5
हनानीया नु सफीरा
1 मिनु हनानीया नु आ मीश सफीरामी यो आस रू का लेयङसे बाक्त।
2 मिनु क्येट ताक्शा, इच्का गो वोंइसीस, लीशो चहिं नेल्ल ओशो ला, दे सोइश्शो आन कली गेचा, दे लोव़सी गारपदसे बाक्त। मिनु मोपा मेको लीशो क्येट हनानीयामी चोव़दीम्माक्त। प्रेरित ६:३४-३७
3 मिनु सोइश्शो आन बाक्तीके जाक्दीश्शा, क्येट गेवानु, पत्रुसमी “हनानीया, मारदे गे इ थुंम सैतान ओव़चा गेशा, परमप्रभु यावे आ सोक्त कली जोल पवी? रू लेयशो क्येट नेल्ल ओशो ला बाक्ब, दे मारदे इच्का ख्रुइश्शा वोदी?
4 मेको रू मलेयसी नु इस केन बाक्त। लेयसी नोले मेक रे जाक्शो क्येट यो इस केन बाक्त। मिनु मारदे जोल पसी? गे आंइ कली जोल मपसी, तन्न परमप्रभु यावे कली जोल पाइतीसी” दे मदा बाक्त।
5 मिनु हनानीयामी पत्रुस आ देंशो नेंशा, दिङ गोल्शा बेक्माक्त। मिनु मुरपुकीमी मेको लोव़ नेंशा, शुश हिंमा बाक्त।
6 मेकेर खुम्सीशो ठिटापुकीमी आ बेक्शो रां लाइश्शा थिम्मे बाक्त।
7 मिनु हेररा घन्टा सां नोले हनानीया आ मीशेमी आ वोंइश बेक्त, दे मतुइक्थु, मेकेर जाक्माक्त।
8 मिनु पत्रुसमी “इस रू ओशोमीन लेयसी? लो, देनो” देंमेनु “ओशोमीन लेयतस्कु” देंमाक्त।
9 मिनु पत्रुसमी “गे निक्शी गारशा, मोदेंशो पा परमप्रभु यावे आ सोक्त कली जोल पचा दुम्बा? इ वोंइश कली थिम्थ लाइबपुकी लेश्शा जाक्चाम्तेक्म। इच्ची ना इ कली यो लाइश्शा थिम्नीम” देंमेनु, मीश मुर यो दिङ गोल्शा बेक्माक्त।
10 मिनु ठिटापुकी जाक्शा कोव़ङमेनु, सफीरा यो बेक्शो तामे बाक्त। मिनु लाइश्शा आ वोंइश थिम्तीके आ नेक्था थिम्मे बाक्त।
11 मिनु थमा सुइश्शा बुक्बपुकी नु मेको लोव़ नेंब नेल्लेमी “मो देंशो हेंथे पा जोल पचा मदुम्बाक्माक्त” दे तुइश्शा, शुश हिंमा बाक्त।
सोइश्शोपुकीमी गेय पशो
12 मिनु सोइश्शोपुकीमी मुर आन दातेमी शुश चिन्ड नु छक लाक्चा ङा गेय पाम्तेक्म। मेको नेल्ल सोलोमन नें वोइश्शो थाम पाइश्शो ठेयब कोठाम बाक्बाक्मा बाक्त। प्रेरित ३:११
13 थमा मसुइक्बपुकी मेकोपुकी नु काथा गाक्चा बाक्चा हिंशा, मेको आन कली ठेयब सेल्शा, आन पर्बम रिम्शो लोव़ ला पाइबाक्मा बाक्त।
14 मिनु वोंइश मुर नु मीश मुर शुशेमी प्रभु कली थमा सुइक्ब दुम्शा, तेम्सीन सीन शुश बारना बारन लमा बाक्त। प्रेरित २:४७
15 सोइश्शोपुकीमी शुश छक लाक्चा ङा गेय पशो तशा, मुरपुकीमी रोइ पाइब आन कली चाक्शा, लां पित्थ इप्पाइश्शा, वोइक्बाक्मा बाक्त। मारदे हना पत्रुस मेको लां गाक्मेनु, आ वांकुम योइश्शा साब, दे मिम्शा मो पाइबाक्मा बाक्त। प्रेरित १९:११-१२
