8
यहूदीपुकीम अधिकार तशो
मिनु मेको नाक्‍त पिप अहासूरसमी यहूदी आन जोरी सत्रु हामान आ खिं पिपीम एस्‍तर कली गेप्‍तु। मारदे हना एस्‍तरमी पिप कली “गो मोरदेकै आ खिं ङा मुर का नङ” दे शेंतीके, मोरदेकै पिप आ बाक्‍तीकेम जाक्‍चा माल्‍ताक्‍व। एस्‍तर २:७ मिनु पिपमी हामान रे रोइश्‍‍शो अधिकार ङा छाप थोक्‍तीक औंठी प्रुइश्‍शा, मोरदेकै कली गेप्‍तु। मिनु एस्‍तरमी मोरदेकै कली हामान आ खिं कली अधिकार पाइब सेल्‍तु। एस्‍तर ३:१०
पिपीम एस्‍तरमी लेंशा पुंइशो
मिनु एस्‍तरमी लेंशा पिप आ खोइलीम बाप्‍शा, ङाक्‍शा नमो सिमो पा “अगाग आ मुर हामानमी यहूदी आन पर्बम ब्रेक्‍शो मरिम्‍शो ब्रेक्‍स क्‍याम्‍शा गेन” दे पुंइतु। मिनु पिपमी आ राज दन्‍ड एस्‍तर गे शुक्‍तु। मिनु एस्‍तर बोक्‍शा, पिप आ ङोंइती राप्‍त। एस्‍तर ४:११; एस्‍तर ५:२ मिनु एस्‍तरमी “पिपम दाक्‍‍नीनी नु गो इन शिशी ताता नु आं देंशो लोव़ गे दाक्‍‍नीनी नु आं देंशो नेंनीनी हना, अगाग आ मुर हम्‍मदाता आ तौ हामानमी इन राज्‍य ङा हुकुम पाइब नेल्‍ल आन कली ‘यहूदी नेल्‍ल आन कली साइक्‍चा’ दे ब्रेक्‍शा सोइश्‍शो ब्रेक्‍स नेल्‍ल क्‍याम्‍चा, दे ब्रेक्‍स का ब्रेक्‍शा सोइक्‍तीन। मारदे हना आं जात नु आं खिं ङा मुरपुकी खतम दुम्‍शो गो दोपा फाल्‍ने चाप्‍नुङा ङा?” देंत। मिनु पिप अहासूरसमी पिपीम एस्‍तर नु यहूदी मोरदेकै कली “हामानमी यहूदी आन कली खतम सेल्‍चा माल्‍तीके, मेको आ खिं पिपीम एस्‍तर कली गेता। मारदे हना हामान क्‍युक्‍शा साइक्‍चा पुंइसाक्‍व। मुल आं नेंमी इन दाक्‍स पा यहूदी आन कली रिम्‍शो दुम्‍चा आ पर्बम नक ब्रेक्‍स का ब्रेक्‍तीन। मिनु मेकोमी आं छाप थोक्‍तीन। मारदे हना पिप आ नेंमी ब्रेक्‍शा, आं छाप थोक्‍शो हुकुम गेनायो क्‍याम्‍ने मचाम्‍सीब” देंत।
मोरदेकै आ सोइश्‍शो ब्रेक्‍स
मिनु सिवान माइश्‍शो ३ महिना ङा २३ नाक्‍तीम पिपम आ ब्रेक्‍स पाइब मुर आन कली ब्रेत्‍ताक्‍मी। मेकोपुकीमी मोरदेकै आ देंशो खोदेंशो पा यहूदी, सरकार ङा गेय पाइब, मान ताइब नु रागी रागी आन कली हुकुम पाइब भारत रे कूश माइश्‍शो एथीयोपीया सम्‍म ङा १२७ ओटा रागी नेल्‍लेमी मुर नेल्‍ल आन ब्रेक्‍स नु आंम आंम लोव़म नु यहूदी आन कली आंम आंम आन ब्रेक्‍स नु आंम आंम आन लोव़म पिप आ अरेशो लोव़ ब्रेक्‍ताक्‍म। 