30
धूप चोशा चढ़ेतीके
प्रस्थान ३७:२५-२८
1 मिनु गे धूप चोचा कली बोल्यो शी के चढ़ेतीक का सेल्चा माल्नेवे।
2 मेको आ पित्थ लाइश्शो कुबीत का नु आ ब्रेम्शो कुबीत का ङा ४ पाटे दुम्चा माल्ब। मिनु आ ग्येत्थ लाइश्शो कुबीत निक्शी दुम्चा माल्ब। मेको ग्रोव़ पाइश्शो दुम्चा माल्ब। ग्रोव़ नेल्ल मख्रोंइसीशो शी का केन दुम्चा माल्नीम। कुबीत का ०.५ मिटर बाक्ब।
3 मेको नेल्ल क्येख सुनमी गिल्चा माल्ब। मिनु मेको कली सिरपेच के खोदेंशो पा सुन के सुर सेल्पाइक्चा माल्नेवे।
4 मिनु सुन के मुन्द्रा निक्निक्शी सेल्पाइक्चा माल्नेवे। मेको मुन्द्रा धूप चोतीके आ सिरपेच खोदेंशो सुर आ दी निम्फा पटटी गे क्येप्पाइक्चा माल्नेवे। मेको कुरतीक कोक्के आन कली शुइक्तीक दुम्ब।
5 मिनु मेको कुरचा कली बोल्यो शी के कोक्के निक्शी सेल्शा, सुनमी गिल्पाइक्चा माल्नेवे।
6 मिनु मेको परमप्रभु यावे आ अरेशो लोव़ वोइश्शो कबल पशो सन्दोस नु सुम्तीके फारतीक वा आ ङोंइती वोइक्चा माल्नेवे। गो मेकेर इ कली ग्रुम्नुङ। प्रस्थान २५:२१-२२
7 मिनु हारूनमी सुनी कुस कुस बत्ती दाचा कली सादानु, ब्रोव़शो रिना पाइब धूप चोचा माल्ब। भजन संग्रह १४१:२
8 नाक्दो हारूनमी बत्ती दाङानु यो धूप चोचा माल्ब। मेको परमप्रभु यावे आ ङोंइती धूप चोतीक मेको आन चच युइ आन पालामी गेना हना यो पचा माल्नीम।
9 मेको धूप चोतीकेमी अरु धूप चोचा मदुम्ब। चोशा चढ़ेतीके नु जचा थोव़क चढ़ेतीके मेकेर चढ़ेचा मदुम्ब। तूचा थोव़क चढ़ेतीके यो मेकेर मोइक्चा मदुम्ब। लेवी १०:१-२
10 बर्सम खेयप का हारूनमी चढ़ेतीक आ ग्रोव़म हुश ख्रेक्शा पाप क्याम्तीक गेय पचा माल्ब। मेको हुश पाप आ पर्बम चढ़ेशो बस्तु आ हुश बाक्चा माल्ब। मेको गेना हना यो बर्समी खेयप का इन चच युइ आन पाला सम्म मेको पाप क्याम्तीक गेय चढ़ेतीके आ हुशेमी पचा माल्ब। मेको परमप्रभु यावे आ ङोंइती नेल्ल क्येङा चोव़खो सेल्तीके बाक्ब” दे परमप्रभु यावेमी मोसा कली देंत। लेवी १६:१८
क्येट पोक्चा शेंशो
11 परमप्रभु यावेमी मोसा कली
12 “गे इस्राएली वोंइश मुर आन कली हिक्गीनु, मेको आन कली मुर बेक्तीक रोइ मपामेक्ल, दे ब्रोंइचा कली नेल्लेमी परमप्रभु यावे कली क्येट गेचा माल्नीम। मिनु मेको आन कली हिक्शोनु, मारेइ मरिम्शो मदुम्ब। गन्ती १:३; २सामुएल २४:२-३
