29
चढ़ेब आन ङोंइती ङा पतीके
लेवी ८:-
1 गे हारून नु आ तौपुकी आं कली चढ़ेब सेल्चा कली मार पचा माल्नेवे देंशा हना, बोहोर का, मारेइ मदुम्शो थम रिम्शो सांड निक्शी चाक्को।
2 मिनु रिम्शो चेरब फस के बोरब ओख्ती मसुप्शो शोब्ले, तेल ब्वाइश्शो जिज शोब्ले नु तेल ख्रेक्शो बोरब ओख्ती मसुप्शो शोब्ले सेल्पाइक्चा माल्नेवे।
3 मेको शोब्ले नेल्ल तोव़लो कामी कुर पा, बोहोर नु सांड चाक्चा माल्नेवे।
4 मिनु हारून नु आ तौ आन कली ग्रुम्तीक ताम्बु आ ओव़तीकेमी चाक्चा नम। मिनु गे मेको आन कली चिक्चा माल्नेवे।
5 वासी चाक्शा, हारून कली आगा फेक्तीक वा, मेको आ तार ङा फेक्तीके वा फेक्पाइश्शा, कुचु तार वोइक्तीक फेक्शा निसाफ पतीके ऊरीम नु थुम्मीम बाक्शो झोला रेल्चा माल्नेवे। मिनु मेको तारी बुटा आप्शो किप्तीके किप्पाइक्चा माल्नेवे।
6 आ पिया तारी गुक्तीके गुप्शा, मेको तारी ‘परमप्रभु यावे कली ला’ दे ब्रेक्शो कुप्फीम पांइतीके पांइपाइक्चा माल्नेवे। प्रस्थान २८:३६; प्रस्थान ३९:३०
7 मिनु लुक्तीक तेल लाइश्शा आ पियामी तेल लुक्तो। प्रस्थान ३०:२५
8 मिनु हारून आ तौ आन कली यो चाक्शा, वा फेक्चा माल्नेवे।
9 मिनु आ तौ आन कली किप्तीके किप्चा माल्नेवे। मिनु आन पियाम गुक्तीके गुप्चा माल्नेवे। मिनु मेकोपुकी गेना हना यो आं कली चढ़ेब गेय पाइब दुम्नीम। मोपा हारून नु आ तौ आन कली आं कली चढ़ेब सेल्मी। प्रस्थान २८:४१
10 मिनु मेको बोहोर ग्रुम्तीक ताम्बु आ ङोंइती चाक्शा, हारून नु आ तौ आन कली आन गुइ मेको बोहोर आ पिया तारी वोइक्पाइक्चा माल्नेवे।
11 मिनु मेको बोहोर कली परमप्रभु यावे आ ङोंइती, ग्रुम्तीक ताम्बु आ ओव़तीकेम राप्पाइश्शा क्योरचा माल्नेवे। लेवी १:४
12 मिनु बोहोर आ हुश इच्का खोइ लाइश्शा इ ब्रेप्चोमी चढ़ेतीक आ ग्रोव़पुकीमी ख्रेक्चा माल्नेवे। मिनु लीशो हुश नेल्ल चढ़ेतीके आ पुंमी मोइक्चा माल्नेवे।
13 मिनु गे क्यी गिल्शो बोंसो नेल्ल, आइदी तारी ङा जाला, आ चिच निम्फा नु आ तार ङा बोंसो नेल्ल चढ़ेतीकेम चोचा माल्नेवे। लेवी ३:१६-१७
14 आ श्ये, आ कुशुल नु आ गोबर चहिं ताम्बु आ लाङगा रे ग्रुंइशा, चोचा माल्नेवे। मेको पाप पशो आ पर्बम चढ़ेशो बाक्ब। लेवी ४:११-१२
15 मिनु मेको सांड का चाक्शा, हारून नु आ तौ आन गुइ मेको आ पिया तार वोइक्पाइक्चा माल्नेवे।
16 मेको कली क्योरशा, मेको आ हुश चढ़ेतीक नेल्ल ब्रुइक्चा माल्नेवे।
17 मिनु मेको सांड आ श्ये कली टुक्रा टुक्रा पा चेक्शा, पिया नु वोइक्चा माल्नेवे। मिनु मेको आ क्यी नु आ खोइली नेल्ल मुरशा, मेको श्ये नु पियामी वोइक्चा माल्नेवे।
18 मोदेंशो पा सांड नेल्ल चढ़ेतीक तारी चोचा माल्नेवे। मेको परमप्रभु यावे कली चोशा चढ़ेतीक बाक्ब। परमप्रभु यावे कली ब्रोव़शो रिना पाइश्शो मीम चोशा चढ़ेतीके बाक्ब। १सामुएल २:२८
