13
शेंब आस कली सोइश्शो
1 एन्टीओक सहर ङा थमा सुइक्ब आन दातेमी परमप्रभु यावे आ लोव़ पाइब नु शेंब का निक्शी यो बाक्मा बाक्त। मोदेंशो मुर सु सु बाक्मा बाक्त देंशा हना, बारनाबास, क्येर माइश्शो सिमियोन, साइरेनी ङा लुसीयस, पिप हेरोद आ गेय पाइब मानाएन नु सावल बाक्मा बाक्त। प्रेरित ११:२७; १कोरिन्थी १२:२८
2 मिनु काबु थमा सुइक्बपुकी खुम्सीशा माइजा बाक्शा, प्रार्थना पना पन प्रभु कली ठेयब सेल्ना सेल्न बाक्मानु, परमप्रभु यावे आ सोक्तीमी “बारनाबास नु सावल आस कली आं गेय पथ योव़तासी। मोपतीके मेको आस कली आं गेय पचा कली सोइक्तीने” दे तुइक्पाइक्मी बाक्त। प्रेरित ९:१५
3 मिनु माइजा बाक्शा, प्रार्थना पा आसीक गेशा, प्रभु आ गेय पथ सोइक्तमे बाक्त। प्रेरित ६:६
4 मिनु मेको निक्शी परमप्रभु यावे आ सोक्तीमी योव़शा सोइक्तीके एन्टीओक सहर रे ब्रुप्शा, सिलुसीया सहरमी जाक्दीस्सा बाक्त। मेकेर जहाज ङोइश्शा समुन्द्र शोक्शा, साइप्रस टापु जाक्दीस्सा बाक्त।
5 मिनु सलामीस सहर जाक्दीश्शा, यहूदी आन ग्रुम्तीक खिं लशा, परमप्रभु यावे आ लोव़ शेंदसे बाक्त। एन्टीओक रे काथा गाक्शा, यूहन्ना मर्कूसमी मेको आस कली वारच पस ङा पस बाक्माक्त। प्रेरित १२:१२,२५
चटक कोंइब कली हुइश्शो
6 मिनु साइप्रस टापु नेल्ल हिरशा, गाक्मा गाक्मा पाफोस सहरमी जाक्दीम्मा बाक्त। मेकेर जाक्दीश्शा बाक्मानु, बार-येसु माइश्शो चटक कोंइब, यहूदी मुर का ग्रुम्मे बाक्त। मेको “परमप्रभु यावे आ लोव़ पाइब नङ” देंखु पा गाक्बाक्माक्त।
7 मेको चटक कोंइब सेरगीयस-पावल नें पाइश्शो हुकुम पाइब आ खिंमी बाक्बाक्माक्त। मेको हुकुम पाइब जोक्ब तुइक्ब मुर बाक्माक्त। मिनु काबु बारनाबास नु सावल आस कली ब्रेश्शा “परमप्रभु यावे आ लोव़ गो यो नेंनुङ” दे माइक्सी बाक्त।
8 मेको चटक कोंइब बार-येसु कली ग्रीक लोव़मी एलुमास यो देंबाक्मा बाक्त। मिनु मेकोमी हुकुम पाइब कली बारनाबास नु सावल आस शेंशो लोव़ थमा सुइक्चशो तशा “मेको आस शेंशो थमा मसुतीन” दे हुकुम पाइब आ थुं हिरपाइक्चा मला बाक्त।
9 सावल कली पावल यो देंनीमी। मिनु पावलमी चटक कोंइबमी हुकुम पाइब आ थुं हिरपाइक्चा माल्शो तुइश्शा, परमप्रभु यावे आ सोक्तीम ब्रीशा सक्ति पाइश्शो दुम्शा, चटक कोंइब कली मिक्च मयाक्थु कोव़स ङा कोव़स पा
10 “गे सैतान आ तौ नवे। रिम्शो मदाक्थु, मरिम्शो ला दाक्नेवे। प्रभुमी सेल्शो रिम्शो लां कली मरिम्शो सेल्चा थुं पवी? मरिम्शो थुं पाइश्शो बाक्ते। मोपतीके प्रभुमी इ कली मुल सजाइ गेब।
11 गे मिक्च मताइब दुम्शा, शुश नाक्त सम्म छेङछेङ मताइनेवे” दे हुइक्ता बाक्त। मो देंम चोटीन मेको चटक कोंइब मिक्च मताइब दुम्शा, आ गुइ कीशा लां कोंइब मुर माल्दा बाक्त।
12 मिनु हुकुम पाइबमी चटक कोंइब कली मिक्च मताइब दुम्शो तशा छक लाक्माक्त। मिनु “मेको आस लोव़ प्रभु आ सक्ति पाइश्शो लोव़ बाक्माक्त” दे रुप्शा, प्रभु कली थमा सुइक्ब दुम्माक्त।
