14
आइकोनीयम सहरमी शेंशो
पावल नु बारनाबास आइकोनीयम सहरमी जाक्‍दीश्‍शा, यहूदी आन ग्रुम्‍तीक खिं लशा, मेकेर खुम्‍सीशा बाक्‍शो आन कली ख्रीस्‍त आ लोव़ शेंना शेंन बाक्‍सा बाक्‍त। मिनु ख्रीस्‍त आ लोव़ नेंशा, यहूदी नु ग्रीक शुशेमी थमा सुदमे बाक्‍त। मिनु थमा मसुइक्‍ब यहूदीपुकीमी अर्को रागी ङा मुर आन कली पोक्‍शा “मेको आस शेंशो लोव़ मनेंचा” दे आन थुं हिरपा मरिम्‍शो पचा गोव़मे बाक्‍त। मो दुम्‍शा यो पावल नु बारनाबास शुश नाक्‍त सम्‍म मेकेर शेंना शेंन बाक्‍सा बाक्‍त। ठेयब थुं पा सुइ आन कली तशा महिंथु, ख्रीस्‍त आ लोव़ शेंदसेनु, प्रभुमी चिन्‍ड नु छक लाक्‍चा ङा गेय पचा कली सक्ति गेशा, आस शेंशो लोव़ थमा सेला बाक्‍त। प्रेरित १९:११; हिब्रू २:४ आस लोव़ नेंशा, चिन्‍ड नु छक लाक्‍चा ङा गेय पशो तशा, सहर ङा मुरपुकी ब्राशा, का निक्‍शी थमा मसुइक्‍ब यहूदीपुकी नु गारमा बाक्‍त, का निक्‍शी ख्रीस्‍त आ सोइश्‍शो नु गारमा बाक्‍त। मिनु अर्को रागी ङा मुर, यहूदी नु आन हुकुम पाइब गारशा “शेंब आस कली फुल्‍लु आप्‍शा मसाइक्‍थु मप्रोंइचा नसी” दे साइक्‍चा माल्‍मे बाक्‍त। २तिमोथी ३:११ मिनु पावल नु बारनाबासमी मेको आन मो पशो तुइश्‍शा, सहर रे प्रोक्‍शा, लाइकाओनीया रागी ङा लिस्‍त्रा नु डेरबे सहर लसा बाक्‍त। मिनु मेकेर एर ओंथ ङा गाउं गाउं हिरना हिरन ख्रीस्‍त आ लोव़ शेंना शेंन गाक्‍सा बाक्‍त।
लिस्‍त्रा सहरम शेंशो
मिनु लिस्‍त्रा सहरमी जरमेसे रे गाक्‍ने मचाप्‍ब आ खोइल मदुक्‍ब मुर का बाक्‍माक्‍त। काबु मेको खोइल मदुक्‍ब मुरुमी पावल आ शेंशो लोव़ थाम्‍पा नोफा दाइश्‍शा नेंना बाक्‍त। मिनु पावलमी मोपा नोफा दाइश्‍शा नेंशो तशा, मेकोमी साबाक्‍ती, दे थमा सुदा बाक्‍त, दे तुइश्‍शा, मत्ती ९:२८ 10 मेको कली मिक्‍च मयाक्‍थु कोव़शा, ठेयब सेंदा पा “इ खोइल दिंशा बोक्‍शा रपो” दे मदा बाक्‍त। मो मदानु, मेको छुल बोक्‍शा राप्‍शा एर ओंथ गाक्‍माक्‍त। 11 मिनु मोपा सापाइश्‍शो तशा, छक लाक्‍शा, मेकेर देल्‍शोपुकीमी आन लाइकाओनीया ङा लोव़ पा “इं देवता मुर खोदेंशो दुम्‍शा यिशा, गोपुकी नु काथा बाक्‍सा बाक्‍त” देंमुमा बाक्‍त। प्रेरित २८:६ 12 मिनु बारनाबास कली जिउस नु पावल कली हेरमेस, दे देवता आस नें वोदमे बाक्‍त। मारदे हना पावल चहिं लोव़ पस जोक्‍बाक्‍माक्‍त।
13 सहर ओव़तीक आ नेक्‍था जिउस देवता आ थान सेल्‍शो बाक्‍माक्‍त। मिनु जिउस कली चढ़ेबमी चढे़चा कली ब्‍यफ नु फू माला चाक्‍पाइक्‍मी बाक्‍त। 14 मिनु बारनाबास नु पावलमी मेकोपुकीमी गो इंस कली देवता मानेशा हुश जारशा चढ़ेचशो बाक्‍नीमी, दे तुइश्‍शा, आस वा खाक्‍शा दोरशा लशा, मुर आन दातेमी जाक्‍दीस्‍सा बाक्‍त। 