16
तिमोथी कली योव़शो
मिनु डेरबे सहरमी जाक्‍दीश्‍शा, मेकेर रे लशा, लिस्‍त्रा सहरमी जाक्‍दीस्‍सा बाक्‍त। मिनु लिस्‍त्रामी तिमोथी नें पाइश्‍शो थमा सुइक्‍ब का ग्रुम्‍से बाक्‍त। तिमोथी आ ममा ख्रीस्‍त कली थमा सुइक्‍ब यहूदी जात ङा बाक्‍माक्‍त। आ आफ चहिं ग्रीक बाक्‍माक्‍त। प्रेरित १७:१४; प्रेरित १९:२२; प्रेरित २०:४; फिलिप्‍पी २:१९-२२; १थिस्‍सलोनिकी ३:२,६; २तिमोथी १:५ लिस्‍त्रा नु आइकोनीयम सहरमी बाक्‍ब थमा सुइक्‍ब नेल्‍लेमी तिमोथी रिम्‍शो मुर बाक्‍ब देंबाक्‍मा बाक्‍त। मिनु पावलमी तिमोथी कली गेय पाइब वारच सेल्‍शा, काथा लाइक्‍चा देंमाक्‍त। मिनु यहूदीपुकीमी तिल्‍शा मवोदमेक्‍ल, दे ख्रोइक्‍तीक चिनु ख्रोइक्‍पदा बाक्‍त। मारदे हना तिमोथी आ आफ ग्रीक बाक्‍ब, दे नेल्‍लेमी तुइश्‍शो बाक्‍मा बाक्‍त। गलाती २:३ मिनु काथा लाइश्‍शा, गाउं सहर हिरना हिरन गाक्‍शा, थमा सुइक्‍ब आन कली ग्रुम्‍शा, यरूसलेमम बाक्‍ब ख्रीस्‍त आ सोइश्‍शोपुकी नु ग्रुम्‍तीक ङा शेंब खाल्‍पा आन देंशो लोव़ नेंपदमे बाक्‍त। प्रेरित १५:२३-२९ मोदेंशो नेंपा गाक्‍मानु, थमा सुइक्‍ब आन थुं बारपदमे बाक्‍त। मिनु नाक्‍त किंत किंत थमा सुइक्‍बपुकी तेम्‍सीशा, शुश दुम्‍मा बाक्‍त।
परमप्रभु आ सोक्‍तीमी लां कोंइशो
मिनु परमप्रभु यावे आ सोक्‍तीमी पावल नु आ वारच आस कली एसीयामी शेंचा मगेतीके फ्रिगीया नु गलातीया रागी लमा बाक्‍त। प्रेरित १८:२३ मिनु माइसीया आ नेक्‍था जाक्‍दीश्‍शा, मुल बिथीनीया रागी ओव़चा, दे थुं पामे बाक्‍त। तन्‍न येसु आ सोक्‍तीमी लचा मगेमी बाक्‍त। मोपतीके माइसीया लां रे पा ब्रुप्‍शा, त्रोआस सहरम जाक्‍दीम्‍मा बाक्‍त।
मासीडोनीया लशो
मिनु त्रोआस सहरमी बाक्‍मानु, काबु नाक्‍दो प्रभुमी पावल कली कोंइतीक कोंइदा बाक्‍त। मार कोंइदा बाक्‍त देंशा हना, मासीडोनीया रागी ङा मुर का पावल आ ङोंइती राप्‍शा “आंइ मासीडोनीया रागी पिशा, आंइ कली वारच पाइक्‍चा नकी, हजुर” दे पुंइशो तवा बाक्‍त। 10 मेको कोंइतीक तशा, पावल छुल बोक्‍शा “मासीडोनीया लय” देंत। मोपतीके गो यो सासाक्‍क। प्रभुमी मासीडोनीया ङा मुर आन कली ग्‍येरपाइक्‍तीक लोव़ शेंथ सोइक्‍ता बाक्‍त, दे नेल्‍लेमी रुप्‍तक। 