10 मोपा मेको ब्रेक्‍स कली पिप अहासूरस आ नेंमी ब्रेक्‍शा, पिप आ छाप थोक्‍ताक्‍व। मिनु मेको ब्रेक्‍स कली शारा दोरपाइक्‍ब आन कली गेशा, थाम्‍पान दोरपा चोव़थ सोइक्‍ताक्‍म। मेको आन ङोइश्‍शो शारा पिप आ नेल्‍ल क्‍येङा रिम्‍शो शारा बाक्‍तेक्‍म। 11 मेको ब्रेक्‍समी मार ब्रेक्‍शो बाक्‍त देंशा हना “सहर नेल्‍ल ङा यहूदी बुक्‍शा, आंम कली खतम पाइबपुकी रे प्रोंइसीमल। मिनु मेकोपुकीमी तेको तेको जात ङा नु तेको तेको रागी ङा बुक्‍शो मुर, सु सुम आन मीश नु आन आल आन कली श्‍येत गेमे, मेको आन कली काबुमीन क्‍याम्‍चा, साइक्‍चा नु खतम सेल्‍चा कली बुक्‍चा माल्‍नीम। मिनु मेकोपुकीमी श्‍येत गेब मुर आन मारेइ मारेइ रोइक्‍ने चाप्‍नीम। एस्‍तर ३:१३; एस्‍तर ९:७-१०,१५,१६ 12 पिप अहासूरसमी आ रागी नेल्‍लेमी मेको श्‍येत गेब आन कली अदार माइश्‍शो १२ महिना ङा १३ नाक्‍तीम खतम सेल्‍चा माल्‍ब” दे ब्रेक्‍शो बाक्‍त। 13 मिनु मेको ब्रेक्‍स नेल्‍ल रागी ङा मुर आन कली तुइक्‍पाइक्‍चा कली लेंशा मोदेंशोन ब्रेक्‍स ब्रेक्‍शा, उरदी पपाइक्‍चा, दे लोव़ सोइक्‍ताक्‍म। मिनु यहूदी चहिं मेको नाक्‍त आन जोरी सत्रु आन कली क्‍येक्‍क लेत्‍चा कली सासीशा बाक्‍मल, दे यहूदी आन कली अरेशा ब्रेक्‍शा सोइक्‍ताक्‍म। 14 मिनु पिपमी मेको शारा ङोइक्‍ब आन कली आ देंशो लोव़ चोव़थ शारा ङोइक्‍पा थाम्‍पान दोरपाइश्‍शा सोइक्‍ताक्‍व। मिनु मेको लोव़ सुसा दरवार रे योक्‍चा गोम्‍तेक्‍म।
यहूदी आन ग्‍येरतीक नाक्‍त
15 मिनु मोरदेकै पिप आ बाक्‍तीक रे दरवार ङा ठेयब नीलो नु बुश फेक्‍तीक वा फेक्‍शा, पियाजी रङ ङा बरखी रुक्‍शा, पियामी सुन के ठेयब सिरपेच गुप्‍शा, सहर लत। मिनु मोरदेकै कली तशा, सुसा सहर ङा मुरपुकी थाम्‍पान ग्‍येरसाक्‍म। 16 मिनु यहूदी आन कली मेको नाक्‍त आन थुं बारपाइक्‍तीके, शुश ग्‍येरतीके नु मान ततीके नाक्‍त दुम्‍त। 17 मिनु पिप आ ब्रेक्‍स नु आ हुकुम जाक्‍दीशो नेल्‍ल रागी नु सहर नेल्‍लेमी यहूदी साप्‍पा ग्‍येरसाक्‍म। मिनु मेको नाक्‍त चाड सेल्‍शा, भोज जाम्‍तेक्‍म। मिनु मेको रागी ङा शुश मुर यहूदी दुम्‍तेक्‍म। मारदे हना मुर नेल्‍ल यहूदी आन कली तशा हिंतेक्‍म।