15 मिनु ठेयब सेंदा पा “ए गेपुकी, मार पचानी? गो देवता मनस्‍कु, इन खोदेंशो मुर कका नस्‍कु। इन कली ग्‍येरपाइक्‍ब लोव़ शेंथ जाक्‍शो नस्‍कु। मूर्ति पूजा पचा प्रोंइशा, गेना हना यो ब्रोंइशा बाक्‍ब परमप्रभु यावे गे इन थुं हिरदीने। मेकोमी सरीङ, रागी, समुन्‍द्र नु मेकेर मार मार बाक्‍मा, मेको नेल्‍ल सेल्‍शो बाक्‍ब, दे तुइक्‍तीने। प्रेरित १०:२६ 16 साइ ङोंइती रे मुल सम्‍म परमप्रभु यावेमी रागी नेल्‍ल आन कली आन दला दाक्‍स पचा गेशो बाक्‍त। प्रेरित १७:३० 17 आन दला दाक्‍स पा बाक्‍तेक्‍म हना यो, परमप्रभुमी मेको आन कली तुइक्‍पांइसीन सीन बाक्‍त। दोपा तुइक्‍पांइसीन सीन बाक्‍त देंशा हना, रेउ यिपा मार मार वापा इन कली जाक्‍दीत्‍चा ङा पा जचा नु फेक्‍चा गेशा, ग्‍येरशा बाक्‍चा गेशो बाक्‍त” देंसा बाक्‍त। 18 मिनु देवता मानेशा हुश जारशा चढ़ेचा ममाल्‍ब देंसानु यो, हेरर हेररा चढ़ेमे बाक्‍त।
19 मिनु नोले एन्‍टीओक नु आइकोनीयम सहर रे थमा मसुइक्‍ब यहूदीपुकी जाक्‍मा बाक्‍त। मेकोपुकीमी सहर ङा मुर आन कली पोक्‍शा, पावल कली साइक्‍चा कली फुल्‍लु क्रोम्‍पदमे बाक्‍त। मिनु बेक्‍त, दे आ रां लाइश्‍शा, सहर रे ग्रुंइशा ताइक्‍तमे बाक्‍त। २कोरिन्‍थी ११:२५; २तिमोथी ३:११ 20 मिनु थमा सुइक्‍बपुकी कोव़थ लशा, पावल आ एर ओंथ राम्‍मानु, सेंसीशा बोक्‍शा सहर लेम्‍माक्‍त। मिनु आ दीसा बारनाबास नु गाक्‍शा, डेरबे सहर जाक्‍दीस्‍सा बाक्‍त।
एन्‍टीओक लेश्‍शो
21 मिनु डेरबे सहरमी शुश मुर आन कली येसु आ ग्‍येरपाइक्‍ब लोव़ शेंशा रुप्‍पदसेनु, शुश मुरुमी थमा सुदमे बाक्‍त। मिनु मेकेर रे लशा लेंशा लिस्‍त्रा, आइकोनीयम नु पिसीदीया ङा एन्‍टीओकमी जाक्‍दीस्‍सा बाक्‍त। 22 मेको सांफा सहर ङा थमा सुइक्‍ब आन कली “मार दुम्‍त हना यो, थमा सुइक्‍चा मप्रोनीन। इन खोइल थेक्‍शा बाक्‍कीने। ख्रीस्‍त आ नेंमी शुश श्‍येत जचा पुंइसीशा ला परमप्रभु यावे आ राज्‍य ओव़चा ताइनय, दे रुपीने” दे आन थुं बारपदसे बाक्‍त। रोमी ५:३-५; १थिस्‍सलोनिकी ३:३ 23 मिनु ते ते थमा सुइक्‍बपुकी ग्रुम्‍शा बाक्‍मा, मेक मेक शेंब खाल्‍पापुकी वोइक्‍ना वोइक्‍न, माइजा बाक्‍शा, प्रार्थना पना पन, प्रभु कली थमा सुइश्‍शा, थमा सुइक्‍ब आन कली प्रभु आ गुइमी जिम्‍मा गेना गेन गाक्‍सा बाक्‍त। प्रेरित ६:६ 24 मिनु पिसीदीया रागी रे गाक्‍शा, पाम्‍फीलीया रागी जाक्‍दीस्‍सा बाक्‍त। 25 मिनु पेरगा सहरमी ख्रीस्‍त आ लोव़ शेंशा, मेकेर रे ब्रुप्‍शा अत्‍तलीया जाक्‍दीस्‍सा बाक्‍त। 26 अत्‍तालीया सहरमी जहाज ङोइश्‍शा, समुन्‍द्र शोक्‍शा, एन्‍टीओक सहरम जाक्‍दीस्‍सा बाक्‍त। ङोंइती एन्‍टीओकम बाक्‍सानु, परमप्रभु यावेमी मेको आस कली ख्रीस्‍त आ लोव़ शेंथ योव़शो बाक्‍माक्‍त। मिनु थमा सुइक्‍बपुकीमी मेको आस कली प्रभु कली जिम्‍मा गेशा, शेंथ सोइश्‍शो बाक्‍मा बाक्‍त। मिनु मुल शेंने थुम्‍शा लेश्‍शा जाक्‍सा बाक्‍त। प्रेरित १३:१-२ 27 मिनु जाक्‍शा थमा सुइक्‍ब आन कली खुप्‍शा, दोपा परमप्रभु यावेमी आं नु बाक्‍शा गेय पपाइश्‍शा आसीक गेवा, दोपा अर्को रागी ङा मुर आन कली थमा सुइक्‍पा, पाप रे ब्रोंइतीक लां कोंइशा, आ मुर सेला, मेको लोव़ नेल्‍ल तुइक्‍पदसे बाक्‍त। १कोरिन्‍थी १६:९ 28 मिनु शुश नाक्‍त सम्‍म थमा सुइक्‍बपुकी नु काथा बाक्‍सा बाक्‍त।