12
चढ़ेब नु लेवीपुकी
1 शाल्तीएल आ तौ जेरूब-बाबेल नु येशुआ नु काथा लेश्शा जाक्ब चढ़ेब नु लेवीपुकी सु सु बाक्तेक्म देंशा हना, सेरायाह, येरमीया, एज्रा एज्रा २:२
2 अमारयाह, माल्लुक, हत्तुश,
3 शेकन्याह, रेहुम, मेरेमोथ,
4 इददो, गिन्नेथोइ, अबीयाह, लूका १:५
5 मियामीन, मा-अदीयाह, बिल्गाह,
6 शेमायाह, योयारीब येदायाह,
7 सल्लु, अमोक, हिल्कीयाह नु येदायाह बाक्तेक्म। मेकोपुकी येशुआ आ पाला ङा चढ़ेब नु आन लोक्ब आन ठेयब मुर बाक्तेक्म।
8 मिनु लेवीपुकी सु सु बाक्तेक्म देंशा हना, येशुआ, बिन्नुइ, कदमीएल, शेरेब्याह, यहूदा नु मत्तन्याह बाक्तेक्म। मेको नु आन लोक्बपुकी परमप्रभु यावे कली ठेयब सेल्तीक कुम्सो पपाइक्ब बाक्तेक्म।
9 मेको आन लोक्ब बाकबुकीयाह नु उन्नो कुम्सो पची ना आन नेक्था बाक्बाक्ताक्स।
10 येशुआ योयाकीम आ आफ बाक्त। योयाकीम एल्याशीब आ आफ बाक्त। एल्याशीब यो-यादा आ आफ बाक्त। नेहेम्याह ३:१
11 यो-यादा योनाथन आ आफ बाक्त। मिनु योनाथन यादुअ आ आफ बाक्त।
चढ़ेब आन ठेयब मुरपुकी
12 योयाकीम आ पालामी चढ़ेब आन खिं खिं ङा ठेयब मुर सु सु बाक्तेक्म देंशा हना, सेरायाह आ खिं ङा ठेयब मुर मेरायाह, येरमीया आ खिं ङा ठेयब मुर हनान्याह,
13 एज्रा आ खिं ङा ठेयब मुर मेशुल्लाम, अमारयाह आ खिं ङा ठेयब मुर येहो-हानान,
14 माल्लुक आ खिं ङा ठेयब मुर योनाथन, शेबान्याह आ खिं ङा ठेयब मुर योसेफ,
15 हारीम आ खिं ङा ठेयब मुर अदना, मेरायोथ आ खिं ङा ठेयब मुर हेल्काइ,
16 इददो आ खिं ङा ठेयब मुर जकरिया, गिन्नेथोन आ खिं ङा ठेयब मुर मेशुल्लाम,
17 अबीयाह आ खिं ङा ठेयब मुर जिक्री, मीन्यामीन आ खिं ङा ठेयब मुर का, मोअदयाह आ खिं ङा ठेयब मुर पिल्ताइ,
18 बिल्गाह आ खिं ङा ठेयब मुर शम्मुआ, शेमायाह आ खिं ङा ठेयब मुर येहो-नाथान,
19 योयारीब आ खिं ङा ठेयब मुर मतेनाइ, येदायाह आ खिं ङा ठेयब मुर उज्जी,
20 सल्लाइ आ खिं ङा ठेयब मुर कल्लाइ, अमोक आ खिं ङा ठेयब मुर एबेर,
21 हिल्कीयाह आ खिं ङा ठेयब मुर हशाब्याह नु येदायाह आ खिं ङा ठेयब मुर नेथनेल बाक्तेक्म।
22 पारसी ङा पिप दारा आ पालामी चढ़ेब नु लेवी आन खिं ङा ठेयब मुर आन नें ब्रेक्शा वोइश्शो बाक्त। चढ़ेब आन नेल्ल क्येङा ठेयब चढ़ेब एल्याशीब, यो-यादा, योहानान नु यादुअ आन पाला सम्म आन खिं ङा ठेयब मुर आन नें ब्रेक्शो बाक्तेक्म।
23 मिनु लेवी आन खिं ङा ठेयब मुर आन नें एल्याशीब आ तौ योहानान आ पाला सम्म इतिहास ङा किताबमी ब्रेक्शो बाक्तेक्म।
परमप्रभु कली ठेयब सेल्शो
