13
अर्को रागी ङा मुर तिल्शो
1 मेको नाक्ती मुर आन ङोंइती मोसा आ ब्रेक्शो किताब पढेशो बाक्त। मिनु मेकेर मार ब्रेक्शो बाक्त देंशा हना “अम्मोन नु मोआब ङा मुरपुकी रे सुइ परमप्रभु आ मुर आन ग्रुम्तीकेमी गेनायो जाक्चा मताइनीम। ब्यवस्था २३:४-६
2 मारदे हना मेकोपुकी इस्राएली आन कली शोब्ले नु ब्वाक्कु गेचा कली ग्रुम्थ मजाक्शो बाक्तेक्म। तन्न इस्राएली आन कली सराप पाइक्चा कली बालाम कली क्येट गेशा, ब्रेश्शो बाक्तेक्म। मो पाम्तेक्म हना यो, आंइ परमप्रभुमी मेको सराप रे आसीक सेल्शो बाक्त” दे ब्रेक्शो बाक्त। गन्ती २२:५-६
3 मिनु मेको अरेशो लोव़ पढेशो नेंशा, अर्को रागी ङा मुर नेल्ल आन कली तिल्तेक्म।
चढ़ेब एल्याशीब कली हुइश्शो
4 मिनु मेको क्येङा ङोंइती चढ़ेब एल्याशीब आंइ परमप्रभु आ खिं ङा ठेयब कोव़ब बाक्त। मेको तोबीयाह एल्याशीब आ नेक्था ङा मुर बाक्त। नेहेम्याह २:१९
5 मिनु चढ़ेब एल्याशीबमी आंम खिं ङा मुर, तोबीयाह कली परमप्रभु यावे आ खिं ङा वोइक्तीक ठेयब कोठा का गेशो बाक्त। ङोंइती मेको कोठामी मार मार शेंशो खोदेंशो पा चढ़ेशो १० भाग ङा अन्न, धूप, परमप्रभु यावे आ खिं ङा बोसपुकी, मुर आन गेशो १० भाग ङा भाग का अन्न, अङगुर शांबु नु तेल वोइश्शो बाक्त। मेको परमप्रभुमी शेंशो खोदेंशो पा लेवी, कुम्सो पाइब, लाप्चो खाल पाइब नु चढ़ेब आन तचा ङा भाग वोइश्शो बाक्त।
6 मेको नेल्ल दुम्ची ना गो यरूसलेममी मबाक्शो बाक्ती। मारदे हना गो बेबीलोन ङा पिप आरता-सास्त ३२ बर्स जाक्दीम्मेनु, पिप आ बाक्तीकेमी लेत्ती। मिनु इच्का नोले “यरूसलेम लेश्शा, लचा गेयीनी” दे पिप कली पुंइता।
7 मिनु गो यरूसलेम जाक्ङानु, एल्याशीबमी तोबीयाह कली परमप्रभु आ खिं ङा कोठा गेशा, मरिम्शो पशो तुइक्ताक्ङ।
8 मेको तुइश्शा, शुश गाइक्ताक्ङ। मिनु गो तोबीयाह आ मार मार नेल्ल मेको कोठा रे ग्रुंइशा ताइक्ताक्ङ।
9 मिनु “मेको कोठा नेल्ल कली रिम्शो सेल्चा माल्नीम” दे अरेता। मिनु गो परमप्रभु आ खिं ङा बोसपुकी, चढ़ेशो अन्न नु ब्रोव़शो रिना पाइब थोव़क लेंशा वोइक्तामी।
10 मिनु लेवीपुकीमी आन तचा माल्शो भाग मतशो बाक्तेक्म, दे आं कली तुइक्पाइक्तेक्म। मोपा मेको लेवीपुकी नु ठेयब सेल्तीक कुम्सो पाइब आन गेय प्रोंइशा, आंम आंम रूमी लशा, गेय पाइबाक्तेक्म। नेहेम्याह १२:४७