13 गिश जना वोंइश मुर हिक्सीनीमी, मिश जना ताम्बु ङा नाक्तीके ङा आधा शेकेल गेचा माल्नीमी। शेकेल का २० गेराह चांदी बाक्नीम। मोपा परमप्रभु यावे कली गेशो क्येट आधा शेकेल गेचा माल्शो बाक्ब। शेकेल का ११.५ ग्राम खोदेंशो बाक्ब। गेरा का ०.६ ग्राम बाक्ब।मत्ती १७:२७
14 वोंइश मुर गिश जना २० बर्स गाप्शो नु मेको क्येङा लाक्शो बाक्मा, मिश जनाम परमप्रभु यावे कली गेचा माल्शो चढ़ेचा माल्नीम।
15 इन पाप क्याम्तीक गेय पचा कली थीबमी आधा शेकेल, मथीबमी यो आधा शेकेल परमप्रभु यावे कली गेचा माल्नीनी।
16 इस्राएली वोंइश मुरुमी आन गेशो प्रोंइतीक क्येट ताक्शा, ग्रुम्तीक ताम्बु ङा गेय पचा कली गेचा माल्नेवे। मिनु मेको क्येट परमप्रभु यावे आ ङोंइती इस्राएली आन कली प्रोंइशो मिम्तीक चिन्ड दुम्ब” देंत।
चिक्तीक ठेयब बोस
17 मिनु लेंशा परमप्रभु यावेमी मोसा कली
18 “गे चिक्चा कली कांसा के ठेयब बोस का सेल्पतो। मेको आ निप्पाइक्तीके यो कांसा केन दुम्चा माल्ब। मेको ग्रुम्तीक ताम्बु नु चढ़ेतीक आस दातेमी वोइश्शा, ब्वाक्कु कुर पपाइक्चा माल्नेवे। प्रस्थान ३८:८
19 मेको ब्वाक्कुमी हारून नु आ तौपुकीमी आन गुइ खोइली चिक्सीचा माल्नीम।
20 मेकोपुकी मबेक्कल, दे ग्रुम्तीक ताम्बुम ओव़चा क्येङा ङोंइती चिक्सीचा माल्नीम। मिनु चढ़ेतीकेमी गेय पचा, दे परमप्रभु यावे आ ङोंइती मीम चोशा चढ़ेतीक चढ़ेचा कली लमानु, मेको ब्वाक्कुम चिक्सीचा माल्नीम। ब्वाक्कुम चिक्सीमानु, मेको मबेक्नीम।
21 मेकोपुकी नु आन चच युइ आन पाला नेल्लेमी गेना हना यो पतीके लोव़ बाक्ब” देंत।
ताम्बु ङा लुक्तीक तेल
22 मिनु लेंशा परमप्रभु यावेमी मोसा कली
23 “गेमी शुश क्येट लाइब ब्रोव़शो रिना पाइब थोव़क चाक्चा माल्नेवे। मार चाक्चा माल्नेवे देंशा हना, मूरे आ रस ५ सहे शेकेल, दाल चिनी सहे निक्शी ५० शेकेल नु ब्रोव़शो रिना पाइब बोच सहे निक्शी ५० शेकेल चाक्चा माल्नेवे। शेकेल का ११.५ ग्राम चांदी के क्येट बाक्ब। ताम्बु ङा शेकेल चहिं १२ ग्राम बाक्ब।
24 नु कस्सीया माइश्शो ब्रोव़शो रिना पाइब फू ५ सहे शेकेल, ताम्बु ङा नाक्तीकेमी नाक्शा, चाक्चा माल्नेवे। रिम्शो तेल हिन का यो चाक्चा माल्नेवे। हिन का ४ लिटर खोदेंशो बाक्ब।
