15
ख्रोइक्तीक चिनु आ पर्बम लोव़
1 मिनु नोले यहूदीया रागी रे मुरपुकी यिशा, एन्टीओकमी जाक्मा बाक्त। मेकोपुकीमी “साइ मोसामी देंशो ख्रोइक्तीक चिनु ख्रोइक्चा माल्ब। मपाइतीनी हना, पाप रे ब्रोंइचा मताइनीनी” दे शेंबाक्मा बाक्त। गलाती ५:२
2 मिनु पावल नु बारनाबासमी मोदें शेंशो नेंशा, मेको आन शेंशो लोव़ मबिस्सा बाक्त। मेकोपुकीमी ख्रोइक्तीक चिनु ख्रोइक्चा माल्ब देंमा बाक्त। पावल नु बारनाबासमी चहिं ख्रोइक्चा ममाल्ब, देंसा बाक्त। मिनु लोव़ निक्शी दुम्तीके थमा सुइक्ब आन थुं ग्याल्माक्त। मिनु पावल, बारनाबास नु का निक्शी आन कली योव़शा, यरूसलेममी बाक्ब सोइश्शोपुकी नु ग्रुम्तीके ङा शेंब खाल्पा आन कली हिल्लो पथ सोइक्तमे बाक्त। गलाती २:१
3 मिनु योव़शा सोइक्चा पुंइसीशोपुकी एन्टीओक रे गाक्शा, यरूसलेम ङा लां खोइश्शा ङोंइती फोनीसीया, नोले सामरीया रागीमी जाक्दीम्मा बाक्त। मिनु ते ते जाक्दीम्मा, मेक मेक ङा थमा सुइक्ब आन कली ग्रुम्शा “अर्को रागी ङा मुरपुकीमी यो ख्रीस्त कली थमा सुइश्शा, पाप रे ब्रोंइचा ताम्तेक्म” दे तुइक्पाइक्ना पाइक्न गाक्मा बाक्त। मिनु नेंबपुकी शुश ग्येरसमा बाक्त।
अर्को रागी ङा मुर आन पर्बम सल्ला पशो
4 मिनु यरूसलेममी जाक्दीम्मानु, थमा सुइक्बपुकी, ख्रीस्त आ सोइश्शो, थमा सुइक्ब आन शेंब खाल्पा नेल्लेमी मान पा ब्रामे बाक्त। मिनु परमप्रभु यावेमी पपाइश्शो गेय दोपा पामे, मार दुम्मे, मेको लोव़ नेल्ल देंमा बाक्त।
5 थमा सुइक्ब का निक्शी फरिसी बाक्मा बाक्त। मेकोपुकीमी बोक्शा “अर्को रागी ङा मुरपुकीमी ख्रीस्त कली थमा सुइक्ब दुम्मानु, इं यहूदी धर्म ङा ख्रोइक्तीक चिनु ख्रोइक्चा माल्नीम, मोसामी अरेशो नेल्ल पचा माल्नीम” देंमा बाक्त।
6 मिनु ख्रीस्त आ सोइश्शोपुकी नु थमा सुइक्ब शेंब खाल्पापुकी खुम्सीशा “मेको लोव़ निक्शीमी तेको लोव़ टिशा पचा?” दे लोव़सी पमुमा बाक्त।
7 मिनु शुश लोव़ पमुमानु, पत्रुस बोक्शा “आं लोक्बपुकी, नोफा दाइश्शा नेनीने, ख्रीस्त आ लोव़ ब्रचा गोवानु, परमप्रभु यावेमी अर्को रागी ङा मुर आन कली शेंशा, ग्येरपाइक्ब लोव़ थमा सुइक्पाइक्थ, आं कली योव़ती, दे तुइश्शो ननी। प्रेरित १०:४४; प्रेरित ११:१५
8 मुर नेल्ल आन थुं तुइक्ब परमप्रभु यावेमी यहूदी इं कली गेशो खोदेंशो पा अर्को रागी ङा मुर आन कली यो आन थुंमी आ सोक्त गेप्तु।
9 मेकोपुकीमी येसु ख्रीस्त कली थमा सुइक्तीकेमी माफ तशा, गो नेल्ल का दुम्शो बाक्नीकी।
10 परमप्रभु यावेमी मेको आन कली रिम्शो सेल्तु, दे तुइश्शा, इं किकी पिपीमी लाइ यो कुरने मचाप्चा ङा भारी मेको आन कली कुरपाइक्चा दुम्बा ङा? परमप्रभु क्येङा लाक्शा जोक्ब तुइक्ब दुम्चा शिरबा ङा? मत्ती २३:४; गलाती ५:१
