एस्तर
ब्रेक्ब मुर: ब्रेक्ब मुर सु बाक्मे, मेको मतुंइसीब देंनीम। तन्न मोरदेकैमी एस्तर आ पर्बम नेल्ल ब्रेक्शो बाक्ब, देंनीम। एस्तर ९:२० का निक्शी मुरुम “एज्राम ब्रेक्शो बाक्ब” देंनीम।
गेना ङा लोव़: इस्राएलीपुकी ग्याइश्शा बेबीलोन लाइक्चा पुंइसीशो नोले जेरूब-बाबेल नु इस्राएली यरूसलेम लेश्शो बाक्तेक्म। मेको आन दातेमी एज्रा यो बाक्त। एको ५३६-४५८ बि. सी. ङा लोव़ बाक्ब। मेना एज्रा नु नेहेम्याह यरूसलेम सहरमी गेय पशो बाक्ताक्स। हाग्गै नु जकरिया यो बाक्सा बाक्त। मेना एस्तर आ किताब ब्रेक्शो बाक्त।
मारदे ब्रेक्शो: एको किताब परमप्रभुमी आ मुर आन कली दाक्शा, श्येत रे प्रोंइशो आ पर्बम कोंइशा ब्रेक्शो बाक्ब। मेना रे यहूदीपुकीमी पुरीम चाड मानेनीम। मेको पुरीम चाड एस्तरमी यहूदी आन कली श्येत रे प्रोंइशो आ पर्बम मिम्तीक चाड का बाक्ब।
1
पिप अहासूरस आ ठेयब दुम्तीके
1 एको लोव़ नेल्ल अहासूरस माइश्शो पिप आ पालाम दुम्शो लोव़ बाक्ब। अहासूरसमी भारत रे एथीयोपीया माइश्शो कूश रागी सम्म पा १२७ ओटा रागी आन कली सासन पाइब बाक्त।
2 मेना मेको पिप अहासूरसमी आ राज्य ङा सुसा दरवारमी आ ठेयब नित्तीकेमी निश्शा सासन पाप्तु।
3 मिनु मेको पिप दुम्शो ३ बर्स जाक्दीम्मेनु, आ हुकुम पाइब मुर नु सरकार ङा गेय पाइब नेल्ल आन कली भोज का गेप्तु। मेको भोजमी मादी नु पारसी आन ठेयब मुर नु मेको रागी ङा हुकुम पाइब नेल्ल जाक्शो बाक्तेक्म।
4 मिनु मेको पिपमी १८० नाक्त सम्म आ राज्य ङा शुश शोंप, आ दारस नु आ ठेयब दुम्तीके मेको आन कली कोंइताक्मी।
5 मेको कोंइतीक नाक्त नुम्मेनु, मेको पिपमी आ दरवार ङा ठेयब नु आइक्च मुर नेल्ल आन कली ठेयब भोज गेप्तु। मिनु मेको भोज सुसा दरवार ङा लाङगाम ७ नाक्त सम्म दुम्त।
6 मिनु पिप आ दरवार नेल्ल दारपाइक्चा कली बुश नु नीलो वा क्याइश्शो बाक्तेक्म। मेको वापुकी नीलो झुम्का पाइश्शो दारशो मलमल के बाक्तेक्म। मिनु मेको वा आन कली बुश नु नीलो डोरी पाइश्शो, चांदी के ग्याइक्तीकेमी शुश क्येट लाइब बुश फुल्लु के थामम क्युक्शो बाक्तेक्म। मेकेर सुन नु चांदी के सेल्शो नित्तीके बाक्तेक्मे। मेको बुटा आप्शो शुश क्येट लाइब बुश, गिगी नु क्येर फुल्लुम साप्शो खप तारी वोइश्शो बाक्तेक्म।
7 मिनु मेको मुर आन कली सुन के कचौरामी अङगुर शांबु तूचा गेशो बाक्तेक्म। मेको कचौरा का का पा अर्को अर्को खाल ङा बुटा आप्शो बाक्तेक्म। मिनु पिपमी मेको आन कली शुश अङगुर शांबु तूचा गेप्तु।
8 मेको नेल्लेमी आंम आंम दाक्शो पा तूचा ताम्तेक्म। मारदे हना पिपम “नेल्ल आन कली आंम दाक्शो तूचा गेन” दे आ शांबु ख्रेप्ब आन कली माइश्शो बाक्त।
पिपीम वास्तीमी पिप कली मटिशो
9 मिनु वास्ती पिपीममी यो दरवार ङा मीश मुर आन कली पिप अहासूरस आ दरवारमीन ठेयब भोज का गेप्तु।