पिसीदीया ङा एन्टीओकम शेंशो
13 मिनु पावल नु आ वारचपुकी पाफोस सहरमी जहाज ङोइश्शा समुन्द्र शोक्शा, पाम्फीलीया रागी ङा पेरगा सहरमी जाक्दीम्मा बाक्त। यूहन्ना मर्कूस चहिं पावल नु बारनाबास आस कली प्रोंइशा, यरूसलेम लेम्माक्त। प्रेरित १५:३८
14 पावल नु बारनाबास पेरगा रे गाक्शा, पिसीदीया रागी ङा एन्टीओक सहरमी जाक्दीस्सा बाक्त। मिनु नाइक्तीक नाक्ती ग्रुम्तीक खिं लशा, मेकेर देल्शो मुरपुकी नु निश्शा बाक्सा बाक्त।
15 मिनु ग्रुम्तीक खिं ङा ठेयब मुरपुकीमी मोसा नु परमप्रभु यावे आ लोव़ पाइबमी ब्रेक्शो लोव़ पढेपा नेंपाइक्ने थुम्शा, पावल नु बारनाबास आस कली ब्रेश्शा “आंइ लोक्ब निक्शी, मुर आन कली शेंशा, आन थुं बारपाइक्चा ङा लोव़ बाक्त हना, शेंदीसे” दे आस कली लोव़ पचा गेमे बाक्त। प्रेरित १५:२१
16 मिनु पावल राप्शा “इस्राएली नु परमप्रभु यावे कली मान पा हिंबपुकी, इन नोफा दाइश्शा, नेनीन।
17 इस्राएली आन परमप्रभु यावेमी आंइ किकी पिपी आन कली योव़शा, इजीप्त रागीमी बाक्मानु, शुश सोशा बोशा ठेयब जात दुम्पाइक्मी बाक्त। मिनु शुश सक्ति पाइश्शो गेय कोंइशा, मेको आन कली श्येत रे प्रोंइशा ग्रुंइदीमी बाक्त। प्रस्थान १२:३७,४०,४१; प्रस्थान १४:८
18 मिनु ४० बर्स सम्म गोरशो रागीमी लां कोंइना कोंइन लाइक्मीनु, मेकोपुकीमी आ लोव़ मटिम्तेक्म हना यो, फाल्शा रिम्शो पाइक्मी बाक्त। भजन संग्रह १०६:१३-३३
19 कनान रागीमी बाक्ब ७ रागी ङा मुर नेल्ल आन कली साइश्शा, मेको आन रागी आंइ किकी पिपी आन कली गेवा बाक्त। ब्यवस्था ७:१; यहोसु १४:२
20 मोपा ४ सहे ५० बर्स बाक्शा नोले निसाफ पाइब योव़शा वोदा बाक्त। नोले परमप्रभु यावे आ लोव़ पाइब सामुएल कली अधिकार गेवा बाक्त। न्यायाधीस २:१६; १सामुएल ३:२०
21 सामुएल आ पालामी आंइ किकी पिपीमी ‘आंइ कली सासन पाइब पिप का गेचा नकी’ दे पुन्मे बाक्त। मिनु परमप्रभु यावेमी बेन्यामीन थर ङा कीश आ तौ सावल कली योव़शा, आन पिप सेला बाक्त। मिनु सावल ४० बर्स सम्म पिप दुम्माक्त। १सामुएल ८:५; १सामुएल १०:२१-१४
22 मिनु परमप्रभु यावेमी सावल नु आ खिं ङा मुर आन कली पिप दुम्चा रे तिल्शा, दाऊद कली पिप सेला बाक्त। दाऊद आ पर्बम परमप्रभु यावेमी ‘येस्से आ तौ दाऊद आं मिम्शो खोदेंशो पा आं यो मिम्ब। मिनु गो नु गारब। आं दाक्शो पाइब, दे तुइक्नुङ’ देंशो बाक्त। १सामुएल १३:१४
23 परमप्रभु यावेमी इस्राएली आन कली पाप रे प्रोंइब का सोइक्नुङ, दे लोव़ गेशो बाक्माक्त। मेको पाप रे प्रोंइब दाऊद आ खिं ङा येसु बाक्ब। यसैया ११:१
24 येसुम शेंचा क्येङा ङोंइती ब्वाक्कुम ख्रुम्शा ग्रुंइब यूहन्नामी इस्राएली आन कली ‘पाप पचा प्रोंइशा, इन थुं परमप्रभु यावे गे लेत्तीन’ दे शेंशो बाक्माक्त। लूका ३:३