11 मिनु त्रोआस सहरमी जहाज ङोइश्‍शा तेइ महिरथु, सामोथ्रेस टापु लां पा आ दीसा नाक्‍ती निआपोलीस सहरमी जाक्‍दीत्‍तक। 12 मेकेर जाक्‍दीश्‍शा जहाज रे तोंइ‍साक्‍क। मिनु गाक्‍शा फिलिप्‍पी सहरमी जाक्‍दीत्‍तक। फिलिप्‍पी मासीडोनीया रागी ङा ठेयब सहर का बाक्‍ब। मेको रागी रोमी आन गुइमी बाक्‍माक्‍त। गोपुकी फिलिप्‍पी सहरमी इच्‍का नाक्‍ती बाक्‍तक।
13 मिनु नाइक्‍तीक नाक्‍त सहर रे ग्रूशा, खोला आ नेक्‍था लाइतक। मारदे हना खोला आ नेक्‍थामी यहूदी आन प्रार्थना पथ बुक्‍तीक बाक्‍म कों, दे मिम्‍शा, मेक जाक्‍दीत्‍तक। मिनु जाक्‍दीक्‍कानु, मीश मुरपुकी खुम्‍सीशा बाक्‍शो थित्‍तक। 14 मिनु मेको आन कली लोव़सी पना पन येसु आं लोव़ शेंताक्‍क। आंइ लोव़ नेंब का चहिं थिआटीरा सहर रे जाक्‍शो वा पसल दाइक्‍ब लिडीया नें पाइश्‍शो मीश मुर का बाक्‍त। मेको लिडीया परमप्रभु यावे कली मान पा ठेयब सेल्‍ब बाक्‍बाक्‍माक्‍त। मेकोमी पावल आ लोव़ थम नोफा दाइश्‍शा नेंतु। मिनु प्रभुमी रुप्‍चा थुं गेप्‍तु। 15 मिनु थमा सुइक्‍ब दुम्‍शा, ब्‍वाक्‍कुम ख्रुम्‍शा ग्रुंइचा पुंइसाक्‍व। आ खिं ङा मुर नेल्‍ले यो थमा सुइक्‍ब दुम्‍शा, ब्‍वाक्‍कुम ख्रुम्‍शा ग्रुंइचा पुंइसाक्‍म। ब्‍वाक्‍कुम ख्रुम्‍शा ग्रुंइचा पुंइसीशा नोले लिडीयामी “गेपुकीमी प्रभु कली थमा सुइक्‍ब बाक्‍माक्‍त, दे मिम्‍ताक्‍यीनी हना, आं खिंमी बास बाक्‍थ जाक्‍कीन। आं खिंमी मजाक्‍थु मदुम्‍ब” दे माइक्‍तीकी। मिनु लिडीया आ खिं लशा बाक्‍तक।
येसु आ नें थिशा वोल खेरशो
16 मेकेर बाक्‍शा गो प्रार्थना पथ खोला आ नेक्‍था लना लन पकानु, काबु वाइलीम मीश आल का लांमी ग्रुम्‍तक। मेको मीश आल वोलम गेशो सक्ति तशा, मुर आन कली नोले दुम्‍ब लोव़ नेल्‍ल तुइक्‍पाइक्‍बाक्‍माक्‍त। मोपा आ होव़प आन कली शुश क्‍येट चेम्‍शा गेबाक्‍माक्‍त। 17 मिनु लांमी ग्रुम्‍शा, आंइ नोले खोइश्‍शा “एको मुर नेल्‍ल क्‍येङा ठेयब परमप्रभु यावे आ गेय पाइब नमी। पाप रे दोपा ब्रोंइचा, दे शेंशा गाक्‍ब नमी, इन कली लां कोंइब नमी” दे रेयके पना पन पित। मर्कूस १:२४,३४ 18 नाक्‍त किंत किंत मेकोमी मोदेंशा, रेयके पवानु, पावल ब्रीताक्‍व। मिनु काबु पावल नोले हिरशा, कोव़शा वोल कली “गो येसु ख्रीस्‍त आ नें थिशा ग्रूशा लावो, देंनुङ” दे हुइश्‍शा खेरतु। मर्कूस १६:१७ 19 मिनु वोल ग्रूशा, लम ङा मेरे नोले दुम्‍ब लोव़ तुइक्‍तीक सक्ति जाम्‍त। मिनु आ होव़पपुकीमी क्‍येट का यो मतामे। मिनु चुरशा, पावल नु सिलास आस कली ग्‍याइश्‍शा कीशा, सहर ङा दिंम कामी चाक्‍शा, ठेयब मुर निसाफ पाइब आन ङोंइती राप्‍पाइक्‍तेक्‍म। 