16 यरूसलेम एर ओंथ सहर ङा रोइ पशो नु वोलम तशो मुर शुश आन कली चाक्बाक्मा बाक्त। मेकोपुकी यो नेल्ल साशा लाइबाक्मा बाक्त।
सोइश्शोपुकी खेदा पचा पुंइसीशो
17 सोइश्शोपुकीमी मोदेंशो छक लाक्चा ङा गेय पशो तशा, ठेयब चढ़ेब नु सदुकी आन थुंम गेहे पामे बाक्त। प्रेरित ४:१,६
18 मिनु सोइश्शो आन कली ग्याइक्पा लाइश्शा, जेल्खानमी चोक्पदमे बाक्त।
19 मिनु मेको नाक्दो परमप्रभु यावे आ स्वर्ग ङा गेय पाइब कामी लाप्चो रोक्शा, मेको आन कली ग्रुंइदीमी बाक्त। प्रेरित १२:७
20 मिनु ग्रुंइशा “परमप्रभु यावे आ खिं लशा, मुर आन कली येसु आ नेंमी ब्रोंइतीक लां आ पर्बम शेंदीने” दे सोइक्तीमी बाक्त।
21 मेको लोव़ टिशा, सुनी कना परमप्रभु यावे आ खिं जाक्दीश्शा, ओव़शा शेंचा गोव़मे बाक्त।
कछडीमी राप्पाइक्चा पुंइसीशो
मेको लोव़ टिशा, सुनी कना परमप्रभु यावे आ खिं जाक्दीश्शा, ओव़शा शेंचा गोव़मे बाक्त। मिनु ठेयब चढ़ेब, मेको नु बाक्बपुकी, इस्राएली आन जोक्ब तुइक्ब खाल्पापुकी खुम्सीशा “सिनाक्त चोक्पाइश्शो आन कली चाक्चा” दे जेल्खान सोइक्तमे बाक्त।
22 मिनु गेय पाइबपुकी लशा कोव़ङमेनु, मेको चोक्चा पुंइसीशोपुकी मथिदमे बाक्त। मिनु लेश्शा जाक्शा, देंमा बाक्त।
23 मेकोपुकीमी “जेल्खानमी जाक्दीकानु, खाल पाइब बाक्तेक्म। लाप्चो नेल्ल चोक्स ङा चोक्स बाक्तेक्म। मिनु आगा कोव़शोनु, इन माल्शो मुरपुकी चहिं मबाक्म” देंमा बाक्त।
24 मिनु परमप्रभु यावे आ खिं ङा कप्तान नु ठेयब चढ़ेबपुकीमी मेको लोव़ नेंशा “ते लमा, दोपा ओदेंशो दुम्मे?” दे छक लाक्शा, मुल मार पचा, दे मिम्ने मचाप्मे बाक्त।
25 मिनु मुर का जाक्शा “सिनाक्त गेपुकीमी जेल्खानमी चोक्पाइश्शो मुरपुकीमी परमप्रभु यावे आ खिंमी मुर आन कली शेंना शेंन बाक्नीम” देंमाक्त।
26 मिनु कप्तान नु गेय पाइबपुकी परमप्रभु यावे आ खिं लशा, सोइश्शो आन कली मारेइ मपथु, चाक्ग्मे बाक्त। “मारदे हना मरिम्शो पाइतय हना, मुरपुकीमी इं कली फुल्लु आप्शा साइक्नीम” दे हिंमा बाक्त।
27 मिनु कछडीम चाक्शा, आन ङोंइती राप्पाइक्मी बाक्त।
28 मिनु ठेयब चढ़ेबमी “येसु आ नें मशेंचा, मुर आन कली मतुइक्पाइक्चा देंतक। गेपुकीमी चहिं यरूसलेम नेल्ल मेको लोव़ फ्रनी बाक्त। लोव़ फ्रशो ला ममाइ। मेको येसु कली गोपुकीमी साइश्शो, दे आंइ कली दोस गेनी बाक्त” दे हुइक्तीमी बाक्त। प्रेरित ४:१८; मत्ती २७:२५
29 मिनु पत्रुस नु येसु आ सोइश्शो नेल्लेमी “गोपुकीमी मुर आन लोव़ क्येङा परमप्रभु यावे आ लोव़ टिचा, दे थुं फ्रेंताक्क। प्रेरित ४:१९; दानीएल ३:१७-१८
30 इं किकी पिपी आन परमप्रभु यावेमी गेपुकीमी शीम केप्शा, कांटी थोक्शा क्याइश्शा साइक्पाइश्शो येसु कली बेक्शो रे सेंताक्व। प्रेरित ३:१५