24 मिनु लेवी आन ठेयब मुरपुकी हशाब्याह, शेरेब्याह नु कदमीएल आ तौ येशुआम परमप्रभु यावे कली ठेयब सेल्तेक्म। आन लोक्बपुकी परमप्रभु आ मुर दाऊदम देंशो खोदेंशो पा मेको आन आइक्ची गे राप्शा, पालो पा परमप्रभु यावे कली कुम्सो पा ठेयब सेल्तेक्म। मोपा कुम्सो पाइब आन हुल का एर गे नु हुल का ओंथ गे बाक्तेक्म। १इतिहास २५:-; २इतिहास २९:२५
25 मत्तन्याह, बाकबुकीयाह, ओबदिया, मेशुल्लाम, ताल्मोन नु अक्कुब चहिं ठेयब लाप्चो आ नेक्था ङा मार मार वोइक्तीक कोठा ङा लाप्चो खाल पाइब बाक्तेक्म। २इतिहास ८:१४
26 मेको नेल्लेमी योसादाक आ चच, येशुआ आ तौ योयाकीम नु हुकुम पाइब नेहेम्याह नु परमप्रभु यावे आ लोव़ जोक्ब तुइक्ब चढ़ेब एज्रा आ पालामी मोदेंशो गेय पाइब बाक्तेक्म। १इतिहास ५:४०-४१
गारो सेल्ने थुम्शो
27 मिनु यरूसलेम ङा गारो प्रोव़ने थुम्तीक चाड कली लेवी आन कली आन आन बाक्तीक तेइ तेइ रे माल्शा, यरूसलेममी चाक्तेक्म। मारदे चाक्तेक्म देंशा हना, गारो थुम्तीके परमप्रभु यावे आ ङोंइती ग्येरसीशा “गे रिम्शो पाइब ननी” दे ठेयब सेल्तीक कुम्सो पचा नु खैजडी, तार पाइश्शो ठेयब ताप्तीके नु बीना ताप्चा कली चाक्तेक्म।
28 मिनु कुम्सो पाइबपुकी यरूसलेम नु आ एर ओंथ नु नेतोफाह आ मुर आन बाक्तीक रे यरूसलेममी खुम्साक्म।
29 बेथ-गिल्गाल नु गेबा सहर नु अज्मावेथ रे यो जाक्तेक्म। मारदे हना कुम्सो पाइबपुकीमी यरूसलेम आ एर ओंथम आंम आंम कली बाक्तीके सेल्शा बाक्शो बाक्तेक्म।
30 चढ़ेब नु लेवीपुकीमी आंम आंम कली चोव़खो सेल्सीशा, नोले मुर आन कली नु ठेयब लाप्चोपुकी नु गारो आन कली चोव़खो सेल्तेक्म।
गारो थुम्शा चाड मानेशो
31 मिनु गो यहूदा रागी ङा ठेयब मुर आन कली गारो तार ङोइक्पाइक्तामी। परमप्रभु यावे कली ठेयब सेल्ब कुम्सो पाइब आन कली ठेयब हुल निक्शी पा वोइक्ता। हुल का गारो तारी ग्युरा गे पा, मोव़ल लाप्चो गे लाम्तेक्म।
32 मिनु मेको कुम्सो पाइब आन नोले होशायाह नु यहूदा ङा ठेयब मुर आन हुल का लाम्तेक्म।
33 मिनु मेको आन नोले अजारयाह, एज्रा, मेशुल्लाम,
34 यहूदा, बेन्यामीन, शेमायाह नु येरमीया लाम्तेक्म।
35 मिनु चढ़ेब आन तौ का निक्शी तुराही ताप्बपुकी यो मेको आन नोले खोइक्तेक्म। योनाथन आ तौ जकरिया, योनाथन आ आफ शेमायाह, शेमायाह आ आफ मत्तन्याह, मत्तन्याह आ आफ मीकाया नु जाक्कुर आ आफ आसाफ बाक्त।
36 मिनु मेको आ लोक्बपुकी शेमायाह, अजारेल, मिलालाइ, गिलालाइ, माइ, नेथनेल, यहूदा नु हानानी बाक्तेक्म। मेकोपुकीमी परमप्रभु आ मुर दाऊद आ ताप्तीकपुकी ताप्शा गाक्तेक्म। मिनु परमप्रभु यावे आ लोव़ जोक्ब तुइक्ब एज्रा मेको आन ङोंइती गाक्ब बाक्त।
37 मिनु मेकोपुकी ब्वाक्कु बुक्तीक लाप्चो गे लाम्तेक्म। मिनु क्रेसी ङोइश्शा, ग्येत्थ लशा, दाऊद आ सहर ङा गारो ङोइश्शा, दाऊद आ खिं लाक्शा, पूर्ब गे बाक्शो ब्वाक्कु लाप्चो गे लाम्तेक्म।
