17
थिस्सलोनीकी सहरम शेंशो
1 मिनु मेकेर रे लशा, अम्फी-पोलीस नु आपोल्लोनीया सहरमी हिरशा, थिस्सलोनीकी सहरमी जाक्दीम्मा बाक्त। मेकेर यहूदी आन ग्रुम्तीक खिं का बाक्माक्त। १थिस्सलोनिकी २:२
2 पावल हिरशा गाक्मेनु, सहर सहर ङा यहूदी आन ग्रुम्तीक खिं खिं ओव़शा शेंबाक्माक्त। मोपा थिस्सलोनीकी सहरमी यो ग्रुम्तीक खिं लशा, शेंचा गोवा बाक्त।
3 नाइक्तीक नाक्ती सां सम्म परमप्रभु यावे आ लोव़ रे पा यहूदी आन कली “पाप रे प्रोंइब ख्रीस्त शुश श्येत जशा बेक्चा माल्ब। मिनु बेक्शो रे सेंसीचा माल्ब, दे ब्रेक्शो बाक्ब। मेको मोदेंशो श्येत जशा बेक्शा, बेक्शो रे सेंसीशो ख्रीस्त चहिं येसु बाक्त, दे रुपीने” दे शेंदीमी बाक्त। लूका २४:२६-२७, ४५-४६
4 पावल आ लोव़ नेंशा “आ देंशो थमा बाक्माक्त” दे यहूदी का निक्शी थमा सुइक्ब दुम्शा, पावल नु सिलास नु गारमा बाक्त। परमप्रभु यावे कली मान पाइब ग्रीकपुकी नु ठेयब नें चलेशो मीश मुरपुकी शुशेमी यो पावल आ शेंशो नेंशा थमा सुदमे बाक्त। १थिस्सलोनिकी १:१; २थिस्सलोनिकी १:१
5 शुश मुर आन कली थमा सुइश्शो तशा, थमा मसुइक्ब यहूदी आन थुं चोव़मी बाक्त। मिनु हेंथे गाक्ब गेय मपाइश्शो मुर आन कली खुप्शा, सहरमी मरिम्शो मुर आन कली पोक्पाइश्शा, ठेयब रेयके पपदमे बाक्त। मिनु पावल नु सिलास यासोन आ खिंमी बाक्सा बाक्त, दाप्शा, यासोन आ खिं लशा “मेको आस कली ग्रुंइशा, आंइ गुइमी गेचा नकी” दे रेयके पामे बाक्त।
6 तन्न पावल नु सिलास मेको खिंमी मबाक्शो बाक्सा बाक्त। मिनु मेको आस कली मथित्थु, यासोन नु थमा सुइक्ब आन कली ग्याइश्शा कीशा लाइश्शा, ठेयब मुर आन ङोंइती चाक्दीत्मे बाक्त। मेकोपुकीमी “नेल्ल रागी ङा मुर आन कली आन थुं ग्याल्पाइश्शा, दूली पपाइक्बपुकी इं सहरमी यो जाक्तेक्म। प्रेरित १६:२०
7 मिनु एको यासोनमी मेको आन कली बास गेशा थुल्शा वोइक्तीमी। मेकोपुकीमी इं रोमी पिप सिजर कली ममानेचा। येसु कका पिप बाक्ब, दे शेंना शेंन गाक्नीम” दे दोस गेमे बाक्त। लूका २३:२
8 मेको लोव़ नेंशा ठेयब मुर नु अरु नेल्ल आन थुं ग्याल्मा बाक्त।
9 मिनु यासोन नु आ वारच आन कली क्येट थाप्पाइश्शा प्रोंइशा सोइक्तमे बाक्त।
10 मिनु थमा सुइक्बपुकीमी पावल, सिलास नु तिमोथी आन कली में नाक्दोन छुल छाल पोक्शा, बेरोइया सहर गे सोइक्तमे बाक्त। मिनु बेरोइया सहरमी जाक्दीश्शा, यहूदी आन ग्रुम्तीक खिं लशा, शेंचा गोव़मे बाक्त।
बेरोइया सहरमी शेंशो