25 मोपा शेंदानु, मुर आन कली ‘आं कली तशा, पाप रे प्रोंइब एको बाक्म कोर में? मदेनीन। गो मनङ। तन्न मुल जाक्चशो बाक्ब। गो मेको आ ङोंइती बाप्शा, आ जुत्ता प्रुइक्चा यो मशिरनुङ’ दे शेंशो बाक्माक्त। लूका ३:१५; यूहन्ना १:२०; मर्कूस १:७; लूका ३:१६; यूहन्ना १:२७
26 आं लोक्बपुकी, अब्राहाम आ खिं ङा मुर बाक्तीनी हना यो, परमप्रभु यावे कली मान पा हिंब अर्को रागी ङा मुर बाक्तीनी हना यो, गो नेल्ल इं कली परमप्रभुमी पाप रे ब्रोंइतीक लोव़ नेंपाइक्ब।
27 यरूसलेममी बाक्बपुकी नु आन ठेयब मुरपुकीमी येसु पाप रे प्रोंइब बाक्ब, दे मरुबेम। नाइक्तीक नाक्त किंत किंत परमप्रभु यावेमी ब्रेक्पाइश्शो लोव़ पढेशा नेंशा यो रुप्ने मचबेम। मोपा मारेइ रुप्ने मचाप्तीके येसु कली दोस गेम्तेक्म। आन मो पशोमी साइ ङा ब्रेक्शो लोव़ नेल्ल थमा सेल्तेक्म। यूहन्ना १६:३
28 साइक्चा पुंइसीचा ङा दोस ग्रुंइने मचाप्तेक्म हना यो, हुकुम पाइब पिलातस कली मेको मुर साइक्चा पुंइसीब बाक्ब, दे साइक्पाइक्तेक्म। मत्ती २७:२२-२३
29 मिनु साइ ङा ब्रेक्शो लोव़ नेल्ल थमा दुम्पाइक्तेक्म। येसु शीम क्येप्शा कांटी थोक्शा क्याइश्शा साइश्शा खपीम फ्रुप्शा, आ बेक्शो रां थिम्तेक्म। मत्ती २७:५९-६०
30 तन्न परमप्रभु यावेमी मेको कली बेक्शो रे सेंताक्व। प्रेरित ३:१५
31 मिनु गालील रे यरूसलेम सम्म येसु नु काथा गाक्ब आन कली बेक्शो रे सेंसीशा शुश नाक्त तपांइसाक्व। मोदेंशो पा येसु कली सेंसीशो ताइबपुकीमी ‘येसु बेक्शो रे सेंचा पुंइसाक्व। मुल यो ब्रोंइशो बाक्ब। आंइ मिक्चीमी ताइतक’ दे शेंना शेंन गाक्नीम।
32 परमप्रभु यावेमी इं किकी पिपी आन कली ङोंइती पशो लोव़ पाप रे प्रोंइब का सोइश्शा खाप्शो, ग्येरपाइक्तीक लोव़ इन कली शेंनीकी।
33 मेको लोव़ साइ परमप्रभु यावेमी ब्रेक्पाइश्शो लोव़ नु गारब। मारदे हना भजन संग्रह कामी ‘गे आं तौ नवे। मुलाक्ती गो इ कली थीतन’ दे ब्रेक्शो बाक्ब। भजन संग्रह २:७
34 लेंशा मबेक्चा ङा नु मराक्चा ङा पा बेक्शो रे सेंसीशो आ पर्बम परमप्रभुमी ‘दाऊद कली गेशो खोदेंशो पा गो इ कली आसीक गेनन’ दे ब्रेक्पाइश्शो बाक्ब। यसैया ५५:३
35 मोपतीके दाऊदमी भजन संग्रह कामी ‘परमप्रभु यावे, इन योव़शो तौ कली बेक्शा लशा यो, राक्चा मगेनीनी’ दे ब्रेक्शो बाक्त। भजन संग्रह १६:१०; प्रेरित २:२७
36 दाऊदमी मेको लोव़ ब्रेक्शो बाक्त हना यो, आंम पर्बम ममाइ। मारदे हना दाऊदमी परमप्रभु यावेमी गेशो सासन पने थुम्शा बेक्शा, आ किकी पिपी आन कली थिम्तीकेमी थिम्चा पुंइसीशा राक्शा लमाक्त।
37 येसु चहिं बेक्शा मरा। मारदे हना परमप्रभु यावेमी मेको कली बेक्शो रे सेंताक्व।
38 मोपतीके आं लोक्बपुकी, आं लोव़ रुपीने। मेको येसुमी मुर आन पाप क्याम्शा गेब, दे इन कली शेंनीकी। रोमी ८:३-४