31 परमप्रभु यावेमी इस्राएली आन थुं आ गे लेप्पाइक्ब, लां कोंइब कली नु पाप रे प्रोंइब सेल्शा, आ ग्युरा गे निप्पाइक्तु। प्रेरित २:३३
32 मेको नेल्ल आंइ मिक्चीमी ताइतक। आ देंशो टीब आन कली परमप्रभु यावेमी आ सोक्त गेब। मिनु परमप्रभु यावे आ सोक्तीमी ‘मेको लोव़ नेल्ल थमा बाक्ब’ दे तुइक्पाइक्ब, दे तुइक्तीने” देंमा बाक्त। लूका २४:४८; यूहन्ना १५:२६-२७
33 मोदेंशो लोव़ पशो नेंशा, गाइश्शा “मेको आन कली मसाइक्थु मप्रोंइचा नमी” देंमा बाक्त।
गमालीएल आ देंशो पशो
34 मिनु मेको आन दातेमी गमालीएल माइश्शो फरिसी का बाक्माक्त। मेको निसाफ पतीक आ पर्बम शेंब बाक्माक्त। मुर नेल्लेमी मेको कली मान पाइबाक्मा बाक्त। मिनु गमालीएलमी मेकेर बाक्ब आन कली मोपा गाइश्शो तशा, सोइश्शो आन कली लाङगा ग्रुंइशा वोइक्मी बाक्त। प्रेरित २२:३
35 मिनु कछडीम बाक्ब आन दातेमी राप्शा, मेको आन कली “आं लोक्ब इस्राएलीपुकी, मेको मुर आन कली मार पचा चिक्तीनी, मेको होस पा पने। मोपतीके आं लोव़ का निक्शी नेनीने।
36 साइ थुदास माइश्शो आ पर्बम गो नेल्लेमी तुइक्ताक्य। मेकोमी ठेयब सेल्सीशा, ४ सहे मुर आन कली आ नोले खोइक्ब सेल्तु। मिनु थुदास साइक्चा पुंइसाक्व। मिनु आ नोले खोइक्ब नेल्ल ब्राशा गाक्तेक्म। मिनु मेको आन लोव़सी जाम्शा लत।
37 मेको नोले मुर आन कली हिक्तीक बर्समी गालील ङा यहूदा माइश्शो मुर का बोक्माक्त। मेकोमी यो आ नोले खोइक्ब मुर सेला बाक्त। मेको यो जाम्शा लमाक्त। मिनु आ नोले खोइक्ब नेल्ल ब्राशा गाक्मा बाक्त।
38 मोपतीके मेको येसु माइश्शो आ नोले खोइक्ब आन कली मारेइ मपाइय्य। मो प्रोंइशा सोइक्तय। मेको आन लोव़ मुरुमी मिम्शो लोव़ बाक्त हना, मारेइ मदुम्थु जाम्शा लाइब। मत्ती १५:३३
39 परमप्रभु यावे आ पशो बाक्त हना चहिं, गेपुकीमी तेक्शा यो मतेक्सीब। मेको ला ममाइ। गेपुकी परमप्रभु यावे कली मरिम्शो पाइब दुम्नीनी” दे माइक्मी बाक्त।
40 मिनु गमालीएल आ लोव़ नेंशा, बिस्समा बाक्त। मिनु लाङगाम सोइश्शो आन कली खिं गा ब्रेश्शा, का का पा युक्पदमे बाक्त। मिनु “मुल ङा मेरे येसु आ नेंमी शेंशा मगाक्कीने” दे प्रोंइशा सोइक्तमे बाक्त। मत्ती १०:१७
41 मिनु सोइश्शोपुकी ग्येरसीशा, मेकेर रे लमा बाक्त। मारदे हना “येसु आ नेंमी श्येत जचा रिम्शो दुम्ब” देंमा बाक्त। मत्ती ५:१०-१२; १पत्रुस ४:१३
42 मिनु नाक्त किंत किंत परमप्रभु यावे आ खिंमी, आंम आन खिं खिंमी खुम्सीशा “येसु परमप्रभु यावे आ सोइश्शो ख्रीस्त बाक्ब” दे शेंना शेंन बाक्बाक्मा बाक्त।