11 मारदे हना प्रभु येसुमी इं कली शिशी पतीके पाप रे ब्रोंइचा ताइतय, दे थमा सुइक्तय। मेकोपुकीमी इं खोदेंशो पा प्रभु आ शिशी तशा थमा सुइक्ब दुम्तेक्म” दे पत्रुसमी माइक्मी बाक्त। मिनु नेल्ल ब्वालेइ पामे बाक्त। गलाती २:१६; एफिसी ४:२-१०
12 मिनु बारनाबास नु पावल आस पालो लोव़ पचा गोम्से बाक्त। अर्को रागी ङा मुरपुकी नु बाक्सानु, दोपा परमप्रभु यावेमी चिन्ड नु छक लाक्चा ङा गेय पपदा, मेको लोव़ नेल्ल तुइक्पदसे बाक्त।
13 मेको लोव़ पने थुम्से नोले याकूबमी “आं लोक्बपुकी, इन नोफा दाइश्शा, आं लोव़ नेनीने। प्रेरित २१:१८; गलाती २:९
14 परमप्रभु यावेमी अर्को रागी ङा मुर आन कली यो योव़शा, आ मुर सेल्तु, दे सिमोनमी तुइक्पाइक्तु। नेल्ल क्येङा ङोंइती दोदेंशो दुम्मे, मार दुम्मे, मेको लोव़ शेंताक्व।
15 अर्को रागी ङा मुर आन कली योव़शा, आ मुर सेल्तु, दे साइ नेसी परमप्रभु यावे आ लोव़ पाइबपुकीमी ब्रेक्शो आन लोव़ नु गारब।
16 ‘मेको नेल्ल दुम्शा नोले गो लेश्शा जाक्नुङ। मिनु साइ दाऊदमी सेल्पाइश्शो ब्रेश्शो खिं लेंशा सेल्नुङ। मार मार ब्रेश्शो बाक्मा, मेको नेल्ल गो नक सेल्शा वोइक्नुङ।
17 मारदे हना योव़चा पुंइसीशो अर्को रागी ङा मुरपुकीमी आं कली तुइश्शा, आं मुर दुम्मल, दे मो पाइक्नुङ।
18 साइ रे गो मोदेंशो लोव़ तुइक्पाइक्ना पाइक्न पिती’ दे ब्रेक्शो बाक्ब। आमोस ९:११-१२
19 मोपतीके परमप्रभु यावे आ देंशो तुइश्शा, दोदेंशो मिम्चा माल्नय देंशा हना, अर्को रागी ङा थमा सुइक्ब आन कली श्येत मगेचा।
20 मेको आन कली ‘मूर्ति कली चढ़ेशो मजचा, तेल्लेम मपचा, हुश मचुइक्थु साइश्शो श्ये मब्वचा, हुश मब्वचा’ दे चिठी ब्रेक्शो बाक्त। लेवी १९:४; लेवी १९:२९; लेवी ३:१७
21 परमप्रभुमी मोसा कली ब्रेक्पाइश्शो लोव़ चहिं तुइक्नीम। मारदे हना साइ रे नाइक्तीक नाक्त इं ग्रुम्तीक खिंमी नेंशा तुइक्नीम” दे माइक्मी बाक्त। प्रेरित १३:१५
अर्को रागी ङा मुर आन कली चिठी
22 मिनु याकूब आ लोव़ नेंशा, नेल्ल थुं का दुम्शा, आ देंशो बिस्समा बाक्त। मिनु चिठी ब्रेक्शा, मेको चिठी चोव़थ मुर योव़शा, पावल नु बारनाबास, नु काथा एन्टीओक सोइक्चा, दे सल्ला पामे बाक्त। मेको योव़शो का यहूदा नु का सिलास बाक्सा बाक्त। यहूदा आ याइनी नें बारसाबास बाक्माक्त। यहूदा नु सिलास थमा सुइक्ब आन कली शेंब खाल्पा बाक्सा बाक्त।
23 मेको चिठीम चहिं “एन्टीओक, सिरीया नु सिलीसीया ङा अर्को रागी ङा येसु ख्रीस्त कली थमा सुइक्ब आंइ लोक्बपुकी, गो यरूसलेम सहरम बाक्ब ख्रीस्त आ सोइश्शो, आंइ ग्रुम्तीक ङा शेंब खाल्पा नु थमा सुइक्ब लोक्ब नेल्लेमी इन कली ‘रिम्शो बाक्कीन’ देंशा ब्रेक्शा सोइक्ताक्क।