20 मिनु “एको मुर यहूदी नसी। इं सहरमी जाक्‍शा, मुर आन थुं ग्‍याल्‍पाइश्‍शा शुश श्‍येत गेम्‍ताक्‍से। प्रेरित १७:६ 21 इं रोमी ऐन कानुनम मगारचा ङा दूली शेंशा, आस पतीके पपाइक्‍चा बोल पाम्‍ताक्‍स” दे दोस गेम्‍तेक्‍म। 22 एर ओंथ जाक्‍शा देल्‍शोपुकीमी यो “एको आस कली तुप्‍चा माल्‍ब” दे रेयके पाम्‍तेक्‍म। मिनु निसाफ पाइबपुकीमी पावल नु सिलास आस कली आस फेक्‍शो वा प्रुइश्‍शा, कोक्‍केम तुप्‍पाइक्‍तेक्‍म। २कोरिन्‍थी ११:२५; फिलिप्‍पी १:३०; १थिस्‍सलोनिकी २:२
जेल्‍खानम चोक्‍चा पुंइसीशो
23 मिनु तुप्‍शा जेल्‍खानमी चोक्‍चा देंतेक्‍म। मिनु जेल्‍खान ङा ठेयब मुर कली “प्रोक्‍ने मचाप्‍चा ङा पा चोक्‍पाइश्‍शा वोतो” दे माइक्‍तेक्‍म। 24 मिनु मेकोमी मेको आस कली नेल्‍ल क्‍येङा आगा ङा कोठा लाइश्‍शा, ठेंङरो थोक्‍शा वोइक्‍पदा बाक्‍त।
25 नाक्‍दो पावल नु सिलासमी प्रार्थना पा कुम्‍सो पा परमप्रभु यावे कली ठेयब सेल्‍से बाक्‍त। आस प्रार्थना नु कुम्‍सो पशो जेल्‍खानमी चोक्‍सीशो नेल्‍लेमी नेन्‍मे बाक्‍त। 26 मिनु प्रार्थना नु कुम्‍सो पना पन बाक्‍सानु, ठेयब ख्रिनु कुशा, जेल्‍खान ङा जग यो हिम्‍पदा बाक्‍त। ख्रिनुमी हिम्‍दानु, लाप्‍चो नेल्‍ल रोक्‍समा बाक्‍त। जेल्‍खानमी चोक्‍सीशो आन साङलो, ठेंङरो नेल्‍ल ब्रुइक्‍मा बाक्‍त। 27 मो दुम्‍मेनु, जेल्‍खान ङा ठेयब मुर ग्री‍चोक पा सेंसीशा छुल बोक्‍माक्‍त। मिनु लाप्‍चो नेल्‍ल रोक्‍सीशो तशा “आमाइ, चोक्‍शो नेल्‍ल प्रोक्‍शा गाक्‍मा बाक्‍त। मार पङा” दे आ तरवार ग्रि शोइश्‍शा, क्‍योरसीशा बेक्‍नुङ, दे क्‍योरसीचा मला बाक्‍त। 28 मिनु पावलमी क्‍योरसीचशो तशा “ए मपावो, मपावो, सुइ मप्रोक्‍क। नेल्‍ल बाक्‍तक” दे ब्रेम्‍माक्‍त। 29 मिनु बत्ती दाशा गेयीनी देंशा, चोक्‍शो आन बाक्‍तीके पावल नु सिलास आस ङोंइती लशा, ख्रिंख्रि पा बाम्‍माक्‍त। 