5
मोसा नु हारून आस लोव़
1 मिनु नोले मोसा नु आ लोक्ब हारून फाराओ ग्रुम्थ लाम्ताक्स। मिनु मेको कली “परमप्रभु यावे, इस्राएली आन परमप्रभुमी आंस कली लोव़ पाप्तु। मेकोमी ‘आं मुर आन कली गोरशो रागीमी आं पर्बम चाड मानेचा कली लचा गेवो’ दे परमप्रभु यावेमी इन कली देंशो बाक्ब” देंताक्स। प्रस्थान ३:१८; प्रस्थान ७:१६,२६; प्रस्थान ९:१,१३
2 मिनु फाराओमी “परमप्रभु यावे सु बाक्म, गो मतुइक्नुङ। मार, आ देंशो लोव़ टिचा माल्नुङा? गो इस्राएली आन कली मारदे लचा गेनुङा? गो परमप्रभु यावे कली मतुइक्नुङ। मोपतीके इस्राएल ङा मुर, इन कली लचा मगेनन्नी” देंत।
3 मिनु मेको निक्शीमी “हिब्रू मुर आन परमप्रभुमी आंस कली ग्रुम्तु। आंइ कली लचा गेने, दे पुंइनस्कु। गोपुकी रोइमी, लडाइमी मबेक्कल, दे परमप्रभु यावे, आंइ परमप्रभु कली चढ़ेथ नाक्त सां सम्म गोरशो रागीम लचा गेने” दे माइक्ताक्स।
4 मिनु इजीप्त ङा पिपम मेको आस कली “मोसा नु हारून, गे मारदे मुर आन कली आन गेय क्योल्चा माल्नीसी? इस गेय पथ लस” देंत।
इस्राएली आन कली श्येत गेशो
5 मिनु फाराओमी लेंशा “नेनीस, इस जात ङा मुर शुश दुम्तेक्म। गे मेको आन कली आन गेय रे नाइक्चा गेचा माल्सी?” दे मोसा नु हारून आस कली हुइक्ताक्व। प्रस्थान १:७,१२
6 मोपतीके मेको नाक्ती रे फाराओमी गेय पपाइक्ब ठेयब मुर नु कोव़ब मुर आन कली
7 “मुल रे इस्राएली आन कली इंटा सेल्चा कली पराल मगेचा, आंमा गुप्थ लचा माल्नीम।
8 तन्न इंटा चहिं ङोंइती दोशो सेल्मे, मुल यो मोशोन सेल्चा माल्नीमी। मिनु आन गेय ङोंइती पशो खोदेंशो पा पचा माल्नीम। मारदे हना आन गेय मबाक्मेनु, मेकोपुकीमी ‘गोपुकी गोरशो रागीम आंइ परमप्रभु कली चढ़ेचा दाक्नीकी’ दे लोव़ पशा ग्रीनीम।
9 मेको मुर आन कली शुश गेय पपाइश्शा श्येत गेचा माल्नीनी। मेकोपुकीम गेय पा बाक्मानु, दूली लोव़ मनेंनीम” दे आ मुर आन कली देंमाक्त।
10 मिनु इस्राएली आन कली गेय पपाइक्बपुकी नु कोव़बपुकीमी मुर आन कली “फाराओमी ‘इन कली पराल मगेनुङ’ देंशो बाक्ब।
11 मोपतीके ते खुप्ने चाप्नीनी, मेक ङा खुप्तीन। इंटा चहिं ङोंइती दोशो सेल्नी, मुल यो मोशोन सेल्चा माल्नीनी” दे मदमे बाक्त।
12 मोपा मेकोपुकी इजीप्त रागीमी पराल मथित्तीके पराल के ठुटा गुप्थ ब्रशा गाक्मा बाक्त।
13 गेय पपाइक्बपुकीमी “पराल गेशो नाक्त दोशो इंटा सेल्नी, मुल यो मोशोन सेल्चा माल्नीनी” दे शुश गेय पपदमे बाक्त।
14 फाराओ आ गेय पपाइक्ब इस्राएली कोव़बपुकी यो वोइश्शो बाक्मा बाक्त। मेको आन कली तुप्शा “ङोंइती ङा खोदेंशो पा सिनाक्ती मुलाक्ती इंटा मारदे मसेल्नी?” दे इस्राएली कोव़ब आन कली हुइक्तमे बाक्त।
15 मिनु इस्राएली कोव़बपुकीमी फाराओ कली “मारदे इन वाइल आन कली ओदेंशो मरिम्शो पाइनीनी?
16 इन वाइल आन कली पराल मगेथु ‘इंटा सेलीने’ दे हुइक्नीनी। मेको ला ममाइ, इन मुरपुकीमी आंइ कली तुप्नीम। गे इन रागी ङा मुर आन कली मरिम्शो पपाइक्नीनी” देंमा बाक्त।
17 मिनु फाराओमी “गे अल्सेपुकी, थम अल्से दुम्तीनी। मोपतीके गे ‘आंइ कली परमप्रभु यावे कली चढ़ेथ लचा गेने’ देंतीनी।
18 मुल गेय पथ लने। पराल मगेंसीब, इंटा चहिं ङोंइती दोशो सेल्नी, मोशोन सेल्चा माल्नीनी” देंमाक्त।
19 मिनु इस्राएली कोव़बपुकीमी “इं कली मरिम्शो पशा, शुश श्येत गेनीम” दे तुइक्तमे बाक्त। मारदे हना “ङोंइती नाक्त किंत किंत दोशो इंटा सेल्नी, मुल यो मोशोन सेल्चा माल्नीनी” देंशो बाक्मा बाक्त।
20 मिनु फाराओ आ बाक्तीके रे लमानु, मेकोपुकीमी लांमी रिम्शा बाक्शो मोसा नु हारून आस कली ग्रुम्तेक्म।
21 मिनु मेको कोव़बपुकीमी “परमप्रभु यावेमी इस कली सजाइ गेवल। मारदे हना गे निक्शीमी फाराओ नु आ मुर आन ङोंइती आंइ कली मरिम्शो सेल्तीसी। आंइ कली साइक्चा, दे तरवार आन गुइमी गेतीसी” दे गाइश्शा हुइक्ताक्म।
22 मिनु मोसा परमप्रभु यावे आ नेक्था लशा “परमप्रभु, मारदे गे इन मुर आन कली मरिम्शो पाइनीनी? आं कली मारदे एक सोइक्तीनी?
23 गो इन नेंमी फाराओ नु लोव़ पङा नोले, मेकोमी इन मुर आन कली ङोंइती क्येङा शुश श्येत गेप्तु। गे चहिं इन मुर आन कली मप्रोंइनी” देंत।