10 मेको भोज दुम्शो ७ नाक्तीमी पिप अहासूरस अङगुर शांबुम रांइशा, पिपम आ दरवार ङा ७ जना शुश अधिकार पाइश्शो गेय पाइब मेहूमान, बिस्था, हारबोना, बिग्थान, आबाग्था, जेथार नु कारकस आन कली
11 “पिपीम वास्ती कली आ सिरपेच गुम्सीशा, मुर नेल्ल नु हुकुम पाइब आन ङोंइती आ दारस कोंइचा कली चाक्कीन” दे अरेशा सोइक्ताक्व। मारदे हना मेको पिपीम शुश दारशो बाक्त।
12 तन्न पिपीममी पिप आ सोइश्शो मुर आन देंशो मबिस्से। मोपा वास्तीम मबिश्शो तशा, मेको पिप हिंचा ङा पा गाइक्ताक्व।
पिपमी वास्ती कली सजाइ गेशो
13 मिनु पिपमी “मुल मार पचा” दे जोक्ब तुइक्ब नु लोव़ पाप्तु। मेको जोक्ब तुइक्बमी ङोंइती रे पिप कली अर्ती गेबाक्मा बाक्त। मिनु ऐन कानुन जोक्ब तुइक्ब नेल्लेमी “मुल मार पचा” दे सल्ला पाम्तेक्म।
14 मेको पिप कली सल्ला गेब सु बाक्मा बाक्त, देंशा हना, पारसी नु मादी ङा ७ जना हुकुम पाइब कारशेना, शेथार, अदमाथा, टारशीश, मेरेस, मारसेना नु मेमुकान बाक्मा बाक्त। मेकोपुकी पिप आ ङोंइती बाक्शा, नेल्ल क्येङा ठेयब अधिकार पा गेय पाइब बाक्तेक्म।
15 मिनु पिप अहासूरसमी मेको आन कली “आं गेय पाइब रे पा आं सोइश्शो लोव़ पिपीम वास्तीमी मटीव। मोपतीके मेको कली ऐन कानुन कोव़शा मार पचा?” दे हिल्लो पाप्तु।
16 मिनु मेमुकानमी पिप नु आ सरकार ङा हुकुम पाइब नेल्ल आन ङोंइती “पिपीम वास्तीमी पिप कली ला ममाइ, तन्न हुकुम पाइब नेल्ल आन कली नु पिप अहासूरस आ रागी ङा मुर नेल्ल आन कली मरिम्शो पाप्तु।
17 मुल पिपीम आ मरिम्शो पशो मीश मुर नेल्लेमी तुइक्नीम। मोपतीके मेकोपुकीमी यो आन वोंइश कली आइक्च सेल्शा मटीनीम। मेकोपुकीमी ‘पिप अहासूरसमी पिपीम वास्ती कली आ बाक्तीकेमी ब्रेत्ताक्व, तन्न पिपीममी मटीव’ दे लोव़ पाइनीम।
18 मिनु पिपीम आ पशो आ पर्बम नेंब मादी नु पारसी ङा सासन पाइब आन मीश मुरपुकीमी, पिप आ सासन पाइब नेल्ल आन कली मुलाक्त ङा लोव़ पाइनीम। मिनु मीश मुरुमी आन वोंइश आन कली मटिथु, शुश जिचा पोक्नीम।
19 मोपतीके गे दाक्नीनी हना, पिपीम वास्ती गे इन ङोंइती गेनायो जाक्ने मचबल। मिनु आ पिपीम दुम्तीके क्याम्शा, अर्को मेको क्येङा दारशो मीश आल कली पिपीम सेलीन। मेको इन सेल्शो कानुन पारसी नु मादी आन कानुनमी यो गेनायो मक्याम्सीचा ङा पा ब्रेक्पतीन। दानीएल ६:९
20 मिनु एको पिप आ ब्रेक्पाइश्शो लोव़ एको राज्य नेल्लेमी नेंतेक्म हना, ठेयब नु आइक्च मीश मुर नेल्लेमी आन वोंइश कली मान पाइनीम” देंत।
21 मिनु मेमुकान आ लोव़ पिप नु सासन पाइबपुकीमी “रिम्शो बाक्ब” दे दाक्ताक्म। मिनु पिपमी मेमुकान आ देंशो खोदेंशो पाप्तु।
22 मिनु मेकोमी आ रागी नेल्ले ङा मुर आन आंम आंम ब्रेक्स नु आंम आंम लोव़मी “खिं ङा ठेयब वोंइश मुरुमी आंम खिं ङा मुर आन कली अधिकार पचा माल्नीम” दे मुर नेल्ल आन जात जात ङा ब्रेक्स नु आंम आंम लोव़म ब्रेक्पाइश्शा सोइक्ताक्व। एस्तर ३:१२; एस्तर ८:९