39 येसु कली थमा सुइक्ब नेल्ल आन पाप क्याम्चा पुंइसीनीम। मिनु आन पाप क्याम्चा पुंइसीशा, परमप्रभु आ ङोंइती पाप मपथु बाक्शो तांइसीनीम। मोसामी ब्रेक्शो लोव़मी इन पाप क्याम्ने मचाप्ब। मारदे हना मेको लोव़ नेल्ल टिने मचाप्तीके पापी दुम्तीनी। रोमी १०:४
40 मोपतीके होस पांइसीने। साइ परमप्रभु यावे आ लोव़ पाइबमी
41 ‘ए, गे शुक्शी पाइबपुकी, छक लाक्चा ङा पा पुलु दुम्शा लने। मारदे हना गो इन पालामीन गेय का पाइनुङ। तन्न गे थमा मसुइक्नीनी। मिनु सुइमी इन कली शेंताक्म हना यो गे थमा मसुइक्नीनी’ ” दे पावलमी शेंदीमी बाक्त। हबकुक १:५
42 मिनु ग्रुम्तीक खिं रे ग्रूशा गाक्चाम्सेनु, आस लोव़ नेंबपुकीमी “मुल जाक्शो नाइक्तीक नाक्ती लेंशा शेंचा नकी” दे पुन्मे बाक्त।
43 मिनु गाक्सानु, यहूदी नु यहूदी धर्म मानेब शुशेमी मेको आस नोले खोदमे बाक्त। मेको निक्शीमी “परमप्रभु यावेमी इन कली शिशी पा ख्रीस्त कली थमा सुइक्ब सेल्तु। मुल ङा मेरे मेको थमा सुइक्तीक मप्रोनीन” दे मदसे बाक्त।
खेरचा पुंइसीशो
44 मिनु नाइक्तीक नाक्त जाक्मेनु, सहर ङा मुर नेल्ल जाक्शा, परमप्रभु यावे आ लोव़ शेंशो नेंथ देल्मा बाक्त।
45 मोपा शुश मुर देल्शो तशा, यहूदी आन थुं चोव़मे बाक्त। मिनु पावलमी लोव़ शेंदानु, मेकोपुकीमी आ लोव़ ख्रोइश्शा, जिचा पोक्ग्मे बाक्त।
46 मिनु पावल नु बारनाबासमी यो महिंथु ठेयब थुं पा “अरु आन क्येङा ङोंइती इन कली परमप्रभु यावे आ लोव़ नेंपाइक्चा माल्शो। गेपुकीमी चहिं मनेंनीनी, नोफा मदाइक्नीनी, थमा मसुइक्नीनी। इन मोदेंशो पशोमी गेना हना यो ब्रोंइशा बाक्चा मताइनीनी। जाम्शा लाइनीकी, दे तुइक्तीने। मुल ङा मेरे इन कली शेंचा प्रोंइशा, अर्को रागी ङा मुर आन कली शेंथ गाक्नस्कु। प्रेरित ३:२५-२६; मत्ती १०:५-६
47 आंमा शेंब दुम्शा, गाक्शो मनस्कु। परमप्रभु यावेमी आंस कली आ लोव़ शेंब सेल्तु। मिनु मेकोमी ‘गो इ कली नेल्ल रागी ङा, नेल्ल जात ङा मुर आन कली लां कोंइशा, छेङछेङ दुम्शा रुप्पाइक्चा कली सोइक्ताक्ङ’ दे ब्रेक्शो बाक्ब” देंसा बाक्त। यसैया ४९:६
48 मिनु अर्को रागी ङा मुरपुकीमी “मुल गो यो पाप रे ब्रोंइचा ताइबाक्तक” दे रुप्शा थाम्पा ग्येरसीशा, परमप्रभु यावे कली ठेयब सेल्मे बाक्त। परमप्रभु यावेमी ङोंइती रे योव़शोपुकीमी ख्रीस्त कली थमा सुइश्शा, गेना हना यो ब्रोंइशा बाक्चा ताइब दुम्मा बाक्त। रोमी ८:२९-३०
49 मिनु ख्रीस्त आ पर्बम शेंशो लोव़ मेको रागीमी तेइ तेइ ब्रमाक्त।
50 ख्रीस्त कली थमा मसुइक्ब यहूदीपुकीमी यहूदी धर्म मानेब ठेयब मीश मुर नु सहर ङा सरकार ङा ठेयब मुर आन कली पोक्शा, पावल नु बारनाबास आस कली मेको रागी रे ग्रुंइदमे बाक्त।
51 मेको निक्शी चहिं आस खोइल ङा फुरकु थुर थुर पा ताइश्शा, गाक्शा आइकोनीयम सहरमी जाक्दीस्सा बाक्त। प्रेरित १६:८; मत्ती १०:१४
52 एन्टीओक सहरम बाक्ब थमा सुइक्बपुकी चहिं ग्येरसीशा, परमप्रभु यावे आ सोक्तीम प्रिंचा पुंइसमा बाक्त।