11 मोपतीके गो ठेयब मुर आन कली “परमप्रभु यावे आ खिं मारदे प्रोंइनी?” दे हुइक्ताक्ङमी। मिनु गो लेवी नु कुम्सो पाइब आन कली ब्रेश्शा, आन गेय पपाइक्तामी।
12 मिनु यहूदा रागीम बाक्ब नेल्लेमी १० भाग ङा भाग का अन्न, नक अङगुर शांबु नु तेल परमप्रभु यावे आ खिं ङा मार मार वोइक्तीक कोठामी चाक्तेक्म। गन्ती १८:२१
13 मिनु गो चढ़ेब शेलेम्याह, ब्रेक्ब सादोक नु लेवी आ थर ङा पेदायाह मेको सांफा कली मार मार वोइक्तीक कोठा कोव़ब मुर सेल्तामी। मिनु मत्तन्याह, आ चच नु जाक्कुर आ तौ हानान कली मेको आन कली वारच पाइब सेल्ता। मेकोपुकी थमा सुइक्चा पुंइसीशो मुर बाक्तेक्म। मिनु मेको आन लोक्ब आन तचा ङा थोव़क गेचा माल्तेक्म।
14 गो परमप्रभु यावे कली “आं परमप्रभु, इन खिं कोव़शा नु मेकेर ङा पशो रिम्शो पतीक मप्रेंदीन। आं कली मिम्तीन” देंती। नेहेम्याह ५:१९
नाइक्तीक नाक्त
15 मेना गो का निक्शी यहूदाम बाक्बपुकीमी नाइक्तीक नाक्ती कोल ख्राक्शो, चेरब खुप्शो गधा आन कली मार मार कुरपा नाइक्तीक नाक्त यरूसलेममी चाक्शो तातामी। मेकोपुकीमी नाइक्तीक नाक्त अङगुर शांबु, अङगुर नु फोव़शी यो यरूसलेमम लेयचा कली चाक्तेक्म। मिनु गो मेको आन कली “गे नाइक्तीक नाक्ती मेको मलेयङीन” दे हुइक्ताक्ङमी। नेहेम्याह १०:३२
16 यरूसलेममी बाक्ब टायर ङा मुरपुकीमी यो ङांइ नु लेयतीक मार मार थोव़क नाइक्तीक नाक्त चाक्शा, यरूसलेममी बाक्ब यहूदी आन कली लेयतेक्म।
17 मिनु यहूदा ङा ठेयब मुर आन कली हुइश्शा “नाइक्तीक नाक्त गे मार मरिम्शो गेय पनी? गे नाइक्तीक नाक्त अरु नाक्त खोदेंशो सेल्तीनी। गे मतुइक्तीनी?
18 मार, इन किकी पिपीमी यो मोदेंशोन मपामे ङा? मो दुम्तीके, इं परमप्रभुमी एको सहर नु इं कली एको श्येत गेशो ममाइ ङा? मिनु मुल गे नाइक्तीक नाक्त, गेय पतीक नाक्त खोदेंशो सेल्शा, परमप्रभु आ गाइक्तीक तेम्नीनी?” दे हुइक्ताक्ङमी। इजीकीएल २०:१२-१३
19 मिनु “यरूसलेम ङा गारो ङा ठेयब लाप्चोपुकी नाइक्तीक नाक्त नां रिक्चा क्येङा ङोंइती चोक्चा माल्नीम। मिनु नाइक्तीक नाक्त मनुम्म सम्म रोक्चा मदुम्ब” दे माइक्तामी। मिनु नाइक्तीक नाक्ती मार मार थोव़क यरूसलेममी मचाक्गमेक्ल, दे आंम आंम गेय पाइब का निक्शी आन कली लाप्चोपुकी खाल पचा कली वोइक्तामी।
20 मिनु नाक्दो मेको मार मार ग्याप्ब लेयबपुकीमी यरूसलेम मेर नां सोंइताक्म। का निक्शी खेयप मोदेंशो पाम्तेक्म।