19 मिनु मेको लीशो सांड चाक्चा माल्नेवे। मिनु हारून नु आ तौ आन गुइ मेको सांड आ पिया तार वोइक्पाइक्चा माल्नेवे।
20 मिनु मेको सांड क्योरशा, आ हुशेम हारून आ ग्युरा नोफा ङा लोव़तीम नु आ तौ आन ग्युरा नोफा ङा लोव़तीम ख्रेक्चा माल्नेवे। मिनु मेको आन ग्युरा गुइ ङा ठेयब ब्रेप्चोम नु आन ग्युरा खोइली ङा ठेयब ब्रेप्चोम ख्रेक्चा माल्नेवे। मिनु लीशो हुश चढ़ेतीक तार नु आ एर ओंथ ब्रुइक्चा माल्नेवे।
21 मिनु चढ़ेतीकेम बाक्शो हुश नु लुक्तीक तेल लाइश्शा, हारून नु आ वा नु आ तौ आन वा तारी ब्रुइक्चा माल्नेवे। मोपा हारून नु आ वा, आ तौ नु मेको आन वा नेल्ल परमप्रभु यावे कली ला गेय पचा कली दुम्नीम।
22 मिनु सांड आ बोंसो, आ बोंसो पाइश्शो मीलु, आ क्यी गिल्शो बोंसो, आइदी तार ङा जाला, आ चिच निम्फा, मेको तार ङा बोंसो नु आ ग्युरा फिला लाइक्चा माल्नेवे। मारदे हना मेको चढ़ेब सेल्तीके सांड बाक्ब। लेवी ३:३-४
23 मिनु परमप्रभु यावे आ ङोंइती वोइश्शो बोरब ओख्ती मसुप्शो शोब्ले, तोव़लो ङा शोब्ले का, तेलम ब्वाइश्शो जिज शोब्ले का नु तेल ख्रेक्शो शोब्ले का लाइश्शा,
24 मेको नेल्ल हारून नु आ तौ आन दाइश्शो गुइ गुइमी गेचा माल्नेवे। मेको परमप्रभु यावे आ ङोंइती ग्येत्थ लुक्च पा हिम्शा चढ़ेतीक चढ़ेचा माल्नीम।
25 मिनु गे मेको आन गुइ रे ताक्शा, परमप्रभु यावे आ ङोंइती ब्रोव़शो रिना पाइब चढ़ेतीके तारी चोशा चढ़ेचा माल्नेवे। मेको परमप्रभु यावे कली मीम चोशा चढ़ेतीक बाक्ब।
26 मिनु हारून कली चढ़ेब सेल्तीके सांड आ कुथ्रु चाक्शा, परमप्रभु यावे आ ङोंइती ग्येत्थ लुक्च पा हिम्शा चढ़ेचा माल्नेवे। मेको चहिं इ के दुम्ब।
27 मिनु मेको हारून नु आ तौ आन कली चढ़ेब सेल्शो सांड आ ग्येत्थ लुक्च पा हिम्शा चढ़ेशो कुथ्रु नु क्युक्शा चढ़ेशो फिला मेको आन कली गेचा माल्नीम। गन्ती १८:१८
28 मारदे हना इस्राएलीपुकीमी मेको हारून नु आ तौ आन कली गेना हना यो गेचा माल्शो भाग बाक्ब। मेको गेचा माल्शो चढ़ेतीके बाक्ब। इस्राएलीपुकीमी आन परमप्रभु यावे नु दुशा बाक्चा आ पर्बम चढ़ेतीके रे गेचा माल्शो मेकोन बाक्ब।
29 हारून आ चढ़ेची ना फेक्तीक मेको आ नोले चढ़ेब दुम्ब आ तौ के दुम्ब। मेको वा फेक्शा, तेल लुक्शा, चढ़ेब दुम्ब। प्रस्थान २८:४०-४१
30 हारून आ पा ङा चढ़ेब दुम्ब आ तौ ग्रुम्तीक ताम्बु आगा परमप्रभु यावे आ बाक्तीकेम गेय पथ ओव़मेनु, ७ नाक्त सम्म मेको वा फेक्चा माल्ब।
31 मिनु मेको चढ़ेब सेल्तीके सांड आ श्ये ग्रुम्तीक ताम्बु आ लाङगाम क्येचा माल्नेवे।
32 मिनु नोले हारून नु आ तौपुकीमी मेको सांड आ श्ये नु तोव़लो ङा शोब्ले ग्रुम्तीक ताम्बु आ ओव़तीकेमी बाक्शा जचा माल्नीम।
