब्रचा। सुइ मुर आन कली मशेंचा। मतुइक्पाइक्चा नम” देंमा बाक्त।
19 मिनु पत्रुस नु यूहन्नामी “परमप्रभु यावे आ देंशो टिचा देय इन देंशो टिचा? एको निक्शीमी परमप्रभु यावेमी तेको पचा देंबा, दे आंमा मिम्तीने। प्रेरित ५:२८-२९
20 गो निक्शी चहिं आंस मिक्चीम तशो नु आंस नोफामी नेंशो लोव़ मदेंथु मचाप्नस्कु। मेको रुपीन” देंसा बाक्त।
21 मिनु मेको आस दोस थिन्ने मचाप्तीके मेकोपुकीमी “हेरकादे, मुल ङा मेरे मोदेंशो गेय मपसे” दे हिंच कोंइशा, लोव़ थोक्शा, सोइक्तमे बाक्त। शुश मुरुमी आस पशो छक लाक्चा ङा गेय तशा, परमप्रभु कली ठेयब सेल्ना सेल्न बाक्बाक्मा बाक्त।
22 साशो मुर चहिं ४० बर्स लाक्शो बाक्माक्त। मोपतीके मेको कली साशो तशा, नेल्ल छक लाक्मा बाक्त।
परमप्रभु कली ठेयब सेल्शो
23 मिनु पत्रुस नु यूहन्ना प्रोंइचा पुंइसीशा, वारच आन कली ग्रुम्थ लसा बाक्त। मिनु सु सुमी मार मार पवा, मार मार देंमा, मेको नेल्ल शोव़ङसे बाक्त।
24 मिनु आस लोव़ नेंशा, नेल्ल थुं का पा परमप्रभु यावे कली ठेयब सेल्शा “परमप्रभु यावे, नेल्ल आन कली सासन पाइब, गे सरीङ, रागी, समुन्द्र नेल्ल सेल्तीनी। मिनु मेकेर बाक्शो मारेइ मारेइ सेल्तीनी। मिनु मेको आन कली कोव़नीनी।
25 साइ इन लोव़ पाइब किकी पिपी, आंइ आफ दाऊद कली इन सोक्त रे पा ‘अर्को रागी ङा मुरपुकी मारदे गाइक्नीमी, मारदे चुरनीमी? मुरपुकीमी मारदे शोर गाक्शो दूली मिम्नीमी?
26 परमप्रभु यावे नु आ तेल लुक्शो, ख्रीस्त आस जोरी सत्रु दुम्शा, रागी ङा पिपपुकी नु हुकुम पाइबपुकी थुं का दुम्शा बुक्नीम’ देंपाइक्तीनी। भजन संग्रह २:१-२
27 मोपा साइ इन पपाइश्शो लोव़ सिनाक्त मुलाक्त गाम्ना गाम्न पित। मारदे हना इन सोइश्शो, इन गेय पाइब येसु, आ जोरी सत्रु आंइ मिक्चीमी ताइतक। पिप हेरोद का, पन्तीयस पिलातस का, अर्को रागी ङा मुर नु इस्राएल ङा मुर नेल्ल गारशा, आंइ सहरमी बुक्शो ताइतक। लूका २३:१२
28 मेकोपुकीमी इन देंशो ङा लाक्शा मारेइ पने मचबेम। इन देंशो ला पने चाप्तेक्म। प्रेरित २:२३
29 परमप्रभु, मेकोपुकीमी हिंच कोंइताक्म हना यो, महिंथु ठेयब थुं पा इन लोव़ शेंतीक सक्ति तकल, दे पुंइनीकी। एफिसी ६:१९
30 परमप्रभु यावे, इन गेय पाइब येसु आ नें ब्रशा, सापाइक्तीक गेय, छक लाक्चा ङा गेय नु चिन्ड कोंइने चाप्कल, दे पुंइनीकी” दे प्रभु कली ठेयब सेल्शा पुन्मे बाक्त।
31 मोदेंशो प्रार्थना पने थुम्मे चोटीन ख्रिनु कुशो खोदेंशो पा आन बुक्शा बाक्तीके एर ओंथ नेल्ल हिम्से बाक्त। मिनु नेल्ले परमप्रभु यावे आ सोक्तीम प्रिंचा पुंइसमा बाक्त। मिनु महिंथु ठेयब थुं पा परमप्रभु आ लोव़ शेंना शेंन गाक्बाक्मा बाक्त।
थमा सुइक्ब नेल्ल थुं का ङा दुम्शो
32 मिनु थमा सुइक्ब आन थुं नेल्ल कांइचीक दुम्शा, मेकोपुकी नु बाक्शो मारेइ मारेइ नेल्ल इं के मिम्बाक्मा बाक्त। सुइमी यो आं के, इं के मदेंबाक्मा बाक्त। प्रेरित २:४४
33 मिनु येसु आ सोइश्शोपुकीमी सक्ति पाइश्शो लोव़ पा प्रभु येसु बेक्शो रे सेंचा पुंइसाक्व, दे नेंपाइक्बाक्मा बाक्त। मेको नेल्ल शुश आसीक तामे बाक्त। प्रेरित २:४७
34 मोपतीके श्येत जाइब का यो मबाक्मा बाक्त। मारदे हना रू खिं थीबपुकीमी रू खिं का निक्शी लेयशा, क्येट चाक्शा, प्रेरित २:४५
35 मेको १२ जना सोइश्शो आन कली गेशा, सु सु कली माल्मा, मेको आन कली योक्शा गेचा नमी, दे गेबाक्मा बाक्त। मिनु मेकोपुकीमी योक्बाक्मा बाक्त।
36 मोदेंशो गेब का चहिं योसेफ माइश्शो मुर का बाक्माक्त। मेको योसेफ साइप्रस रागीमी जरमेशो लेवी आ थर ङा बाक्माक्त। सोइश्शोपुकीमी योसेफ आ याइनी नें बारनाबास वोइश्शो बाक्मा बाक्त। बारनाबास देंशो “आन थुं ग्येत्थ लुक्च दुम्शो मुर आन कली आन थुं नाइक्पाइक्ब” दे रुम्सीब। प्रेरित ११:२२-२६; प्रेरित १२:२५; प्रेरित १५:२; गलाती २:१कलस्सी ४:१०
37 मेको बारनाबासमी रू का लेयशा क्येट चाक्शा, सोइश्शो आन गुइमी गेवा बाक्त।