6
ठेयब लेश्‍शो आन कली हुइश्‍शो
मिनु “आबी, सियोन ङा ठेयब मुर, मेकोपुकीमी सामरीया ङा डांडामी ‘गो रिम्‍शो बाक्‍नीकी’ दे मिम्‍नीम। इस्राएल ङा मुरपुकीमी मेको आन कली थमा सुइश्‍शा, जाक्‍नीम। गे आइक्‍ची हांबु काल्‍नेह सहर लशा, कोव़ङीन। मिनु मेकेर रे ठेयब हमाथ रागी लन। मेको नोले पलिस्‍ती आन गाथ सहरमी लने। इन राज्‍य मेको आन राज्‍य क्‍येङा रिम्‍शो बाक्‍बा ङा? मार, मेको इन रागी मेको आन रागी क्‍येङा ठेयब बाक्‍बा ङा? उत्‍पत्ती १०:१० गे ‘श्‍येत जतीक नाक्‍त मजाक्‍ब’ दे मिम्‍नीनी। मिनु गे हुश ख्राक्‍श पोक्‍ब सासन पाइब चाक्‍नीनी। भजन संग्रह १०:५
आबी, मेको हात्ती आ दारा के सेल्‍शो खाटमी इप्‍नीमी। आन इप्‍‍तीकेमी गोल्‍शा बाक्‍नीमी। मेकोपुकीम क्‍यारश भेडा आन पाठा नु गोठ ङा बाछा ब्‍वाइनीमी। मेकोपुकीम हें‍थे कुम्‍सो पा तार पाइश्‍शो ठेयब ताप्‍तीक ताप्‍नीमी। मिनु ‘गो दाऊद खोदेंशो पा ताप्‍तीक सेल्‍नुङ’ दे मिम्‍नीम। यसैया ५:१२ मेकोपुकीम डाप्‍काम अङगुर शांबु तूनीमी। नेल्‍ल क्‍येङा रिम्‍शो तेल ख्रेक्‍सीनीमी। तन्‍न योसेफ आ खिं ङा मुरुम श्‍येत जामेनु, सुर्ता मपाइनीम। मोपतीके मेको नेल्‍ल क्‍येङा ङोंइती ग्‍याइश्‍शा लाइक्‍चा पुंइसीनीम। मोपा मेको आन चाड पतीके, ग्‍येरशा बाक्‍तीक नाक्‍त नुप्‍ब” देंत।
इस्राएल ङा मुर आन ठेयब लेश्‍शो
परमप्रभु यावेमी आ नेंमी कसम जशो बाक्‍ब। मिनु मुर नेल्‍ल आन परमप्रभु यावेमी “गो याकूब आ ठेयब लेश्‍शो तशा ग्रांग्रा दीनुङ। मेको आ बोल्‍यो दरवार आन कली काइ मदाक्‍नुङ। गो एको सहर नु आ मार मार नेल्‍ल आन जोरी सत्रु आन गुइमी गेनुङमी” देंशो बाक्‍ब।
खिं काम १० जना मुर लीतेक्‍म हना यो, मेको नेल्‍ल बेक्‍नीम। 10 मिनु खिं ङा मुर कामी मेको आन बेक्‍शो रां चोइब, खिं आगा रे बेक्‍शो मुर ग्रुंइचा कली जाक्‍शा, मेकेर ख्रुइक्‍ब का कली “गेपुकी नु अरु सुइ बाक्‍नीमी?” दे हिल्‍लो पाइब। मिनु मेकोमी “मबाक्‍ब” देंब। मिनु खिं ङा मुरुमी “सिक्‍सी पावो। गोपुकीमी परमप्रभु यावे आ नें थिचा मदुम्‍ब” देंब। आमोस ८:३ 11 मारदे हना परमप्रभु यावेमी हुकुम पाइब। मिनु ठेयब खिं कली प्रेप्‍ब। मिनु आइक्‍च खिं यो प्रेप्‍ब। 12 मेकोमी “मार, शारा रोंगुम दोरनीमी ङा? मार, मेकेर ब्‍यफ वाक्‍नीमी ङा? तन्‍न गेपुकीम ठीक निसाफ कली दूली सेल्‍तीनी। ठीक पतीक कली कशो सेल्‍तीनी। आमोस ५:७ 13 गेपुकी लो-देबार सहर आ पर्बम ग्‍येरसाक्‍नी। मिनु ‘मार, गोपुकीमी इं सक्तिम कारनाइम सहर मग्रासे ङा?’ देंनीनी। 14 ए इस्राएल आ खिं ङा मुरपुकी, गो इन पर्बम रागी का ङा मुर आन कली पोक्‍नुङमी। मिनु मेकोपुकीमी इन कली लेबो-हेमाथ रे अराबाह ङा खोला सम्‍म श्‍येत गेशा खेदा पाइनीम” दे मुर नेल्‍ल आन परमप्रभु यावेमी देंत।