33 मेको ङोंइती आन पाप क्याम्चा कली चढ़ेशो थोव़क आंम कली परमप्रभु यावे कली ला गेय पाइब दुम्चा, दे जचा माल्नीम। तन्न अरुमी मेको जचा मदुम्नीम। मारदे हना मेको परमप्रभु यावे के बाक्ब। लेवी १०:१७
34 चढ़ेब सेल्ची ना ङा श्ये नु शोब्ले सुनी सम्म हेंत हना, मेको हेंशो नेल्ल चोचा माल्नेवे। मेको मजचा मब्वचा। मारदे हना मेको चढ़ेब सेल्ची ना ङा बाक्ब।
35 गोम इ कली अरेशो खोदेंशो पा हारून नु आ तौ आन कली पाइक्मी। मेको आन कली ७ नाक्त सम्म मोदेंशो चढ़ेब सेल्तीक गेय पचा माल्नेवे।
36 मिनु गे नाक्त किंत किंत बोहोर का पाप पशो आ पर्बम चढ़ेचा माल्नेवे। मेको पाप क्याम्तीक गेय पचा कली चढ़ेशो बाक्ब। मिनु चढ़ेतीक परमप्रभु के दुम्त, दे हुश ब्रुइश्शा, तेल लुक्चा माल्नेवे।
37 गे ७ नाक्त सम्म चढ़ेतीकेमी मो पशा पाप क्याम्तीक गेय पचा माल्नेवे। मिनु मेको चढ़ेतीके परमप्रभु कली ला दुम्ब। मेको चढ़ेतीक कली मार मारम थीनीमी, मेको यो परमप्रभु केन दुम्नीम। प्रस्थान ३०:२९
नाक्त किंत किंत ङा चढ़ेतीक
गन्ती २८:३-८
38 मिनु गे चढ़ेतीकेमी मार चढ़ेचा माल्नेवे देंशा हना, नाक्त किंत किंत बर्स का दुम्शो सांड निक्शी चढ़ेचा माल्नेवे।
39 मेको का सुनी का चहिं नाक्दो चढ़ेचा माल्नेवे। २राजा १६:१५; भजन संग्रह १४१:२
40 ङोंइती ङा सांड नु रिम्शो चेरब फस १० भाग ङा भाग का, ४ भाग ङा हिन भाग का रिम्शो तेल मेको नु बुल्शा, ४ भाग ङा हिन अङगुर शांबु भाग का तूचा थोव़क चढ़ेचा माल्नेवे। चेरब फस एफाह का २२ लिटर खोदेंशो बाक्ब। मेको के १० भाग का २ लिटर खोदेंशो बाक्ब। हिन का ४ लिटर, ४ भाग ङा भाग का लिटर का बाक्ब।प्रस्थान २७:२०
41 मिनु अर्को सांड नाक्दो चढ़ेचा माल्नेवे। मिनु मेको नु अन्न चढ़ेतीक नु आ तूचा थोव़क चढ़ेतीक सुनी ङा खोदेंशो पा नाक्दो यो चढ़ेचा माल्नेवे। परमप्रभु यावे कली ब्रोव़शो रिना पाइब मीम चोशा चढ़ेतीके मेकोन बाक्ब।
42 गे इ चच युइ आन पाला नेल्लेमी गेना हना यो परमप्रभु यावे आ ङोंइती ग्रुम्तीक ताम्बु आ ओव़तीक आ नेक्था चोशा चढ़ेतीक चढ़ेचा माल्नीम। मेकेर गो गे नु लोव़ पचा कली ग्रुम्नन। प्रस्थान ३३:७; प्रस्थान २५:२
43 मिनु गो इस्राएली आन कली मेकेर ग्रुम्नुङ। मिनु मेको ताम्बु आं छेङछेङम ब्रीशा आं के दुम्ब। प्रस्थान ३३:१०; प्रस्थान ४०:३४
44 गो ग्रुम्तीक ताम्बु नु चढ़ेतीक आं के सेल्नुङ। हारून नु आ तौ आन कली यो आं कली चढ़ेब दुम्शा, आं गेय पपाइक्चा कली आं के सेल्नुङमी।
45 गो इस्राएली आन दातेमी बाक्नुङ। मिनु मेको आन परमप्रभु दुम्ती। प्रस्थान २५:८; जकरिया २:१४; लेवी २६:१२
46 गो मेको आन दातेमी बाक्चा कली मेको आन कली इजीप्त रे ग्रुंइब मेको परमप्रभु यावे, आन परमप्रभु नङ। गो मेको आन परमप्रभु यावे नङ, दे मेकोपुकीम तुइक्चा माल्नीम। प्रस्थान २०:२