30 मिनु मेको आस कली ग्रुंइशा “हजुर, आं पशो पाप मार पा क्‍याम्‍सीबा?” दे हिल्‍लो पवा बाक्‍त। प्रेरित २:३७ 31 मिनु पावल नु सिलासमी “प्रभु येसु कली थमा सुतो। मिनु गे नु इ खिं ङा मुर नेल्‍लेमी पाप क्‍याम्‍चा पुंइसीशा गेना हना यो ब्रोंइशा बाक्‍चा ताइनीनी” देंसा बाक्‍त। 32 मिनु मेको ठेयब मुर नु आ खिं ङा मुर नेल्‍ल आन कली प्रभु आ लोव़ तुइक्‍पदसे बाक्‍त। 33 मिनु ठेयब मुर नु आ खिं ङा मुर नेल्‍लेमी थमा सुइश्‍शा ब्‍वाक्‍कुमी ख्रुम्‍शा ग्रुंइचा पुंइसमा बाक्‍त। पावल नु सिलास आस तुप्‍शो गार नेल्‍ल चिक्‍तमे बाक्‍त। 34 मिनु आ खिं लाइश्‍शा, जचा तूचा सेल्‍शा थुल्‍मे बाक्‍त। मिनु नेल्‍लेमी “परमप्रभु यावे कली थमा सुइक्‍ब दुम्‍तय” दे थाम्‍पा ग्‍येरसमा बाक्‍त।
35 आ दीसा सुनी ठेयब मुर निसाफ पाइबपुकीमी “मेको आस कली प्रोंइचा न‍सी” दे सिपाही आन कली जेल्‍खानमी सोइक्‍तमे बाक्‍त। 36 मिनु जेल्‍खान ङा ठेयब मुरुमी पावल कली “गे इस कली प्रोंइचा नसी, दे निसाफ पाइबपुकीम सिपाही कली सोइक्‍ताक्‍मे। सुइमी इस कली दोस गेने मचाप्‍नीम। रिम्‍शो पा लसे” देंमाक्‍त। 37 मिनु पावलमी सिपाही आन कली “गो मोशा मलाइनस्‍कु। मारदे हना सिनाक्‍त आंस कली मारेइ मरुप्‍थु दोस का यो मग्रुंइथु मुर नेल्‍ल आन कुल तुप्‍तीस्‍कीमी। तुप्‍शा ला ममाइ, जेल्‍खानमी यो चोक्‍तीस्‍कीमी। गो रोमी यो नस्‍कु। मिनु मो पचा मदुम्‍ब। आंस कली सुइ आन मतुइक्‍थु ख्रुइश्‍शा प्रोंइशा सोइक्‍चा मगारब। गो लसीन मलाइनस्‍कु। सिनाक्‍त आंस कली चोक्‍पाइक्‍बपुकी जाक्‍शा ग्रुंइदीस्‍कीमील” देंशा सिपाही आन कली लेश्‍शा सोइक्‍ता बाक्‍त। प्रेरित २२:२५ 38 मिनु सिपहीपुकी लशा, पावल आ देंशो लोव़ मेको चोक्‍पाइक्‍ब आन कली देंमा बाक्‍त। मिनु मेको निक्‍शी रोमी यो बाक्‍सा बाक्‍त देंशो नेंशा हिंमा बाक्‍त। 39 मिनु हिंशा “लो, प्रोंइथ लचा माल्‍ब” देंशा जेल्‍खानमी जाक्‍मा बाक्‍त। मिनु पावल नु सिलास आस कली “गो इस कली मतुइक्‍थु चोक्‍पाइश्‍शो, मगाइक्‍तीसे, आंइ सहर प्रोंइशा, रिम्‍शो पा लसे” दे मिलो शिलो पा ग्रुंइशा सोइक्‍तमे बाक्‍त। 40 मिनु जेल्‍खान रे ग्रूशा, लिडीया आ खिं जाक्‍ताक्‍स। मिनु पावल नु आ वारचपुकीमी थमा सुइक्‍ब आन कली ग्रुम्‍शा, आन थुं बारपाइश्‍शा वोइश्‍शा गाक्‍तेक्‍म।