7
मोसामी चिन्ड कोंइशो
1 परमप्रभु यावेमी मोसा कली “नेनो, गो इ कली फाराओ आ ङोंइती परमप्रभु खोदेंशो पा चिन्ड कोंइने चाप्ब सेल्तन। इ लोक्ब हारून चहिं इ लोव़ पाइब दुम्ब। प्रस्थान ४:१६
2 गो इ कली मार मार माइक्ना, गे मेको देंचा माल्नेवे। मिनु इ लोक्ब हारूनमी ‘इस्राएली आन कली इन रागी रे लचा गेन’ दे फाराओ कली देंचा माल्ब।
3 तन्न गो फाराओ कली काइ मटीब सेल्नुङ। मिनु गो इजीप्त रागीमी शुश चिन्ड नु छक लाक्चा ङा गेय कोंइनुङ। प्रस्थान ४:२१
4 मिनु फाराओमी इस कली मटीब। मिनु गो इजीप्त ङा मुर आन कली थाम्पान सजाइ गेशा, आं शुश मुर आन कली इजीप्त रागी रे ग्रुंइनुङ।
5 गो इजीप्त ङा मुर आन कली थाम्पान सजाइ गेशा, इस्राएली आन कली आन दाते रे ग्रुंइदुनु ‘गो परमप्रभु यावे नङ’ दे इजीप्त ङा मुर आन कली तुइक्पाइक्नुङ” देंत। प्रस्थान ७:१७; प्रस्थान ८:१८; प्रस्थान ९:२९; १सामुएल १७:४६; १राजा २०:२८; २राजा १९:१९; इजीकीएल २९:६
6 मिनु मोसा नु हारूनमी परमप्रभु यावे आ देंशो पाम्ताक्से।
7 मोपा फाराओ नु लोव़ पची ना, मोसा ८० बर्स दुम्शो बाक्त। हारून ८३ बर्स दुम्शो बाक्त।
कोक्के ब्वारशा बुस्स दुम्पाइश्शो
8 मिनु परमप्रभु यावेमी मोसा नु हारून आस कली
9 “फाराओमी इस कली ‘छक लाक्चा ङा चिन्ड कोंइदीसे’ देंमेनु, गेमी हारून कली ‘इ कोक्के बुस्स दुम्पाइक्चा कली फाराओ आ ङोंइती ब्वारदो’ देंचा माल्नेवे। मिनु मेको कोक्के बुस्स दुम्ब” देंत। प्रस्थान ४:३
10 मोपा मोसा नु हारूनमी परमप्रभु यावे आ देंशो पशा, फाराओ आ बाक्तीकेमी लाम्ताक्स। मिनु हारूनमी आ कोक्के फाराओ नु आ गेय पाइब मुर आन ङोंइती ब्वारताक्व। मिनु मेको कोक्के बुस्स दुम्त।
11 मिनु फाराओमी इजीप्त रागी ङा जादू नु टुना मुना पाइब आन कली ब्रेत्ताक्मी। मेकोपुकीमी यो आन टुना मुनामी हारून खोदेंशो पा आन कोक्के ब्वारशा, बुस्सपुकी सेल्तेक्म। प्रस्थान ७:२२; प्रस्थान ८:३; उत्पत्ती ४१:८; २तिमोथी ३:८
12 तन्न हारून आ कोक्के रे दुम्शो बुस्सुमी मेको आन कोक्के रे दुम्शो बुस्स नेल्ल आन कली दाक्तीमी।
13 मिनु परमप्रभु यावेमी देंशो खोदेंशो पा फाराओ काइ मटीब दुम्शा, मोसा नु हारून आस देंशो लोव़ मबिस्से। प्रस्थान ४:२१
ब्वाक्कु नेल्ल हुश सेल्शो
14 मिनु परमप्रभु यावेमी मोसा कली “फाराओ काइ मटीब दुम्त। आं मुर आन कली लचा मगेब।
15 गे दीसा सुनी फाराओ ग्रुम्थ लचा माल्नीसी। फाराओ ब्वाक्कु आ नेक्था लमेनु, गे मेको आ क्येङा ङोंइती खोला आ नेक्था जाक्दीश्शा, रिम्शा बाक्चा माल्नीसी। बुस्स दुम्ब कोक्के यो लाइक्चा माल्नीसी।
16 मिनु गे मेको कली ‘परमप्रभु यावे, हिब्रू मुर आन परमप्रभुमी इन कली, आं मुर आन कली आं कली चढ़ेतीक चढ़ेथ गोरशो रागी लचा गेवो, देंती। तन्न गे मुल सम्म आं लोव़ मटिवी’ देंत” देनीस। प्रस्थान ५:१
17 मोपतीके परमप्रभु यावेमी “गो परमप्रभु यावे नङ। गे आं पतीकेमी तुइक्नेवे। गो आं कोक्केमी नील खोला ङा ब्वाक्कु तुप्नुङ। मिनु मेको हुश दुम्ब। प्रस्थान ४:९
18 मिनु खोला ङा ङांइ नेल्ल बेक्नीम। खोला शुश राक्शो रिना पाइब। मिनु इजीप्त ङा मुरपुकी मेको ब्वाक्कु तूचा ग्रांग्रा दीनीम” दे मोसा कली देंत।
19 मिनु परमप्रभु यावेमी मोसा कली “गेमी हारून कली ‘इ कोक्के इजीप्त रागी ङा ब्वाक्कु हुश दुम्पाइक्चा कली ब्वाक्कु तारी दिंदो। नादी, खोला, कुवा नु इनार आन तारी दिंदो। मुर आन चाक्शो ठेका नु गरम बाक्शो ब्वाक्कु यो हुश दुम्ब’ दे हारून कली देनो” देंत। प्रकाश ११:६
20 मिनु परमप्रभु यावेमी मोसा नु हारून कली दोदेंशो देंमे, मोदेंशो पाम्ताक्स। मोसामी फाराओ नु आ गेय पाइब आन ङोंइती आ कोक्के खोला ङा ब्वाक्कु तार दिंशा तुबानु, हुश दुम्त।
21 मोपा नील खोला ङा ङांइ नेल्ल बेक्तेक्म। मिनु ब्वाक्कु राक्शो रिना पाइश्शो दुम्त। इजीप्त रागी ङा मुर नेल्लेमी नील खोला ङा ब्वाक्कु तूने मचबेम। इजीप्त रागी नेल्ल हुशेइ हुश दुम्त।
22 इजीप्त रागी ङा ठेयब टुना मुना पाइबपुकीमी यो आन मन्तरमी आस पशो खोदेंशो पाम्तेक्म। फाराओ आ थुं चहिं ङोंइती ङा खोदेंशो पा काइ मटीब दुम्माक्त। मिनु मोसा नु हारून आस देंशो मटिवो। परमप्रभु यावेमी ङोंइती दोदेंशो देंमे, मोदेंशो दुम्त। प्रस्थान ७:११
23 मिनु फाराओ आ खिं लेम्माक्त। मार दुम्मे, मारेइ ममिम्ता बाक्त।
24 इजीप्त रागी ङा मुरपुकीमी नील खोला आ नेक्था शुश कुवा दोम्तेक्म। मारदे हना नील खोला ङा ब्वाक्कु काइ तूचा मदुम।
25 मोपा परमप्रभु यावेमी नील खोला ङा ब्वाक्कु तुप्शा, हुश दुम्शो ७ नाक्ती दुम्त।