11 बेरोइया सहर ङा यहूदीपुकीमी थिस्सलोनीकी ङा मुर आन पशो खोदेंशो मपामे बाक्त। तन्न नोफा दाइश्शा पावल नु सिलास आस लोव़ नेंशा परमप्रभुमी ब्रेक्पाइश्शो लोव़ नु मेको आस शेंशो लोव़ गारबा देय मगारबा कोव़चा कली नाक्त किंत किंत जाक्मा बाक्त। यूहन्ना ५:३९
12 मिनु शुश मुरुमी थमा सुदमे बाक्त। ग्रीक रागी ङा नें चलेशो मीश मुर वोंइश मुर यो शुश थमा सुइक्ब दुम्मा बाक्त।
13 मिनु थिस्सलोनीकी सहरमी बाक्ब यहूदीपुकीमी “पावलमी बेरोइया सहरमी परमप्रभु यावे आ लोव़ शेंबाक्माक्त” देंशो नेंशा जाक्शा, मुर आन कली पोक्शा दूली पपाइश्शा, पावल कली खेदा पचा गोपदमे बाक्त।
14 मिनु थमा सुइक्बपुकीमी पावल कली समुन्द्र आ नेक्था गे सोइक्तमे बाक्त। सिलास नु तिमोथी चहिं मेक उइ बाक्सा बाक्त। प्रेरित १६:१
एथेन्स सहरमी शेंशो
15 पावल कली चोव़दीबपुकीमी एथेन्स सहर सम्म चोव़दीमा बाक्त। मिनु लेत्चामेनु, पावलमी मेको आन कली “सिलास नु तिमोथी आस कली आं बाक्तीके रीब पा सोइक्चा नसी” दे सोइक्तीमी बाक्त।
16 मिनु पावल एथेन्स सहरम मेको आस कली रिम्शा बाक्मेनु, सहरमी हिरशा गाक्माक्त। मिनु सहरमी गाक्मेनु, तेइ तेइ शुश मूर्ति सेल्शा वोइश्शो तशा, आ थुं मनुमाक्त।
17 मिनु यहूदी आन ग्रुम्तीक खिं लशा, यहूदी नु परमप्रभु कली मान पाइब अर्को रागी ङा मुर आन कली येसु आ पर्बम लोव़सी पना पन बाक्माक्त। नाक्त किंत किंत सहरमी हिरशा, लांमी सु सु आन कली ग्रुम्मी, मेको नेल्ल आन कली येसु आ पर्बम शेंना शेंन गाक्माक्त।
18 मोपा मुर आन कली ग्रुमानु, इपीक्युरीपुकी, स्तोइकीपुकी नु यो ग्रुम्शा लोव़ पवा बाक्त। मेकोपुकीमी पावल आ शेंशो नेंशा का निक्शीमी “एकोमी मार हेंथे फश लोव़ पना पन गाक्बाक्मे” देंमा बाक्त। का निक्शीमी चहिं “फश लोव़ ममाइ। मुल सम्म इं मतुइश्शो देवता आ पर्बम शेंबाक्त” देंमा बाक्त। देवता आ पर्बम शेंबाक्त, दे मारदे देंमा बाक्त देंशा हना, पावलमी “येसु आ ग्येरपाइक्ब लोव़ नु बेक्शो रे सेंसीशा ब्रोंइत” दे शेंबाक्माक्त। १कोरिन्थी ४:१२
19 मिनु मेकोपुकी पावल कली अरीयोपागस माइश्शो आन देल्शा बाक्तीकेमी लोव़ पथ चाक्दीत्मे बाक्त।
20 मिनु मेकोपुकीमी “गो मारेइ मतुइक्नीकी। गो आंइ कली शेंदीने, रुप्पतीने। इन शेंशो लोव़ मार में, दे रुप्चा दाक्नीकी” देंमा बाक्त
21 एथेन्स ङा मुर नु एथेन्स सहरमी बाक्ब नेल्लेमी नक नक लोव़ पचा नु नेंचा कली नाक्त किंत किंत हिरशा माल्शा बाक्बाक्मा बाक्त।
22 मिनु पावल अरीयोपागसमी राप्शा “एथेन्स सहरम बाक्बपुकी, गो इन सहरमी हिरशा गाक्ङानु, तेइ तेइ मूर्ति सेल्शा वोइश्शो ताता। मोपतीके गे मूर्ति आन कली सेउ पाइबाक्तीनी, पूजा पाइबाक्तीनी, दे रुप्ता।