21 मिनु गो मेको आन कली “मारदे नाइक्तीक नाक्त गारो आ ङोंइती उइ नां सोंइदीनी? गे लेंशा मो पाइतीनी हना, इन कली मो मप्रोंइनन्नी” दे हुइक्ताक्ङमी। मेको नोले सुइ मुर नाइक्तीक नाक्ती मेकेर मजाक्म।
22 मिनु गो लेवी आन कली ब्रेश्शा “आंम कली ठीक सेल्सीने। नाइक्तीक नाक्त परमप्रभु यावे के बाक्ब, दे मानेचा कली ठेयब लाप्चोपुकी खाल पथ बाक्कीन” दे माइक्तामी। मिनु गो “आं परमप्रभु, आं ओदेंशो पशो यो मिम्तीन। मिनु इन ठेयब नु गेना हना यो दाक्तीके कोंइदीनी” देंती।
अर्को रागी ङा मीश चाक्शो
23 मिनु मेना यो गो अश्दोदी, अम्मोनी नु मोआबी मीश आन कली चाक्ब यहूदी आन कली ग्रुम्तामी।
24 मेको आन आलपुकीमी का निक्शी अश्दोदी लोव़ पाइबाक्तेक्म। यहूदी आन लोव़ मजोक्थु, अर्को रागी ङा मुर आन लोव़ पाइबाक्तेक्म।
25 मिनु गो मेकोपुकी नु जिशा, सराप पाइश्शा, का निक्शी आन कली तुप्शा, आन चां रोक्ताक्ङमी। मिनु मेको आन कली परमप्रभु आ नेंमी लोव़ पाइक्तामी। “गे इन तमीपुकी मेको आन तौ कली गेतीनी नु आन तमी इन तौ आन कली चाक्तीनी हना, आंइ कली खतम दुम्पाइक्नीनी” देंती। ब्यवस्था ७:३
26 मिनु “इस्राएल ङा पिप सोलोमनमी मोदेंशो मीश चाक्शा पाप पवा, ममाइ? शुश रागी आन दातेमी मेको खोदेंशो पिप सुइ मबाक्म। मिनु परमप्रभुमी मेको कली दाक्शा, इस्राएली नेल्ल आन पिप सेल्शो बाक्त। मोदेंशो बाक्त हना यो, अर्को रागी ङा मीश मुरपुकीमी मेको कली पाप पपाइश्शो बाक्तेक्म। १राजा ११:३-८
27 मिनु मार, गोपुकीमी इन लोव़ नेंशा, इन खोदेंशो पा इं परमप्रभु कली शुश मरिम्शो पा, अर्को रागी ङा मीश चाक्नीनी?” दे हुइक्ताक्ङमी।
28 मिनु नेल्ल क्येङा ठेयब चढ़ेब एल्याशीब आ चच, येहो-यादा आ तौमी होरोनी सान्बल्लत आ तमी का चाक्शो बाक्त। मोपतीके गो मेको कली आं ङोंइती रे ग्रुंइशा खेरता। नेहेम्याह २:१०,१९; नेहेम्याह १२:१०
29 “आं परमप्रभु, मेकोपुकीमी इन कली चढ़ेतीक गेय नेल्ल मरिम्शो सेल्तेक्म। मोदेंशो पा मेकोपुकीमी चढ़ेब नु लेवी आन पशो कबल प्रोंइतेक्म। मेको मिम्तीन” देंती।
30 मिनु गो मेको आन कली अर्को रागी ङा मारेइ मारेइ रे ठीक सेल्तामी। मिनु गो चढ़ेब नु लेवी आन पचा माल्शो गेय लेंशा पपाइक्तामी। गन्ती २५:१२-१३; मलाकी २:८
31 मिनु परमप्रभु आ खिं कली शी नु नेल्ल क्येङा ङोंइती सिश्शो फल चाक्चा आ पर्बम लोव़सी गारपाइक्ता। मिनु गो “आं परमप्रभु, आं पशो मिम्शा, आं कली रिम्शो पाइय्यीनी” देंती।