38 मिनु परमप्रभु यावे कली “गे रिम्शो पाइब बाक्नीनी” दे कुम्सो पाइब आन अर्को हुल चहिं गारो तारी पेरा गे लाम्तेक्म। मिनु गो नु ठेयब मुर आन अर्को हुल मेको आन नोले खोइश्शा, मी मुइक्तीक माइश्शो लाइश्शो खिं लाक्शा, ब्रेम्शो गारो गे लाइतक।
39 मिनु नोले एफ्राइम लाप्चो, माइत गारो ङा ठेयब लाप्चो, ङांइ लाप्चो, हानानेल माइश्शो लाइश्शो खिं, मेआ माइश्शो लाइश्शो खिं लाक्शा, भेडा लाप्चो गे लाइतक। मिनु मेकोपुकी जेल्खान लाप्चोम जाक्दीशा नांइसाक्म।
40 मेकेर जाक्शा, परमप्रभु कली “गे रिम्शो पाइब बाक्नीनी” दे कुम्सो पाइब आन हुल निक्शी परमप्रभु आ खिं आ ङोंइती राप्तेक्म। मिनु गो नु ठेयब मुर आन हुल का यो मेकेर बाक्तक।
41 मिनु चढ़ेब एल्याकीम, मासेयाह, मीन्यामीन, मीकाया, एली-ओ-एनाइ, जकरिया नु हनान्याहमी तुराही ताप्तेक्म।
42 मिनु मासेयाह, शेमायाह, एलाजर, उज्जी, येहो-हानान, माल्कीयाह, एलाम नु एजेर यो मेको नु बाक्तेक्म। मिनु कुम्सो पाइबपुकीमी येज्रायाह कुम्सो पाइब आन कली शेंब नु कुम्सो पाम्तेक्म।
43 मेको नाक्त ठेयब चढ़ेतीक चढ़ेशा, शुश ग्येरशो बाक्तेक्म। मारदे हना परमप्रभुमी मेको आन थुं थाम्पा ग्येरपाइक्तु। मीश मुरपुकी नु आलपुकी यो शुश ग्येरसाक्म। मिनु यरूसलेम ङा मुर आन ग्येरसीशो सेंदा ङोन ङोन सम्म नेंसाक्व।
खाल पाइब आन गेय
44 मिनु मेको नाक्त मार मार वोइक्तीक कोठा खाल पाइब मुर आन कली वोइक्तेक्म। मेकोपुकी मुर आन गेशो चढ़ेशो, ङोंइती सिश्शो मार मार नु १० भाग ङा भाग का चाक्शो ताक्शा साम्चा कली वोइश्शो बाक्तेक्म। मेकोपुकीमी सहर मेर ङा रू रे चढ़ेब नु लेवी आन भाग खुप्शा वोइक्तेक्म। मारदे हना यहूदा ङा मुरपुकीम चढ़ेब नु लेवी आन पशो तशा, दाक्शा, नेल्ल शुश ग्येरसीशो बाक्तेक्म।
45 चढ़ेब नु लेवीपुकीमी परमप्रभु आ देंशो खोदेंशो पा चोव़खेतीक गेय पाम्तेक्म। मिनु कुम्सो पाइब नु लाप्चो खाल पाइबपुकी यो दाऊद नु आ तौ सोलोमनमी देंशो खोदेंशो पा चोव़खेतीके गेय पाइब बाक्तेक्म।
46 मारदे हना दाऊद नु आसाफ आस पालामी कुम्सो पाइब आन कली शेंब का बाक्शो बाक्त। मेना यो परमप्रभु कली ठेयब सेल्तीक नु “गे रिम्शो पाइब बाक्नीनी” दे कुम्सो पाइब बाक्शो बाक्तेक्म। १इतिहास २५:-
47 मिनु इस्राएल ङा मुर नेल्लेमी जेरूब-बाबेल नु नेहेम्याह आस पालामी कुम्सो पाइब नु लाप्चो खाल पाइब आन कली नाक्त किंत किंत ङा माल्शो गेम्तेक्म। लेवी आन भाग वोइक्तेक्म। मिनु लेवीपुकीमी आन ताक्शो रे हारून आ चच युइ आन भाग वोइक्तेक्म। गन्ती १८:२६; नेहेम्याह १०:३९