24 गोपुकी नु बाक्ब का निक्शी इन बाक्तीकेमी जाक्शा, इन थुं क्याल्तेक्म देंशो लोव़ नेंतक। मेको आंइ सोइश्शो मबाक्नीम।
25 मोपतीके गो नेल्ल थुं का दुम्शा, मुल इन थुं नाइक्पाइक्चा कली इं दाक्शो बारनाबास नु पावल नु काथा लोव़ कुरब मुर इन बाक्तीक सोइश्शो बाक्नीकी।
26 बारनाबास नु पावल इं प्रभु येसु ख्रीस्त आ नेंमी बेक्चा यो महिंब बाक्नीसी।
27 आंइ मिम्शो नु आंइ देंशो नेल्ल मेको आंइ सोइश्शो यहूदा नु सिलास निक्शीमी इन कली तुइक्पाइक्नीसी। मिनु गे लोव़ नेल्ल तुइक्नीनी।
28 इन कली रुप्पाइक्चा माल्शो लोव़ चहिं परमप्रभु यावे आ सोक्तीमी आंइ कली रुप्पाइश्शो लोव़ बाक्ब। मिनु मेको लोव़ इन कली शेंनीकी। इन कली हेल्शो भारी कुरपा गाक्पाइश्शो खोदेंशो लोव़ ममाइ।
29 मेको लोव़ मार बाक्ब देंशा हना ‘मूर्ति कली चढ़ेशो मजचा, हुश मब्वचा, हुश मचुइक्थु साइश्शो श्ये मब्वचा, तेल्लेम मपचा’ एको लोव़ टीतीनी हना, गे रिम्शो दुम्नीनी। आंइ लोव़ ओशोन बाक्ब” दे ब्रेक्शो बाक्माक्त।
30 मिनु यरूसलेम रे ब्रुप्शा एन्टीओक जाक्दीश्शा, थमा सुइक्ब आन कली ब्रेश्शा, मेको चिठी गेम्से बाक्त।
31 मिनु मेकोपुकीमी चिठी प्राक्शा पढेशा, ग्येरसमा बाक्त।
32 यहूदा नु सिलास परमप्रभु यावे आ लोव़ पाइब यो बाक्सा बाक्त। मिनु मेको निक्शीमी शुश लोव़ पा लोक्ब आन थुं बारपदसे बाक्त। प्रेरित ११:२७; प्रेरित १३:१
33 मिनु शुश नाक्ती एन्टीओकम शेंना शेंन बाक्शा, यरूसलेम लेत्ची ना यहूदा ला लेम्माक्त।
34 सिलास चहिं एक उइ बाक्नुङ, दे बाक्माक्त।
35 पावल नु बारनाबास एन्टीओकम बाक्शा अरु नु गारशा, प्रभु आ लोव़ तुइक्पाइक्ना पाइक्न शेंना शेंन बाक्सा बाक्त।
पावल नु बारनाबास ब्राशो
36 मिनु काबु पावलमी बारनाबास कली “ङोंइती ते ते प्रभु आ लोव़ शेंथ हिरससा, मेक मेक ङा थमा सुइक्बपुकी दो पामे, मार पामे, कोव़थ लस” देंमाक्त।
37 मिनु बारनाबासमी “यूहन्ना, आ याइनी नें मर्कूस कली यो काथा लाइश्शा लस” देंमाक्त। प्रेरित १२:१२,२५
38 पावलम चहिं मलाइक्चा, दे मबिस्से बाक्त। मारदे हना ङोंइती काथा गाक्शा, पाम्फीलीया रागीमी बाक्मानु, गेय प्रोंइशा आ का ला लेश्शो बाक्माक्त। प्रेरित १३:१३
39 मिनु बारनाबास लाइक्चा, पावलमी मलाइक्चा देंतीके मेको आस लोव़ मगारथु, जिशा ब्रासा बाक्त। मिनु बारनाबासमी मर्कूस कली लाइश्शा, जहाज ङोइश्शा साइप्रस लमाक्त।
40 पावलम चहिं सिलास कली योव़ङा बाक्त। मिनु थमा सुइक्बपुकीमी परमप्रभु यावेमी पावल नु सिलास आस कली रिम्शो कोव़ङल, आसीक गेवल, दे प्रार्थना पशा सोइक्तमे बाक्त।
41 मिनु मेकेर रे लशा, सिरीया नु सिलीसीया रागीमी जाक्दीश्शा, थमा सुइक्ब आन थुं बारपदसे बाक्त।