25 मेको नेल्ल ब्वाइश्शा थम रिम्शो लुक्तीक तेल सेल्पाइक्चा माल्नेवे। मेको परमप्रभु यावे कली ला बाक्ब। मेको ब्रोव़शो रिना पाइब सेल्स जोक्ब मुर कली सेल्पाइक्चा माल्नेवे। मेको थम रिम्शो लुक्तीक तेल ताम्बु कली ला सेल्चा माल्ब। प्रस्थान ३७:२९
26 मिनु गे ग्रुम्तीक ताम्बु नु कबल पशो सन्दोस,
27 टेबल नु मेकेर ङा मार मार नेल्ल, बत्ती दातीके नु मेको आ मार मार नेल्ल नु धूप चोशा चढ़ेतीके,
28 चोशा चढ़ेतीके नु मेको आ मार मार नेल्ल नु चिक्तीके ठेयब बोस नु आ निप्पाइक्तीके नेल्ल ख्रेक्पाइक्चा माल्नेवे। प्रस्थान ३०:१०
29 मोपा मेको मारेइ मारेइ नेल्ल ख्रेक्तीनु, मेको ताम्बु ङा गेय कली ला दुम्नीम। मेको कली मार मारम थीनीमी, मेको यो परमप्रभु कली दुम्नीम।
30 आं कली चढ़ेब दुम्ब हारून नु आ तौ आन कली यो तेल ख्रेक्शा, आं गेय पाइब सेल्चा माल्नेवे। प्रस्थान २९:७
31 इस्राएली आन कली ‘मेको गेना हना यो इन चच युइ आन पाला सम्म लुक्तीक तेल दुम्चा माल्ब। मेको तेल परमप्रभु यावे के ला बाक्ब।
32 मेको अरु मुर आन कली ख्रेक्चा मदुम्ब। मेको खोदेंशो पा ब्वाइश्शा तेल सेल्चा मदुम्ब। मेको परमप्रभु आ तेल ला बाक्ब’ दे मिम्चा माल्नीनी।
33 सुमी मेको खोदेंशो पा ब्वाइश्शा तेल सेल्बा नु अरु मुर आन कली ख्रेक्बा, मेको मुर आ थर रे तिल्चा पुंइसीब” दे परमप्रभु यावेमी मोसा कली देंत।
धूप सेल्चा शेंशो
34 मिनु परमप्रभु यावेमी मोसा कली “ब्रोव़शो रिना पाइब थोव़क मार ब्वाइक्पाइक्चा माल्नेवे देंशा हना, चोव़क, कुन्दापुरी, ब्रोव़शो रिना पाइब रवा आ दूध नु मारेइ मब्वाइश्शो मूरे, उइक्थ उइक्थ पा नाक्शा ब्वाइक्पाइक्चा माल्नेवे।
35 जोक्ब मुरुम मेको नेल्ल ब्वाइश्शा, ब्रोव़शो रिना पाइब धूप, हिक्सी सुप्शा, अरु मब्वाइश्शो परमप्रभु कली ला चढ़ेतीक धूप सेल्पाइक्चा माल्नेवे।
36 मेको रे इच्का खोइ तुप्शा, फस सेलो। मिनु मेको फस ग्रुम्तीक ताम्बु ङा नेल्ल क्येङा चोव़खो कोठा कबल पशो सन्दोस आ ङोंइती वोइश्शा, मेको फस चोचा माल्नेवे। मेको इन कली नेल्ल क्येङा चोव़खो दुम्ब। मेकेर गो इ कली ग्रुम्नुङ। प्रस्थान ३०:६
37 इन कली धूप सेल्नीनु, आं धूप खोदेंशो पा मसेलीन। ‘मेको धूप परमप्रभु यावे आं धूप ला बाक्ब’ दे मिम्चा माल्नीनी।
38 सुइमी मेको नाम्चा कली सेल्तेक्म हना, मेको आन थर रे तिल्चा पुंइसीनीम” दे परमप्रभु यावेमी मोसा कली माइक्तु।