23 इन पूजा पशो मूर्ति कोव़ना कोव़न गाक्ङानु, मूर्ति कामी ‘मतुइश्शो देवता’ दे मुशा ब्रेक्शा वोइश्शो ताता। मुल सम्म इन मतुइक्थु मानेशो परमप्रभु आ पर्बम गो इन कली शेंथ जाक्ती।
24 सरीङ रागीमी मार मार बाक्मा मेको नेल्ल परमप्रभुमी सेल्शो नम। मोपतीके सरीङ रागी सेल्ब परमप्रभु मुरुमी सेल्शो थान मन्दीरमी मबाक्ब। १कोरिन्थी ८:२७
25 मुरपुकीमी परमप्रभु कली मारेइ गेचा ममाल्नीमी। आं कका रागीमी बाक्ब नेल्ल आन कली ब्रोंइतीक सोक्त नु आन माल्शो नेल्ल गेशो बाक्ब। भजन संग्रह ५०:९-१२
26 ङोंइती मुर का सेल्शा, मेको मुर रे पा नेल्ल रागी ङा मुर सेल्तीमी। दोशो ब्रोंइचा, ते बाक्चा, मेको नेल्ल परमप्रभुमी पने थुम्शो बाक्ब। ब्यवस्था ३२:८
27 मुरपुकीमी परमप्रभु यावे कली माल्शा थिश्शा, मुर आन कली सेल्शा रागीमी वोइक्तीमी। मेको मुर आन क्येङा ङोन मबाक्ब, इं नेक्थान बाक्शो बाक्ब। यसैया ५५:६
28 मारदे हना परमप्रभु नु काथा बाक्शा ब्रोंइनय, दे तुइक्नय। गेपुकी नु बाक्ब ब्रेक्ब मुर कामी ‘गो नेल्ल परमप्रभु आ तमी तौ नय’ दे ब्रेक्शो बाक्त।
29 गोपुकी परमप्रभु यावे आ तमी तौ दुम्शा, मुर आन मिम्शो आन गुइमी सेल्शो सुन चांदी फुल्लु मार मार के मूर्ति तशा, परमप्रभु मोदेंशो बाक्ब, दे मिम्चा मदुम्ब। उत्पत्ती १:२७; यसैया ४०:१८
30 मुल सम्म गे मतुइक्तीनी। मिनु मतुइक्थु देवता आन कली सेउ पाइबाक्तीनी। मतुइक्थु मो पशो तुइश्शा, परमप्रभु यावेमी इन कली दोस मगेब। मुल चहिं परमप्रभुमी मुर नेल्ल आन कली ‘इन थुं आं गे लेत्तीन’ दे ब्रेप्ब। प्रेरित १४:१६; लूका २४:४७
31 मारदे हना काबु नेल्ल आन कली ठीक पा निसाफ पाइब। मेको निसाफ पची नाक्त परमप्रभुमी योव़शा वोइश्शो बाक्ब। निसाफ पाइब यो योव़शा वोइश्शो बाक्ब। मेको निसाफ पाइब कली ‘आं योव़शो बाक्ब’ दे कोंइचा कली बेक्शो रे सेंताक्व” दे पावलमी शेंदीमी बाक्त। प्रेरित १०:४२; मत्ती २५:३१-३३
32 मिनु बेक्शो रे सेंचा पुंइसाक्व, मुर नेल्ल बेक्शो रे सेंचा पुंइसीनीम, दे शेंशो नेंशा, का निक्शीमी “एको फश लोव़ पाइक्बाक्त, है” दे रिस्समा बाक्त। का निक्शीमी चहिं “इन शेंशो रिम्शो लाक्तक, लेंशा नेंनीकी” दे गाक्मा बाक्त।
33 मिनु पावल मेकेर रे लमाक्त।
34 का निक्शीमी आ लोव़ थमा सुइश्शा, पावल नु गारमा बाक्त। मोदेंशो आ नु गारब का डियोनीसीयस नें पाइश्शो अरीयोपागस ङा मुर बाक्माक्त। का डामारीस नें पाइश्शो मीश मुर बाक्माक्त। अरु यो बाक्मा बाक्त।