7
सल्हा माले कोंइशो
1 परमप्रभु यावेमी आं कली मार कोंइताक्यी देंशा हना, पिप आ बाली नाली खुप्ने थुम्शा, अर्को बाली वामानु, मेकोम मारेइ मारेइ नेक्ब सल्हा माले आन कली ठीक पशो ताता।
2 मिनु मेकोपुकीमी रू ङा घांस नेल्ल नेक्गमे नोले गो “परमप्रभु यावे माफ गेयीनी। याकूब आ रागी दोपा ब्रोंइने चाप्बा ङा? मारदे हना मेको थम आइक्च बाक्ब” देंती।
3 मिनु परमप्रभु यावेमी “मेको मोदेंशो मदुम्ब” देंत।
मी कोंइशो
4 मिनु परमप्रभु यावेमी आं कली मार कोंइताक्यी देंशा हना परमप्रभु यावेमी आं कली ब्रशो मी का कोंइताक्यी। मिनु मेको मीम ठेयब समुन्द्र कली सोव़पाइक्तु। मिनु रागी कली यो नेक्तु। उत्पत्ती ७:११
5 मिनु गो “परमप्रभु यावे नाइक्तीन, दे गो इन कली पुंइनुङ। याकूब आ रागी दोपा ब्रोंइने चाप्बा ङा? मारदे हना मेको थम आइक्च बाक्ब” देंती।
6 मिनु परमप्रभु यावेमी “मोदेंशो यो मदुम्ब” देंत।
गारो प्रोव़तीक घन्टी कोंइशो
7 मिनु परमप्रभु यावेमी आं कली मार कोंइताक्यी देंशा हना, परमप्रभु यावे गारो काम गारो प्रोव़तीक घन्टी शेशा, राप्शो बाक्त।
8 मिनु परमप्रभु यावेमी आं कली “आमोस गे मार तवी?” दे हिल्लो पाप्तु। मिनु गो “गारो प्रोव़तीक घन्टी का ताता” देंती। मिनु परमप्रभुमी “कोव़ङो, गो आं मुर इस्राएली आन दातेमी गारो प्रोव़तीक घन्टी का क्युक्नुङ। मिनु मुल गो मेको आन नेक्था बाक्शा, मार पाइक्बाक्मा, कोव़नुङमी। यसैया ३४:११; आमोस ८:२
9 इसहाक आ डांडा ङा थान खतम दुम्नीम। मिनु इस्राएल ङा थान नेल्ल ब्रेश्शा जाम्शा लाइनीम। मिनु गो तरवार शेशा येरोबाम आ खिं ङा मुर साइक्चा कली बोक्शा लाइनुङ” देंत।
आमोस नु अमस्याह
10 मिनु बेथेल ङा चढ़ेब अमस्याहमी इस्राएल ङा पिप येरोबाम कली “इस्राएल आ खिं ङा मुर आन दातेमी इस्राएलम बाक्ब आमोसमी इन पर्बम मरिम्शो पाइब। एको रागीमी मेको आ लोव़ फाल्ने मचाप्ब।
11 आमोसमी ‘येरोबाम तरवारम साइक्चा पुंइसीब। मिनु इस्राएल ङा मुर आन रागी रे ग्याइश्शा लाइक्चा पुंइसीनीम’ देंशो बाक्ब” दे आमोसमी देंत।
12 मिनु अमस्याहमी आमोस कली “ए, परमप्रभु यावे आ लोव़ पाइब, गे एक रे प्रोक्शा यहूदा रागी लावो। मिनु मेकेर क्येट चेम्शा शोब्ले ग्याप्शा जशा, परमप्रभु यावे आ लोव़ पावो। १सामुएल ९:९
13 बेथेलमी लेंशा गेनायो परमप्रभु यावे आ लोव़ मपावो। मारदे हना मेको पिप आ देवी देवता थान नु राज्य ङा पूजा पतीके बाक्ब” देंत। १राजा १२:२८-२९
14 मिनु आमोसमी अमस्याह कली “गो परमप्रभु यावे आ लोव़ पाइब मनङ। मिनु परमप्रभु यावे आ लोव़ पाइब आ तौ यो मनङ। गो दा गोठला का नु फोव़शी रवा कोव़ब मुर नङ।
15 मिनु परमप्रभु यावेमी आं कली क्यारश भेडा योव़तीक रे ब्रेत्ताक्यी। मिनु मेकोमी आं कली ‘लावो। आं मुर इस्राएली आन कली आं लोव़ शेंदीमी’ दे माइक्ती।
16 मोपतीके मुल परमप्रभु यावे आ लोव़ नेनीन। गे आं कली ‘इस्राएल आ पर्बम परमप्रभु यावे आ लोव़ मपावो। मिनु इसहाक आ खिं ङा मुर आन पर्बम लोव़ मपावो’ देंतीनी। आमोस २:१२
17 मोपतीके परमप्रभु यावेमी इ कली ‘इ मीश सहरम तेल्लेम का दुम्ब। इ तमी तौ नेल्ल तरवारमी क्योरचा पुंइसीनीम। मिनु इ रागी पुक्शा योक्सीनीम। गे चहिं ग्रांग्रा दिशो रागी काम बेक्नेवे। मिनु इस्राएल थमा पा आ रागी रे ग्याइश्शा लाइक्चा पुंइसीब’ ” दे आमोसमी अमस्याह कली देंत।